ବୌଦ୍ଧ: ଉପାନ୍ତ ଅଞ୍ଚଳରେ ଆଜି ମଧ୍ୟ ଅପହଞ୍ଚ ମୋବାଇଲ୍ ଓ ଇଣ୍ଟରନେଟ ସେବା । ଡିଜିଟାଲ ଇଣ୍ଡିଆର ସ୍ବପ୍ନ ଦେଖାଇ ଉପାନ୍ତ ଅଞ୍ଚଳର ଅଧିବାସୀଙ୍କୁ ମୋଦି ସରକାର ଭଣ୍ଡେଇ ଦେଇଥିବା ଅଭିଯୋଗ କରି ପ୍ରଧାନମନ୍ତ୍ରୀ ମୋଦି ଓ କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବଙ୍କ କୁଶ ପୁତ୍ତଳିକା ଦାହ କଲେ ଆନ୍ଦୋଳନକାରୀ । ଚନ୍ଦ୍ର ପୃଷ୍ଠରେ ଘର ତୋଳିବା ପାଇଁ ବିଭିନ୍ନ ସ୍ତରରେ ଉଦ୍ୟମ ଆରମ୍ଭ ହୋଇଥିବାବେଳେ ବୌଦ୍ଧ ଜିଲ୍ଲାର ବିଭିନ୍ନ ସ୍ଥଆନରେ ଆଜି ମଧ୍ୟ ଅପହଞ୍ଚ ମୋବାଇଲ୍ ଓ ଇଣ୍ଟରନେଟ ସେବା । ଫଳରେ ହଜାର ହଜାର ଅଧିବାସୀ ଡିଜିଟାଲ ଇଣ୍ଡିଆର ବାହାର ଜଗତରେ ବାସ କରିବା ଭଳି ମନେହେଉଛି । ଏନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି ।
ଇଣ୍ଟରନେଟ ସେବାରୁ ବଞ୍ଚିତ ମହାଲିକପଡା ପଞ୍ଚାୟତ:
ଓଡ଼ିଶାର ମଧ୍ୟ ଭାଗରେ ଥିବା ବୈଦ୍ଧ ଜିଲ୍ଲାର ଉପାନ୍ତ ମହାଲିକପଡା ପଞ୍ଚାୟତ ଆଜି ପର୍ଯ୍ୟନ୍ତ ଡିଜିଟାଲ ଇଣ୍ଡିଆରେ ଯୋଡି ହୋଇ ପାରିନାହିଁ । ହରଭଙ୍ଗା ବ୍ଲକର ଆଦିବାସୀ ଅଧ୍ୟୁଷିତ ମହାଲିକପଡା ପଞ୍ଚାୟତରେ ସ୍ବାଧୀନତାର ୭୭ ବର୍ଷ ପରେ ମଧ୍ୟ ସ୍ଥାନୀୟ ଅଧିବାସୀ ବାହ୍ୟ ଜଗତରୁ ଏକ ପ୍ରକାର ବିଛିନ୍ନ ହୋଇରହିଛନ୍ତି । ଏଠାରେ କୌଣସି ମୋବାଇଲ୍ ସେବା କିମ୍ବା ଇଣ୍ଟରନେଟ ସେବା ଆଦୌ ନାହିଁ । ତେଣୁ ମହାଲିକପଡା ଅଞ୍ଚଳବାସୀ ଆମ୍ବୁଲାନ୍ସ ସେବା, ଅଗ୍ନିଶମ ସେବା, ଶିକ୍ଷା ଓ ସର୍ବୋପରି ସରକାରୀ ଯୋଜନାର ସୁଫଳ ପାଇପାରୁ ନାହାନ୍ତି ।
ହନ୍ତସନ୍ତ ମହାଲିକପଡା ପଞ୍ଚାୟତବାସୀ:
ସରକାର ସମସ୍ତ ଯୋଜନାକୁ ଅନଲାଇନ ମାଧ୍ୟମରେ ହିତାଧିକାରୀଙ୍କ ଠାରୁ ଗ୍ରହଣ କରୁଥିବାବେଳେ ମହାଲିକପଡା ଅଞ୍ଚଳବାସୀ ଏଥିରୁ ସମ୍ପୂର୍ଣ୍ଣ ବଞ୍ଚିତ ଥିବା ଅଭିଯୋଗ ହୋଇଛି । ବର୍ତ୍ତମାନ ସମୟରେ ରାଜ୍ୟ ସରକାରଙ୍କ ସୁଭଦ୍ରା ଯୋଜନା ପାଇଁ ସ୍ଥାନୀୟ ମହିଳାମାନେ ଅନ୍ୟ ପଞ୍ଚାୟତ କିମ୍ବା ଇଣ୍ଟରନେଟ ସେବା ମିଳୁଥିବା ଅଞ୍ଚଳକୁ ଯାଇ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ପ୍ରଧାନମନ୍ତ୍ରୀଙ୍କୁ ଦାବିପତ୍ର:
ପୂର୍ବରୁ ଅଞ୍ଚଳର ଅଧିବାସୀ ବାରମ୍ବାର ଅଭିଯୋଗ ତଥା ଗୁହାରି କଲେ ମଧ୍ୟ କୈାଣସି ସୁଫଳ ନମିଳିବାରୁ ଆଜି ମହାଲିକପଡା ବିକାଶ ପରିଷଦର ସଦସ୍ୟମାନେ ବୈଦ୍ଧ ଜିଲ୍ଲାପାଳଙ୍କ ଜରିଆରେ ପ୍ରଧାନମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ଏଥିସହିତ ବିକାଶ ପରିଷଦର କର୍ମକର୍ତ୍ତାମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ ସହିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଦୂର ସଞ୍ଚାର ମନ୍ତ୍ରୀ ଅଶ୍ବିନୀ ବୈଷ୍ଣବଙ୍କ କୁଶ ପୁତ୍ତଳିକା ଦାହ କରିଛନ୍ତି ।
ଇଟିଭି ଭାରତ, ବୌଦ୍ଧ
