ପୁରୀ:ବିଶ୍ୱପ୍ରସିଦ୍ଧ ରଥଯାତ୍ରାକୁ ନେଇ ଚଳଚଞ୍ଚଳ ପୁରୀ ଶ୍ରୀମନ୍ଦିର ରଥଖଳା । ଚାଲିଛି ଜୋରସୋରରେ ରଥ ନିର୍ମାଣ କାର୍ଯ୍ୟ । ତିନି ରଥର ୩୪ ଗୋଟି ଚକ ନିର୍ମାଣ ଶେଷ ହୋଇ ଦଣ୍ଡା ନିର୍ମାଣ ପାଇଁ ରଥ ଖଳାରେ ତିନି ରଥର ପାଞ୍ଚ ଦଣ୍ଡା କାଠ ପଡ଼ିଛି । ଏଥିସହ ତିନି ରଥର ଅନ୍ୟାନ୍ୟ ଅଂଶ ଗୁଡ଼ିକର ନିର୍ମାଣ କାର୍ଯ୍ୟ ଆଗେଇ ଚାଲିଛି । ରଥ ନିର୍ମାଣକାରୀ ସେବକମାନେ ସମାନ୍ତରାଳ ଭାବେ ନିର୍ମାଣ କାର୍ଯ୍ୟ ଆଗେଇ ନେଉଛନ୍ତି । ତିନି ରଥର ଓରା, ଓରାଖମ୍ବି, ଭୂଇଁ ଚଉତା ଆଦିର ଚଉପଟ କାର୍ଯ୍ୟ ଶେଷ ହୋଇଛି ।
ଏଥିସହ ରଥ ଖଳାରେ ତିନି ରଥର ଦୁଇଟି ଲେଖାଏଁ ସାନ ଉଛୁଳା ଅଖର ଗୋଲେଇ କାର୍ଯ୍ୟ ଶେଷ ହୋଇ ବାକି ଅଖ ଗୁଡ଼ିକର ଉଭୟ ପାର୍ଶ୍ଵ ଗୋଲେଇ କାର୍ଯ୍ୟ ମହାରଣା ସେବକ ମାନେ ଜାରୀ ରଖିଛନ୍ତି । ଏଥିସହ ତିନି ରଥର ଚକ ସଂଖ୍ୟକ ଯୋକା କାଠର ଚଉପଟ କାର୍ଯ୍ୟ ଜାରି ରହିଛି । ତିନି ରଥର ଦଣ୍ଡା ନିର୍ମାଣ ପାଇଁ ରଥ ଅମୀନ ତିନି ରଥ ଖଳାକୁ ୩ଟି ଲେଖାଏଁ ୪୦ ଫୁଟିଆ ସାହାଜ କାଠ ଏବଂ ୨ ଟି ଲେଖାଏଁ ୪୦ ଫୁଟିଆ ଧଉରା କାଠ ଯୋଗାଇ ଦିଆଯାଇଛି । ଅନୁକୂଳ ପୂଜା ପରେ ତିନି ରଥର ଦଣ୍ଡା ଚଉପଟ କାର୍ଯ୍ୟ ଆରମ୍ଭ ହେବ ।
ତାଳଧ୍ଵଜ ରଥର ୧୧ ନମ୍ୱର ଚକର ଗୋଟିଏ ପଇ ବଦଳା ଯିବାକୁ ଥିବା ବେଳେ ୧୨ ନମ୍ବର ଚକର ତୁମ୍ବରେ ସିଙ୍ଗଡ଼ା ବାଡ଼ିଆ ଶେଷ ହୋଇଅଛି । ତାଳଧ୍ଵଜ ରଥର ବାକି ଅଂଶ ଗୁଡ଼ିକର ନିର୍ମାଣ କାର୍ଯ୍ୟ ଜାରି ରହିଛି । ତାଳଧ୍ଵଜ ରଥର ଆଗ, ପଛ ଏବଂ ଦୁଇ ପାର୍ଶ୍ଵ ମୁହାଁଟ ଚଉପଟ କାର୍ଯ୍ୟ ଶେଷ ହୋଇଛି । ଆଠ ଗୋଟି ଭୂଇଁ ଖାମ୍ବୀର ଚଉପଟ ସହ ସାଲ କାର୍ଯ୍ୟ ଶେଷ ହୋଇଛି । ତାଳଧ୍ଵଜ ରଥର ୧୬ଟି ଯୋକା ମଧ୍ୟରୁ ଆଜି ସୁଦ୍ଧା ୭ ଗୋଟି ଯୋକାର ନିର୍ମାଣ ଶେଷ ହୋଇ ବାକି ଯୋକା ଗୁଡ଼ିକର ଚଉପଟ କାର୍ଯ୍ୟ ଜାରି ରହିଛି । ରଥର ଗୋଟିଏ ନାହାକା ଅଖ, ଦୁଇଟି ସାନ ଉଛୁଳା ଅଖର ଦୁଇ ପାର୍ଶ୍ଵ ଗୋଲେଇ କାର୍ଯ୍ୟ ଶେଷ ହେବାପରେ, ବାକି ତିନୋଟି ଅଖର ଉଭୟ ପାର୍ଶ୍ଵ ଗୋଲେଇ ପାଇଁ ଚଉପଟ କାର୍ଯ୍ୟ ଜାରି ରହିଛି । ଓରାର ଚଉପଟ କାର୍ଯ୍ୟ ଶେଷ ହୋଇଛି ।
ଏହାମଧ୍ୟ ପଢନ୍ତୁ.. ରଥ ଖଳା ହାଲଚାଲ: ସରିଲା ତିନି ରଥର 32 ଚକ ନିର୍ମାଣ - Puri Ratha Construction Work
ଦର୍ପଦଳନ ରଥର ୧୦ଟି ଚକ ନିର୍ମାଣ ଶେଷ ହୋଇ ୧୧ନମ୍ୱର, ଚକ ତୁମ୍ବରେ ସିଙ୍ଗଡ଼ା ବାଡ଼ିଆ ଶେଷ ହୋଇଛି । ଦର୍ପଦଳନ ରଥର ବାକି ଅଂଶ ଗୁଡ଼ିକ ମଧ୍ୟରୁ ଚାରିଗୋଟି ଓରାର ଚଉପଟ ଶେଷ ହୋଇଛି । ଦୁଇଟି ସାନ ଉଛୁଳା ଅଖର ଚଉପଟ ଶେଷ ହୋଇ ବାକି ୪ଟି ଅଖର ଉଭୟ ପାର୍ଶ୍ଵ ଗୋଲେଇ ପାଇଁ ଚଉପଟ କାର୍ଯ୍ୟ ଜାରି ରହିଛି । ଦର୍ପଦଳନ ରଥର ୧୨ଟି ଯୋକା ମଧ୍ୟରୁ ୧୦ଟି ଯୋକା ଶେଷ ହୋଇ ଶେଷ ଦୁଇଟି ଯୋକାର ଆଂଶ ମରା ଶେଷ ପର୍ଯ୍ୟାୟରେ ପହଞ୍ଚିଛି ।
ନନ୍ଦିଘୋଷ ରଥର ୧୪ ଗୋଟି ଚକର ନିର୍ମାଣ ଶେଷ ହୋଇ ୧୫ ନମ୍ୱର ଚକର ତୁମ୍ବରେ ସିଙ୍ଗଡ଼ା ବାଡିଆ ଶେଷ ହୋଇଛି । ରଥର ବାକି ଅଂଶ ଗୁଡ଼ିକର ନିର୍ମାଣ କାର୍ଯ୍ୟ ଆଗେଇ ଚାଲିଛି । ଚାରୋଟି ମୁହାଣ୍ଟ ଚଉପଟ ଶେଷ ହୋଇଛି । ନିର୍ମାଣ ଶେଷ ପରେ ବାକି ୧୧ଟି ଜୋକାର ଚଉପଟ ଜାରି ରହିଛି । ଚାରୋଟି ଓରାର ଚଉପଟ ଶେଷ ହୋଇ ବିନ୍ଧ କାର୍ଯ୍ୟ ଶେଷ ହୋଇଛି । ଦୁଇଟି ସାନ ଉଛଳା ଅଖର ଉଭୟ ପଟ ଗୋଲେଇ ଶେଷ ପରେ ବାକି ୫ଟି ଅଖର ଉଭୟ ପାର୍ଶ୍ଵ ଗୋଲେଇ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ରୂପକାର ସେବକମାନେ ତିନି ରଥର ସାରଥି ଗୁଜରେ ରୂପ ଖୋଦେଇ କାର୍ଯ୍ୟ କରିବା ସହ ଖୋଦେଇ ଶେଷ ହୋଇଥିବା ରୂପ ଗୁଡ଼ିକର ପଲିସ କାର୍ଯ୍ୟ ଜାରି ରଖିଛନ୍ତି ।
ଦୋଳ ବେଦୀ ଅସ୍ଥାୟୀ କମାର ଶାଳରେ ଓଝା ସେବକ ମାନେ ତିନି ରଥର ଅଖ ଦଣ୍ଡା ବିଡିଆ ଏବଂ ଚଉରସ କଣ୍ଟା ସହ ଯୋଖା କଣ୍ଟା ନିର୍ମାଣ ଜାରି ରଖିଛନ୍ତି ।
ଇଟିଭି ଭାରତ, ଭୁବନେଶ୍ୱର
