ଭୁବନେଶ୍ବର: ଜାତୀୟ ଯକ୍ଷ୍ମା ବିଲୋପ (NTEP) ହେଉଛି ଏକ ଫ୍ଲାଗସିପ୍ କାର୍ଯ୍ୟକ୍ରମ । ଯେଉଁଠାରେ ଯକ୍ଷ୍ମା ରୋଗର ଶୀଘ୍ର ଚିହ୍ନଟ, ଚିକିତ୍ସା ଏବଂ ପ୍ରତିରୋଧ ପାଇଁ ଗୁରୁତ୍ୱ ଦିଆଯାଇଛି । ଏ ଦିଗରେ ଓଡ଼ିଶା ଆଖିଦୃଶିଆ କାର୍ଯ୍ୟକ୍ରମ କରି ଏହାର ଫଳାଫଳକୁ ହ୍ରାସ କରିପାରିଛି । ତେବେ ୨୦୨୩ ଫେବୃଆରୀ ପରଠାରୁ ଭାରତ ସରକାରଙ୍କ କେନ୍ଦ୍ରୀୟ ଟିବି ଡିଭିଜନରୁ ଓଡ଼ିଶାକୁ ଆଣ୍ଟି ଟିବି ଔଷଧ ଯୋଗାଣ ପର୍ଯ୍ୟାପ୍ତ ନୁହେଁ । ଯାହାଦ୍ଵାରା ରାଜ୍ୟ ଉପରେ ସିଧାସଳଖ ଭାବରେ ପ୍ରତିକୂଳ ପ୍ରଭାବ ପକାଇଛି । ଆଣ୍ଟି ଟିବି ଔଷଧ ବଜାରରେ ଉପଲବ୍ଧ ନାହିଁ । ତେଣୁ ଏହି ଘଟଣାର ଅନୁଧ୍ୟାନ କରିବା ସହ ରାଜ୍ୟକୁ ଯକ୍ଷ୍ମା ଔଷଧର ଯୋଗାଣ ପାଇଁ ଉପଯୁକ୍ତ ପଦକ୍ଷେପ ନେବାକୁ କେନ୍ଦ୍ରକୁ ଅନୁରୋଧ କରିଛନ୍ତି ରାଜ୍ୟ ସରକାର ।
ବିଶେଷ ଭାବରେ ଗ୍ରାମାଞ୍ଚଳରେ ସ୍ବାସ୍ଥ୍ୟସେବା ପହଞ୍ଚାଇବା ସହ ନିରାମୟ ଯୋଜନାରେ ରୋଗୀଙ୍କୁ ମାଗଣାରେ ଔଷଧ ଯୋଗାଇ ଦେବାକୁ ରାଜ୍ୟ ସରକାର ପ୍ରତି ସ୍ବାସ୍ଥ୍ୟକେନ୍ଦ୍ରରେ ସୁବିଧା କରୁଛନ୍ତି । ହେଲେ ଯକ୍ଷ୍ମା ଭଳି ସଂକ୍ରାମକ ରୋଗ ପାଇଁ ଅନେକ ଜିଲ୍ଲାର କୌଣସି ସ୍ବାସ୍ଥ୍ୟକେନ୍ଦ୍ରରେ ଔଷଧ ଉପଲବ୍ଧ ନଥିବା ବିଡ଼ମ୍ବନାର ବିଷୟ ପାଲଟିଛି । ଅନେକ ସମୟରେ ମେଡିକାଲରେ ଛୋଟ ପିଲାଙ୍କ ପାଇଁ ଟିବି ଔଷଧ ଉପଲବ୍ଧ ହେଉନାହିଁ । କେବଳ ବଡମାନଙ୍କ ପାଇଁ ଔଷଧ ଥିବା କହି ଫେରାଇ ଦେଉଥିବା ଅଭିଯୋଗ ହେଉଛି ।
ଏହା ମଧ୍ୟ ପଢନ୍ତୁ: ଯକ୍ଷ୍ମା ରୋଗର ଚିକିତ୍ସା ହେବ ସହଜ, ଚିହ୍ନଟ ହେଲା ବ୍ୟାକ୍ଟେରିଆକୁ ବଞ୍ଚାଇ ରଖୁଥିବା ଜିନ୍
ସୂଚନା ଅନୁଯାୟୀ, ଯକ୍ଷ୍ମା ମୁକ୍ତ ପଞ୍ଚାୟତ ତଥା ୨୦୨୫ ସୁଦ୍ଧା ରାଜ୍ୟର ସମସ୍ତ ପଞ୍ଚାୟତକୁ ଯକ୍ଷ୍ମାମୁକ୍ତ କରିବା ନେଇ ଲକ୍ଷ୍ୟ ରଖିଛନ୍ତି ସରକାର । ନିରନ୍ତର ବିକାଶ ଲକ୍ଷ୍ୟର ଏକ ଅଂଶବିଶେଷ ଯକ୍ଷ୍ମାମୁକ୍ତ ଓଡ଼ିଶା । ୧୦ ବର୍ଷରେ ସାରା ଦେଶରେ ଓଡ଼ିଶା ୧୨ଟି ରାଙ୍କ ଉପରକୁ ଉଠି ଏବେ ୨ ନମ୍ବରରେ ରହିଛି । ଟିବି ମୁକ୍ତ ପଞ୍ଚାୟତର ଉଦ୍ଦେଶ୍ୟ ଯକ୍ଷ୍ମା ସହିତ ଜଡିତ ସମସ୍ୟାକୁ ହୃଦୟଙ୍ଗମ କରିବା । ପଞ୍ଚାୟତଗୁଡ଼ିକ ମଧ୍ୟରେ ସୁସ୍ଥ ପ୍ରତିଯୋଗିତା ସୃଷ୍ଟି କରିବା ଏବଂ ସେମାନଙ୍କ ଅବଦାନକୁ ପ୍ରଶଂସା କରିବା ପାଇଁ ପଞ୍ଚାୟତିରାଜ ଅନୁଷ୍ଠାନକୁ ସଶକ୍ତ କରିବା । ଜିଲ୍ଲା, ବ୍ଲକ, ପଞ୍ଚାୟତ ସ୍ତରରେ ବୈଠକ କରି ଯକ୍ଷ୍ମା ରୋଗୀଙ୍କୁ ଚିହ୍ନଟ କରିବା ସହ ରୋଗ ନିରାକରଣ ପାଇଁ ପଦକ୍ଷେପ ବାବଦରେ ଆଲୋଚନା କରି ଯକ୍ଷ୍ମାମୁକ୍ତ ପଞ୍ଚାୟତ ପ୍ରମାଣପତ୍ର ହାସଲ କରିବା ଉପରେ ଗୁରୁତ୍ବ ଦିଆଯାଇଛି ।
ଇଟିଭି ଭାରତ, ଭୁବନେଶ୍ୱର
