ଭୁବନେଶ୍ବର: ସାଇବର ଅପରାଧ ଏବଂ ଆର୍ଥିକ ଠକେଇରେ ଟେଲିକମ୍ ସମ୍ବଳର ଅପବ୍ୟବହାରକୁ ରୋକିବା ପାଇଁ ଦୂରସଞ୍ଚାର ବିଭାଗର ‘ଡିଜିଟାଲ ଇଣ୍ଟେଲିଜେନ୍ସ ପ୍ଲାଟଫର୍ମ (ଡିଆଇପି)’ ଏବଂ ‘ଚକ୍ଷୁ’ ବ୍ୟବସ୍ଥାର ଶୁଭାରମ୍ଭ ହୋଇଛି । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଯୋଗାଯୋଗ ରାଷ୍ଟ୍ରମନ୍ତ୍ରୀ ଦେବୁସିଂହ ଚୌହାନଙ୍କ ଉପସ୍ଥିତିରେ ଏହାର ଶୁଭାରମ୍ଭ କରିଛନ୍ତି । ତେବେ ଏହି ଉପକରଣ ଗୁଡ଼ିକ ନାଗରିକମାନଙ୍କୁ ସନ୍ଦେହଜନକ ଠକେଇ ଯୋଗାଯୋଗକୁ ସକ୍ରିୟ ଭାବରେ ରିପୋର୍ଟ କରିବାକୁ ସଶକ୍ତ କରିବା ପାଇଁ ଅଗ୍ରଣୀ ପଦକ୍ଷେପ ନିଆଯାଉଛି ।
ଏହି ଅବସରରେ ମନ୍ତ୍ରୀ କହିଛନ୍ତି, "ସୁରକ୍ଷିତ ଭାରତ ପ୍ରକଳ୍ପ ଅଧୀନରେ ସାଇବର ଠକେଇକୁ ରୋକିବା ପାଇଁ ଜାତୀୟ, ସାଂଗଠନିକ ଓ ବ୍ୟକ୍ତିଗତ ୩ଟି ସ୍ତରରେ ସରକାର ନିରନ୍ତର ପ୍ରୟାସ ଜାରି ରଖିଛନ୍ତି । ନାଗରିକମାନେ ଯେପରି ସେମାନଙ୍କ ଅଭିଯୋଗର ସମାଧାନ କରିବା ସହ ସାଇବର ଠକେଇରୁ ନିଜକୁ ରକ୍ଷା କରିପାରିବେ ସେଥିପାଇଁ ସଚେତନତା ସୃଷ୍ଟି କରିବା ପାଇଁ ଟେଲି ଯୋଗାଯୋଗ ବିଭାଗ ଅନେକ ପଦକ୍ଷେପ ନେଇଛି ।" ଏ ସଂକ୍ରାନ୍ତରେ 'ସଂଚାର ସାଥୀ' ପୋର୍ଟାଲ ବିଷୟରେ ମନ୍ତ୍ରୀ କହିଛନ୍ତି, "ଏହା ଏଭଳି ଆକ୍ରମଣର ସଫଳ ମୁକାବିଲା କରିବାରେ ସହାୟକ ହୋଇଛି । ଆଜିର ଦୁଇଟି ପୋର୍ଟାଲ ଡିଆଇପି ଓ ଚକ୍ଷୁକୁ ମିଶାଇ ଏହି ଉପକରଣ ଯେକୌଣସି ପ୍ରକାର ସାଇବର ସୁରକ୍ଷା ବିପଦକୁ ନିୟନ୍ତ୍ରଣ କରିବାର କ୍ଷମତା ଓ ଦକ୍ଷତାକୁ ଆହୁରି ବୃଦ୍ଧି କରିବ ।"
ଡିଜିଟାଲ ଇଣ୍ଟେଲିଜେନ୍ସ ପ୍ଲାଟଫର୍ମ (ଡିଆଇପି): ଦୂରସଞ୍ଚାର ବିଭାଗ ଦ୍ୱାରା ବିକଶିତ ଡିଜିଟାଲ ଇଣ୍ଟେଲିଜେନ୍ସ ପ୍ଲାଟଫର୍ମ (ଡିଆଇପି) ରିଅଲ ଟାଇମ୍ ଇଣ୍ଟେଲିଜେନ୍ସ ସେୟାରିଂ, ସୂଚନା ଆଦାନ ପ୍ରଦାନ ଏବଂ ଅଂଶୀଦାରଙ୍କ ମଧ୍ୟରେ ସମନ୍ୱୟ ପାଇଁ ଏକ ସୁରକ୍ଷିତ ଏବଂ ସମନ୍ୱିତ ପ୍ଲାଟଫର୍ମ । ଯଥା ଟେଲିକମ୍ ସେବା ପ୍ରଦାନକାରୀ (ଟିଏସ୍ପି), ଆଇନ ପ୍ରବର୍ତ୍ତନକାରୀ ଏଜେନ୍ସି (ଏଲଇଏ), ବ୍ୟାଙ୍କ ଏବଂ ଆର୍ଥିକ ଅନୁଷ୍ଠାନ (ଏଫଆଇ), ସୋସିଆଲ ମିଡିଆ ପ୍ଲାଟଫର୍ମ, ପରିଚୟ ଦସ୍ତାବିଜ ପ୍ରଦାନକାରୀ କର୍ତ୍ତୃପକ୍ଷ ଇତ୍ୟାଦି । ଏହି ପୋର୍ଟାଲରେ ଟେଲିକମ୍ ସମ୍ବଳର ଅପବ୍ୟବହାର ଭାବେ ଚିହ୍ନଟ ହୋଇଥିବା ମାମଲା ସମ୍ପର୍କରେ ମଧ୍ୟ ସୂଚନା ରହିଛି । ଅଂଶୀଦାର ହୋଇଥିବା ସୂଚନା ନିଜ ନିଜ କ୍ଷେତ୍ରରେ ଅଂଶୀଦାରମାନଙ୍କ ପାଇଁ ଉପଯୋଗୀ ହୋଇପାରିବ ।
ସଞ୍ଚାର ସାଥୀ ପୋର୍ଟାଲରେ ଚକ୍ଷୁ ସୁବିଧା: ଚକ୍ଷୁ ହେଉଛି ଡିଓଟିର ସଂଚାର ସାଥୀ ପୋର୍ଟାଲରେ ପୂର୍ବରୁ ଉପଲବ୍ଧ ନାଗରିକ କେନ୍ଦ୍ରିକ ସୁବିଧାର ସଦ୍ୟତମ ସଂଯୋଜନ । ଚକ୍ଷୁ ନାଗରିକମାନଙ୍କୁ କେୱାଇସି ଅବଧି ଶେଷ କିମ୍ବା ବ୍ୟାଙ୍କ ଆକାଉଣ୍ଟ/ ପେମେଣ୍ଟ ୱାଲେଟ / ସିମ୍ / ଗ୍ୟାସ୍ ସଂଯୋଗ / ବିଦ୍ୟୁତ ସଂଯୋଗ ଅପଡେଟ୍ କରିବା, ସେକ୍ସୋର୍ସନ, ଟଙ୍କା ପଠାଇବା ପାଇଁ ସରକାରୀ ଅଧିକାରୀ ଭାବେ / ସମ୍ପର୍କୀୟ ପରିଚୟ ଦେଇ ଠକିବା, ଦୂରସଂଚାର ବିଭାଗ ଦ୍ୱାରା ସମସ୍ତ ମୋବାଇଲ ନମ୍ବର ବିଚ୍ଛିନ୍ନ କରିବା ଇତ୍ୟାଦି ଠକେଇ ଉଦ୍ଦେଶ୍ୟରେ କଲ୍, ଏସ୍ଏମ୍ଏସ୍ କିମ୍ବା ହ୍ଵାଟ୍ସଆପ୍ ମାଧ୍ୟମରେ ପ୍ରାପ୍ତ ସନ୍ଦିଗ୍ଧ ଠକେଇ ସମ୍ପର୍କରେ ସୂଚନା ଦେବାର ସୁବିଧା ପ୍ରଦାନ କରିଥାଏ । ଯଦି କୌଣସି ନାଗରିକ ପୂର୍ବରୁ ସାଇବର କ୍ରାଇମ କିମ୍ବା ଆର୍ଥିକ ଠକେଇର ଶିକାର ହୁଅନ୍ତି, ତେବେ ସାଇବର କ୍ରାଇମ ହେଲ୍ପଲାଇନ ନମ୍ବର ୧୯୩୦ କିମ୍ବା ଭାରତ ସରକାରଙ୍କ https://www.cybercrime.gov.in ୱେବସାଇଟରେ ରିପୋର୍ଟ କରିବାକୁ ପରାମର୍ଶ ଦିଆଯାଇଛି ।
ଏହା ମଧ୍ୟ ପଢନ୍ତୁ- ସାବଧାନ ! ଆପଣଙ୍କୁ ବି ଆସିପାରେ ସାଇବର ଠକଙ୍କ ଫୋନକଲ
ସଞ୍ଚାର ସାଥୀ ପୋର୍ଟାଲ (https://sancharsaathi.gov.in)ରେ ପୂର୍ବରୁ ଉପଲବ୍ଧ ଥିବା ସୁବିଧା, ସେମାନଙ୍କ ନାମରେ ଜାରି ହୋଇଥିବା ମୋବାଇଲ ସଂଯୋଗଗୁଡିକ ଜାଣିବା, ହଜିଯାଇଥିବା ମୋବାଇଲ୍ ହ୍ୟାଣ୍ଡସେଟ୍ ରିପୋର୍ଟ କରିବା, ଏକ ନୂତନ/ପୁରୁଣା ଡିଭାଇସ୍ କିଣିବା ସମୟରେ ମୋବାଇଲ୍ ହ୍ୟାଣ୍ଡସେଟର ଅସଲି ଥିବା ଯାଞ୍ଚ କରିବା, ଭାରତୀୟ ଟେଲିଫୋନ୍ ନମ୍ବରରେ ଆସୁଥିବା ଆନ୍ତର୍ଜାତିକ କଲ୍ ଗୁଡ଼ିକୁ କଲିଂ ଲାଇନ୍ ପରିଚୟ ଭାବରେ ରିପୋର୍ଟ କରିବା ଆଦି ଡିଆଇପି ଏବଂ ‘ଚକ୍ଷୁ’ରେ ରହିଛି । ସତର୍କ ରିପୋର୍ଟିଂକୁ ପ୍ରୋତ୍ସାହିତ କରି ଏବଂ ସନ୍ଦିଗ୍ଧ ଠକେଇ ଯୋଗାଯୋଗ ବିପକ୍ଷରେ ସକ୍ରିୟ ପଦକ୍ଷେପ ଗ୍ରହଣ କରି, ଡିଓଟି ପ୍ରତ୍ୟେକ ନାଗରିକଙ୍କ ସ୍ୱାର୍ଥ ଏବଂ କଲ୍ୟାଣର ସୁରକ୍ଷା ପାଇଁ ଉତ୍ସର୍ଗୀକୃତ ରହିଛି ।
ଇଟିଭି ଭାରତ, ଭୁବନେଶ୍ବର
