ତେଜିଲା 'ସୁଭଦ୍ରା' ରାଜନୀତି, ବିଜେପିକୁ ଟାର୍ଗେଟ କଲେ ବିରୋଧୀ, ଜବାବ ଦେଲା ଶାସକ ଦଳ - Subhadra Politics

Subhadra Scheme Politics: ରାଜ୍ୟରେ ସୁଭଦ୍ରା ଯୋଜନା ଶୁଭାରମ୍ଭ ପରେ ଜୋର ଧରିଲା ରାଜନୀତି । ବିରୋଧୀ ବିଜେଡି ଓ କଂଗ୍ରେସ ରାଜ୍ୟରେ ବିଜେପି ସରକାରକୁ କଲେ ଟାର୍ଗେଟ । ଏହି ପ୍ରସଙ୍ଗରେ ମତ ରଖିଛନ୍ତି ରାଜନୀତି ସମୀକ୍ଷକ । ଆସନ୍ତୁ ଜାଣିବା ।

ଭୁବନେଶ୍ବର: ବିକାଶ ନା ଭୋଟ ବ୍ୟାଙ୍କ ପଲିଟିକ୍ସ ? ରାଜ୍ୟରେ ସୁଭଦ୍ରା ଯୋଜନା ଶୁଭାରମ୍ଭ ପରେ ଏମିତି କିଛି ପ୍ରଶ୍ନ ଉଠାଇଛନ୍ତି ବିରୋଧୀ । ସରକାରୀ ଅର୍ଥରେ ଦଳର ଭୋଟ ବ୍ୟାଙ୍କକୁ ଶାସକ ଦଳ ସଶକ୍ତ କରୁଥିବା ବିରୋଧୀ ଅଭିଯୋଗ କରୁଛନ୍ତି । 2024 ସାଧାରଣ ନିର୍ବାଚନ ପୂର୍ବରୁ ରାଜ୍ୟରେ ଦୀର୍ଘ ବର୍ଷ କ୍ଷମତାରେ ଥିବା ବିଜେଡି ବିରୋଧରେ ମଧ୍ୟ ସମାନ ଅଭିଯୋଗ ରହିଥିଲା । କିନ୍ତୁ ବିଜେଡିର ମହିଳାର ଭୋଟ ବ୍ୟାଙ୍କକୁ ବିଜେପି ସୁଭଦ୍ରା ଯୋଜନା ଦ୍ୱାରା ପ୍ରଭାବିତ କରିଥିଲା ବୋଲି କହିଛନ୍ତି ରାଜନୀତି ସମୀକ୍ଷକ ।

2019 ଓ 2024ରେ ବଢିଛି ମହିଳାଙ୍କ ମତଦାନ :
ନିର୍ବାଚନ ଆୟୋଗଙ୍କ ସୂଚନା ଅନୁସାରେ, ଓଡି଼ଶାରେ 2024 ନିର୍ବାଚନରେ ମୋଟ 3 କୋଟି 36 ଲକ୍ଷ 46ହଜାର 762 ଭୋଟର ଥିଲେ । ରାଜ୍ୟରେ 1 କୋଟି 70 ଲକ୍ଷ 39 ହଜାର 900 ପୁରୁଷ ଓ 1 କୋଟି 66 ଲକ୍ଷ 3 ହଜାର 401 ମହିଳା ଓ 3 ହଜାର 461 ତୃତୀୟ ଲିଙ୍ଗୀ ଭୋଟର ଅଛନ୍ତି । ସେହିପରି 2.5 କୋଟିରୁ ଅଧିକ ଭୋଟର ମତାଧିକାର ସାବ୍ୟସ୍ତ କରିଥିଲେ । ପୁରୁଷଙ୍କଠାରୁ ମହିଳା ମତଦାତାଙ୍କ ପ୍ରତିଶତ ଅଧିକ । ରାଜ୍ୟରେ ହାରାହାରି 74.44% ମତଦାନ ହୋଇଥିବାବେଳେ 75.55% ମହିଳା ଓ 73.37% ପୁରୁଷ ମତଦାନ କରିଥିଲେ । 2019ରେ ମଧ୍ୟ ମହିଳାଙ୍କ ମତଦାତାଙ୍କ ହାର ଅଧିକ ଥିଲା । ମୋଟ 3 କୋଟି 24 ଲକ୍ଷ 97 ହଜାର 762 ଭୋଟରଙ୍କ ମଧ୍ୟରୁ 73.09% ମତଦାନ କରିଥିଲେ । ପୁରୁଷ 72.07% ଓ ମହିଳା 74.18% ମତଦାନ କରିଥିଲେ ।

'ମିଥ୍ୟା ପ୍ରତିଶ୍ରୁତି ଦେଇ ମହିଳାଙ୍କୁ ମୋହରା'କଂଗ୍ରେସ ମୁଖପାତ୍ର ରଜନୀ ରଞ୍ଜନ ମହାନ୍ତି କହିଛନ୍ତି, "ମିଥ୍ୟା ପ୍ରତିଶ୍ରୁତି ଦେଇ ମହିଳାମାନଙ୍କୁ ମୋହରା ବନାଯାଉଛି । ମହିଳାମାନେ ସୁଭଦ୍ରା ଯୋଜନାର ଟଙ୍କା ନେଇ ନିଜର ଆବଶ୍ୟକତା ମେଣ୍ଟାଇବେ । ଏହାଦ୍ୱାରା ମହିଳାଙ୍କର ବିକାଶ କିମ୍ବା ସଶକ୍ତିକରଣ ହେବ ନାହିଁ । ଏ ସରକାରର ଆୟୁଷ ବହୁତ କମ ଦିନ । ରାଜ୍ୟର ମହିଳା ଆଗାମୀ ଦିନରେ ଆହୁରି ଭଲ ନିଷ୍ପତ୍ତି ନେବେ । ମହିଳା ଚାହୁଁଛନ୍ତି ଦରଦାମ କମୁ । ବିଜେପି ଓ ବିଜେଡିର ଏଜେଣ୍ଡା ସମାନ । ମହିଳାଙ୍କ ଭୋଟ ବଦଳରେ ମହିଳାଙ୍କ ବିକାଶ ଚାହୁଁଥିଲେ 70 ଭାଗ ମହିଳା ରକ୍ତ ହୀନତାର ଶିକାର ହୋଇନଥାନ୍ତେ । 24 ବର୍ଷର ସରକାର ବିଜେଡି ଯାଇଛି । ସମାନ କଥା ବିଜେପି ଏବେ ଦୋହରାଉଛି । ସମୟ ସବୁ କଥାର ଉତ୍ତର ଦେବ ।"

Subhadra Scheme Politics (x)

'ମହିଳାଙ୍କୁ ସଶକ୍ତ କରିବାକୁ ଯୋଜନା, ଭୋଟ ପାଇଁ ନୁହେଁ'
ବିଜେଡି ମୁଖପାତ୍ର ସୁଲତା ଦେଓ କହିଛନ୍ତି, "ରାଜ୍ୟରେ ପ୍ରାୟ 2 କୋଟି 50 ହଜାର ମହିଳା ଅଛନ୍ତି । ମୋଟ ମହିଳାଙ୍କ ମଧ୍ୟରୁ 18ରୁ 21 ବର୍ଷ ଯୁବତୀ ସଂଖ୍ୟା ପ୍ରାୟ 13 ପ୍ରତିଶତ । ସେହିପରି 60 ବର୍ଷରୁ ଉର୍ଦ୍ଧ୍ବ 17 ପ୍ରତିଶତ ମହିଳା ରହିଛନ୍ତି । ଉଭୟ ମିଳିତ ଭାବେ ମୋଟ ମହିଳାଙ୍କର 30 ପ୍ରତିଶତ ହେବେ । ଯେଉଁମାନେ ସିଧାସଳଖ ସୁଭଦ୍ରା ଯୋଜନାରୁ ବାଦ ପଡିବେ । ସୁଭଦ୍ରା ଯୋଜନାର ପ୍ରଥମ କିସ୍ତି ଦେବା ପୂର୍ବରୁ ତେଲ, କ୍ଷୀର ଓ ଅନ୍ୟାନ୍ୟ ସାମଗ୍ରୀ ଦର ବଢ଼ିଗଲା । ଦ୍ଵିତୀୟ କିସ୍ତି ଦେବା ବେଳକୁ ଆଉ କିଛିର ଦର ବଢ଼ାଇବେ । ମହିଳାଙ୍କ ଭୋଟ ନେବାକୁ ବିଜେଡି କୌଣସି ଯୋଜନା କରେ ନାହିଁ । ବିଜେଡି ସରକାରରେ ମହିଳାଙ୍କର ଅର୍ଥନୈତିକ ଓ ସାମାଜିକ ବିକାଶ ହୋଇଛି । ବିଜେଡି ସରକାର 15 ଲକ୍ଷ ପର୍ଯ୍ୟନ୍ତ ମାଗଣା ସୁଧରେ ଋଣ ଦେଉଥିଲା । ବିଜନେସ ଶିଖିବାକୁ ମହିଳାଙ୍କୁ ଦୁବାଇ ଓ ଅନ୍ୟାନ୍ୟ ଦେଶକୁ ପଠାଉଥିଲୁ । ବିଜେପି ଭୋଟ ପାଇଁ ଏହା କରୁଛନ୍ତି । ମହିଳା ଉଚିତ ଜବାବ ଦେବେ ।"

Subhadra Launching (x)

'ମହିଳାଙ୍କୁ ବିଜେଡିର ପ୍ରତାରଣାର ଫଳ ମୋହନ ସରକାର'ବିଜେପିର ସହ ପ୍ରଭାରୀ ଲତା ଉସେଣ୍ଡୀ କହିଛନ୍ତି, "ବିଜେଡି ପାଖରେ ମହିଳା ଭୋଟ ବ୍ୟାଙ୍କ ବଞ୍ଚିନାହିଁ । ରାଜ୍ୟରେ ମହିଳାଙ୍କ ସମର୍ଥନରେ ବିଜେପିର ସରକାର ଗଠନ ହୋଇଛି । ରାଜ୍ୟରେ ୨୪ ବର୍ଷ ବିଜେଡି ଶାସନ କରିଛି । ମହିଳାଙ୍କ ସହିତ ବିଜେଡି ପ୍ରତାରଣା କରିଥିବା ନିର୍ବାଚନ ଫଳାଫଳରୁ ସ୍ପଷ୍ଟ ହୋଇଛି । ବିଜେପିକୁ ସରକାର ଗଢିବା ଲାଗି ସମର୍ଥନ ମିଳିଛି । ଭୋଟ ବ୍ୟାଙ୍କର କଥା ନୁହେଁ, ଜନସାଧାରଣଙ୍କ କଥା । ମହିଳାଙ୍କୁ ଆର୍ଥିକ ଓ ସାମାଜିକ ଭାବେ ଆଗକୁ ବଢ଼େଇବା ବିଜେପିର ନୀତି ।"

Subhadra Launching (x)

'ମହିଳା ସମର୍ଥନକୁ ପକ୍କା କରିବାକୁ ସୁଭଦ୍ରା ଯୋଜନା'ରାଜନୈତିକ ସମୀକ୍ଷକ ରବି ଦାସଙ୍କ କହିବା କଥା, "ବିଜେପି ଦୀର୍ଘ ଦିନ ଓଡିଶାରେ ବିରୋଧୀ ଦଳରେ ଥିଲା । ମିଶନ ଶକ୍ତି ଜରିଆରେ ମହିଳାଙ୍କ ଭୋଟ ଉପରେ ବିଜେଡିର ନିୟନ୍ତ୍ରଣ ଥିବା ବିଜେପି ଭଲରେ ଜାଣିଥିଲା । ସହାୟତା ବ୍ୟତିତ ବିଭିନ୍ନ କାର୍ଯ୍ୟକ୍ରମରେ SHGଙ୍କୁ ଅଂଶୀଦାର କରାଯାଉଥିଲା । ମହିଳାଙ୍କୁ ଲକ୍ଷ୍ୟ କରି ଗତ ନିର୍ବାଚନରେ କଂଗ୍ରେସ ପକ୍ଷରୁ ବଡ଼ ପ୍ରତିଶ୍ରୁତି ଦିଆଯାଇଥିଲା । କିନ୍ତୁ କଂଗ୍ରେସର ବାର୍ତ୍ତା ଲୋକଙ୍କ ପାଖରେ ପହଞ୍ଚିନଥିଲା । ସୁଭଦ୍ରା ଯୋଜନାରେ ସାହାଯ୍ୟରେ ସୁବିଧା ଯୋଗାଇବୁ ବୋଲି ବିଜେପିର ବାର୍ତ୍ତା ଲୋକଙ୍କ ପାଖରେ ପହଞ୍ଚିଲା । ମହିଳାଙ୍କୁ 50 ହଜାର ଟଙ୍କା ଦେବାକୁ ପ୍ରତିଶ୍ରୁତି ଦେଲେ । ଏହି କଥାକୁ ବ୍ୟାପକ ଭାବେ ଘରେ ଘରେ ପ୍ରଚାର କଲେ । ଏହାକୁ ନେଇ କିଛି ମହିଳାଙ୍କ ମନରେ ଦ୍ବନ୍ଦ୍ୱ ମଧ୍ୟ ସୃଷ୍ଟି ହୋଇଥିଲା । ଋଣ ବଦଳରେ ସହାୟତା କଥା କୁହାଯାଇଥିଲା । ତେଣୁ ନିର୍ବାଚନରେ ପ୍ରାୟ 40ରୁ 45 ପ୍ରତିଶତ ମହିଳା ବିଜେପିକୁ ସମର୍ଥନ କରିଥିବା ଲୋକନୀତି ରିପୋର୍ଟରୁ ଜଣାପଡିଛି । ସୁଭଦ୍ରା ଯୋଜନାର ବହୁଳ ପ୍ରଚାର ବିଜେଡିର ମହିଳା ଭୋଟ ବ୍ୟାଙ୍କକୁ ଭାଙ୍ଗିବାରେ ସଫଳ ହେଲା । ମହିଳା ସମର୍ଥନକୁ ପକ୍କା କରିବା ଲାଗି ବିଜେପି ସୁଭଦ୍ରା ଯୋଜନା ଆରମ୍ଭ କରିଛି ।"'ସୁଭଦ୍ରାରେ ଯାହା କହିଥିଲେ ତାହା ଦେଇନାହାନ୍ତି ସରକାର'ସମୀକ୍ଷକ ରବି ଦାସ ଏହା ମଧ୍ୟ କହିଛନ୍ତି, "ସୁଭଦ୍ରା ଯୋଜନାରେ ମୋହନ ସରକାର ଠକିଛନ୍ତି । ଯାହା କହିଥିଲେ ତାହା ଦେଇନାହାନ୍ତି । ଏକାବେଳେ କିମ୍ବା 2 ବର୍ଷରେ ନଦେଲେ ବି 5 ବର୍ଷରେ ଦେବେ । ଏକକାଳୀନ 50 ହଜାର ଦେବାର କ୍ଷମତା ଓଡିଶା ବଜେଟରେ ନାହିଁ । ମୋଦି ଗ୍ୟାରେଣ୍ଟି ହୋଇଥିଲେ ବି ଓଡିଶା ସରକାରଙ୍କ ଅର୍ଥରେ ଏହା ହେବ । ରାଜ୍ୟ ବଜେଟରେ ଚଳିତ ଆର୍ଥିକ ବର୍ଷରେ 10 ହଜାର କୋଟି ବ୍ୟବସ୍ଥା କରିଛନ୍ତି । ଏଥିପାଇଁ ମଧ୍ୟ ସରକାରଙ୍କୁ ଋଣ କରିବାକୁ ପଡିଛି । ରାଜ୍ୟ ବଜେଟରେ ଏକକାଳୀନ ଦେଇନପାରିବେ ଜାଣି ସୁଭଦ୍ରା ଯୋଜନାକୁ ସରକାର ସଂଶୋଧନ କରିଛନ୍ତି । 2019 ରେ ବିଜେଡି ଲାଗି କାଳିଆ ଓ 2024 ରେ ସୁଭଦ୍ରା ଯୋଜନା କାର୍ଯ୍ୟ କରିଛି ।"

'ଓଡି଼ଶା ତୁଳନାରେ ଅନ୍ୟ ରାଜ୍ୟରେ ମିଳୁଛି ଅଧିକ ସହାୟତା'

ସୁଭଦ୍ରା ଯୋଜନା ନାଁରେ ଓଡ଼ିଶାର ମହିଳାଙ୍କୁ ପ୍ରବଞ୍ଚନା କରିଛି ବିଜେପି।

ନିର୍ବାଚନୀ ଇସ୍ତାହାରରେ ଦେଇଥିବା ପ୍ରତିଶ୍ରୁତି ଭୁଲିଯାଇଛି ବିଜେପି।

ବିଭିନ୍ନ ମାନଦଣ୍ଡ ଯୋଗୁଁ ଯୋଜନାରୁ ରାଜ୍ୟର ଅନେକ ମହିଳା ବାଦ୍ ପଡ଼ିବେ ବୋଲି ଦଳର ନେତ୍ରୀ ଲୋପାମୁଦ୍ରା ବକ୍ସିପାତ୍ର କହିଛନ୍ତି। #BJPAntiOdisha pic.twitter.com/khQSqcnITa

— Biju Janata Dal (@bjd_odisha) September 16, 2024

"ମଧ୍ୟପ୍ରଦେଶରେ ମହିଳାଙ୍କୁ ମାସକୁ 1200 ଟଙ୍କା ମିଳୁଛି । ମହାରାଷ୍ଟ୍ରରେ 1500, କଂଗ୍ରେସ ଥିବା କର୍ଣ୍ଣାଟକରେ ମହିଳାଙ୍କୁ 2000 ଟଙ୍କା ମିଳୁଛି । ଓଡି଼ଶାରେ ସେହି ତୁଳନାରେ ବହୁତ କମ ମିଳୁଛି । ଓଡି଼ଶା ସରକାର ସୁଭଦ୍ରା ଯୋଜନାରେ 5 ବର୍ଷରେ 50 ହଜାର ଦେଲେ ମାସକୁ ହାରାହାରି ଏହା ୮୩୩ ଟଙ୍କା ହେଉଛି । ସେ ଦୃଷ୍ଟିରୁ ଏହା ବଡ଼ ଯୋଜନା ନୁହେଁ । କିନ୍ତୁ ବର୍ତ୍ତମାନ ପାଇଁ ଏହା ବିଜେପି ପାଇଁ ଏହା ଆବଶ୍ୟକ । ଆଗାମୀ ନିର୍ବାଚନରେ ବିଜେଡି ଓ କଂଗ୍ରେସ ଆହୁରି ପ୍ରତିଶ୍ରୁତି ଦେଇପାରିବେ । ଦୀର୍ଘ ବର୍ଷ ସରକାରରେ ଥିବାରୁ ରାଜ୍ୟର ଅର୍ଥନୈତିକ, ରାଜ୍ୟର ବ୍ୟବସ୍ଥା ଓ ମହିଳାଙ୍କ ସହ ସମ୍ପର୍କ ବାବଦରେ ବିଜେଡି ଭଲ ଭାବେ ଅବଗତ ଅଛି । ମହିଳାଙ୍କ ଆସ୍ଥା ଫେରାଇ ଆଣିବା ଲାଗି ବିଜେଡି ଏହା କରିପାରିବ । ସୁଭଦ୍ରା ଯୋଜନା କେତେ ପରିମାଣରେ ମହିଳାଙ୍କୁ ପ୍ରଭାବିତ କରିଛି, ତାହା ଆସନ୍ତା ପଞ୍ଚାୟତ ଓ ପୌର ନିର୍ବାଚନରେ ଜଣାପଡିବ ।"

ଇଟିଭି ଭାରତ, ଭୁବନେଶ୍ବର