ପୁରୀ: ୫ ଦିନିଆ ଓଡ଼ିଶା ଗସ୍ତରେ ଆସିଥିବା ଆରଏସ୍ଏସ୍ ମୁଖ୍ୟ ମୋହନ ଭାଗବତ ପୁରୀ ଯାଇ ମହାପ୍ରଭୁଙ୍କ ଦର୍ଶନ କରିଛନ୍ତି । ବାଂଲାଦେଶ ଚାଲିଥିବା ହିଂସାରେ ହିନ୍ଦୁମାନଙ୍କ ସୁରକ୍ଷା ପାଇଁ ସେ ମହାପ୍ରଭୁଙ୍କୁ ପ୍ରାର୍ଥନା କରିବା ସହିତ ଦୀପଦାନ କରିଛନ୍ତି । ଏଥିସହ ବିମଳା ମନ୍ଦିର, ଲକ୍ଷ୍ମୀ ମନ୍ଦିର, ଆନନ୍ଦ ବଜାର ଓ ସ୍ନାନବେଦୀ ପରିଦର୍ଶନ କରି ସାନିଧ୍ୟ ଲାଭ କରିଛନ୍ତି । ଶ୍ରୀମନ୍ଦିର ଦର୍ଶନ ପରେ ଆରଏସ୍ଏସ୍ ମୁଖ୍ୟ ଗୋବର୍ଦ୍ଧନ ପୀଠରେ ପହଞ୍ଚି ଜଗଦଗୁରୁ ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ବତୀଙ୍କୁ ଭେଟିଛନ୍ତି ।
ଏହି ସମୟରେ ଗଣମାଧ୍ୟମରେ ପ୍ରତିକ୍ରିୟା ଦେଇ ଜଗଦଗୁରୁ ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ବତୀ କହିଛନ୍ତି, ''ବାଂଲାଦେଶରେ ହିନ୍ଦୁମାନଙ୍କ ଉପରେ ଆକ୍ରମଣ ଅତ୍ୟନ୍ତ ଉଦବେଗର ବିଷୟ । ଏହା ତୁରନ୍ତ ବନ୍ଦ ହେବା ଉଚିତ୍ । ଶାନ୍ତି ପ୍ରତିଷ୍ଠା ଦ୍ବାରା ସବୁକିଛି ଉନ୍ନତି ହୋଇପାରିବ । ହିନ୍ଦୁ ହେଉଛନ୍ତି ଶାନ୍ତି ପ୍ରିୟ । ଯେଉଁଠି ହିନ୍ଦୁ ସୁରକ୍ଷିତ ସେହି ଦେଶ ମଧ୍ଯ ସୁରକ୍ଷିତ । ବାଂଲାଦେଶରେ ଏପରି ହିଂସା ଚୀନର ଷଡ଼ଯନ୍ତ୍ର । ଚୀନ ନିଜ ଦେଶରେ ମସଜିଦ ଭାଙ୍ଗିବା ସହ ମୁସଲମାନମାନଙ୍କୁ ଦେଶରୁ ତଡ଼ି ଦେଉଛି । ଭାରତରେ ମଧ୍ୟ ଅସ୍ଥିରତା ପାଇଁ ଚୀନ ବାଂଲାଦେଶର ବ୍ୟବହାର କରୁଛି । ଏହା ଯଦି ବାଂଲାଦେଶ ନବୁଝିପାରେ ଆଗାମୀ ଦିନରେ ଏହାର ଅସ୍ତିତ୍ବ ମାଟିରେ ମିଶିଯିବ ।''
ଏହାସହିତ ଶ୍ରୀମନ୍ଦିରର ବିଭିନ୍ନ ପ୍ରସଙ୍ଗ ନିଆଯାଉଥିବା ନିଷ୍ପତ୍ତିରେ ତାଙ୍କର ମତାମତ ନିଆଯାଉ ନଥିବାରୁ ଜଗତଗୁରୁ କ୍ଷୋଭ ପ୍ରକାଶ କରିଛନ୍ତି । ସୁପ୍ରିକୋର୍ଟଙ୍କ ନିର୍ଦ୍ଦେଶ ରହିଛି ଧାର୍ମିକ ନିଷ୍ପତ୍ତିରେ ଶଙ୍କରାଚାର୍ଯ୍ୟଙ୍କ ମତାମତ ଲୋଡିବା ଦରକାର । ତେବେ ଦୁଃଖର ବିଷୟ ଶ୍ରୀମନ୍ଦିର ପରିଚାଳନା କମିଟି, ଗଜପତି ମହାରାଜା ଏବଂ ରାଜ୍ୟ ସରକାର ତାଙ୍କଠାରୁ କୌଣସି ମତାମତ ନେଉନାହାନ୍ତି । ଏଣୁ ବିନା ଡାକରାରେ ଉପରେ ପଡ଼ି କୌଣସି ପରାମର୍ଶ ଦେବା ଠିକ୍ ହେବ ନାହିଁ ବୋଲି ଜଗତଗୁରୁ ଶଙ୍କରାଚାର୍ଯ୍ୟ କହିଛନ୍ତି । ଧାର୍ମିକ, ଆଧ୍ୟାତ୍ମିକ କ୍ଷେତ୍ରରେ ରାଜନୀତି ପଶିବା ଠିକ୍ ନୁହେଁ । ଯେଉଁଠି ଧାର୍ମିକ, ଆଧ୍ୟାତ୍ମିକ ବିଷୟରେ ଜ୍ଞାନ ନଥିବା ବ୍ୟକ୍ତିଙ୍କ ହସ୍ତକ୍ଷେପ ରହିବ ସେଠାରେ ବିଶୃଙ୍ଖଳା ହେବ ବୋଲି ଶଙ୍କରାଚାର୍ଯ୍ୟ କହିଛନ୍ତି ।
ସେହିପରି ଦେଶରେ ଗୋହତ୍ୟା ବୃଦ୍ଧି ପାଉଥିବାବେଳେ ଏହାକୁ ନେଇ ସେ ଉଦବେଗ ପ୍ରକାଶ କରିଥିଲେ । ଯେତେବେଳେ ମୋଦି ଗୁଜୁରାଟ ମୂଖ୍ୟମନ୍ତ୍ରୀ ଥିଲେ ସେତେବେଳେ ମନମୋହନ ସିଂ ଦେଶର ପ୍ରଧାନମନ୍ତ୍ରୀ ଥିଲେ । ସେତେବେଳେ ଦେଶରେ ଗୋହତ୍ୟା ସମ୍ପୂର୍ଣ୍ଣ ବନ୍ଦ ପାଇଁ ମୋଦି ମନମୋହନଙ୍କୁ କହିଥିଲେ । ତେବେ ଗତ ୧୦ ବର୍ଷ ହେବ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ଥିବାବେଳେ ସେ ମନମୋହନଙ୍କୁ ଗୋହତ୍ୟା ରୋକିବାକୁ ଯେଉଁ ପରାମର୍ଶ ଦେଇଥିଲେ କାହିଁକି ସେ ନିଜେ ଲାଗୁ କରୁନାହାନ୍ତି ବୋଲି ଶଙ୍କରାଚାର୍ଯ୍ୟ ପ୍ରଶ୍ନ କରିଛନ୍ତି । କେନ୍ଦ୍ର ସରକାର ଏନେଇ ବିହିତ ପଦକ୍ଷେପ ନେବାକୁ ସେ ପରାମର୍ଶ ଦେଇଛନ୍ତି ।
ଜଗତଗୁରୁ ଶଙ୍କରାଚାର୍ଯ୍ୟଙ୍କୁ ଭେଟିବା ପୂର୍ବରୁ ଆରଏସଏସ ମୁଖ୍ୟ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିଥିଲେ । ସିଂହଦ୍ଵାରରେ ପହଞ୍ଚିବା ପରେ ତାଙ୍କୁ ସେବାୟତଙ୍କ ପକ୍ଷରୁ ଭବ୍ୟ ସ୍ଵାଗତ କରାଯାଇଥିଲା । ମହାପ୍ରଭୁଙ୍କ ଦର୍ଶନ ସାନିଧ୍ୟ ସହ ବିମଳା ମନ୍ଦିର, ଲକ୍ଷ୍ମୀ ମନ୍ଦିର, ଆନନ୍ଦ ବଜାର ଓ ସ୍ନାନବେଦୀ ଦର୍ଶନ କରିଥିଲେ ମୋହନ ଭାଗବତ । ଶ୍ରୀମନ୍ଦିରରୁ ଫେରିବା ସମୟରେ ସେ କାଶୀ ବିଶ୍ଵନାଥ ଓ ପତିତପାବନଙ୍କ ଦର୍ଶନ ନେଇଥିଲେ ।
ଶ୍ରୀମନ୍ଦିର ସେବାୟତ କହିଛନ୍ତି, ''ବାଂଲାଦେଶରେ ଚାଲିଥିବା ସାଂପ୍ରତିକ ପରିସ୍ଥିତିରେ ହିନ୍ଦୁମାନଙ୍କ ସୁରକ୍ଷା ପାଇଁ ମୋହନ ଭାଗବତ ପ୍ରାର୍ଥନା କରି ମହପ୍ରଭୁଙ୍କ ନିକଟରେ ମଧ୍ୟ ଦୀପଦାନ କରିଥିଲେ । ସେ ପ୍ରାୟ ୪୫ ମିନିଟ୍ କାଳ ଶ୍ରୀମନ୍ଦିରରେ ରହିିଥିଲେ । ନୀଳଚକ୍ରରେ ତାଙ୍କ ନାମରେ ନେତ ବନ୍ଧା ଯାଇଛି ।''
୫ ଦିନିଆ ଓଡ଼ିଶା ଗସ୍ତରେ ଥିବା ଆରଏସଏସ ମୁଖ୍ୟ ନୀଳାଦ୍ରି ଭକ୍ତ ନିବାସରେ ଅବସ୍ଥାନ କରିବା ସହ ଶୁକ୍ରବାର ଅପରାହ୍ନରେ ପୁରୀ ଗୋବର୍ଦ୍ଧନ ପୀଠ ଯାଇ ଜଗଦଗୁରୁ ଶଙ୍କରାଚାର୍ଯ୍ୟଙ୍କୁ ସାକ୍ଷାତ କରିଥିଲେ । ଆଜି ଓ ଆସନ୍ତାକାଲି ପୁରୀରେ ସଂଘର ପ୍ରାନ୍ତ ସେବା ପ୍ରମୁଖ ବୈଠକ ଅନୁଷ୍ଠିତ ହେବ । ଏହି ବୈଠକରେ ମଧ୍ୟ ମୋହନ ଭାଗବତ ଯୋଗଦେବେ ।
ଇଟିଭି ଭାରତ, ପୁରୀ
