ଭୁବନେଶ୍ବର: ସଜେଇ ହୋଇଛି ପୂରା ଗାଁ, ଦାଣ୍ଡରେ ପଡିଛି ଧାଡି ଧାଡି ଝୋଟି । ଚାଲିଛି ଭୋଜିଭାତର ଆୟୋଜନ । ବନ୍ଧା ଚାଲିଛି ସଭା ମଞ୍ଚ । ଗାଁର ପିଲାଠୁ ବୟସ୍କ ପର୍ଯ୍ୟନ୍ତ ଉତ୍ସାହରେ କରିଛନ୍ତି ଅପେକ୍ଷା । ମୁଖ୍ୟମନ୍ତ୍ରୀ ହେବା ପରେ ଗାଁକୁ ଫେରୁଛି ଗାଁ ପୁଅ । ବିଧାୟକ ଭାବେ ଏକାଧିକ ଥର ନିର୍ବାଚିତ ହୋଇ ବିଧାନସଭାରେ ଅଞ୍ଚଳର ସମସ୍ୟା କଥା ଉଠାଉଥିବା ଏହି ଗାଁ ପୁଅ ଦିନେ ମୁଖ୍ୟମନ୍ତ୍ରୀ ହୋଇ ଗାଁକୁ ଫେରିବ, ଏକଥା ହୁଏତ କେହି କେବେ ଭାବି ନଥିବେ । ହେଲେ ଆଜି ସବୁ କିଛି ବଦଳିଯାଇଛି । କିଛିଦିନ ପୂର୍ବରୁ ଅଜଣା ଥିବା କେନ୍ଦୁଝର ଜିଲ୍ଲାର ଏହି ରାଇକଳା ଗ୍ରାମରେ ଦେଖିବାକୁ ମିଳିଛି ଏମିତି କିଛି ଦୃଶ୍ୟ । ମୁଖ୍ୟମନ୍ତ୍ରୀ ଭାବେ ଦାୟିତ୍ବ ଗ୍ରହଣ କରିବା ପରେ ପ୍ରଥମ ଥର ନିଜ ପୈତୃକ ଗ୍ରାମ ରାଇକଳାରେ ପହଞ୍ଚିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଭବ୍ୟ ସ୍ବାଗତ ସମ୍ବର୍ଦ୍ଧନାରେ ମୋହନଙ୍କୁ ସ୍ବାଗତ କରିଛି ଜନ୍ମମାଟି ।
ଗତକାଲିଠାରୁ ଦୁଇଦିନିଆ କେନ୍ଦୁଝର ଗସ୍ତରେ ଥିବା ମୁଖ୍ୟମନ୍ତ୍ରୀ ମୋହନ ନିଜ ଗୃହ ଜିଲ୍ଲାରେ ଏକାଧିକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ଆଜି ସେ ନିଜ ପୈତୃକ ଗ୍ରାମ ରାଇକଳାରେ ପହଞ୍ଚିଛନ୍ତି । ରାଇକଳାରେ ଏକ ଅସ୍ଥାୟୀ ହେଲିପ୍ୟାଡ ନିର୍ମାଣ କରାଯାଇଛି । ସେ ସେଠାରେ ଅବତରଣ କରିବା ପରେ ଝୁମ୍ପୁରା ଅଭିମୁଖେ ବାହାରିଥିଲେ । ଏକ ବିଶାଳ ରୋଡ ସୋ’ରେ ମୋହନ ଝୁମ୍ପୁରା ସ୍ଥିତ ଦୁର୍ଗାପଡ଼ିଆରେ ଆୟୋଜିତ କାର୍ଯ୍ୟକ୍ରମସ୍ଥଳୀରେ ପହଞ୍ଚିଥିଲେ । ସେଠାରେ ସାଧାରଣ ସଭାକୁ ସମ୍ବୋଧିତ କରିବା ପରେ ସେ ପୁନର୍ବାର ପୈତୃକ ଗ୍ରାମ ରାଇକଳା ଫେରି ନିଜ ଘରେ ମଧ୍ୟାହ୍ନ ଭୋଜନ କରିବେ ।
ଆଜି ଦିନ ରାଇକଳା ଓ କେନ୍ଦୁଝରର ଜିଲ୍ଲାର ବିଭିନ୍ନ ସ୍ଥାନରେ କାର୍ଯ୍ୟକ୍ରମ ଥିବା ବେଳେ ପରେ ଅପରାହ୍ନ ସାଢେ ୪ଟାରେ ରାଇକଳାରୁ ଭୁବନେଶ୍ବର ପ୍ରତ୍ୟାବର୍ତ୍ତନ କରି ମୁଖ୍ୟମନ୍ତ୍ରୀ ସଂଧ୍ୟାରେ ଭୁବନେଶ୍ବରର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରେ ପହଞ୍ଚିବା ନେଇ ସୂଚନା ମିଳିଛି ।
ଏହା ମଧ୍ୟ ପଢନ୍ତୁ:-ଆଦିବାସୀଙ୍କୁ ମିଳିବ ଉଚିତ ସମ୍ମାନ: ମୁଖ୍ୟମନ୍ତ୍ରୀ - CM MOHAN MAJHI VISITS KENDUJHAR
ଦୁଇଦିନିଆ ଗସ୍ତରେ କେନ୍ଦୁଝରରେ ପହଞ୍ଚିଥିବା ମୁଖ୍ୟମନ୍ତ୍ରୀ ମୋହନ ଗତକାଲି ଘଟଗାଁ ଯାଇ ଜିଲ୍ଲାର ଅଧୀଷ୍ଠାତ୍ରୀ ଦେବୀ ମା’ ତାରିଣୀଙ୍କ ଦର୍ଶନ କରିଥିଲେ । ପରେ ସେ ନିଜ ନିର୍ବାଚନ ମଣ୍ଡଳୀ କେନ୍ଦୁଝରରେ ଶ୍ରୀବଳଦେବଜୀଉଙ୍କ ମନ୍ଦିରକୁ ଯାଇ ଦର୍ଶନ କରିଥିଲେ । ଏହା ପରେ କେନ୍ଦୁଝର ସହରରେ ଏକ ରୋଡ଼ ସୋ’ କରିବା ସହ ଷ୍ଟାଡିୟମଠାରେ ଏକ ସମ୍ବର୍ଦ୍ଧନା ଓ ସାଧାରଣ ସଭାରେ ଯୋଗ ଦେଇଥିଲେ । ଆଦିବାସୀଙ୍କ ଅଧିକାର କଥା କହି ପୂର୍ବ ସରକାର ଉପରେ ବର୍ଷିଥିଲେ । ତାଙ୍କୁ ବିଜେଡିରେ ସାମିଲ ହେବା ପାଇଁ ମନ୍ତ୍ରୀ ପଦର ପ୍ରଲୋଭନ ମିଳିଥିଲା । ହେଲେ ସେ ବିକ୍ରି ହେବାର ବ୍ୟକ୍ତି ନୁହନ୍ତି ବୋଲି ମୋହନ କହିଥିଲେ । ସେ ବିରୋଧୀ ଆସନରେ ଥିବା ବେଳେ ଲୋକଙ୍କ ସ୍ବାର୍ଥ ପାଇଁ ପ୍ରଶ୍ନ କରୁଥିଲେ । ଏବେ ମୁଖ୍ୟମନ୍ତ୍ରୀ ଭାବେ ଲୋକଙ୍କ ପାଇଁ କାମ କରିବେ ବୋଲି କହିଥିଲେ । ବିଜେପିକୁ ଭୋଟ ଦେଇଥିବାରୁ ସେ କେନ୍ଦୁଝରବାସୀଙ୍କୁ ଧନ୍ୟବାଦ ମଧ୍ୟ ଦେଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
