ଭୁବନେଶ୍ବର: ଜୁଲାଇ ପହିଲାରୁ ହଟିବ ବ୍ରିଟିଶ ଆଇନ । ସାରା ଦେଶରେ ଲାଗୁ ହେବ ନୂଆ ଆଇନ । ଦୋଷ ଥିଲେ ହେବ କଠୋର ଦଣ୍ଡ, ବିନା ଦୋଷରେ ଏସବୁ ଧାଁ ଧପଡରୁ ମିଳିବ ମୁକ୍ତି । ଅର୍ଥାତ୍ ଅଯଥା ପୋଲିସ କେସ ଓ ଗିରଫଦାରୀ ଭଳି ସ୍ଥିତିରୁ କ୍ଷାନ୍ତ ମିଳିବ । କାହାରିକୁ ବିନା ଦୋଷରେ ପୋଲିସ କରିପାରିବନି ହଇରାଣ ହରକତ । କାରଣ ନୂଆ ଆଇନରେ ଏଭଳି କିଛି ପରିବର୍ତ୍ତନ ଆଣିଛନ୍ତି ସରକାର, ଯାହା ଆସନ୍ତା ମାସ ପହିଲାରୁ ସାରା ଦେଶରେ ଲାଗୁ ହେବାକୁ ଯାଉଛି ।
ନୂଆ ଆଇନରେ ଏଥର ଇ-ସମନକୁ ଗୁରୁତ୍ବ ଦିଆଯାଇଛି । ଅର୍ଥାତ୍ ଅନଲାଇନରେ ଇମେଲ ବା ହ୍ବାଟ୍ସଆପ ଯୋଗେ ଏଥର ଆସିବ ସମନ ବା କୋର୍ଟ କଚେରୀରୁ ଚିଠି । ଏହି ପ୍ରକ୍ରିୟାରେ ଆଉ ଡାକ ଜରିଆରେ ବିଳମ୍ବରେ ସମନ ପହଞ୍ଚିବା ସମସ୍ୟା ରହିବ ନାହିଁ । ଯେକୌଣସି ବ୍ୟକ୍ତି ସହଜରେ କିଛି କେସ ବା ସେ ସଂକ୍ରାନ୍ତୀୟ ସମସ୍ୟା ଥିଲେ ଫୋନ ଯୋଗେ ଅବା ଅନଲାଇନ ଜରିଆରେ ଜାଣିପାରିବେ ।
ମହିଳା ଓ ଶିଶୁଙ୍କ ପାଇଁ କଡ଼ା ଆଇନ
ନୂଆ ଆଇନରେ ମହିଳା ଓ ଶିଶୁଙ୍କ ପ୍ରତି ହେଉଥିବା ଅପରାଧ ପାଇଁ କଠୋର ଦଣ୍ଡ ବ୍ୟବସ୍ଥା କରାଯାଇଛି । ପ୍ରତାରଣା କରିବା, ପରିଚୟ ଲୁଚାଇ ମହିଳା ଓ ଶିଶୁଙ୍କୁ ଠକିବା ଭଳି କାର୍ଯ୍ୟକୁ ଧର୍ତ୍ତବ୍ୟ ଅପରାଧ ଭାବେ ନିଆଯାଇଛି । ଏଥିରେ ନାବାଳିକାକୁ ପ୍ରେମରେ ଫସାଇବା ଓ ବିବାହ କରିବା ଭଳି ଘଟଣାକୁ ଗୁରୁତର ସହକାରେ ଗ୍ରହଣ କରାଯାଇଛି । ଏପରିକି ମହିଳାଙ୍କୁ ଅନିଚ୍ଛା ସତ୍ତ୍ବେ ଥାନାକୁ ଡ଼କାଯାଇ ପାରିବ ନାହିଁ । ଏପରି ସ୍ଥିତିରେ ପୋଲିସ ତାଙ୍କ ପାଖକୁ ଯାଇ ତଦନ୍ତ କରିବ ।
ସହଜରେ ହେବନି ଗିରଫଦାରୀ
ଧର୍ତ୍ତବ୍ୟ ଅପରାଧ କରିନଥିଲେ ବା ୩ ବର୍ଷରୁ ଊର୍ଦ୍ଧ୍ବ ସଜା ଥିବା ଅପରାଧ କରିନଥିଲେ ସହଜରେ ଗିରଫ କରିପାରିବନି ପୋଲିସ । ଛୋଟ ଛୋଟ ଅପରାଧ ମାମଲାରେ ପୋଲିସ ଅଭିଯୁକ୍ତକୁ ନିର୍ଯାତନା ଦେଇପାରବ ନାହିଁ । କାରଣ ଏ କ୍ଷେତ୍ରରେ ପୋଲିସର କ୍ଷମତାକୁ ସଙ୍କୁଚିତ କରାଯାଇଛି । କେହି ଅଭିଯୋଗ ଆଣିଲେ ପୋଲିସ ହଠାତ୍ ମାମଲା ରୁଜୁ କରିପାରିବ ନାହିଁ । ଘଟଣାର ସତ୍ୟତା ଯାଞ୍ଚ ପାଇଁ ୧୪ ଦିନ ସମୟ ନେବ । ତଦନ୍ତ କରି ପରେ ଉପରିସ୍ଥ ଅଧିକାରୀଙ୍କ ଅନୁମତି କ୍ରମେ ଆକ୍ସନ ନିଆଯିବ । ଗିରଫ ସମୟରେ ପୋଲିସ କାରଣ ଜଣାଇବ । କେବେଠୁ ଗିରଫ ହେଲେ, ଗିରଫ ସମ୍ପର୍କିତ ସମସ୍ତ ସୂଚନା ସବୁକିଛି ଉପରିସ୍ଥ ଅଧିକାରୀ ଜାଣିବେ । ହତ୍ୟା ଓ ଦୁଷ୍କର୍ମ ଓ ଆତଙ୍କବାଦ ଭଳି ଜଘନ୍ୟ ଅପରାଧ କରିନଥିଲେ ସହଜରେ ହାତକଡି ପିନ୍ଧାଇ ପାରିବନି ପୋଲିସ ।
ଜବତ ସମୟରେ ଭିଡିଓ ବାଧ୍ୟତାମୂଳକ
ନୂଆ ଆଇନରେ କୌଣସି ଜିନିଷ ଜବତ ବେଳେ ଭିଡିଓ ପ୍ରମାଣ ବାଧ୍ୟତାମୂଳକ କରାଯାଇଛି । ପୂର୍ବରୁ କିଛି ଜବତ ହେଲେ ତାହାର ପ୍ରମାଣ ତଥ୍ୟ କେବଳ କାଗଜପତ୍ରରେ ରହୁଥିଲା । ଏଣିକି ଏବେ ଯେକୌଣସି ଜିନିଷ ଜବତ ବେଳେ ତାହା କେଉଁ ସ୍ଥାନରୁ କେଉଁ ସମୟରେ କାହା ଉପସ୍ଥିତିରେ ଜବତ ହେଲା ସେସବୁର ଭିଡିଓ ରେକର୍ଡ ହେବ । ଗୋଟିଏ ସ୍ଥାନରୁ ଜବତ କରି ଅନ୍ୟ ସ୍ଥାନରୁ ଦେଖାଇ ପାରିବେ ନାହିଁ ପୋଲିସ କର୍ମଚାରୀ ।
ଇଡି ଭଳି ପୋଲିସ କ୍ଷମତା
କୌଣସି ଅପରାଧ ଜରିଆରେ ଠୁଳ କରାଯାଇଥିବା ବେଆଇନ ସମ୍ପତ୍ତିକୁ ପୋଲିସ ବ୍ୟାଜାପ୍ତ କରିପାରିବ । ପୋଲିସକୁ ଏହି କ୍ଷମତା ଦିଆଯାଇଛି । ଅର୍ଥାତ୍ କୌଣସି ଜିନିଷକୁ ଯେପରି ଇଡି ବ୍ୟାଜାପ୍ତ କରୁଥିଲା ସେଭଳି ପୋଲିସ ମଧ୍ୟ ଠାବ କରି ତାକୁ ବ୍ୟାଜାପ୍ତ ପାଇଁ ଜବତ କରି ସିଜ କରିପାରିବ ।
ନୂଆ ଆଇନରେ ପୋଲିସ ବିରୋଧରେ ବି ଅଭିଯୋଗ କରିହେବ । ଆଉ ଥାନା ବାବୁ ନ ଶୁଣିଲେ କୋର୍ଟର ଦ୍ବାରସ୍ଥ ହେବା ବଦଳରେ ଏହି ଆଇନରେ ଅନେକ ସୁବିଧା କରାଯାଇଛି । ଏନେଇ ସମ୍ପୃକ୍ତ ଅଧିକାରୀଙ୍କ ବରିଷ୍ଠ ଅଧିକାରୀଙ୍କ ପାଖରେ ଅଭିଯୋଗ କରିବାର ସୁଯୋଗ ରହିବ । ଏହାର ରିପୋର୍ଟ ଦେଲେ ତା'ର ଅଭିଯୋଗକୁ ତ୍ୱରିତ ଭିତ୍ତିରେ ଶୁଣି ଆବଶ୍ୟକ ପଡ଼ିଲେ ସେହି ଅଫିସର ବିରୋଧରେ ମାମଲା ରୁଜୁ ହୋଇପାରିବ ।
ଆତଙ୍କବାଦୀ କାର୍ଯ୍ୟକଳାପ ପାଇଁ ଆଇନ କଡାକଡା କରାଯାଇଛି । ଆତଙ୍କୀ ଗତିବିଧି ବା ସେଥିରେ ସମ୍ପୃକ୍ତ ଥିଲେ କଠୋର ଦଣ୍ଡ ମିଳିବ । ସେହିପରି ଛିନତାଇକୁ ହାଲୁକା ଭାବେ ନନେଇ ଏକ ଅପରାଧ ଭାବେ ବିଚାର କରାଯାଇଛି । କଙ୍ଗାରୁ କୋର୍ଟ ଭଳି ବିନା ଆଇନରେ ଅନ୍ୟକୁ ଦଣ୍ଡ ଦେବା ବା ଅତ୍ୟାଚାର କରିବା ଭଳି ଘଟଣାକୁ ଗୁରୁତର ସହ ନିଆଯାଇଛି । ଜାତିଭିତ୍ତିକ ଅତ୍ୟାଚାର, ଘୃଣା ଓ ଭେଦଭାବକୁ ଜନିତ ଅପରାଧ ପାଇଁ ୭ରୁ ୧୦ବର୍ଷ ପର୍ଯନ୍ତ ଦଣ୍ଡ ବିଧାନ ରହିଛି । ନକଲି ନୋଟ କାରବାର, ଧୋକାଧାଡି ଠକେଇ, ଅପହରଣ, ମାନବ ଚାଲାଣ ଭଳି ଡକାୟତି ଓ ଦେହ ବ୍ୟବସାୟ ଭଳି ଅପରାଧକୁ ଗୁରୁତର ଅପରାଧ ଭାବେ ନିଆଯାଇଛି । ଏନେଇ କଠୋର ଦଣ୍ଡ ବିଧାନ ସହ କଡ଼ା ନିୟମ ହୋଇଛି ।
ସାକ୍ଷୀ ଓ ଦୋଷ ସ୍ବୀକାରକୁ ଗୁରୁତ୍ବ
ସାକ୍ଷୀମାନଙ୍କର ସୁରକ୍ଷା ପାଇଁ ନୂଆ ଆଇନରେ WpS ବ୍ୟବସ୍ଥା ହୋଇଛି । ରାଜ୍ୟ ଓ ଜିଲ୍ଲାସ୍ତରରେ ସାକ୍ଷୀମାନଙ୍କର ସୁରକ୍ଷା ପାଇଁ ବ୍ୟବସ୍ଥା ଓ ଏଥିପାଇଁ ଖର୍ଚ୍ଚର ବ୍ୟବସ୍ଥା କରାଯାଇଛି ।ଏଥିସହ ୭ ବର୍ଷରୁ କମ ଦଣ୍ଡ ଥିବା କୌଣସି ଦୋଷ କରିଥିଲେ ଏବଂ ଏହାର ସ୍ବୀକାର କଲେ ସେନେଇ ଆଇନରେ କୋହଳ ବ୍ୟବସ୍ଥା ରହିଛି ।
ଜେଲ ଓ କଏଦୀଙ୍କ ପାଇଁ ସୁବିଧା
ଆର୍ଥିକ ଅସ୍ବଚ୍ଛଳ କଏଦୀଙ୍କ ଆଇନଗତ ଲଢେଇ ପାଇଁ ବ୍ୟବସ୍ଥା ରହିଛି । ଦୀର୍ଘ ଦିନ ଧରି ଜେଲରେ ଥିବା ଲୋକ ପାଇଁ ସୁବିଧାରେ ମୁକୁଳିବାର ବ୍ୟବସ୍ଥା ରହିବ । ଛୋଟ ଛୋଟ ଅପରାଧ କରିଥିଲେ ଜେଲ ନୁହେଁ ଅଲଗା ବ୍ୟବସ୍ଥା ରହିଛି । ନୂଆ ଆଇନରେ ଏଭଳି କିଛି ଆଖିଦୃଶିଆ ପରିବର୍ତ୍ତନ କରାଯାଇଛି ।
ଇଟିଭି ଭାରତ, ଭୁବନେଶ୍ବର
