ପୁରୀ: ପାଖେଇ ଆସୁଛି ରାକ୍ଷୀ ପୂର୍ଣ୍ଣିମା । ଭାଇ ହାତରେ ସ୍ନେହର ଡୋରି ବାନ୍ଧିବ ଭଉଣୀ । ଆଉ ମାଗିବ ସୁରକ୍ଷାର ପ୍ରତିଶ୍ରୁତି । ଶ୍ରୀକ୍ଷେତ୍ରରେ ମାନବୀୟ ଲୀଳା କରୁଥିବା ଜଗତନାଥ ଜଗନ୍ନାଥ ବି ଏହି ପରମ୍ପରା ସହ ଜଡିତ । କେବଳ ମଣିଷ ନୁହେଁ ମହାପ୍ରଭୁ ବି ହାତରେ ବାନ୍ଧନ୍ତି ରାକ୍ଷୀ । କେଉଁ କାଳରୁ ଶ୍ରୀମନ୍ଦିରରେ ପାଳିତ ହୋଇଆସୁଛି ରକ୍ଷାବନ୍ଧନ ଉତ୍ସବ । ଭଉଣୀ ସୁଭଦ୍ରା ବଡଭାଇ ବଳଭଦ୍ର ଓ ଜଗତର ସାଆନ୍ତ ଜଗନ୍ନାଥଙ୍କ ହାତରେ ବାନ୍ଧନ୍ତି ରାକ୍ଷୀ । ଆସନ୍ତା 19ରେ ରାକ୍ଷୀ ପୂର୍ଣ୍ଣିମା ଥିବାରୁ ଶ୍ରୀମନ୍ଦିରରେ ରାକ୍ଷୀ ପ୍ରସ୍ତୁତିରେ ଲାଗିଛନ୍ତି ପାରମ୍ପାରିକ ପାଟରା ବିଷୋୟୀ ସେବାୟତ । ଚାରୋଟି ବଡ଼ ରାକ୍ଷୀ ସହ ଗୁଆମାଳ ମଧ୍ୟ ପ୍ରସ୍ତୁତ କରୁଛନ୍ତି ଏହି ସେବାୟତ । ଆସନ୍ତା ସୋମବାର ରଙ୍ଗବେରଙ୍ଗ ବାସୁଙ୍ଗା ପାଟରେ ପ୍ରସ୍ତୁତ ଏହି ରାକ୍ଷୀ ଶ୍ରୀମନ୍ଦିରକୁ ଯିବ ।
ବାସୁଙ୍ଗା ପାଟରେ ମହାପ୍ରଭୁଙ୍କ ପାଇଁ ପ୍ରସ୍ତୁତ ହୁଏ ରାକ୍ଷୀ:
ରାକ୍ଷୀ ପୂର୍ଣ୍ଣିମା ପାଇଁ ଶ୍ରୀମନ୍ଦିରରେ ପ୍ରସ୍ତୁତି କରାଯାଉଛି । ଏହି ଦିନ ବଳଭଦ୍ର ଜନ୍ମ ସହ ଭଉଣୀ ସୁଭଦ୍ରା ରାକ୍ଷୀ ବାନ୍ଧିବେ ଦୁଇଭାଇ ବଳଭଦ୍ର ଓ ମହାପ୍ରଭୁ ଶ୍ରୀଜଗନ୍ନାଥଙ୍କ ହାତରେ । ଶ୍ରୀମନ୍ଦିର ପ୍ରଶାସନ ଦ୍ବାରା ଯୋଗାଇ ଦିଆଯାଇଥିବା ରଙ୍ଗବେରଙ୍ଗ ବାସୁଙ୍ଗା ପାଟରେ ପ୍ରସ୍ତୁତ କରାଯାଉଛି ଏହି ରାକ୍ଷୀ । ପ୍ରଭୁ ବଳଭଦ୍ରଙ୍କ ପାଇଁ ବାଇଗଣୀ-ନୀଳ ଓ ଜଗନ୍ନାଥଙ୍କ ପାଇଁ ହଳଦିଆ-ନାଲି ୨ଟି ଲେଖାଏଁ ରାକ୍ଷୀ ପ୍ରସ୍ତୁତ କରାଯାଉଛି । ପାଟରା ବିଷୋୟୀ ସନ୍ତୋଷ କୁମାର ପାତ୍ର ବେଶ ନିଷ୍ଠାର ସହ ଏହି ରାକ୍ଷୀ ପ୍ରସ୍ତୁତ କରୁଛନ୍ତି । ତେବେ ଏହି ରାକ୍ଷୀ ସହିତ ଚାରିଗୋଟି ଗୁଆମାଳ ମଧ୍ୟ ପ୍ରସ୍ତୁତ କରାଯାଇଥାଏ। ୫୪ଟି ଗୁଆରେ ପ୍ରସ୍ତୁତ ଏହି ଗୁଆମାଳ ମଧ୍ୟ ରକ୍ଷାବନ୍ଧନ ଅବସରରେ ଲାଗି କରାଯିବାର ପରମ୍ପରା ରହିଛି । ଏହାଛଡ଼ା ପାର୍ଶ୍ବ ଦେବାଦେବୀଙ୍କ ପାଇଁ ମଧ୍ୟ ରାକ୍ଷୀ ପ୍ରସ୍ତୁତ କରିଥାନ୍ତି ପାଟରା ବିଷୋୟୀ ସେବାୟତ ମାନେ। ପୂର୍ଣ୍ଣିମା ଦିନ ପ୍ରସ୍ତୁତ ଏହି ରାକ୍ଷୀ ଶ୍ରୀମନ୍ଦିର ଗାରଦରେ ଦିଆଯିବା ପରେ ସିଂହାରୀ ସେବାୟତ ମାନେ ଏହାକୁ ମହାପ୍ରଭୁଙ୍କ ବାହୁରେ ଲାଗି କରିଥାନ୍ତି।
![କାଳିଆ ସାଆନ୍ତେ ପିନ୍ଧିବେ ରାକ୍ଷୀ](https://etvbharatimages.akamaized.net/etvbharat/prod-images/16-08-2024/od-pur-rakhipreparation-7205521_16082024170631_1608f_1723808191_123.jpg)
ଭାଇ-ଭଉଣୀ ନିବିଡ ସମ୍ପର୍କର ବାର୍ତ୍ତା ଦେଉଛନ୍ତି କାଳିଆ ସାଆନ୍ତେ:
ମହାପ୍ରଭୁଙ୍କ ପାଇଁ ରାକ୍ଷୀ ପ୍ରସ୍ତୁତ କରିଥିବା ପାଟରା ବିଷୋୟୀ ସେବାୟତ ସନ୍ତୋଷ କୁମାର ପାତ୍ର କହିଛନ୍ତି, ‘ରାକ୍ଷୀ ପ୍ରସ୍ତୁତିରେ ସେ ଦଶଦିନ ହେବ ଲାଗିଛନ୍ତି । ଏହା ଶେଷ ପର୍ଯ୍ୟାୟରେ ପହଁଚିଛି । 4ଟି ରାକ୍ଷୀ ଓ 4ଟି ଗୁଆମାଳ ପ୍ରସ୍ତୁତି ହୋଇଛି । ଏହା 19 ତାରିଖ ସକାଳେ ଆମେ ଏହାକୁ ଶ୍ରୀମନ୍ଦିରରେ ହସ୍ତାନ୍ତର କରିବୁ । ଏହି ରାକ୍ଷୀ ସମ୍ପୂର୍ଣ୍ଣ ବାସୁଙ୍ଗା ପାଟରେ ପ୍ରସ୍ତୁତ କରାଯାଏ । ଏହା ଆମର ପାରିବାରିକ ସେବା । ଶ୍ରୀକ୍ଷେତ୍ରରେ ମହାପ୍ରଭୁ ମାନବୀୟ ଲୀଳା କରୁଛନ୍ତି । ଭାଇ ଭଉଣୀ ମଧ୍ୟ ରେ କିଭଳି ନିବିଡ ସମ୍ପର୍କ ତାହା ମହାପ୍ରଭୁ ବାର୍ତ୍ତା ଦେଉଛନ୍ତି । ମହାପ୍ରଭୁଙ୍କ ଏଠି ସବୁ ବଡ । ବଡ ଠାକୁର, ବଡଦାଣ୍ଡ, ବଡଧାମ, ବଡ ଦେଉଳ । ମହାପ୍ରଭୁ ବିଶ୍ଵର ସବୁଠୁ ବଡ ରାକ୍ଷୀ ହାତରେ ପିନ୍ଧିଥାନ୍ତି । ମହାପ୍ରଭୁଙ୍କ ଏହି ଦୁର୍ଲ୍ଲଭ ବେଶ ଦର୍ଶନ କରି ଭକ୍ତ ବହୁତ ଆନନ୍ଦ ଲାଭ କରନ୍ତି ।
![କାଳିଆ ସାଆନ୍ତେ ପିନ୍ଧିବେ ରାକ୍ଷୀ](https://etvbharatimages.akamaized.net/etvbharat/prod-images/16-08-2024/od-pur-rakhipreparation-7205521_16082024170631_1608f_1723808191_291.jpg)
ସୁରକ୍ଷା-ଆଶୀର୍ବାଦର ପରମ୍ପରା:
ଉତ୍ତରପାର୍ଶ୍ବ ମଠ ମହନ୍ତ ନାରାୟଣ ରାମାନୁଜ ଦାଶ ଶ୍ରୀମନ୍ଦିରରେ ରାକ୍ଷୀ ପୂର୍ଣ୍ଣିମା ପରମ୍ପରାକୁ ନେଇ କହିଛନ୍ତି, ‘ଶ୍ରୀମନ୍ଦିରରେ ରାକ୍ଷୀ ପୂର୍ଣ୍ଣିମା ଦିନ ଭଉଣୀ ସୁଭଦ୍ରା ଭାଇ ବଳଭଦ୍ର ଓ ଜଗନ୍ନାଥଙ୍କୁ ରାକ୍ଷୀ ପିନ୍ଧାଇବେ। ଏହାକୁ ସାରା ବିଶ୍ଵବାସୀ ପାଳନ କରୁଛନ୍ତି । ଏହି ରକ୍ଷା ବନ୍ଧନ ଉତ୍ସବ ଏକ ସନାତନ ପରମ୍ପରା । ଭାଇ ଭଉଣୀକୁ ସବୁବେଳେ କିଭଳି ସୁରକ୍ଷା ଓ ଆଶୀର୍ବାଦ ଦେଇଥାଏ ତାହା ଏହି ପରମ୍ପରା । ଶ୍ରୀ ମନ୍ଦିରରେ ରାକ୍ଷୀ ପୂର୍ଣ୍ଣିମା ଦିନ ବଳଭଦ୍ର ଜନ୍ମ ନୀତି ଶେଷ ପରେ ଏହି ରାକ୍ଷୀ ପୂର୍ଣ୍ଣିମା ନୀତି ହେଇଥାଏ । ପ୍ରଭୁ ଜଗନ୍ନାଥ ଓ ବଳଭଦ୍ର ଭଉଣୀ ସୁଭଦ୍ରାଙ୍କ ଠାରୁ ରାକ୍ଷୀ ପିନ୍ଧିଥାନ୍ତି । ମହାପ୍ରଭୁଙ୍କ ଶ୍ରୀଅଙ୍ଗ ଲାଗି ସେବକ ମାନେ ରାକ୍ଷୀକୁ ପ୍ରଭୁ ଜଗନ୍ନାଥ ଓ ବଳଭଦ୍ରଙ୍କୁ ପିନ୍ଧାଇ ଥାଆନ୍ତି ।’
![କାଳିଆ ସାଆନ୍ତେ ପିନ୍ଧିବେ ରାକ୍ଷୀ](https://etvbharatimages.akamaized.net/etvbharat/prod-images/16-08-2024/od-pur-rakhipreparation-7205521_16082024170631_1608f_1723808191_783.jpg)
ଶ୍ରୀମନ୍ଦିରରେ ବର୍ଷ ତମାମ ପାଳନ କରାଯାଉଥିବା ପର୍ବ ମଧ୍ୟରୁ ରକ୍ଷା ବନ୍ଧନର ବିଶେଷ ମହତ୍ତ୍ବ ରହିଛି । ଆଉ ଏହି ଉତ୍ସବ ପାଇଁ ମହାପ୍ରଭୁଙ୍କ ରାକ୍ଷୀ ପ୍ରସ୍ତୁତ କରି ବେଶ ଉତ୍ସାହିତ ଅନୁଭବ କରିଥାନ୍ତି ପାଟରା ବିଷୋୟୀ ସେବାୟତ ମାନେ । ତେବେ ରାକ୍ଷୀ ପୂର୍ଣ୍ଣିମା ଯେତିକି ପାଖଉଛି ଭକ୍ତଙ୍କ ଉତ୍ସାହ ସେତିକି ବୃଦ୍ଧି ପାଇବାରେ ଲାଗିଛି ।
![କାଳିଆ ସାଆନ୍ତେ ପିନ୍ଧିବେ ରାକ୍ଷୀ](https://etvbharatimages.akamaized.net/etvbharat/prod-images/16-08-2024/od-pur-rakhipreparation-7205521_16082024170631_1608f_1723808191_1078.jpg)
ଏହା ମଧ୍ୟ ପଢନ୍ତୁ: ରାକ୍ଷୀ କିଣିଲେ ସୃଷ୍ଟି ହେବ ଜଙ୍ଗଲ, ପ୍ରଦୂଷଣ ନୁହେଁ ପରିବେଶକୁ ସୁରକ୍ଷା ଦେବ ସିଡ୍ ରାକ୍ଷୀ
ଏହା ମଧ୍ୟ ପଢନ୍ତୁ: ପ୍ରଧାନମନ୍ତ୍ରୀଙ୍କ ପାଇଁ ରାଷ୍ଟ୍ରପତିଙ୍କ ଜିଲ୍ଲାରୁ ପଠାଗଲା ରାକ୍ଷୀ
ଇଟିଭି ଭାରତ, ପୁରୀ