ଭୁବନେଶ୍ବର: ମୁଖ୍ୟମନ୍ତ୍ରୀ ମୋହନ ମାଝୀ ୨୦୨୪-୨୫ ଆର୍ଥିକ ବର୍ଷ ପାଇଁ ବିଧାନସଭାରେ ପ୍ରଥମ ବଜେଟ୍ ଉପସ୍ଥାପନ କରିଛନ୍ତି । ଏଥିରେ କୃଷି ଓ କୃଷକଙ୍କ ଉନ୍ନତି ପାଇଁ ଫୋକସ୍ କରାଯାଇଛି । କୃଷି କ୍ଷେତ୍ର ପାଇଁ ୩୩ ହଜାର ୯୧୯ କୋଟି ଟଙ୍କାର ବ୍ୟୟବରାଦ ହୋଇଛି । ଯାହାକି ଗତବର୍ଷ ଅପେକ୍ଷା ୩୬ ପ୍ରତିଶତ ଅଧିକ । ୨୦୨୩-୨୪ରେ କୃଷି ବଜେଟ୍ ପରିମାଣ ୨୪ ହାର ୮୧୯ କୋଟି ଟଙ୍କା ଥିଲା । ଏଥର କୃଷି ବଜେଟ ପରିମାଣ ବଢାଇ କୃଷକଙ୍କ ଆୟ ବୃଦ୍ଧି ଓ ଅର୍ଥନୈତିକ ବିକାଶର ଲକ୍ଷ୍ୟ ରଖିଛନ୍ତି ମୋହନ ସରକାର ।
“ଲୋକଙ୍କ ବଜେଟ୍ ୨୦୨୪”ରେ କୃଷକଙ୍କ ପାଇଁ ଗତ ଆର୍ଥିକ ବର୍ଷ ତୁଳନାରେ ୩୬% ଅଧିକ(₹୩୩,୯୧୯ କୋଟି) ଓ ଜଳସେଚନ ତଥା ବନ୍ୟା ନିୟନ୍ତ୍ରଣ ପାଇଁ ଗତ ଆର୍ଥିକ ବର୍ଷ ତୁଳନାରେ ୨୨% ଅଧିକ( ₹୧୪,୧୧୧ କୋଟି) ବ୍ୟୟବରାଦ କରାଯାଇଛି। ଚାଷୀଙ୍କ ଆୟ ବୃଦ୍ଧିରେ ଏହା ସହାୟକ ହେବ। #PeoplesBudget #ବିକଶିତଓଡ଼ିଶାବିକଶିତଭାରତ pic.twitter.com/37iBVC77qJ
— CMO Odisha (@CMO_Odisha) July 25, 2024
କୃଷି ବଜେଟରେ ରାଜ୍ୟ ସରକାର ପିଏମ୍ କିଷାନ ଯୋଜନା, ସମୃଦ୍ଧ କୃଷକ ଯୋଜନା, ଓଡ଼ିଶା ବଳଭଦ୍ର ଜୈବିକ ଚାଷ ମିଶନ, ଡ୍ୟାମ ସୁରକ୍ଷା ଓ ଉନ୍ନତିକରଣ ଭଳି ନୂଆ ଯୋଜନା ଘୋଷଣା କରିଛନ୍ତି । ସମୃଦ୍ଧ କୃଷକ ଯୋଜନାରେ ଚାଷୀଙ୍କ ଠାରୁ କ୍ବିଣ୍ଟାଲ ପିଛା ୩୧୦୦ ଟଙ୍କାରେ ଧାନ କିଣାଯିବ । ଯାହା ବର୍ତ୍ତମାନର ସର୍ବନିମ୍ନ ସହାୟକ ମୂଲ୍ୟ (MSP) ଠାରୁ ୮୦୦ ଟଙ୍କା ଅଧିକ । ଏହି ସମୃଦ୍ଧ କୃଷକ ଯୋଜନା ପାଇଁ ବଜେଟରେ ୫ ହଜାର କୋଟି ଟଙ୍କାର ବ୍ୟୟବରାଦ କରାଯାଇଛି । ମଣ୍ଡିରେ କଟନୀ ଛଟନୀ ରୋକିବାକୁ ଆଦ୍ରତା ପରିମାପକ ଯନ୍ତ୍ର ଓ କମ୍ୟୁଟରାଇଜ ଓଜନ ଉପକରଣ ବ୍ୟବହାର କରାଯିବ । ସେହିଭଳି ସିଏମ୍ କିଷାନ ଯୋଜନାରେ ଚାଷୀଙ୍କୁ ଟପ୍ ଅପ୍ ଦେବେ ରାଜ୍ୟ ସରକାର ।
ଚାଷୀମାନଙ୍କ ଲାଗି ବ୍ଲକ ସ୍ତରରେ କୃଷି ସମୃଦ୍ଧ କେନ୍ଦ୍ର ପ୍ରତିଷ୍ଠା କରାଯିବ । ମିଲେଟ ଜାତୀୟ ଫସଲର ଉତ୍ପାଦନ ଓ ବ୍ୟବହାରକୁ ବୃଦ୍ଧି କରିବା ପାଇଁ କୃଷି ବଜେଟରେ ଶ୍ରୀ ଅନ୍ନ ଅଭିଯାନ ପାଇଁ ୬୪୯ କୋଟି ଟଙ୍କାର ବ୍ୟୟଅଟକଳ ହୋଇଛି । ଆଦିବାସୀ ଅଞ୍ଚଳରେ ମିଲେଟ୍ ଚାଷୀଙ୍କୁ ପ୍ରୋତ୍ସାହନ ଦିଆଯିବ । ମିଲେଟ ପ୍ରକ୍ରିୟାକରଣ ପ୍ଲାଣ୍ଟ ସ୍ଥାପନ ପାଇଁ ରାଜ୍ୟ ସରକାର ୪୦ ପ୍ରତିଶତ ସବସିଡି ଦେବେ । ସରକାରୀ କ୍ୟାଣ୍ଟିନ, ସ୍କୁଲ ଓ ଅନୁଷ୍ଟାନରେ ମିଲେଟ୍ ଯୋଗାଇ ପୁଷ୍ଟିହୀନତାର ମୁକାବିଲା କରାଯିବ । ଉପଖଣ୍ଡ ସ୍ତରରେ ପ୍ରାଥମିକ ପର୍ଯ୍ୟାୟରେ ଶୀତଳ ଭଣ୍ଡାର ନିର୍ମାଣ ପାଇଁ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି ।
ସେହିଭଳି ବଜେଟରେ ଜଳସେଚନ ଓ ବନ୍ୟା ନିୟନ୍ତ୍ରଣ ପାଇଁ ୧୪, ୧୧୧ କୋଟି ଟଙ୍କାର ବ୍ୟୟବରାଦ ହୋଇଛି । ଗତ ଆର୍ଥିକ ବର୍ଷ ତୁଳନାରେ ଏହା ୨୨ ପ୍ରତିଶତ ଅଧିକ । ଚାଷୀଙ୍କ ଆୟ ବୃଦ୍ଧିରେ ଏହା ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
