ରାଇରଙ୍ଗପୁର: ଜୁନ ୧ ରେ ହେବାକୁ ଯାଉଛି ରାଜ୍ୟରେ ଶେଷ ପର୍ଯ୍ୟାୟ ନିର୍ବାଚନ । ଯାହାକୁ ନେଇ ସବୁ ଦଳୀୟ ପ୍ରାର୍ଥୀ ଭୋଟରଙ୍କୁ ମନାଇବାରେ ଜୋରସୋରରେ ଲାଗିପଡିଛନ୍ତି । ଏହାରି ମଧ୍ୟରେ ବର୍ତ୍ତମାନ ଆଜି ଝାଡ଼ଖଣ୍ଡ ମୁଖ୍ୟମନ୍ତ୍ରୀ ଚମ୍ପାଇ ସୋରେନ ମୟୂରଭଞ୍ଜ ଗସ୍ତରେ ଆସି ରାଇରଙ୍ଗପୁର, ମୋରୋଡା ଓ ସାରସକଣା ନିର୍ବାଚନ ମଣ୍ଡଳୀରେ ଜେଏମଏମ ପ୍ରାର୍ଥୀଙ୍କ ପାଇଁ ପ୍ରଚାର କରିବେ ବୋଲି ଜଣାପଡିଛି । ଏନେଇ ସାମ୍ୱାଦିକ ସମ୍ମିଳନୀରେ ସୂଚନା ଦେଇଛନ୍ତି ଝାଡ଼ଖଣ୍ଡ ରାଜ୍ୟର ପରିବହନ ମନ୍ତ୍ରୀ ଦୀପକ ବିରୁଆ ।
ମୟୂରଭଞ୍ଜ ଜିଲ୍ଲାର ବିଭିନ୍ନ ସମସ୍ୟାକୁ ନେଇ ମଙ୍ଗଳବାର ଦିନ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ଦଳ ତରଫରୁ ରାଇରଙ୍ଗପୁର ସହରର କଲ୍ୟାଣୀ ମଣ୍ଡପ ଠାରେ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିବା ବେଳେ ଜିଲ୍ଲାର ବିଭିନ୍ନ ସମସ୍ୟାକୁ ନେଇ ସ୍ବର ଉତ୍ତୋଳନ କରିଛି ଜେଏମଏମ । ଏନେଇ ବିଜେପି ଏବଂ ବିଜେଡ଼ିକୁ ଟାର୍ଗେଟ କରି ଝାଡ଼ଖଣ୍ଡ ରାଜ୍ୟର ପରିବହନ ମନ୍ତ୍ରୀ ଦୀପକ ବିରୁଆ ଆନ୍ଦୋଳନ କରିବା ନେଇ ଚେତାବନୀ ଦେଇଛନ୍ତି ।
ମୟୂରଭଞ୍ଜ ଜିଲ୍ଲା ଖଣି ଖାଦାନରେ ପରିପୂର୍ଣ୍ଣ ଥାଇ ମଧ୍ୟ କେବଳ ଖଣି ଖାଦାନରୁ କଞ୍ଚା ମାଲ ବାହାରକୁ ରପ୍ତାନୀ ହେଉଛି କିନ୍ତୁ ସମସ୍ତ ଭିତ୍ତିଭୂମି ଥାଇ ମଧ୍ୟ ମୟୂରଭଞ୍ଜ ଜିଲ୍ଲାରେ ଶିଳ୍ପ ପ୍ରତିଷ୍ଠା ହୋଇପାରୁନି । ଯାହା ଫଳରେ ବେରୋଜଗାରୀ ସମସ୍ୟା ଦିନକୁ ଦିନ ବଢିବାରେ ଲାଗିଛି । ଏଥିସହ ସାରସକଣା ନିର୍ବାଚନ ମଣ୍ଡଳୀ ଅନ୍ତର୍ଗତ ବିଜାତଳା ଅଞ୍ଚଳରେ ଥିବା କିଛି ସ୍କୁଲ ବନ୍ଦ କରାଯାଇଛି । ଫଳରେ ଛାତ୍ରଛାତ୍ରୀ ମାନେ ଶିକ୍ଷାଦାନରୁ ବଞ୍ଚିତ ହେଉଛନ୍ତି । ସେହି ସ୍କୁଲ ଗୁଡିକୁ ପୁନର୍ବାର ଖୋଲିବା ପାଇଁ ଜେଏମଏମ ଦଳ ପ୍ରୟାସ ଜାରି ରଖିଛି । ଅଲଚିକି ଭାଷା ପାଇଁ ଅସ୍ଥାୟୀ ଶିକ୍ଷକଙ୍କ ନିଯୁକ୍ତି ସହିତ ହୋ ଏବଂ ମୁଣ୍ଡା ଭାଷାର ଓ୍ବାରାଙ୍ଗଚିତ୍ ଲିପି ରେ ପାଠପଢା ଆରମ୍ଭ କରାଯିବା ନେଇ ଦଳ ଆନ୍ଦୋଳନରେ ଓହ୍ଲାଇବ ବୋଲି କହିଛନ୍ତି ଝାଡ଼ଖଣ୍ଡ ରାଜ୍ୟର ପରିବହନ ମନ୍ତ୍ରୀ ।
ଏହି ସବୁ ପ୍ରସଙ୍ଗରେ ମୟୂରଭଞ୍ଜରେ ଜନ ସମର୍ଥନ ଲୋଡ଼ିବା ସହ ଜନ ସାଧାରଣଙ୍କୁ ଭିକ୍ଷା କରାଯିବ । ଏଥିସହ ଦୀର୍ଘ ୨୫ ବର୍ଷର ବିଜେଡି ସରକାର ଶାସନ କାଳରେ ମୟୂରଭଞ୍ଜ ଜିଲ୍ଲାର ଜନସାଧାରଣ ବିଭିନ୍ନ ସୁବିଧାରୁ ବଞ୍ଚିତ ରହିଛନ୍ତି । କେବଳ ନିର୍ବାଚନ ସମୟରେ ଏଠାକାର ଜନସାଧାରଣଙ୍କୁ ବିଜେଡ଼ି ଦଳ ବ୍ୟବହାର କରୁଥିବା ନେଇ ବିଜେଡି ଉପରେ ବର୍ଷିଥିଲା ଦଳ । ସେହିପରି ବିଜେପି ସରକାରଙ୍କ ବିରୁଦ୍ଧରେ ମଧ୍ୟ ବର୍ଷିଥିଲା ଜେଏମଏମ ।
କେନ୍ଦ୍ରର ବିଜେପି ସରକାର ମଧ୍ୟ ଦରଦାମ ବୃଦ୍ଧି ଓ ବେରୋଜଗାରୀ ସମସ୍ୟାକୁ ନେଇ କୌଣସି ଆଖି ଦୃଶିଆ ପଦକ୍ଷେପ ଗ୍ରହଣ କରିନାହିଁ। ତେଣୁ ଚଳିତ ନିର୍ବାଚନରେ ମୟୂରଭଞ୍ଜ ର ଜନସାଧାରଣ ଉଭୟ ବିଜେପି ଓ ବିଜେଡ଼ି ଦଳକୁ ପ୍ରତ୍ୟାଖାନ କରିବେ ଓ ବିପୁଳ ସଂଖ୍ୟାରେ ଧନୁତୀର ଚିହ୍ନରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ଦଳ କୁ ଭୋଟ ଦେଇ ଜୟଯୁକ୍ତ କରାଇବେ ବୋଲି ଦୃଢେ଼ାକ୍ତି ପ୍ରକାଶ କରିଛନ୍ତି ଝାରଖଣ୍ଡ ରାଜ୍ୟର ପରିବହନ ମନ୍ତ୍ରୀ ଦୀପକ ବିରୁଆ । ଚଳିତ ନିର୍ବାଚନରେ ଲୋକସଭା ସାଂସଦ ପ୍ରାର୍ଥୀନୀ ଅଞ୍ଜନୀ ସୋରେନଙ୍କୁ ମୟୂରଭଞ୍ଜ ଜିଲ୍ଲାର ଜନତା ଥରେ ସୁଯୋଗ ଦେଇ ବିଜୟୀ କରାଇବେ ବୋଲି ଆଶା ରଖିଛନ୍ତି ମନ୍ତ୍ରୀ ଦୀପକ ବିରୁଆ।
ଏହା ମଧ୍ୟ ପଢନ୍ତୁ: ଅବାଧ ଓ ନିରପେକ୍ଷ ନିର୍ବାଚନ ପାଇଁ ପ୍ରଶାସନର ପ୍ରସ୍ତୁତି, ଫୋକସରେ ଶାନ୍ତି ଶୃଙ୍ଖଳା
ଇଟିଭି ଭାରତ, ମୟୂରଭଞ୍ଜ
