ବଲାଙ୍ଗୀର: ଫିଲ୍ମ ସୁଟିଂ ବେଳେ ମାଓବାଦୀ ଭୟ । ହଠାତ କରାଗଲା ବାରଣ । ଅଧାରେ ଅଟକିଲା ‘ରାଣ୍ଡି ପୁଅ ଅନନ୍ତା’ ଫିଲ୍ମର ସୁଟିଂ । ପରେ ସୁରକ୍ଷିତ ସ୍ଥାନରେ ଚାଲିଛି ଓଡିଆ ଫିଲ୍ମର ସୁଟିଂ । ଘଟଣାଟି ଥିଲା ଗତକାଲି(ମଙ୍ଗଳବାର)ର । ବଲାଙ୍ଗୀର ଜିଲ୍ଲା ହରିଶଙ୍କର ଠାରେ ଓଡ଼ିଆ ସିନେମା ‘ରାଣ୍ଡି ପୁଅ ଅନନ୍ତା’ର ସୁଟିଂ ଗତ କିଛି ଦିନ ଧରି ଚାଲିଥିଲା । ଗୁଇନ୍ଦା ସୂଚନା ପରେ ସେଠାରେ ସୁଟିଂ ପାଇଁ ବାରଣ କରାଯାଇଥିଲା । ଏହା ପରେ ସୁରକ୍ଷିତ ସ୍ଥାନରେ ଫିଲ୍ମର ସୁଟିଂ ଜାରି ରହିଛି ।
ମାଓ ପ୍ରଭାବିତ ଅଞ୍ଚଳରେ ଫିଲ୍ମ ସୁଟିଂ:
ବଲାଙ୍ଗୀରର ହରିଶଙ୍କର ଅଞ୍ଚଳ ମାଓ ପ୍ରଭାବିତ ଅଞ୍ଚଳ ଅଟେ । ଏଠାରେ ଗତକିଛି ଦିନ ହେଲା ଚାଲିଥିଲା ସବ୍ୟସାଚୀ ମିଶ୍ରଙ୍କ ଅଭିନୀତ ‘ରାଣ୍ଡି ପୁଅ ଅନନ୍ତା’ର ସୁଟିଂ ଚାଲିଥିଲା । ହେଲେ ଭୁବନେଶ୍ବର ଗୁଇନ୍ଦା ବିଭାଗରୁ ସୂଚନା ଆସିଥିଲା ଯେ ମାଓବାଦୀ ଅପହରଣ ଉଦ୍ୟମ ହୋଇପାରେ । ଯାହାର ଚିଠି ପୋଲିସ୍ ପାଖକୁ ଆସିବା ପରେ ବଲାଙ୍ଗୀର ପୋଲିସ୍ ପଦକ୍ଷେପ ନେଇଛି । ଯେଉଁ ସ୍ଥାନରେ ଫିଲ୍ମ ସୁଟିଂ କରାଯାଉଥିଲା ତାହାକୁ ଅଟକାଯାଇ ସୁରକ୍ଷିତ ସ୍ଥାନରେ ଏବେ ସୁଟିଂ କରାଯାଉଛି ।
ଏସବୁ ଅଞ୍ଚଳକୁ ଯିବାକୁ ବାରଣ:
ମାଓ ପ୍ରଭାବିତ ଅଞ୍ଚଳରେ ସୁଟିଂ କରିବାକୁ କିମ୍ବା ସେ ଅଞ୍ଚଳକୁ ଯିବାକୁ ସମସ୍ତ ସିନେମା କ୍ର୍ୟୁ ସଦସ୍ୟଙ୍କୁ ବାରଣ କରାଯାଇଛି । ବିଶେଷ କରି ଖପ୍ରାଖୋଲ ଅଞ୍ଚଳର ହରିଶଙ୍କର ଅଞ୍ଚଳ, ସାପମୁଣ୍ଡ, ଓ ଖୁରେ ପାଣିକୁ ଅଞ୍ଚଳକୁ ଯିବାକୁ ମନା କରାଯାଇଛି । ସେପଟେ ସିନେମା ସୁଟିଂ ଅନ୍ୟ ସ୍ଥାନରେ ସ୍ଵାଭାବିକ ଭାବରେ ଜାରି ରହିଛି ।
କଣ କହିଲା ପୋଲିସ ?
ପାଟଣାଗଡ଼ ଏସଡିପିଓ ସଦାନନ୍ଦ ପୂଝାରୀ କହିଛନ୍ତି, ‘ପୂର୍ବରୁ ହରିଶଙ୍କର ମାଓ ପ୍ରଭାବିତ ଅଞ୍ଚଳ ଥିଲା । ତେଣୁ ଏଠି ସୁଟିଂ କରୁଥିବା ସିନେମା କ୍ରୁ ସଦସ୍ୟଙ୍କୁ ସେ ଅଞ୍ଚଳ ନ ଯିବାକୁ ପୋଲିସ୍ ପକ୍ଷରୁ ନିର୍ଦ୍ଦେଶ ଦିଆଯାଇଛି । ସେହିପରି ସେଭଳି କୌଣସି ବିପଦ ନାହିଁ ଏବଂ ପୋଲିସ୍ ତୀକ୍ଷ୍ଣ ନଜର ରହିଛି’ ।
ପୋଲିସର ବାରଣକୁ ନେଇ କଣ କହିଲେ କ୍ରୁ ସଦସ୍ୟ ?
ସିନେମା କ୍ରୁ ସଦସ୍ୟ ସ୍ଥିତ ପଟ୍ଟନାୟକ କହିଛନ୍ତି, ‘ଏହି ଘଟଣା ସତ ଅଟେ । ଓଡ଼ିଶା ଗୁଇନ୍ଦା ବିଭାଗ ଏହି ସୂଚନା ଦେଇଥିଲା । ବଲାଙ୍ଗୀର ଏସପି ଏଥିରେ ପଦକ୍ଷେପ ନେଇଛନ୍ତି । ହେଲେ ଏବେ ବି ସମ୍ପୂର୍ଣ୍ଣ ସୁରକ୍ଷା ବଳୟ ମଧ୍ୟରେ ସୁଟିଂ ଚାଲିଛି ଓ ସବୁ ଠିକ୍ ଠାକ୍ ଚାଲିଛି । ତେବେ ଆଗକୁ ପୋଲିସ୍ କିମ୍ବା ଗୁଇନ୍ଦା ବିଭାଗର ନିର୍ଦ୍ଦେଶ ଯାହା ଆସେ ସେହି ଅନୁସାରେ ଆମେ ପଦକ୍ଷେପ ନେବୁ।’
ରାଣ୍ଡି ପୁଅ ଅନନ୍ତା ଫିଲ୍ମ:
ଏହି ସିନେମାରେ ମୁଖ୍ୟ ଭୂମିକାରେ ସବ୍ୟସାଚୀ ମିଶ୍ର ଥିବା ବେଳେ କୁନା ତ୍ରିପାଠୀ ଭଳି ଅଭିନେତା ମଧ୍ୟ ଏଥିରେ ନଜର ଆସିବେ । ସେହିପରି ଏହା ଫକୀର ମୋହନ ସେନାପତିଙ୍କ ଦ୍ଵାରା ରଚିତ କାହାଣୀ ଉପରେ ଆଧାରିତ ଅଟେ । ଏହାର ନିର୍ଦ୍ଦେଶନା ଦେଉଛନ୍ତି ସବ୍ୟସାଚୀ ମହାପାତ୍ର ।
ଇଟିଭି ଭାରତ, ବଲାଙ୍ଗୀର
