ସମ୍ବଲପୁର: ନୂତନ ପାଠ୍ୟକ୍ରମରେ ସାମିଲ ହେବ ଓଡ଼ିଶା ଜଙ୍ଗଲର ଗୁରୁତ୍ୱ ଓ ଏଥିପାଇଁ ଆରମ୍ଭ ହୋଇଥିବା ସ୍ୱତନ୍ତ୍ରତା ସଂଗ୍ରାମର କାହାଣୀ । ସମ୍ବଲପୁର ଗସ୍ତରେ ଆସି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏନେଇ କହିଛନ୍ତି । ଏହାସହ ବନ କର୍ମଚାରୀଙ୍କ ସଶକ୍ତିକରଣ ପାଇଁ କଣ ପଦକ୍ଷେପ ନିଆ ଯାଇ ପାରିବ ସେନେଇ ଆଲୋଚନା ହେବ ବୋଲି ମନ୍ତ୍ରୀ ସୂଚନା ଦେଇଛନ୍ତି ।
ପାଠ୍ୟକ୍ରମରେ ସ୍ଥାନ ପାଇବ ଓଡ଼ିଶା ଜଙ୍ଗଲ:
ସମ୍ବଲପୁର ସ୍ଥିତ ବୁର୍ଲା ଏମସିଏଲର କର୍ପୋରେଟ କାର୍ଯ୍ୟାଳୟରେ ଅଣଗେଜେଟେଡ଼ ବନ ସେବା ସଂଘଙ୍କ ରାଜ୍ୟ ସ୍ତରୀୟ କାର୍ଯ୍ୟକ୍ରମରେ ଯୋଗ ଦେଇ ନୂଆ ଶିକ୍ଷାନୀତିରେ ଓଡ଼ିଶା ଜଙ୍ଗଲ ବିଷୟ ଉଲ୍ଲେଖ ରହିବା ନେଇ କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଆଗାମୀ ଦିନରେ ରାଜ୍ୟ ସରକାର କେନ୍ଦ୍ର ସରକାରଙ୍କ ନୂତନ ଶିକ୍ଷା ନୀତିକୁ ଲାଗୁ କରିବେ l ଏନେଇ ରାଜ୍ୟ ସରକାର ଔପଚାରିକ ନିଷ୍ପତ୍ତି ନେଇ ସାରିଛନ୍ତି l ତେଣୁ ନୂତନ ପାଠ୍ୟକ୍ରମରେ ଜଙ୍ଗଲର ଗୁରୁତ୍ବ, ଜଙ୍ଗଲ ଯୋଗୁଁ ଆରମ୍ଭ ହୋଇଥିବା ସ୍ୱତନ୍ତ୍ରତା ସଂଗ୍ରାମର କାହାଣୀ ସବୁ ସ୍ଥାନ ପାଇବ ବୋଲି କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ l
ଗୋଟିଏ ଗଛ ମାଙ୍କ ନାଁରେ:
ଏହି ଅବସରରେ ସେ ଆହୁରି କହିଛନ୍ତି," ବର୍ତ୍ତମାନ କେନ୍ଦ୍ର ସରକାର ଜଙ୍ଗଲ ସୁରକ୍ଷା ଉପରେ ଅଧିକ ଗୁରୁତ୍ବ ଦେଉଛନ୍ତି l ତେଣୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି "ଏକ ପେଡ ମା କେ ନାମ (ଗୋଟିଏ ଗଛ ମାଙ୍କ ନାଁରେ)" ନାରା ଦେଇଛନ୍ତି l ତେଣୁ ଜଙ୍ଗଲ ଓ ପରିବେଶ ସୁରକ୍ଷା ଆମ ସମସ୍ତଙ୍କ ପାଇଁ ବଡ଼ ଦାୟିତ୍ୱ l ଓଡିଶାରେ ଥିବା 19ଟି ଅଭୟରଣ୍ୟରୁ 4 ଟା ସମ୍ବଲପୁର ଅଞ୍ଚଳରେ ରହିଛି l ଏଠିକାର ଲୋକଙ୍କ ଅର୍ଥନୀତି, ଚଳଣି ସବୁ ଜଙ୍ଗଲ ଉପରେ ଆଧାରିତ l ତେଣୁ ଏହାର ସୁରକ୍ଷା ସମସ୍ତଙ୍କ ଦାୟିତ୍ୱ l ତେଣୁ ଜଙ୍ଗଲ ଓ ଜୀବଜନ୍ତୁଙ୍କ ସୁରକ୍ଷା ପାଇଁ ଆଗାମୀ ଦିନରେ ଜଙ୍ଗଲ ଭିତରେ ଜଳାଶୟ ସୃଷ୍ଟି କରାଯିବ l ଜଙ୍ଗଲ ଜମି ପଟ୍ଟା, ପେସା ଆଇନ କିପରି ଲାଗୁ ହେବ ସେନେଇ କାର୍ଯ୍ୟ ଚାଲିଛି l ବେଳେ ବେଳେ ଜଙ୍ଗଲ ର ଜୀବଜନ୍ତୁ ଓ ବିକାଶ ସାମ୍ନାସାମ୍ନି ହେଉଛନ୍ତି । ତେଣୁ ଏହି ସମସ୍ୟାର ସମାଧାନର ବାଟ ବାହାର କରିବାର ଆବଶ୍ୟକତା ରହିଛି l"
ବନ୍ୟ ପରିଚାଳନାରେ ଏଆଇ ଟେକ୍ନୋଲୋଜି:
ଅନ୍ୟପଟେ ବର୍ତ୍ତମାନ ବନ୍ୟ ପରିଚାଳନାରେ ଏଆଇ ଟେକ୍ନୋଲୋଜିର ବ୍ୟବହାର ହେଉଛି l ଏହା ବହୁତ ଭଲ ପଦକ୍ଷେପ ବୋଲି କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ l ଏହା ସହ ବନ କର୍ମଚାରୀଙ୍କ ସଶକ୍ତିକରଣ ପାଇଁ କଣ ପଦକ୍ଷେପ ନିଆ ଯାଇ ପାରିବ ସେନେଇ ଆଲୋଚନା ହେବ ବୋଲି କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ l
ଇଟିଭି ଭାରତ, ସମ୍ବଲପୁର
