ଭୁବନେଶ୍ବର: କେଉଁଠି ଅଛନ୍ତି ଆଇପିଏସ ଆଶିଷ ସିଂ ? ତାଙ୍କ କାର୍ଯ୍ୟକଳାପ ଏବଂ କାର୍ଯ୍ୟ ସ୍ଥିତି ବିଷୟରେ ଅବଗତ ନାହିଁ ରାଜ୍ୟ ଗୃହ ବିଭାଗ । 2010 ବ୍ୟାଚର ଆଇପିଏସ ଆଶିଷ ସିଂହ ଏବେ କେଉଁଠି ବୋଲି ଖୋଜୁଛି ଗୃହ ବିଭାଗ । ଗୃହ ବିଭାଗ ଏନେଇ ଆଜି ଓଡିଶା ପୋଲିସ ଡିଜିଙ୍କୁ ଚିଠି ଲେଖି ପଚାରିଛି ।
ଚିଠି ଲେଖି ଖୋଜୁଛି ଗୃହବିଭାଗ: ଓଡିଶା ପୋଲିସ ଡିଜିଙ୍କୁ ଆଜି ଚିଠି ଲେଖିଛନ୍ତି ଗୃହ ବିଭାଗ ଅତିରିକ୍ତ ସଚିବ ମୁରଲୀଧର ମଲ୍ଲିକ । ସେ ଚିଠିରେ ଦର୍ଶାଇଛନ୍ତି ଯେ, ସ୍ବାସ୍ଥ୍ୟଗତ କାରଣରୁ ଗତ ମେ 4 ତାରିଖରୁ ମାସେ ଛୁଟି ନେଇଥିଲେ ଆଇପିଏସ ଅଫିସର ଆଶିଷ ସିଂହ । ଏବେ ଆଶିଷ ଚାକିରିରେ ଯୋଗଦେଲେଣି କି ନାହିଁ ସୂଚନା ଦେଇନାହାନ୍ତି । ତେଣୁ ସେ କାର୍ଯ୍ୟରେ ଯୋଗ ଦେଇଛନ୍ତି ନା ନାହିଁ ଚିଠି କରି ପଚାରିଛି ବିଭାଗ । ଛୁଟି ନେବାର ମାସେରୁ ଅଧିକ ବିତିଥିଲେ ବି ତାଙ୍କ ବିଷୟରେ ଏପର୍ଯ୍ୟନ୍ତ ବିଭାଗ ପାଖରେ କୌଣସି ସୂଚନା ନାହିଁ । ସେ ଯୋଗଦେଲେଣି ନା ଛୁଟି ବଢ଼ାଇଛନ୍ତି ସେନେଇ ମଧ୍ୟ ବିଭାଗକୁ କୌଣସି ଖବର ମିଳିନାହିଁ । ତେଣୁ ତାଙ୍କ ବିଷୟରେ ସମସ୍ତ ତଥ୍ୟ ତୁରନ୍ତ ଜଣାଇବାକୁ ଡିଜିପିଙ୍କୁ ଚିଠିରେ ଉଲ୍ଲେଖ କରିଛନ୍ତି ଗୃହ ବିଭାଗ ଅତିରିକ୍ତ ସଚିବ ।
ଏହା ମଧ୍ୟ ପଢନ୍ତୁ: ଖସିଲେ ଡିଏସ କୁଟ୍ଟେ, ମିଛରେ ଛୁଟି ନେଇ ଫସିଲେ ଆଶିଷ ସିଂ !
ମହାପ୍ରଭୁ ଶ୍ରୀଜଗନ୍ନାଥଙ୍କ ପବିତ୍ର #ରଥଯାତ୍ରାର ସୁପରିଚାଳନା ନିମନ୍ତେ ଡିଜିପି ଶ୍ରୀ ଅରୁଣ କୁମାର ଷଡଙ୍ଗୀଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତି ବୈଠକ ରାଜ୍ଯ ପୋଲିସ ମୁଖ୍ୟ କାର୍ଯାଳୟଠାରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ରଥଯାତ୍ରାକୁ ଶୃଙ୍ଖଳିତ ଭାବେ ସମ୍ପନ୍ନ କରିବାକୁ ଡିଜିପି ବରିଷ୍ଠ ପୋଲିସ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। pic.twitter.com/0Y4ZIe4G7z
— Odisha Police (@odisha_police) June 26, 2024
କାଲି ଥିଲେ ବୈଠକରେ ଉପସ୍ଥିତ: ଓଡିଶାରେ ଅଛନ୍ତି ଆଇପିଏସ ଅଫିସର ଆଶିଷ ସିଂହ । ଗତକାଲି ରଥଯାତ୍ରା ସମନ୍ବୟ ବୈଠକରେ ପୋଲିସ ଡିଜିଙ୍କ ସହ ଉପସ୍ଥିତ ଥିଲେ ଆଶିଷ । ଏନେଇ ଓଡିଶା ପୋଲିସ ପକ୍ଷରୁ ଟ୍ବିଟ କରି ସୂଚନା ଦିଆଯାଇଛି । ପୋଲିସ ମୁଖ୍ୟାଳୟରେ ଆୟୋଜିତ ବୈଠକରେ ଜଣେ ବରିଷ୍ଠ ଆଇପିଏସ ଅଧିକାରୀ ସାମିଲ ହେଉଛନ୍ତି । ଅଥଚ ବିଭାଗକୁ ଏ ବାବଦରେ ସୂଚନା ମିଳୁନାହିଁ । ବିଭାଗର ବଡ଼ ଅଧିକାରୀଙ୍କ ବାବଦରେ ଜାଣିବା ଲାଗି ଚିଠି ଲେଖିବାକୁ ପଡୁଛି, ଯାହା ଅନେକ ଚର୍ଚ୍ଚା ସୃଷ୍ଟି କରୁଛି ।
ଏହା ମଧ୍ୟ ପଢନ୍ତୁ: DIG ଆଶିଷ ସିଂଙ୍କ ବିରୋଧରେ ସଙ୍ଗୀନ ଅଭିଯୋଗ, ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ବିଜେପି
ସାଧାରଣ ନିର୍ବାଚନ ପୂର୍ବରୁ କେନ୍ଦ୍ରାଞ୍ଚଳ ଆଇଜି ଭାବେ କାର୍ଯ୍ୟ କରୁଥିଲେ ଆଶିଷ । ନିର୍ବାଚନ ପରିଚାଳନାରେ ପକ୍ଷପାତିତା ଅଭିଯୋଗରେ ଆଶିଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇଥିଲେ ନିର୍ବାଚନ ଆୟୋଗ । ତାଙ୍କୁ ନିର୍ବାଚନ ଦାୟିତ୍ବରୁ ହଟାଇ ତତ୍କାଳୀନ ମୁଖ୍ୟମନ୍ତ୍ରୀଙ୍କ ସୁରକ୍ଷା ଦାୟିତ୍ବ ଦିଆଯାଇଥିଲା । ପରବର୍ତ୍ତୀ ସମୟରେ ସ୍ବାସ୍ଥ୍ୟଗତ କାରଣ ଦର୍ଶାଇ ମେ 4ରୁ ମାସେ ଛୁଟି ନେଇଥିଲେ ଆଶିଷ । ସ୍ବାସ୍ଥ୍ୟ ସମସ୍ୟା ଆଳରେ ସେ ଶାସକ ଦଳ ଲାଗି କାର୍ଯ୍ୟ କରୁଥିବା ଅଭିଯୋଗ ଆସିଲା । ଆଶିଷଙ୍କ ସ୍ବାସ୍ଥ୍ୟ ପରୀକ୍ଷା ଏମ୍ସ ଭୁବନେଶ୍ବରରେ କରାଇବାକୁ ନିର୍ବାଚନ ଆୟୋଗ ନିର୍ଦ୍ଦେଶ ଦେଇଥିଲେ । ସେ ସମ୍ପୂର୍ଣ୍ଣ ସୁସ୍ଥ ଥିବା ରିପୋର୍ଟ ଆସିଥିଲା ।
ଇଟିଭି ଭାରତ, ଭୁବନେଶ୍ବର
