ଝାରସୁଗୁଡ଼ା: ସରଗରମ ହେଉଛି ଝାରସୁଗୁଡ଼ା ରାଜନୀତି । ବିଜୁ ଜନତା ଦଳର ଷ୍ଟାର ଶୋ ଏବଂ ବିଜେପିର ବିଜେପି ମନ୍ତ୍ରୀଙ୍କ ପ୍ରଚାର କମ୍ପୁଛି ଝାରସୁଗୁଡ଼ା ନିର୍ବାଚନ ମଣ୍ଡଳୀ । ମତଦାନ ତାରିଖ ପାଖେଇ ଆସୁଥିବାବେଳେ ଜୋରସୋରେ ପ୍ରଚାର କରୁଛନ୍ତି ବିଭିନ୍ନ ଦଳର ହେଭିୱେଟ । ବିଜେଡି ବଲିଉଡରୁ ଷ୍ଟାର ପ୍ରଚାରକ ଆଣି ଥିବାବେଳେ ବିଜେପି ପଡ଼ୋଶୀ ରାଜ୍ୟର ମନ୍ତ୍ରୀଙ୍କୁ ଆଣି ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ମାଗୁଛନ୍ତି ।
ଗତକାଲି ବିଜେଡ଼ି ପ୍ରାର୍ଥୀ ଦୀପାଳି ଦାସଙ୍କ ପାଇଁ ବଲିଉଡ ଷ୍ଟାର ନିଲ ନିତିନ ମୁକେଶ ଓ ଭାଗ୍ୟଶ୍ରୀ ଝାରସୁଗୁଡ଼ା ବ୍ଳକ ଓ ପୌରାଞ୍ଚଳରେ ପ୍ରଚାର କରିଥିବା ବେଳେ ଆଜି ପୁଣି ଲଇକେରା ଓ କୁଲାବିରା ବ୍ଲକରେ ଦୀପାଳି ଦାସଙ୍କ ପାଇଁ ପ୍ରଚାର କରିଛନ୍ତି । ଏହାସହ ଶିକ୍ଷା, ସ୍ଵାସ୍ଥ୍ୟ ଓ ଗମନାଗମନ ବିକାଶ ପାଇଁ ଦୀପାଳି ଦାସ ଏବଂ ବରଗଡ଼ ଲୋକସଭା ପ୍ରାର୍ଥୀ ପରିନିତା ମିଶ୍ରଙ୍କୁ ଭୋଟ ଦେବାକୁ ଲୋକଙ୍କୁ ନିବେଦନ କରିଛନ୍ତି ବଲିଉଡ ଷ୍ଟାର ।
ସେପଟେ ଆଜି ଲଇକେରା ବ୍ଳକର ଝିର୍ଲାପାଲି, ଭାତଲଇଡ଼ା ଓ ଭାଲୁପତ୍ରାରେ ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀଙ୍କ ପାଇଁ ଛତିଶଗଡ଼ ଅର୍ଥମନ୍ତ୍ରୀ ଓମ୍ ପ୍ରକାଶ ଚୌଧୁରୀ ପ୍ରଚାର କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ ମଙ୍ଗଳକାରୀ ଯୋଜନାକୁ ନେଇ ଝାରସୁଗୁଡ଼ା ନିର୍ବାଚନ ମଣ୍ଡଳୀର ବିକାଶ ପାଇଁ ପରିବର୍ତ୍ତନର ଆବଶ୍ୟକ ରହିଛି ଏବଂ ୨୦୨୪ ସାଧାରଣ ନିର୍ବାଚନରେ ଓଡ଼ିଶାରେ ତଥା ଝାରସୁଗୁଡ଼ାରେ ମଧ୍ୟ ପରିବର୍ତ୍ତନ ହେବ ବୋଲି ଓମ୍ ପ୍ରକାଶ କହିଥିଲେ ।
ଏହି ଅବସରରେ ଦୀପାଳି କହିଛନ୍ତି ଯେ, ଜନ ସାଧାରଣ ଜାଣିଛନ୍ତି ମୁଖ୍ୟମନ୍ତ୍ରୀଙ୍କ ସହ ବିକାଶ ରହିଛି । ବିରୋଧୀ ସାଇବେରିଏନ ପକ୍ଷୀ ନିର୍ବାଚନ ବେଳେ ଆସି ପୁଣି ଉଭେଇ ଯିବେ । ତେଣୁ ଲୋକେ ଆସନ୍ତା 20 ତାରିଖ ଡବଲ୍ ଶଙ୍ଖ ଫୁଙ୍କିବେ ଏବଂ ବିଜୁ ଜନତା ଦଳ ପ୍ରତି ବିପୁଳ ବିଜୟ ଆଣି ଦେବେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାଆମାନଙ୍କ ହାତମୁଠାକୁ ଟାଣ କରିଛନ୍ତି । ନବୀନ ହେଉଛନ୍ତି ବିକାଶର ପୁରୁଷ । ତାଙ୍କ ନେତୃତ୍ୱରେ ରାଜ୍ୟ ବିକାଶର ଶିଖରକୁ ପହଞ୍ଚିବ ତେଣୁ ଲୋକେ ନିଶ୍ଚିତ ଭାବରେ ବିଜୁ ଜନତା ଦଳକୁ ଭୋଟ ଦେଇ ବିଜୟୀ କରିବେ ବୋଲି ପରିନିତା କହିଛନ୍ତି । ସେପଟେ ତାମିଲ ଶାସନ କଥା ଉଠାଇ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଛନ୍ତି ଛତିଶଗଡ଼ ଅର୍ଥମନ୍ତ୍ରୀ ଓମ୍ ପ୍ରକାଶ ଚୌଧୁରୀ ।
ଇଟିଭି ଭାରତ, ଭୁବନେଶ୍ବର
