ଢେଙ୍କାନାଳ: ରାଜନୈତିକ ଶତ୍ରୁତାରୁ ଗଡିଲା ମୁଣ୍ଡ ! ହିନ୍ଦୋଳ ଅଞ୍ଚଳରେ ଦୁର୍ବୁତ୍ତଙ୍କ ଗୁଳି ମାଡ଼ରେ ଟଳିଲେ ଜଣେ ଯୁବକ । ରାସୋଳ ଥାନା ଅନ୍ତର୍ଗତ ନୂଆବଗ କେନାଲ ହୁଡାରେ ଜଣେ ଯୁବକଙ୍କୁ ଗୁଳିମାଡ଼ ହୋଇଛି । ଘଟଣା ସ୍ଥଳରେ ହିଁ ଉକ୍ତ ଯୁବକଙ୍କର ମୃତ୍ୟୁ ଘଟିଛି । ତେବେ ମୃତ ଯୁବକ ଜଣକ ହେଲେ ବାଲିମି ଥାନା ଅନ୍ତର୍ଗତ ମହାଲୁଣ୍ଡା ଗ୍ରାମର ସୁବାଷ ସାହୁ ବୋଲି ଜଣାପଡିଛି ।
ସୂଚନା ଯୋଗ୍ୟ ଯେ, ମୃତ ସୁବାଷ ଜଣେ ବିଜେପି ଦଳର ଦୃଢ଼ ସମର୍ଥକ ଓ ତାଙ୍କ ଗ୍ରାମ ଜଳ ବିଭାଜିକା ମିଶନ କମିଟିର ସଭାପତି ରହିଥିଲେ । ରାସୋଳ ଠାରେ ଥିବା ଜଳ ବିଭାଜିକା ମିଶନ ଅଫିସରୁ କାମ ସାରି ନିଜ ଗାଁକୁ ବାଇକ ଯୋଗେ ଫେରୁଥିବା ବେଳେ ସୁବାଷଙ୍କୁ ଖୁବ ନିକଟରୁ ଗୁଳିମାଡ଼ କରାଯାଇଥିଲା । ବାଇକରେ ଦୁଇଜଣ ଦୁର୍ବୃତ୍ତ ତାଙ୍କୁ ପିଛା କରି ନୂଆବଗ କେନାଲ ହୁଡାରେ ଗୁଳି ମାଡ଼ କରିଥିଲେ । ଫଳରେ ସୁବାଷଙ୍କ ଛାତିରେ ଦୁଇ ରାଉଣ୍ଡ ଗୁଳି ଲାଗିଥିଲା । ସୁବାଷଙ୍କୁ ହିନ୍ଦୋଳ ଉପଖଣ୍ଡ ଡାକ୍ତର ଖାନାରେ ଭର୍ତ୍ତି କରାଯାଇଥିଲା ।
ତେବେ ଗୁଳିକାଣ୍ଡ ଘଟାଇ ପଳାଇ ଯାଉଥିବାବେଳେ ଦୁଇ ଦୁର୍ବୃତ୍ତ ନୂଆବଗ ଜଙ୍ଗଲରୁ ଗ୍ରାମବାସୀଙ୍କ ସହାୟତାରେ ପୋଲିସ ଜଣଙ୍କୁ କାବୁ କରିବାରେ ସକ୍ଷମ ହୋଇଛି । ଅନ୍ୟ ଜଣଙ୍କୁ ଗିରଫ ପାଇଁ ପୋଲିସ ଉକ୍ତ ଜଙ୍ଗଲରେ ଛାନଭିନ ଜାରି ରଖିଛି । ତେବେ ଗୁଳିକାଣ୍ଡର ପ୍ରକୃତ କାରଣ କ'ଣ ଜଣ ପଡିନଥିଲେ ମଧ୍ୟ ଜଳ ବିଭିଜିକା ମିଶନର କମିଟିକୁ ନେଇ ରାଜନୈତିକ ବିବାଦରୁ ଶତ୍ରୁତା ନେଇ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଇଛି ।
ଏପଟେ ମୃତଦେହ ଜବତ କରି ପୋଲିସ ତଦନ୍ତ ଆରମ୍ଭ କରିଛି । ମୃତ ସୁଭାଷ ନିଜ ବାପା-ମାଆଙ୍କ ସହିତ କଟକରେ ରହୁଥିବା ବେଳେ ଗତ ୩ବର୍ଷ ହେଲା ଗାଁକୁ ଆସି ନିଜ ଜେଜେ ମାଆଙ୍କ ପାଖରେ ରହୁଥିଲେ । ଗତ ନିର୍ବାଚନରେ ବିଜେପି ଦଳର ଦୃଢ ସମର୍ଥକ ଭାବେ ମଧ୍ୟ କାମ କରୁଥିଲେ । ମାତ୍ର କାହିଁକି ତାଙ୍କୁ ହତ୍ୟା କରାଯାଇଛି ସେ ସମ୍ପର୍କରେ ତାଙ୍କ ପରିବାର ଲୋକେ କିଛି କହି
ପାରୁନାହାନ୍ତି ।
ଇଟିଭି ଭାରତ, ଢେଙ୍କାନାଳ
