ଭୁବନେଶ୍ବର: ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ନେଇ ମୋହନ ସରକାରରେ ଜଷ୍ଟିସ ବିଶ୍ବନାଥ ରଥଙ୍କ ଅଧ୍ୟକ୍ଷତାରେ ଏକ 16 ଜଣିଆ କମିଟି ଗଠନ ହୋଇଛି । ଫଳରେ ବିଜେଡି ସରକାର ସମୟରେ ଗଠନ ହୋଇଥିବା ଜଷ୍ଟିସ ଅରିଜିତ ପସାୟତ କମିଟି ଲୀନ ହୋଇଯାଇଛି । ଯାହାକୁ ନେଇ ଆରମ୍ଭ ହୋଇଛି ରାଜନୀତି । ବିରୋଧୀ ବିଜେଡି ଓ କଂଗ୍ରେସ ଏନେଇ ରାଜ୍ୟ ସରକାରଙ୍କୁ ଘେରିଛନ୍ତି ।
ମହାପ୍ରଭୁ ଶ୍ରୀଜଗନ୍ନାଥ ମନ୍ଦିରର ରତ୍ନଭଣ୍ଡାର ଖୋଲିବାକୁ ନେଇ ଚର୍ଚ୍ଚା ଲାଗି ରହିଥିବାବେଳେ ରାଜ୍ୟ ସରକାର ନୂଆ କମିଟି ଗଠନ କରିଛନ୍ତି । ଜଷ୍ଟିସ ବିଶ୍ବନାଥ ରଥଙ୍କ ଅଧ୍ୟକ୍ଷତାରେ 16 ଜଣିଆ ନୂଆ କମିଟି ରାଜ୍ୟ ସରକାର ଗଠନ କରିଛନ୍ତି । ଫଳରେ ବିଜେଡି ସରକାର ସମୟରେ ଗଠନ ହୋଇଥିବା ଅରିଜିତ ପସାୟତ କମିଟି ମାଟିରେ ମିଶିଛି । କିଛି ଦିନ ପୂର୍ବରୁ ଅରିଜିତ ପସାୟତ ପୁରୀ ଆସି ରତ୍ନଭଣ୍ଡାର ସମ୍ପର୍କିତ କମିଟିର ଅଧ୍ୟକ୍ଷତାରେ କରିବାର ଗସ୍ତ କାର୍ଯ୍ୟକ୍ରମ ପ୍ରକାଶ ପାଇଥିଲା । ଗତକାଲି ସକାଳେ ଅରିଜିତ ପସାୟତ ଭୁବନେଶ୍ବରରେ ମଧ୍ୟ ପହଞ୍ଚିଥିଲେ । ସରକାରଙ୍କ ନିଷ୍ପତ୍ତି ଅନୁସାରେ ରତ୍ନଭଣ୍ଡାର ଖୋଲିବା ନେଇ ସୂଚନା ଦେଲେ । କିନ୍ତୁ ଗତକାଲି ବିଳମ୍ବିତ ସନ୍ଧ୍ୟାରେ ନୂଆ କମିଟି ନେଇ ଘୋଷଣା କଲେ ଆଇନ ମନ୍ତ୍ରୀ ପୃଥିବୀରାଜ ହରିଚନ୍ଦନ ।
ହାଇକୋର୍ଟଙ୍କ ନିର୍ଦ୍ଦେଶ ପରେ ରତ୍ନଭଣ୍ଡାର ଯାଞ୍ଚ ସହ ଅଳଙ୍କାର ଗଣନା ପାଇଁ ନବୀନ ପଟ୍ଟନାୟକ ସରକାର 2024 ମାର୍ଚ୍ଚ 2 ରେ ଉଚ୍ଚସ୍ତରୀୟ କମିଟି ଗଠନ କରିଥିଲେ । ବିଜେଡିର ବରିଷ୍ଠ ବିଧାୟିକା ପ୍ରମିଳା ମଲ୍ଲିକ କହିଛନ୍ତି, "ସେମାନେ କେତେବେଳେ କଣ କହୁଛନ୍ତି, ତାହା ଜଣାପଡୁନାହିଁ । ତାଙ୍କର କଣ ଉଦ୍ଦେଶ୍ୟ ସାରା ଓଡ଼ିଶାବାସୀ ଜାଣିଛନ୍ତି । କେତେବେଳେ ରତ୍ନଭଣ୍ଡାର ଖୋଲିବା ତାରିଖ ଘୋଷଣା କରୁଛନ୍ତି, ପୁଣି ପରେ ମନା କରୁଛନ୍ତି । ତାଙ୍କର ଉଦେଶ୍ୟ ସେମାନେ ଠିକ କଥା କରିବେନାହିଁ । ଠିକ୍ ବାଟରେ ଯିବେ ନାହିଁ । ଖାଲି ଲୋକଙ୍କୁ ଭୁଆଁ ବୁଲେଇବେ । ନିର୍ଦ୍ଦିଷ୍ଟ ଭାବେ ତାଙ୍କର ମନ୍ଦ ଉଦ୍ଦେଶ୍ୟ ରହିଛି । ନହେଲେ ମନ୍ଦ ଉଦ୍ଦେଶ୍ୟ ରଖି ରତ୍ନଭଣ୍ଡାର କମିଟି ଭଙ୍ଗାଯାଇଛି । ଅରିଜିତ ପଶାୟତଙ୍କୁ ମନ୍ଦ ଉଦ୍ଦେଶ୍ୟ ରଖି ହଟେଇ ଦିଆଗଲା । ଓଡ଼ିଶାର ସେ ଜଣେ ସୁନାମଧନ୍ୟ ବ୍ୟକ୍ତି ।"
ପୂର୍ବତନ ମନ୍ତ୍ରୀ ତଥା କଂଗ୍ରେସ ନେତା ପଞ୍ଚାନନ କାନୁନଗୋ କହିଛନ୍ତି, "କାହିଁକି କମିଟି ଭାଙ୍ଗିଲେ କିଛି ବୁଝାପଡୁନାହିଁ । କମିଟି ଭାଙ୍ଗିବାର କୌଣସି କାରଣ ହିଁ ନଥିଲା । ରତ୍ନଭଣ୍ଡାରକୁ ନେଇ ବୋଧେ କୌଣସି ଅସ୍ପଷ୍ଟ ଚିତ୍ର ରହିଛି ଆମେ ସନ୍ଦେହ କରୁଛୁ । ଯେତେବେଳେ ନୀଳମଣି ରାଉତରାୟ ମୁଖ୍ୟମନ୍ତ୍ରୀ ଥିଲେ ସେତେବେଳେ ବିଶ୍ବଭୂଷଣ ହରିଚନ୍ଦନ ଆଇନ ମନ୍ତ୍ରୀ ଥିଲେ । କଥା ସେବେଳୁ ହୋଇଛି । ତାଙ୍କ ପୁଅ ପୃଥ୍ବୀରାଜ ହରିଚନ୍ଦନ ଏବେ ଆଇନ ମନ୍ତ୍ରୀ । ସେ 2 ଜଣ ହିଁ କହିପାରିବେ କାହିଁକି କମିଟି ପରିବର୍ତ୍ତନ ହେଲା । ବର୍ତ୍ତମାନର କମିଟି ଅଧ୍ୟକ୍ଷଙ୍କ ବାପା ହିନ୍ଦୁ ମହାସଭା ନେତା ଥିଲେ । କିନ୍ତୁ କମିଟି କାହିଁକି ଭାଙ୍ଗିଲେ ଆଇନ ମନ୍ତ୍ରୀ ହିଁ କହିପାରିବେ ।"
ଏହା ବି ପଢନ୍ତୁ- କେବେ ଖୋଲିବ ରତ୍ନଭଣ୍ଡାର ଭଣ୍ଡାର, ଏମିତି କହିଲେ ଜଷ୍ଟିସ ଅରିଜିତ ପଶାୟତ
ବରିଷ୍ଠ ସାମ୍ବାଦିକ ପ୍ରସନ୍ନ ମହାନ୍ତି କହିଛନ୍ତି ଯେ, ରତ୍ନଭଣ୍ଡାର ଖୋଲିବା ଉପରେ ବିଶ୍ବର ନଜର ରହିଛି । ରତ୍ନଭଣ୍ଡାର ଖୋଲିବା ତାରିଖ ବାରମ୍ବାର ବଦଳୁଛି । କୌଣସି ସ୍ପଷ୍ଟ ଆଭାସ ଆସୁନାହିଁ । ନିର୍ବାଚନ ପ୍ରତିଶ୍ରୁତି ଅନୁସାରେ ନୂଆ ସରକାର ଅଗ୍ରସର ହେଉଛନ୍ତି । ରତ୍ନଭଣ୍ଡାର ଖୋଲିବା ନେଇ ଆଭାସ ମିଳିଛି । ଆଉ ଏହାର ପ୍ରକ୍ରିୟା ଆରମ୍ଭ ହୋଇଯାଇଛି । ରତ୍ନଭଣ୍ଡାର ଠାରୁ ଅଧିକ ଗୁରୁତ୍ବ ରଖୁଛି ଶ୍ରୀମନ୍ଦିର ସୁରକ୍ଷା । ପାଣି ଗଳୁଥିବା ଅଭିଯୋଗ ଆସୁଛି । ଏହାର ମରାମତି ଲାଗି ରଥଯାତ୍ରା ହିଁ ପ୍ରକୃଷ୍ଟ ସମୟ । ସରକାର ଯେତେବେଳେ ବଦଳିଲା, କମିଟି ମଧ୍ୟ ନୂଆ ସରକାର ବଦଳେଇ ନୂଆ କମିଟି ଗଠନ କରିଛନ୍ତି । କମିଟି ବଦଳିବା ଏକ ଗତାନୁଗତିକ ପ୍ରକ୍ରିୟା । କମିଟି ବଦଳିବାର ଆବଶ୍ୟକତା ଅନୁଭବ କରି ବଦଳେଇଛନ୍ତି । କମିଟି ବଦଳୁ କିନ୍ତୁ ରତ୍ନଭଣ୍ଡାର ଖୋଲି ଯାହା ଆବଶ୍ୟକ ତାହା କରାଯାଉ ।
ଇଟିଭି ଭାରତ, ଭୁବନେଶ୍ବର
