ଭୁବନେଶ୍ବର: ଆଜିଠୁ ଦୁଇଦିନିଆ ଓଡିଶା ଗସ୍ତରେ ଆସିଛନ୍ତି କେନ୍ଦ୍ର କୋଇଲା ଏବଂ ଖଣି ରାଷ୍ଟ୍ରମନ୍ତ୍ରୀ ସତୀଶ ଚନ୍ଦ୍ର ଦୁବେ । ଭୁବନେଶ୍ୱର, ସମ୍ବଲପୁର ଏବଂ ଅନୁଗୁଳରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ କେନ୍ଦ୍ରମନ୍ତ୍ରୀ । ଆଜି ପ୍ରଥମେ ଭୁବନେଶ୍ୱର ସ୍ଥିତ ନାଲକୋ କର୍ପୋରେଟ ଅଫିସରେ ସମୀକ୍ଷା ବୈଠକରେ ଯୋଗଦେବା ପରେ ଅନୁଗୁଳ ଗସ୍ତ କରିବେ । ଅନୁଗୋଳରେ ସ୍ମେଲ୍ଟର ପ୍ଲାଣ୍ଟ ପରିଦର୍ଶନ କରିବେ । ସେଠାରୁ ସମ୍ବଲପୁର ବୁର୍ଲାସ୍ଥିତ ମହାନଦୀ କୋଲଫିଲ୍ଡ ମୁଖ୍ୟ କାର୍ଯ୍ୟାଳୟକୁ ଯିବେ କେନ୍ଦ୍ରମନ୍ତ୍ରୀ । ସେହିପରି ଆସନ୍ତାକାଲି (28 ତାରିଖ) ସେ ସମ୍ବଲପୁରରେ ଏକାଧିକ ସରକାରୀ କାର୍ଯ୍ୟକ୍ରମରେ ଯୋଗ ଦେବା ସହ ବିଭିନ୍ନ ସ୍ଥାନ ପରିଦର୍ଶନ କରିବାର କାର୍ଯ୍ୟକ୍ରମ ରହିଛି ।
ମୋଦି ଶାସନରେ କୌଣସି ରାଜ୍ୟକୁ ଅବହେଳା ନାହିଁ :-
ଭୁବନେଶ୍ବର ବିମାନ ବନ୍ଦରରେ ପହଞ୍ଚିବା ପରେ ପ୍ରତିକ୍ରିୟାରେ କେନ୍ଦ୍ରମନ୍ତ୍ରୀ କହିଛନ୍ତି, ‘‘ଓଡିଶା ଭାରତର ଅଭିନ୍ନ ଅଙ୍ଗ । ମୋଦିଜୀଙ୍କ ସରକାରରେ କୌଣସି ରାଜ୍ୟକୁ ଅବହେଳା କରାଯିବ ନାହିଁ । ଯାହାର ଯେତିକି ହକ୍, ତାକୁ ସେତିକି ମିଳିବ । ରାଜ୍ୟରେ ଡ଼ବଲ ଇଞ୍ଜିନ ସରକାର ଅଛି । ଓଡ଼ିଶାବାସୀଙ୍କ ପାଇଁ ପ୍ରଧାନମନ୍ତ୍ରୀ ସବୁ କିଛି କରିବେ ।’’
କେନ୍ଦ୍ର-ରାଜ୍ୟ ଖଣି ରୟାଲ୍ଟି ନିଷ୍ପତ୍ତି କେମିତି ହେବ:-
ସେହିପରି କୋଇଲା ଖଣିର ରୟାଲ୍ଟି ଉପରେ କାହାକୁ କେତେ ଯିବ ପ୍ରଶ୍ନରେ ମନ୍ତ୍ରୀ କହିଛନ୍ତି, ‘‘ନୀତି ଆୟୋଗ ସହ ବିଭିନ୍ନ ବିଷୟରେ ବୈଠକ ହେବ । ତାହା ଉପରେ ନିଷ୍ପତ୍ତି ନିଆଯିବ । ମୁଁ ଆଜି ନାଲକୋ ଯାଇ ସମୀକ୍ଷା କରିବି । ସେଠାରେ ଶ୍ରମିକମାନଙ୍କର କ'ଣ ଅସୁବିଧା ଅଛି, ତାହା ଉପରେ ମଧ୍ୟ ଆଲୋଚନା କରିବି । ସ୍ଥାନୀୟ ଲୋକଙ୍କ ସମସ୍ୟା ଉପରେ ‘ନାଲୋକ’ ଧ୍ୟାନ ଦେଉଛି କି ନାହିଁ ତାହା ଉପରେ ନଜର ଦେବି । ସବୁ ଜାଗାକୁ ବିଜେପି ଫୋକସ କରୁଛି । ଯେଉଁ ଖଣିଜ ପଦାର୍ଥ ଭାରତରେ ନାହିଁ, ବିଦେଶରୁ ଆମଦାନୀ ହେଉଛି, ସେଭଳି ମହତ୍ତ୍ୱପୂର୍ଣ୍ଣ ଖଣିଜ ସମ୍ପଦ ଉପରେ ଆମର ଖୋଜ ଜାରି ରହିଛି । ଏବେ ସର୍ଭେ ଚାଲିଛି । ଯେଉଁଠି ଏଭଳି ଖଣି ବାହାରିବ ସେ ଦିଗରେ କାର୍ଯ୍ୟ କରାଯିବ । ବହୁତ କାମ ହୋଇଛି । ପୂର୍ବ ସରକାର ଏବଂ ଏବେ ସରକାର ଭିତରେ ବହୁତ ଫରକ ଅଛି । ବିଜେପି ସରକାରରେ ବହୁତ କାମ ହୋଇଛି ।’’
ନିକଟରେ ସୁପ୍ରିମକୋର୍ଟ କ’ଣ ଦେଇଥିଲେ ରାୟ:-
ଗୁରୁବାର ସୁପ୍ରିମକୋର୍ଟ ଖଣି ରୟାଲ୍ଟି ପ୍ରସଙ୍ଗରେ ରାଜ୍ୟମାନଙ୍କ ସପକ୍ଷରେ ବଡ ରାୟ ପ୍ରଦାନ କରିଛନ୍ତି । ରାଜ୍ୟରେ ଥିବା ଖଣି ଉପରେ ରାଜ୍ୟ ସରକାର ଟିକସ ଆଦାୟ କରିପାରିବେ । ଏହା ସେମାନଙ୍କର ଅଧିକାର କ୍ଷେତ୍ର । କେନ୍ଦ୍ର ସରକାର ଏହି ଅଧିକାରରୁ ରାଜ୍ୟମାନଙ୍କୁ ବଞ୍ଚିତ କରିପାରିବ ନାହିଁ । ରୟାଲ୍ଟି କୌଣସି ଟିକସ୍ ନୁହେଁ ବୋଲି ସର୍ବୋଚ୍ଚ କୋର୍ଟ ତାଙ୍କ ରାୟରେ ସ୍ପଷ୍ଟ କରିଥିଲେ । ଏହି ନିଷ୍ପତ୍ତିରେ ଏକାଧିକ ପୂର୍ବ-ଭାରତୀୟ ରାଜ୍ୟ ଓ ବିଶେଷ ଭାବେ ଓଡ଼ିଶା ଲାଭବାନ ହେବାକୁ ଯାଉଛି । ଓଡିଶାରେ ବକ୍ସାଇଟ୍, କୋଇଲା, ଲୁହାପଥର ଓ ମାଙ୍ଗାନିଜ୍ ପରି ଖଣିଜ ସମ୍ପଦ ଯଥେଷ୍ଟ ପରିମାଣରେ ରହିଛି । ଓଡିଶା ପ୍ରାକୃତିକ ସମ୍ପଦରେ ଭରପୂର ରାଜ୍ୟ । ତେଣୁ ଏହି ରାୟ ଓଡିଶାର ଅର୍ଥନୀତିକୁ ମଧ୍ୟ ବେଶ ପ୍ରଭାବିତ କରିବାକୁ ଯାଉଛି । ତେବେ ରାଜ୍ୟ ସରକାର କେମିତି ଟିକସ୍ ନିର୍ଦ୍ଧାରିତ କରିବେ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନି ।
ଇଟିଭି ଭାରତ, ଭୁବନେଶ୍ବର
