ନୂଆପଡା/ସମ୍ବଲପୁର: ପୁଣି ସାମ୍ନାକୁ ଆସିଲା ଜନନୀ ଯନ୍ତ୍ରଣାର କରୁଣ ଛବି । ଖଟିଆରେ ବହୁ ହେଲେ ରୋଗୀ ଏବଂ ଗର୍ଭବତୀ । ଗାଁକୁ ଆମ୍ବୁଲାନ୍ସ ଆସି ନପାରିବାରୁ ଦଉଡ଼ି ଖଟିଆରେ ବୁହା ହୋଇଛନ୍ତି ରୋଗୀ ଏବଂ ଜଣେ ଗର୍ଭବତୀ । ଏଭଳି ଦୁଇଟି ଘଟଣା ସାମ୍ନାକୁ ଆସିଛି ନୂଆପଡ଼ା ଏବଂ ସମ୍ବଲପୁର ଜିଲ୍ଲାରୁ । ଯାହା ସରକାରଙ୍କ ସ୍ବାସ୍ଥ୍ୟ ସେବାକୁ ପଦାରେ ପକାଇଛି । ନୂଆପଡାରେ ଜଣେ ଗର୍ଭବତୀ ମହିଳା ଘରଠାରୁ 2 କିମି ପର୍ଯ୍ୟନ୍ତ ବିପଦ ସଙ୍କୁଳ ଅବସ୍ଥାରେ ଖଟିଆରେ ବୁହା ହୋଇଛନ୍ତି । ରାସ୍ତା ଅବସ୍ଥା ଦୟନୀୟ ଥିବା କାରଣରୁ ମହିଳାଙ୍କ ଘର ପାଖକୁ ପହଞ୍ଚି ପାରିଲା ନାହିଁ ସରକାରଙ୍କ 108 ଆମ୍ବୁଲାନ୍ସ । ଦୀର୍ଘ 2 କି.ମି ଦୂରତାରେ 108 ଆମ୍ବୁଲାନ୍ସ ଅଟକି ରହିଥିବାବେଳେ, ଦୀର୍ଘ 2 ଘଣ୍ଟା ସମୟ ଧରି ମହିଳାଙ୍କୁ ସମ୍ପର୍କୀୟ ମହିଳାମାନେ ଏକ ଖଟିଆରେ ବୋହି ଆମ୍ବୁଲାନ୍ସ ପାଖକୁ ପହଞ୍ଚାଇଛନ୍ତି ।
ସୂଚନାଯୋଗ୍ୟ, ନୂଆପଡା ଜିଲ୍ଲା ସଦର ମହୁକମା ଠାରୁ 80 କିମି ଦୂରତା ଖଡ଼ିଆଳ ବ୍ଲକ ବରଗାଁ ନଦୀପଡା ସାହିରେ ଏହି ଘଟଣା ଦେଖିବାକୁ ମିଳିଛି । ବରଗାଁ ନଦୀପଡା ସାହିର ଅଭିରାମ ଶବର ସ୍ତ୍ରୀ ଦୌପଦି ଶବର ବାସ କରନ୍ତି । ଅଭିରାମ ଶବରଙ୍କ ସ୍ତ୍ରୀ ଦ୍ରୌପଦି ଶବର ଆଜି ଜନନୀ ଯନ୍ତ୍ରଣାରେ ଛଟପଟ ହୋଇଥିଲା । ସମ୍ପର୍କୀୟ ମାନେ ଖଡ଼ିଆଳ ଉପଖଣ୍ଡ ସ୍ବାସ୍ଥ୍ୟ 108 ଆମ୍ବୁଲାନ୍ସକୁ ଫୋନ୍ କରିଥିଲେ ।
ଖବର ପାଇ 108 ଆମ୍ବୁଲାନ୍ସ ବରଗାଁରେ ପହଞ୍ଚିଥିଲା । ହେଲେ ରାସ୍ତା ଖରାପ କାରଣରୁ ଗର୍ଭବତୀ ମହିଳାଙ୍କ ଘରଠାରୁ ଦୀର୍ଘ 2 କିମି ବରଗାଁ ଉତ୍କଳ ଗ୍ରାମ୍ୟ ବ୍ୟାଙ୍କ ପାଖରେ ଆମ୍ବୁଲାନ୍ସ ଅଟକି ଗଲା । ଡ୍ରାଇଭର କୌଶଳ କ୍ରମେ ଆମ୍ବୁଲାନ୍ସ ଗାଡିକୁ ଆଗକୁ ନେବା ପାଇଁ ଶତ ଚେଷ୍ଟା କରିବା ପରେ ମଧ୍ୟ କାଦୁଆ ସରସର ଶୋଚନୀୟ ରାସ୍ତା କାରଣରୁ ଆମ୍ବୁଲାନ୍ସ ଆଗକୁ ଯିବା ସମ୍ଭବ ହୋଇପାରିଲା ନାହିଁ । ଦୀର୍ଘ 2 ଘଣ୍ଟା ଧରି ଆମ୍ବୁଲାନ୍ସ ଅଟକି ରହିଥିବା ପରେ ଜନନୀ ଯନ୍ତ୍ରଣାରେ ଛଟପଟ ହେଉଥିବା ମହିଳା ଦ୍ରୌପଦିଙ୍କୁ ଖଟିଆରେ ବୋହି ମହିଳାମାନେ ଆମ୍ବୁଲାନ୍ସ ପାଖରେ ପହଞ୍ଚାଇଛନ୍ତି । ତେବେ ଦୀପ ତଳ ଅନ୍ଧାର ସଦୃଶ୍ୟ ଖଡ଼ିଆଳ ବ୍ଲକ କାର୍ଯ୍ୟାଳୟ ଠାରୁ ମାତ୍ର 10 କିମି ଦୂରତା ବରଗାଁରେ ଘଟିଛି ଏଭଳି ଘଟଣା ।
ସେହିପରି ସମ୍ବଲପୁର ଜିଲ୍ଲାର କୁଚିଣ୍ଡା ଉପଖଣ୍ଡ ଜମନକିରା ବ୍ଲକ୍ ଖର୍ସନମାଲ ପଞ୍ଚାୟତ ଅଧିନ ବାଘଲତ ଗାଁର ୩ କିମି ରାସ୍ତା ଅତ୍ୟନ୍ତ ଶୋଚନୀୟ ହୋଇପଡିଛି । ଗାଁକୁ ସଂଯୋଗ କରୁଥିବା ମାଟି ରାସ୍ତାରେ ବର୍ଷା ଦିନେ ଟ୍ରାକ୍ଟର ଚଳାଚଳ କରିବାରୁ ଉଭୟ ପାର୍ଶ୍ଵରେ ଛୋଟ ବଡ଼ ଖାଲଖମା ସୃଷ୍ଟି ହୋଇଛି । ଫଳରେ ସାମାନ୍ୟ ବର୍ଷାରେ ରାସ୍ତା ଅବସ୍ଥା ଶୋଚନୀୟ ହୋଇ ପଡୁଛି । ଏଭଳି ପରିସ୍ଥିତି ଯୋଗୁଁ ପଡୋଶୀ ଛତିଶଗଡ ରାଜ୍ୟ ରାୟଗଡ଼ ସହରରୁ ଫେରିଥିବା ଜଣେ ରୋଗୀଙ୍କୁ 3 କିମି ଖଟିଆରେ ବୁହା ହୋଇ ଘରକୁ ଯିବାକୁ ପଡ଼ିଛି ।
ମିଳିଥିବା ସୂଚନା ଅନୁସାରେ, ଜମନକିରା ବ୍ଲକ୍ ଖର୍ସନମାଲ ପଞ୍ଚାୟତ ଅଧିନ ବାଘଲତ ଗାଁର ୟୁନାଶ ଭୂୟାଁ(50) ମଳକଣ୍ଟକ ରୋଗରେ ପୀଡ଼ିତ ଥିଲେ l ତେବେ ସେ ହସ୍ପିଟାଲରୁ ୧୦୮ ଆମ୍ବୁଲାନ୍ସ ଯୋଗେ ସୁଦୂର ରାୟଗଡ଼ରୁ ଚିକିତ୍ସା ସାରି ଘରକୁ ଫେରୁଥିଲେ । ହେଲେ ରାସ୍ତା ଖରାପ ଯୋଗୁଁ ୧୦୮ ଆମ୍ବୁଲାନ୍ସ ଡ୍ରାଇଭର ଗାଁକୁ ଯିବାକୁ ମନା କରିଦେଇଥିଲେ । ସମ୍ପୃକ୍ତ ଆମ୍ବୁଲାନ୍ସ କାଣିବନ୍ଧଳି ଗାଁମୁଣ୍ଡରେ ରୋଗୀଙ୍କୁ ଛାଡ଼ି ଚାଲି ଯାଇଥିଲା ।ଏନେଇ ପରିବାର ଲୋକଙ୍କୁ ଖବର ଦିଆଯିବାରୁ ପରିବାର ଲୋକେ ପହଞ୍ଚି ୟୁନାଶଙ୍କୁ ଏକ ଦଉଡ଼ିଆ ଖଟରେ ଘରକୁ ବୋହିକି ନିଆଯାଇଥିଲା l ବର୍ତ୍ତମାନ ଏହି ଦୃଶ୍ୟ ସୋସିଆଲ ମିଡ଼ିଆରେ ଭାଇରଲ ହୋଇଛି l
ଇଟିଭି ଭାରତ, ନୂଆପଡା/ସମ୍ବଲପୁର
