ଭୁବନେଶ୍ବର: ଦୂର ହେବ ଆଳୁ ସଂକଟ । ପଡ଼ୋଶୀ ରାଜ୍ୟ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ଫୋନରେ କଥା ହେଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଓଡ଼ିଶାକୁ ଆଳୁ ଯୋଗାଣ ସ୍ବାଭାବିକ କରିବାକୁ ଅନୁରୋଧ କରିଛନ୍ତି ମୁଖ୍ୟମନ୍ତ୍ରୀ । ସମସ୍ୟା ଦୂର କରିବାକୁ ପଦକ୍ଷେପ ନେବା ପାଇଁ ଅନୁରୋଧ କଲେ ମୋହନ । ସେପଟେ ମମତା ବାନାର୍ଜୀ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିବା ସୂଚନା ମିଳିଛି ।
ଦୂର ହେବ ଆଳୁ ସମସ୍ୟା:
ରାଜ୍ୟରେ ଆଳୁ ସଂକଟ ଦେଖାଦେଇଥିବା ବେଳେ ଏବେ ସ୍ଥିତିରେ ସୁଧାର ଆସିବ । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହିତ ଫୋନରେ କଥା ହୋଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଓଡ଼ିଶାରେ ଆଳୁ ସଂକଟ ଦୂର କରିବା ପାଇଁ ଆଳୁ ଯୋଗାଣକୁ ସ୍ଵାଭାବିକ କରିବାକୁ ଟେଲିଫୋନ ଯୋଗେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହିତ ଆଲେଚନା କରି ଆଳୁ ଯୋଗାଣ ସମସ୍ୟା ଦୂର କରିବାକୁ ଅନୁରୋଧ କରିଛନ୍ତି । ସେପଟେ ଏନେଇ ପଦକ୍ଷେପ ନେବେ ବୋଲି ମମତା ପ୍ରତିଶୃତି ଦେଇଛନ୍ତି ।
ମମତାଙ୍କ ସହ କଣ କଥା ହେଲେ ମୁଖ୍ୟମନ୍ତ୍ରୀ:
ମୁଖ୍ୟମନ୍ତ୍ରୀ କଥା ହୋଇଛନ୍ତି, "ଦିଲ୍ଲୀରେ ଆପଣଙ୍କ ସହ ଆଲୋଚନା ହେବା ପରେ ଓଡ଼ିଶାକୁ ଆଳୁ ଯୋଗାଣ ସ୍ଵାଭାବିକ ହୋଇଥିଲା । ମାତ୍ର କିଛିଦିନ ପରେ ପୁଣିଥରେ ଓଡ଼ିଶାକୁ ଆଳୁ ଯୋଗାଣରେ ସମସ୍ୟା ସୃଷ୍ଟି ହୋଇଛି ।" ତେବେ ଏଥି ପ୍ରତି ଧ୍ୟାନ ଦେଇ ଆଳି ଯୋଗାଣ ସମସ୍ୟାକୁ ଦୂର କରିବାକୁ ପଦକ୍ଷେପ ନେବା ପାଇଁ ମୁଖ୍ୟମନ୍ତ୍ରୀ ମୋହନ ମାଝୀ ଅନୁରୋଧ କରିଛନ୍ତି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏ ଦିଗରେ ଉପଯୁକ୍ତ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଛନ୍ତି ।
ଆଳୁ ଦୋଷ ଆଜିର ନୁହେଁ:
ବିଜେପି ନେତା ସୁରଥ ବିଶାଳ କହିଛନ୍ତି, "ଯେଉଁ ଅଭାବନୀୟ ପରିସ୍ଥିତି ସୃଷ୍ଟି ହୋଇଛି । ଆଳୁ ଦୋଷ ଆଜିର ନୁହେଁ । ଏ ଆଳୁ ଦୋଷ ୨୫ ବର୍ଷ ଭିତରେ କେତେ ହୋଇଥିଲା ତାହା ରାଜ୍ୟବାସୀ ଜାଣିଛନ୍ତି । ଦୀର୍ଘଦିନର ସମସ୍ୟାକୁ ସମାଧାନ କରିବା ପାଇଁ ବର୍ତ୍ତମାନର ରାଜ୍ୟ ସରକାର ସାମାନ୍ୟତମ ତ୍ରୁଟି ଅବହେଳା ଉଦାସୀନତା ପ୍ରଦର୍ଶନ କରୁନାହାନ୍ତି । ଯାହା କରାଯାଇପାରିବ ପଦକ୍ଷପ ନିଆଯାଉଛି । ସମ୍ପୂର୍ଣ୍ଣ ସୁଧାର ଗୋଟିଏ ଦିନରେ ହେବ ନାହିଁ । ଆଳୁ ଚାଷ ପାଇଁ ଚାଷୀଙ୍କୁ ପ୍ରଭାବିତ କରି ପ୍ରତ୍ସାହିତ କରାଯିବ । ଶୀତଳ ଭଣ୍ଡାର ହେବ ଏଥିପାଇଁ ସମୟ ଲାଗିବ । ତାପରେ ଯାଇ ଅବସ୍ଥା ସୁଧୁରିବ । ଯେଉଁ ଦିନ ନବୀନ ବାବୁ ଚିଠି ଲେଖିଥିଲେ ଆଳୁ ଦେବା ପାଇଁ ସେତେବେଳେ ଲୋକଙ୍କ ମନରେ ସନ୍ଦେହ ହୋଇଥିଲା । ସତେ ଯେମିତି ମନା ବି ଇଏ କରିଥିଲେ ଇଏ କହିଲେ ଆଳୁ ଦେଇଦେବେ । ତେଣୁ ପୂର୍ବରୁ ଯାହା ଅବହେଳା କରିଛ ଏବେ ରାଜନୀତି ନକରି ମୁଖ୍ୟମନ୍ତ୍ରୀ ନେଉଥିବା ପଦକ୍ଷପକୁ ସହଯୋଗ କର । ଧୀରେ ଧୀରେ ଆଳୁ ସ୍ଥିତି ସୁଧୁରୁଛି । ସରକାର ଏବେ ସ୍ୱଳ୍ପ ମୂଲ୍ୟରେ ଆଳୁ ଯୋଗାଇବା ଆରମ୍ଭ କରିଛନ୍ତି ।"
ନୂଆ ସରକାର ଆସୁ ଆସୁ ଆଳୁ ସଙ୍କଟ:
ସେପଟେ ଆଳୁ ସମସ୍ୟାକୁ ନେଇ ବିଜେଡି ନେତା ସମ୍ବିତ ରାଉତରାୟ କହିଛନ୍ତି, "ନବୀନ ସରକାରର ଦୀର୍ଘ ବର୍ଷର ଶାସନ ଭିତରେ ଥରେ କି ଦୁଇଥର ଆଳୁ ସଙ୍କଟ ଦେଖାଦେଇଥିଲା । କିନ୍ତୁ ଏ ସରକାର ଆସୁ ଆସୁ ଆଳୁ ସଙ୍କଟ ଆଜି ତୀବ୍ରରୂପ ଧାରଣ କରିଛି । ଖାଉଟି ହନ୍ତସନ୍ତ ହେଉଛନ୍ତି । ରାଜ୍ୟ ସରକାର ଆଳୁ ଆଣିବା ପାଇଁ ଉଦ୍ୟମ କରୁଛନ୍ତି, ତଥାପି ଆଳୁ ସମସ୍ୟା ଦୂର ହେଇପାରୁନି । ଉତ୍ତରପ୍ରଦେଶରୁ ଆଳୁ ଆଣିବା ପାଇଁ ରାଜ୍ୟ ସରକାର କଥା ହେଉଥିଲେ । ଏବେ ପୁଣି ପଶ୍ଚିମବଙ୍ଗରୁ ଆଣିବା ପାଇଁ କଥା ହେଉଛନ୍ତି । ଯୋଗାଣ ମନ୍ତ୍ରୀ ବାରମ୍ବାର ବୟାନ ଦେଉଛନ୍ତି ଆଳୁ ଗୋଦାମ ଯାଇଥିଲେ, ଚଢ଼ାଉ କରୁଛନ୍ତି, ଆକଟ କରୁଛନ୍ତି । ହେଲେ ଏହା ସତ୍ତ୍ବେ ମଧ୍ୟ ଆଳୁ ସଂକଟ ଦୂର ହୋଇପାରୁନି । ଚେଷ୍ଟା ଜାରି ରଖିଛନ୍ତି ଦେଖାଯାଉ କେତେଦିନରେ ସମସ୍ୟାର ସମାଧାନ କରୁଛନ୍ତି । ଆମେ ଆଶା କରୁଛୁ ଆଳୁ ସମସ୍ୟା ଦୂର ହେବ । ଲୋକଙ୍କୁ ସୁଲଭ ଦରରେ ଆଳୁ ମିଳିବ ।
ଉଭୟ ବିଜେପି ଓ ବିଜେଡି ଉପରେ ବର୍ଷିଲା କଂଗ୍ରେସ:
ସେପଟେ ଆଳୁ ସମସ୍ୟାକୁ ନେଇ ଆଜି ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ସରକାରଙ୍କୁ ଟାର୍ଗେଟ କରିଛି କଂଗ୍ରେସ । କଂଗ୍ରେସ ନେତା ବିଜୟ ପଟ୍ଟନାୟକ କହିଛନ୍ତି "ଆଳୁ ଦାମ ବଢିବା ଯୋଗୁଁ ଲୋକ ଦୁଃଖ କଷ୍ଟରେ ବଞ୍ଚୁଛନ୍ତି । 2016ରେ ବିଜେଡି ସରକାର ଆଳୁ ମିଶନ ଆରମ୍ଭ କରିଥିଲେ ହେଲେ ତାହାର ବିଫଳତା ଯୋଗୁଁ ଆଜି ଏ ସମସ୍ୟା ସୃଷ୍ଟି ହୋଇଛି । ବର୍ତ୍ତମାନର ସରକାର ନେଉଥିବା ପଦକ୍ଷେପରୁ ଯାହା ଜଣା ପଡୁଛି ସେମାନେ ସିରିୟସ ନାହାନ୍ତି । କାହିଁକି ଆଳୁ ମିଶନ ବିଫଳ ହେଲା ତାହାର କାରଣ ଖୋଜନ୍ତୁ ସରକାର । ପରିଚାଳନା ଗତ ତ୍ରୁଟି ଯୋଗୁଁ ଆଳୁ ମିଶନ ଫେଲ ହୋଇଛି । ସରକାରୀ ଶୀତଳ ଭଣ୍ଡାରକୁ ବିଜେଡି ସରକାର ବନ୍ଦ କରିଦେଲେ । ଘରୋଇ ଶୀତଳ ଭଣ୍ଡାର ମାଲିକ ଓ ଚାଷୀଙ୍କ ଭିତରେ ସମନ୍ୱୟ ରହିଲା ନାହିଁ । ମାତ୍ର 1 ଲକ୍ଷ ହେକ୍ଟରରେ ଆଳୁ ଚାଷ କଲେ ରାଜ୍ୟରେ ଆଳୁ ଚାହିଦା ପୂରଣ ହୋଇ ପାରିବ । ପଶ୍ଚିମବଙ୍ଗରୁ କାହିଁକି ଆଳୁ ଗାଡି ଛଡା ଯାଉନାହିଁ ସେ ନେଇ ସରକାର ବିଚାର କରିବା ଦରକାର ।"
ଇଟିଭି ଭାରତ, ଭୁବନେଶ୍ବର
