ଭୁବନେଶ୍ବର: ରାଜଧାନୀରେ ବେଆଇନ ବାଣ ଗୋଦାମରେ ବିସ୍ଫୋରଣ ପରେ ଆକ୍ସନ ମୋଡକୁ ଆସିଛି କମିଶନରେଟ ପୋଲିସ । ବିସ୍ଫୋରଣ ପରେ ବାଣ ମହଜୁଦ ରଖାଯାଇଥିବା ଗୋଦାମ ଘରକୁ ପୋଲିସ୍ ଓ ରାଜସ୍ୱ ଅଧିକାରୀ ସିଲ କରିଛନ୍ତି । ଏହା ସହ ଘର ମାଲିକଙ୍କ ନାମରେ ମାମଲା ରୁଜୁ କରିବା ସହ କିଭଳି ଏହି ବାଣ ଗୋଦାମ ଚାଲିଥିଲା, ସେନେଇ କମିଶନରେଟ ପୋଲିସ ତନାଘନା ମଧ୍ୟ ଆରମ୍ଭ କରିଛି ।
- ସୋମବାର ହୋଇଥିଲା ବିସ୍ଫୋରଣ:
ତେବେ ସୂଚନା ଅନୁସାରେ, ଭୁବନେଶ୍ବର ଇନଫୋସିଟି ଥାନା ଚୁନୁକୋଳି ବସ୍ତି ନିକଟରେ ଏକ ଦୁଇମହଲା ଘରେ ଏହି ବେଆଇନ ବାଣ କାରବାର ଚାଲିଥିଲା । ତଳ ମହଲାରେ ନିଜେ ଘର ମାଲିକ ରହୁଥିବା ବେଳେ ଉପରେ ଚାଲିଥିଲା ବାଣ ଗୋଦାମ । ସୋମବାର ସନ୍ଧ୍ୟାରେ ବାଣ ଗୋଦାମରେ ଭୟଙ୍କର ବିସ୍ଫୋରଣ ହୋଇଥିଲା । ବିସ୍ଫୋରଣ ଏତେ ଭୟଙ୍କର ଥିଲା ଯେ, ଘର ଭିତରେ ଥିବା ଏକ ଗ୍ୟାସ ସିଲିଣ୍ଡର ମଧ୍ୟ ଫାଟି ଯାଇଥିଲା । ଫଳରେ ଘରର ଛାତ ଭୁଶୁଡିବା ସହ ସିଡି ଓ ତାଜା ମଧ୍ୟ ଭୁଶୁଡି ପଡ଼ିଥିଲା । ସମଗ୍ର ଏରିଆରେ ଲୋକଙ୍କ ମଧ୍ୟରେ ଏକ ପ୍ରକାର ଆତଙ୍କ ଖେଳିଯାଇଥିଲା ।
ସେପଟେ ଏଭଳି ବାଣ ବିସ୍ଫୋରଣ ପରେ କେହି ମୃତାହତ ହୋଇନଥିବା ବେଳେ ବିସ୍ଫୋରଣ ପୂର୍ବରୁ ଘର ବିଲ୍ଡିଂରେ ଥିବା ଲେଡିଜ ହଷ୍ଟେଲରୁ ଅନେକ ଛାତ୍ରୀ ବାହରକୁ ପଳାଇ ଆସିବାରୁ ସେମାନେ ଏକ ବଡ଼ ଅଘଟଣରୁ ଅଳ୍ପକେ ବର୍ତ୍ତି ଯାଇଥିଲେ । ଏପରିକି ସେମାନଙ୍କର କିଛି ସାମଗ୍ରୀ କିଛି ପୋଡି ଯାଇଛି । ଗାଡି ଭାଙ୍ଗି ନଷ୍ଟ ହୋଇଛି । ବାଣ ବିସ୍ଫୋରଣର ୨୪ଘଣ୍ଟା ବିତିବା ପରେ ଏବେ ଘରେ ଭଡାରେ ରହୁଥିବା ଯୁବତୀମାନେ ଆସି ସେମାନଙ୍କର ଜିନିଷପତ୍ର ନେଇଥିବା ଜଣାପଡ଼ିଛି ।
- ଗୋଦାମ ଘର ସିଲ୍:
ଏହି ଘଟଣା ପରେ ପୋଲିସ ନିଜଆଡୁ ମାମଲା ରୁଜୁ କରିଛି । ଏନେଇ ଇନଫୋସିଟି ଥାନାରେ ୫୪୭/୨୪ ରେ ମାମଲା ଦାୟର କରି ବିସ୍ଫୋରକ ଅଧିନିୟମ ଅନୁସାରେ, ତଦନ୍ତ କରିବା ସହ ଘଟଣାସ୍ଥଳରେ ପୋଲିସର ଫରେନସିକ ଟିମ୍ ପହଞ୍ଚିଛି । ସେପଟେ ପୋଲିସ ଘର ମାଲିକ ସହ ଏହି ବାଣ ଗୋଦାମ ଚଳାଇବାରେ ଆଉ କି’ଏ ସାମିଲ ଥିଲେ ସେନେଇ ତଦନ୍ତ ଚାଲିଥିବା ସୂଚନା ଦେଇଛନ୍ତି 6 ନମ୍ବର ଜୋନ ଏସିପି ରମେଶ ଚନ୍ଦ୍ର ବିଶୋଇ କହିଛନ୍ତି ।
ବାଣ ବିସ୍ଫୋରଣ ପରେ ଘଟଣାସ୍ଥଳରେ ସ୍ଥାନୀୟ ରାଜସ୍ବ ନିରୀକ୍ଷକ ଅଧିକାରୀ ପହଞ୍ଚି ଯାଞ୍ଚ କରିଛନ୍ତି । ବାଣ ବିସ୍ଫୋରଣ ଓ ଅଗ୍ନିକାଣ୍ଡରେ ହୋଇଥିବା କ୍ଷୟକ୍ଷତି ଯାଞ୍ଚ କରାଯାଇଛି । ଏପରିକି ଘରଟି ସରକାରୀ ନା ବେସରକାରୀ ଜାଗାରେ ସେନେଇ ମଧ୍ୟ ତନାଘନା କରିଛନ୍ତି । ଗୋଦାମ ଘରକୁ ସିଲ୍ କରିବା ସହ ଅଧିକ ତଦନ୍ତ କରୁଛି ଇନଫୋସିଟି ଥାନା ପୋଲିସ । ଏନେଇ ଯାଞ୍ଚ ପାଇଁ ଆସିଥିବା ରାଜସ୍ବ ନିରୀକ୍ଷକ କହିଛନ୍ତି,"ବର୍ତ୍ତମାନ ଯାଞ୍ଚ ଚାଲିଛି । ବିସ୍ଫୋରଣ ଫଳରେ କ'ଣ କ୍ଷୟକ୍ଷତି ହୋଇଛି ତାହାର ଯାଞ୍ଚ କରାଯାଉଛି ।"
ଏହା ମଧ୍ୟ ପଢ଼ନ୍ତୁ...ପୁରୀରେ ବାଣ ବିସ୍ଫୋରଣ ଘଟଣା: ଜଣେ ମୃତ, 2 ଜଣ ଚିକିତ୍ସାଧୀନ ଏହା ମଧ୍ୟ ପଢ଼ନ୍ତୁ...କେରଳ ମନ୍ଦିରରେ ଚାଲିଥିଲା ଉତ୍ସବ, ବାଣ ଦେକାନରେ ନିଆଁ ଲାଗି ବଡ଼ ବିସ୍ଫୋରଣ, ୧୫୦ ଗୁରୁତର ଏହା ମଧ୍ୟ ପଢ଼ନ୍ତୁ...ବାଣ ଗୋଦାମରେ ବିସ୍ଫୋରଣ, ବ୍ୟବସାୟୀ ଜୀବନ୍ତ ଦଗ୍ଧ |
- ପୂର୍ବର ବାଣ ବିସ୍ଫୋରଣ ଘଟଣା:
୪ ଏପ୍ରିଲ ୨୦୨୩ ରାଜଧାନୀରେ ସହୀଦନଗର ଥାନା ଭିଏସଏସ ନଗରର ଗୋଜବାୟାଣୀ ବସ୍ତିରେ ଘଟିଥିଲା ଭୟଙ୍କର ବାଣ ବିସ୍ଫୋରଣ । ବିସ୍ଫୋରଣ ଫଳରେ ଘରେ ଥିବା ଶିବାନନ୍ଦ ତାଡ ନାମକ ଜଣେ ଯୁବକର ମୃତ୍ୟୁ ହୋଇଥିଲା । ସେହି ଘଟଣାରେ ପୋଲିସ ଏକ୍ସପ୍ଲୋସିଭ ଆକ୍ଟରେ ତଦନ୍ତ କରିଥିଲେ ମଧ୍ୟ କୋୖଣସି ଆଖିଦୃଶିଆ କାର୍ଯାନୁଷ୍ଠାନ ହୋଇନଥିଲା । ସେହିପରି ଗତ ବର୍ଷ ୩୧ ଅକ୍ଟୋବର ୨୦୨୩ରେ ବାଲିପାଟଣା ଥାନା ବାଳକାଠି ଓ ତ୍ରାହିଅଚ୍ୟୁତ ରୋଡରେ ଥିବା ଏକ ନଦୀ ପଠାରେ ବାଣ ଗୋଦାମରେ ଅଘଟଣ ଘଟିଥିଲା । ବାଣ ବିସ୍ଫୋରଣ ଯୋଗୁଁ ଜଣେ ଗୁରୁତର ହୋଇଥିଲେ ।
- 2018 ରେ ପ୍ରାଣ ହରାଇଥିଲେ ଦମ୍ପତି:-
ସେହିପରି ୨୦୧୮ ମସିହା ନଭେମ୍ବର ପହିଲାରେ ବାଲିପାଟଣା ଥାନା ନୂଆସାହିରେ ମଧ୍ୟ ଭୟଙ୍କର ବାଣ ବିସ୍ଫୋରଣ ହୋଇଥିଲା । ଜ୍ଞାନରଞ୍ଜନ ମିଶ୍ରଙ୍କ ଘରେ ବାଣ ବିସ୍ଫୋରଣ ଯୋଗୁଁ ଦମ୍ପତିଙ୍କର ମୃତ୍ୟୁ ହୋଇଥିଲା । ଘରେ ବେଆଇନ ବାଣ ତିଆରି କରୁଥିବା ଯୋଗୁଁ ଏଭଳି ଅଘଟଣ ଘଟିଥିବା ସେତେବେଳେ ସାମ୍ନାକୁ ଆସିଥିଲା ।
ଇଟିଭି ଭାରତ, ଭୁବନେଶ୍ବର
