ଷ୍ଟାର୍ଟଅପ୍ ଓଡ଼ିଶା କାର୍ଯ୍ୟନିର୍ବାହୀ ଅଧ୍ୟକ୍ଷଙ୍କ ଉପରେ କାର୍ଯ୍ୟାନୁଷ୍ଠାନ: ବିଜେଡି ସରକାରବେଳେ ଅଧିକ ଦରମା ନେଉଥିଲେ, ଏବେ ସୁଧ ସହ ଫେରାଇବେ ଓମକାର - Omkar Rai To Return Excess Salary

Omkar Rai Asked To Return Excess Salary: ଷ୍ଟାର୍ଟଅପ୍ ଓଡ଼ିଶା ଓ କାର୍ଯ୍ୟନିର୍ବାହୀ ଅଧ୍ୟକ୍ଷ ଓମକାର ରାୟଙ୍କ ଉପରେ ବଡ଼ କାର୍ଯ୍ୟାନୁଷ୍ଠାନ ହୋଇଛି। ନିଜ ଦରମାଠାରୁ ଅଧିକ ଦରମା ନେଉଥିବା ଜଣାପଡ଼ିବା ପରେ ଏବେ ସୁଧ ସହ ଫେରାଇବାକୁ ହୋଇଛି ନିର୍ଦ୍ଦେଶ। ତେବେ କାହା ଛତ୍ରଛାୟା ତଳେ ରହି ସେ ଏପରି କରିବାକୁ ସାହସ କଲେ? ଏମିତି ପ୍ରଶ୍ନ ଉଠାଇଛନ୍ତି ସାଧାରଣଲୋକେ। ଅଧିକ ପଢନ୍ତୁ

ଭୁବନେଶ୍ବର: ଆକ୍ସନ ମୋଡରେ ନୂଆ ସରକାର । ଧାର୍ଯ୍ୟ ପରିମାଣଠୁ ଅଧିକ ଦରମା ନେଇ ଚର୍ଚ୍ଚାରେ ଷ୍ଟାର୍ଟଅପ୍ ଓଡ଼ିଶା ଓ କାର୍ଯ୍ୟନିର୍ବାହୀ ଅଧ୍ୟକ୍ଷ ଓମକାର ରାୟ । ଓମକାରଙ୍କଠାରୁ 9 ଲକ୍ଷ 22 ହଜାର 530 ଟଙ୍କା ଆଦାୟ ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି । ଅର୍ଥ ବିଭାଗର ସ୍ପଷ୍ଟୀକରଣ ଆଧାରରେ MSME ବିଭାଗ ଓମକାରଙ୍କଠାରୁ ଏହି ଅତିରିକ୍ତ ପରିମାଣର ଟଙ୍କା ଆଦାୟ କରିବାକୁ ପ୍ରକ୍ରିୟା ଆରମ୍ଭ କରିଛି ।

Excess Salary (ETV Bharat Odisha)

ଦରମା ତୁଳନାରେ ଅଧିକ ନେଇଥିଲେ ଓମକାର!

2022 ଏପ୍ରିଲରୁ 2024 ଜୁଲାଇ ମାସ ମଧ୍ୟରେ ଷ୍ଟାର୍ଟଅପ୍ ଓଡ଼ିଶାର କାର୍ଯ୍ୟନିର୍ବାହୀ ଅଧ୍ୟକ୍ଷ ଓମକାର ରାୟ ଧାର୍ଯ୍ୟ ଦରମା ତୁଳନାରେ ଅଧିକ ଅର୍ଥ ଦରମା ଆକାରରେ ନେଇଥିବା ଜଣାପଡ଼ିଛି । MSME ବିଭାଗ ପକ୍ଷରୁ ଅଗଷ୍ଟ 23 ତାରିଖରେ ଜାରି ହୋଇଥିବା ନିର୍ଦ୍ଦେଶନାମା ଅନୁସାରେ ଷ୍ଟାର୍ଟଅପ୍ ଓଡ଼ିଶା କାର୍ଯ୍ୟନିର୍ବାହୀ ଅଧ୍ୟକ୍ଷ ଭାବେ ଓମକାର ରାୟ ମାସିକ 2 ଲକ୍ଷ 11 ହଜାର 800 ଟଙ୍କା ଦରମା ପାଇବେ । ରାଜ୍ୟ ସରକାରଙ୍କ ଦ୍ୱାରା ଧାର୍ଯ୍ୟ ଡିଏ ମଧ୍ୟ ପାଇବେ । 2022 ଜୁନ 9 ତାରିଖରେ ବିଭାଗ ପକ୍ଷରୁ ଜାରି ହୋଇଥିବା ନିର୍ଦ୍ଦେଶନାମାରେ ଏହା ଦର୍ଶାଯାଇଥିଲା । ଓମକାର ମୂଳ ପେନସନକୁ ଛାଡ଼ି ଏହି ଦରମା ପାଇବେ । କିନ୍ତୁ 2022 ଏପ୍ରିଲରୁ 2024 ଜୁଲାଇ ମଧ୍ୟରେ ସେ ଧାର୍ଯ୍ୟ 2 ଲକ୍ଷ 11 ହଜାର 800 ଟଙ୍କା ମୂଳ ଦରମା ପରିବର୍ତ୍ତେ 2 ଲକ୍ଷ 25 ହଜାର ଟଙ୍କା ଦରମା ନେଇଥିଲେ । ଆଉ ଏହି ବର୍ଦ୍ଧିତ ମୂଳ ଦରମା ଆଧାରରେ ମଧ୍ୟ ସେ DA ପାଇଥିଲେ । କେବଳ ସେତିକି ନୁହେଁ, ଧାର୍ଯ୍ୟ ପେନସନ ତୁଳନାରେ ସେ ଅଧିକ ପେନସନ ରାଶି ମଧ୍ୟ ନେଇଥିବା ଜଣାପଡିଛି ।

Excess Salary (ETV Bharat Odisha)

9 ଲକ୍ଷରୁ ଉର୍ଦ୍ଧ୍ବ ଟଙ୍କା ଫେରାଇବେ ଓମକାର:
ଷ୍ଟାର୍ଟଅପ୍ ଓଡ଼ିଶାରୁ ଓମକାର 2022 ଏପ୍ରିଲରୁ 2024 ଜୁଲାଇ ମଧ୍ୟରେ ଦରମା ବାବଦରେ ଅଧିକ 3 ଲକ୍ଷ 59 ହଜାର 40 ଟଙ୍କା, ମହଙ୍ଗା ଭତ୍ତା ବାବଦରେ 1 ଲକ୍ଷ 42 ହଜାର 718 ଟଙ୍କା ନେଇଛନ୍ତି । ସେହିପରି ନିଜର ପେନସନ ବାବଦରେ 4 ଲକ୍ଷ 20 ହଜାର 772 ଟଙ୍କା ସେ ନେଇଛନ୍ତି । ମୋଟ 9 ଲକ୍ଷ 22 ହଜାର 530 ଟଙ୍କା ଓମକାରଙ୍କଠାରୁ ସହଜ କିସ୍ତିରେ ଆଦାୟ କରିବାକୁ ଏମଏସଏମଇ ବିଭାଗର ପ୍ରମୁଖ ଶାସନ ସଚିବ ହେମନ୍ତ କୁମାର ଶର୍ମା ନିର୍ଦ୍ଦେଶ ଦେଇଛନ୍ତି ।

Excess Salary (ETV Bharat Odisha)

ଅଣଓଡ଼ିଆଙ୍କୁ ଗୁରୁତ୍ୱ ଅଭିଯୋଗ:

ନୂଆ ସରକାର ଆସିବାଠାରୁ ଚର୍ଚ୍ଚାରେ ରହି ଆସିଛି ଷ୍ଟାର୍ଟଅପ୍ ଓଡ଼ିଶା । ଷ୍ଟାର୍ଟଅପ୍ ଓଡ଼ିଶା କାର୍ଯ୍ୟକ୍ରମରେ ଓଡ଼ିଆ ଷ୍ଟାର୍ଟଅପ ଉଦ୍ୟୋଗୀଙ୍କ ତୁଳନାରେ ଅଣଓଡ଼ିଆଙ୍କୁ ଗୁରୁତ୍ୱ ଦିଆଯାଉଥିବା ଅଭିଯୋଗ ରହିଛି । ଅଭିଯୋଗକୁ ଗୁରୁତର ସହ ନେଇଥିଲେ ମୋହନ ସରକାର । ଏକ ଉଚ୍ଚସ୍ତରୀୟ କମିଟି ଗଠନ କରାଯାଇ ଅଭିଯୋଗର ତଦନ୍ତ ହୋଇଛି । ଅଭିଯୋଗ ପରେ ଏମଏସଏମଇ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ଷ୍ଟାର୍ଟଅପ ଓଡ଼ିଶା କାର୍ଯ୍ୟାଳୟ ପରିଦର୍ଶନ କରିଛନ୍ତି । କାର୍ଯ୍ୟାଳୟରେ ଓଡ଼ିଆର ବ୍ୟାପକ ବ୍ୟବହାର ଉପରେ ଗୁରୁତ୍ୱ ଦେବା ସହ ଅଣଓଡିଆ ଅଧିକାରୀ ଓଡ଼ିଆ ଶିଖିବାକୁ ମନ୍ତ୍ରୀ ତାଗିଦ କରିଥିବା ଜଣାପଡ଼ିଛି ।

ଇଟିଭି ଭାରତ, ଭୁବନେଶ୍ବର