ଭୁବନେଶ୍ବର: ରାଜ୍ୟରେ ଯୁକ୍ତ ତିନି କଲେଜର ସ୍ନାତକ ପାଠ୍ୟକ୍ରମରୁ ଛାତ୍ରଛାତ୍ରୀ ମୁହଁ ଫେରାଉଛନ୍ତି । ଯୁକ୍ତ ଦୁଇ ଶିକ୍ଷା ଗ୍ରହଣ ପରେ କଳା, ବିଜ୍ଞାନ ଓ ବାଣିଜ୍ୟ ବିଭାଗରେ ପଢ଼ିବା ଲାଗି ଛାତ୍ରଛାତ୍ରୀଙ୍କ ମଧ୍ୟରେ ଆଉ ପୂର୍ବଭଳି ଆଗ୍ରହ ଦେଖିବାକୁ ମିଳୁନାହିଁ । ଯୁକ୍ତ ତିନିରେ ଦୁଇଟି ପର୍ଯ୍ୟାୟ ନାମଲେଖା ଶେଷ ହୋଇଥିବା ବେଳେ ଏଭଳି ଏକ ତଥ୍ୟ ସାମ୍ନାକୁ ଆସିଛି । ଦୁଇଟି ପର୍ଯ୍ୟାୟରେ ନାମଲେଖା ହେବା ପରେ ମଧ୍ୟ ସ୍ନାତକରେ ପାଖାପାଖି ୧ ଲକ୍ଷ ୫୩ ହଜାର ୩୪୭ ସିଟ୍ ଖାଲି ରହିଛି । କେବଳ ଚଳିତ ବର୍ଷ ନୁହେଁ ଏମିତିକି ପ୍ରତି ବର୍ଷ ଅଧିକରୁ ଅଧିକ ସିଟ୍ ଖାଲି ପଡ଼ିବାର ନଜିର ରହିଛି ।
![ଯୁକ୍ତ ତିନି ପାଇଁ କମୁଛି ପିଲାଙ୍କ ଆଗ୍ରହ, ଦ୍ଵିତୀୟ ପର୍ଯ୍ୟାୟ ନାମଲେଖା ସୁଦ୍ଧା ଦେଢ଼ ଲକ୍ଷ୍ୟ ସିଟ ଖାଲି](https://etvbharatimages.akamaized.net/etvbharat/prod-images/17-07-2024/od-bbsr-03-plusthree-admission-seat-vacancy-7206049_16072024210225_1607f_1721143945_577.jpg)
ତୃତୀୟ ପର୍ଯ୍ୟାୟ ନାମଲେଖା ପାଇଁ ମେରିଟ ଲିଷ୍ଟ
ଏପଟେ ୨୦୨୪-୨୫ ଶିକ୍ଷାବର୍ଷରେ ଯୁକ୍ତ ତିନି ନାମଲେଖା ପାଇଁ ଆଜି ତୃତୀୟ ମେଧା ତାଲିକା ପ୍ରକାଶ ପାଇଛି । ଏଥିରେ ମୋଟ ୪୪ ହଜାର ୬୦ ଜଣ ଛାତ୍ରୀଛାତ୍ର ମନୋନୀତ ହୋଇଛନ୍ତି । ସେମାନଙ୍କ ମଧ୍ୟରେ ରହିଛନ୍ତି ୨୪ ହଜାର ୮୭୮ ଜଣ ଛାତ୍ରୀ, ୧୯ ହଜାର ୧୮୧ ଜଣ ଛାତ୍ର ଏବଂ ଜଣେ କିନ୍ନର ରହିଛନ୍ତି । ଏମାନଙ୍କ ମଧ୍ୟରେ ବିଜ୍ଞାନ ବିଭାଗରେ ୧୪ ହଜାର ୩୩୨ ଜଣ ଚୟନ ହୋଇଥିବା ବେଳେ କଳାରେ ୨୫ ହଜାର ୭୯୧ ଜଣ, ବାଣିଜ୍ୟରେ ୨ ହଜାର ୮୮୦ ଜଣ, ଶାସ୍ତରୀରେ ୧୯୮ ଜଣ, ସେଲ୍ଫ ଫାଇନାନ୍ସିଂରେ ୮୧୬ ଜଣ, ଏବଂ ଆଇନ ବିଭାଗରେ ୪୩ ଜଣ ମନୋନୀତ ହୋଇଛନ୍ତି । ମନୋନୀତ ଛାତ୍ରୀଛାତ୍ରମାନେ ଛୁଟିଦିନ ଅର୍ଥାତ ୨୧ ତାରିଖ ବ୍ୟତୀତ ୧୮ ତାରିଖ ସକାଳ ୯ ଟାରୁ ୨୨ ତାରିଖ ସନ୍ଧ୍ୟା ୬ଟା ମଧ୍ୟରେ ନାମ ଲେଖାଇବେ ଛାତ୍ର ଛାତ୍ରୀ । ଅଗଷ୍ଟ ୧ ତାରିଖରେ ଯୁକ୍ତ ତିନି ପ୍ରଥମ ବର୍ଷ ପାଠପଢ଼ା ଆରମ୍ଭ ହେବ ।
ତିନି ବର୍ଷର ନାମଲେଖା ଓ ଖାଲି ପଡ଼ିଥିବା ତଥ୍ୟ
ସାମ୍ସ ତଥ୍ୟ ଅନୁସାରେ, ୨୦୨୨ -୨୩ ବର୍ଷରେ ରାଜ୍ୟରେ ୧୦୨୪ ଟି କଲେଜରେ ୨ ଲକ୍ଷ ୫୫ ହଜାର ୯୮୦ ସିଟ୍ରେ ନାମଲେଖା ହୋଇଥିଲା । ତେବେ ସମସ୍ତ ପ୍ରକାର ନାମଲେଖା ପ୍ରକ୍ରିୟା ଶେଷ ହେବାପରେ ମଧ୍ୟ ପ୍ରାୟ ୬୩ ହଜାର ୪୨୯ ସିଟ୍ ଖାଲି ରହିଥିଲା। ସେହିଭଳି ଭାବରେ ୨୦୨୩ -୨୪ ଶିକ୍ଷାବର୍ଷରେ ରାଜ୍ୟର ୧୦୪୭ କଲେଜର ୨ ଲକ୍ଷ ୭୧ ହଜାର ୯୧ ସିଟ୍ରେ ନାମଲେଖା ହୋଇଥିବା ବେଳେ ୮୪ ହଜାର ୮୦୦ ସିଟ୍ ଖାଲି ପଡ଼ିଥିଲା । ତେବେ ୨୦୨୪- ୨୫ ଶିକ୍ଷାବର୍ଷରେ ସିଟ୍ ଖାଲି ପଡ଼ିବା ଏକପ୍ରକାର ଥୟ । କଳା, ବିଜ୍ଞାନ, ବାଣିଜ୍ୟ, ସେଲ୍ଫ ଫାଇନାନ୍ସିଂ ଓ ସଂସ୍କୃତ ବିଭାଗରେ ଯେତିକି ସିଟ୍ ରହିଛି ସେହି ଅନୁଯାୟୀ ଛାତ୍ରଛାତ୍ରୀ ନାମ ଲେଖାଇବାକୁ ଆବେଦନ ହିଁ କରିନାହାନ୍ତି । ଚଳିତ ବର୍ଷ ୧୦୫୬ ଡିଗ୍ରି କଲେଜରେ ୨ ଲକ୍ଷ ୭୪ ହଜାର ୩୩୧ ସିଟ୍ରେ ନାମଲେଖା ପାଇଁ ୨ ଲକ୍ଷ ୩୭ ହଜାର ୭୧୯ ଛାତ୍ରଛାତ୍ରୀ ଆବେଦନ କରିଥିଲେ । ପ୍ରଥମ ପର୍ଯ୍ୟାୟରେ ୧ ଲକ୍ଷ ୭୮ ହଜାର ୯୭୬ ଛାତ୍ରଛାତ୍ରୀ ନାମଲେଖା ପାଇଁ ଯୋଗ୍ୟ ବିବେଚିତ ହୋଇଥିବା ବେଳେ ସେମାନଙ୍କ ମଧ୍ୟରୁ ୯୨ ହଜାର ୨୪୭ ଜଣ ନାମ ଲେଖାଇଥିଲେ । ସେହିପରି ଭାବରେ ଦ୍ବିତୀୟ ପର୍ଯ୍ୟାୟରେ ୪୩ ହଜାର ଛାତ୍ରଛାତ୍ରୀ ଯୋଗ୍ୟ ବିବେଚିତ ହୋଇଥିବା ବେଳେ ଗତ ୧୦ ତାରିଖରେ ଦ୍ବିତୀୟ ପର୍ଯ୍ୟାୟ ନାମଲେଖା ଶେଷ ସୁଦ୍ଧା ପ୍ରାୟ ୩୦ ହଜାର ନାମ ଲେଖାଇଛନ୍ତି । ଆହୁରି ୧୦ ହଜାର ପିଲା ନାମଲେଖାଇବାରୁ ଦୂରେଇ ଯାଇଛନ୍ତି ।
କେଉଁ ବିଭାଗରେ କେତେ ସିଟ ଖାଲି ପଡ଼ିଛି:-
ବର୍ତ୍ତମାନ ସୁଦ୍ଧା କଳା ବିଭାଗରେ ୧ ଲକ୍ଷ୍ୟ ୫୪ ହଜାର ୮୨୮ ସିଟ୍ ମଧ୍ୟରୁ ୭୯ ହଜାର ୮୦୭ ଜଣ ନାମ ଲେଖାଇଛନ୍ତି । ଆହୁରି ୭୫ ହଜାର ସିଟ୍ ଖାଲି ପଡ଼ିଛି । ସେହିପରି ଭାବରେ ଫିଜିକାଲ ସାଇନ୍ସରେ ୪୫ ହଜାର ୭୧ ସିଟ୍ରୁ ୩୦ ହଜାର ୭୩୨ ସିଟ ଖାଲି ପଡ଼ିଥିବା ବେଳେ ବାୟୋଲୋଜିକାଲ ସାଇନ୍ସରେ ୨୮ ହଜାର ୨୨୮ ସିଟ୍ରୁ ୧୭ ହଜାର ୬୨୩ ଟି ସିଟ ଖାଲି ପଡ଼ିଛି । ସେହିଭଳି ବାଣିଜ୍ୟ ବିଭାଗରେ ୩୧ ହଜାର ୯୬୪ ସିଟ୍ ମଧ୍ୟରୁ ୨୦ ହଜାର ୨୩୩ ସିଟ ଖାଲି ପଡ଼ିଥିବା ବେଳେ ସଂସ୍କୃତରେ ୯ ହଜାର ୨୧୨ ସିଟ୍ ମଧ୍ୟରୁ ୬ ହଜାର ୨୮୬ ଓ ସେଲ୍ଫ ଫାଇନାନ୍ସିଂ ବିଭାଗରେ ୪ ହଜାର ୮୪୮ ସିଟ୍ ମଧ୍ୟରୁ ୩ ହଜାର ୩୮୫ଟି ସିଟ ଖାଲି ପଡ଼ିଛି । ତେବେ ରାଜ୍ୟରେ ମୋଟ ଆକାରରେ ୨ ଲକ୍ଷ୍ୟ ୭୪ ହଜାର ୧୧୫ ସିଟ ମଧ୍ୟରୁ ୧ ଲକ୍ଷ୍ୟ ୫୩ ହଜାର ୨୮୦ ସିଟ ଖାଲି ପଡ଼ିଛି ।
କେଉଁ ଜିଲ୍ଲାରେ କେତେ ସିଟ ଖାଲି ପଡ଼ିଛି:-
ରାଜ୍ୟରେ ବଡ଼ ବଡ଼ ଜିଲ୍ଲା ଗୁଡିକରେ ମଧ୍ୟ ପ୍ରାୟତ ସିଟ ଖାଲି ପଡ଼ୁଥିବା ନଜରକୁ ଆସିଛି। ଯେଭଳି ଭାବରେ କଟକ ଜିଲ୍ଲାରେ ମୋଟ ୬୯ ଟି କଲେଜ ରହିଥିବା ବେଳେ ସିଟ ସଂଖ୍ୟା ରହିଛି ୨୧ ହଜାର ୬୯୨। ସେଥିମଧ୍ୟରୁ ନାମଲେଖାଇଛନ୍ତି ୮ ହଜାର ୪୬୦ ଜଣ। ସେହିପରି ଭାବରେ ଗଞ୍ଜାମ ଜିଲ୍ଲାରେ ମୋଟ କଲେଜ ୬୯ ଟି ରହିଥିବା ବେଳେ ସିଟ ସଂଖ୍ୟା ୨୪ ହଜାର ୩୦୮ ଟି ରହିଛି। ସେଥିମଧ୍ୟରୁ ନାମ ଲେଖାଇଛନ୍ତି ମାତ୍ର ୯ ହଜାର ୯୪୭ ଜଣ ଛାତ୍ରାଛାତ୍ରୀ । ଏପଟେ ଖୋର୍ଦ୍ଧା ଜିଲ୍ଲାରେ ମୋଟ କଲେଜ ସଂଖ୍ୟା ୭୨ ରହିଥିବା ବେଳେ ସିଟ ସଂଖ୍ୟା ରହିଛି ୨୧ ହଜାର ୨୩୧ । ସେଥିମଧ୍ୟରୁ ନାମ ଲେଖାଇଛନ୍ତୀ ୭ ହଜାର ୭୧୭। ସେହିଭଳି ଭାବରେ ବାଲେଶ୍ଵରରେ ମୋଟ କଲେଜ ସଂଖ୍ୟା ୭୧ ରହିଥିବା ବେଳେ ସିଟ ସଂଖ୍ୟା ରହିଛି ୧୫ ହଜାର ୮୨୦। ସେଥିମଧ୍ୟରୁ ନାମାଲେଖାଇଛନ୍ତି ୭ ହଜାର ୨୦୯ ଜଣ ଛାତ୍ରଛାତ୍ରୀ ।
ଇଟିଭି ଭାରତ, ଭୁବନେଶ୍ବର