ପୁରୀ: ପାଖେଇ ଆସୁଛି ମହାପ୍ରଭୁଙ୍କର ଘୋଷଯାତ୍ରା । ଆସନ୍ତା 7 ଜୁଲାଇରେ ହେବାକୁ ଥିବା ଏହି ଦିବ୍ୟ ରଥଯାତ୍ରାରେ ସାମିଲ ହେବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ରାଷ୍ଟ୍ରପତିଙ୍କ ପୁରୀ ଗସ୍ତ କାର୍ଯ୍ୟକ୍ରମକୁ ସଫଳ କରିବା ପାଇଁ ପୁରୀ ଜିଲ୍ଲା ପ୍ରଶାସନ ପକ୍ଷରୁ ଚାଲିଛି ପ୍ରସ୍ତୁତି। ଚଳିତ ବର୍ଷ ରଥଯାତ୍ରାରେ ପ୍ରବଳ ଭକ୍ତଙ୍କ ସମାଗମ ହେବା ସହ ରାଷ୍ଟ୍ରପତିଙ୍କ ଗସ୍ତ ଥିବାରୁ କଡ଼ା ସୁରକ୍ଷା ବଳୟ ମଧ୍ୟରେ ରହିବ ପୁରୀ ସହର । ପୁରୀ ପୋଲିସ ପକ୍ଷରୁ ଏନେଇ ସମସ୍ତ ପ୍ରସ୍ତୁତି କରାଯାଉଥିବା ବେଳେ ସହରରେ ଟ୍ରାଫିକ ସୁପରିଚାଳନା ପାଇଁ ଜଣେ ଦକ୍ଷ ଏଡିଜି ଦାୟିତ୍ଵ ଭାରରେ ରହିଥିବା ସୂଚନା ଦେଇଛନ୍ତି ପୁରୀ ଏସପି ପିନାକ ମିଶ୍ର । ଏହା ସହିତ ଏକ ସାମ୍ବାଦିକ ସମ୍ମିଳନୀର ଆୟୋଜନ କରି ଏସପି ରଥଯାତ୍ରା ପାଇଁ କରାଯାଇଥିବା ସୁରକ୍ଷା ବ୍ୟବସ୍ଥା ବିଷୟରେ ସୂଚନା ଦେଇଛନ୍ତି ।
ଚଳିତ ବର୍ଷ ରଥଯାତ୍ରା ଦିନ ନେତ୍ରୋତ୍ସବ, ନବଯୌବନ ଓ ରଥଯାତ୍ରାର ନୀତିକାନ୍ତି ଗୋଟିଏ ଦିନରେ ଥିବାରୁ ଭକ୍ତଙ୍କ ପାଇଁ ନବଯୌବନ ଦର୍ଶନ ବନ୍ଦ ରହିବ। ତେବେ ନୀତିକାନ୍ତି କିଭଳି ଶୃଙ୍ଖଳିତ ଭାବେ ହୋଇପାରିବ ଜିଲ୍ଲା ପ୍ରଶାସନ ସହିତ ଛତିଶା ନିଯୋଗ ଏବଂ ବିଭିନ୍ନ ବ୍ୟକ୍ତି ବିଶେଷଙ୍କ ପରାମର୍ଶରେ ସମସ୍ତ ପ୍ରକାରର ବ୍ୟବସ୍ଥା ହେବ ବୋଲି କହିଛନ୍ତି ପୁରୀ ଏସପି । ତେବେ ସମଙ୍ଗ ପାର୍କିଂରେ ରାଷ୍ଟ୍ରପତିଙ୍କ ହେଲିକପ୍ଟର ଅବତରଣ କରିବା ପାଇଁ ଅସ୍ଥାୟୀ ହେଲିପ୍ୟାଡ ବ୍ୟବସ୍ଥା କରାଯାଇ ହେଲିପ୍ୟାଡ ନିର୍ମାଣ କରାଯାଉଛି । ନବନିର୍ମିତ ଶ୍ରୀସେତୁ ଓ ଶ୍ରୀମାର୍ଗ ଦେଇ ଶ୍ରୀମନ୍ଦିର ଠାରେ ରାଷ୍ଟ୍ରପତି ପହଞ୍ଚିବାର କାର୍ଯ୍ୟକ୍ରମ ରହିଥିବା ଜଣାପଡିଛି । ତେବେ ରାଷ୍ଟ୍ରପତିଙ୍କ ଗସ୍ତ ଦୃଷ୍ଟିରୁ ପ୍ରୋଟକଲ୍ ଅନୁଯାୟୀ ସବୁ ବ୍ୟବସ୍ଥା କରାଯାଉଥିବା ପୁରୀ ଏସପି କହିଛନ୍ତି ।
ଗତ 2022 ନଭେମ୍ବର 10 ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ପ୍ରଥମେ ଶ୍ରୀମନ୍ଦିର ଆସିଥିଲେ । ତେବେ ଆଗାମୀ ରଥଯାତ୍ରାରେ ରାଷ୍ଟ୍ରପତିଙ୍କ ଏହା ଦ୍ଵିତୀୟ ପୁରୀ ଗସ୍ତ ରହିବ । ଏଣୁ ରାଷ୍ଟ୍ରପତିଙ୍କ କାର୍ଯକ୍ରମକୁ ସଫଳ କରିବା ପାଇଁ ପୁରୀ ଜିଲ୍ଲା ପ୍ରଶାସନ ସମ୍ପୂର୍ଣ ପ୍ରସ୍ତୁତ ରହିଛି । ଚଳିତ ବର୍ଷ ରଥଯାତ୍ରା ଏକ ବିରଳ ରଥଯାତ୍ରା ହେବାକୁ ଯାଉଥିବାବେଳେ ଏଥିରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସାମିଲ ହେଉଥିବାରୁ ଏହା ଏକ ଐତିହାସିକ ରଥଯାତ୍ରା ଭାବେ ପରିଗଣିତ ହେବ ବୋଲି ସମସ୍ତଙ୍କର ଆଶା ରହିଛି । ଯାହା ପାଇଁ ଖୋଦ ଆଇନ ମନ୍ତ୍ରୀ ମଧ୍ୟ ପୁରୀ ଯାଇ ସୁରକ୍ଷା ବ୍ୟବସ୍ଥାକୁ କଡ଼ା କଡ଼ି କରବା ସହିତ କାର୍ଯ୍ୟ ସମୀକ୍ଷା ମଧ୍ୟ କରିଛନ୍ତି ।
ଇଟିଭି ଭାରତ, ପୁରୀ
