ବଲାଙ୍ଗୀର: ନାବାଳକ ବଳି ! ଏଭଳି ଏକ ସଙ୍ଗୀନ ଅଭିଯୋଗ ଆସିଛି ବଲାଙ୍ଗୀର ଜିଲ୍ଲା ଲାଠୋର ଥାନା ଝଳିଆ ଲିଟି ଗ୍ରାମରୁ । ଜଣେ ନିଖୋଜ ନାବାଳକର ମୃତଦେହ ଜଙ୍ଗଲରୁ ମିଳିବା ପରେ ପରିବାର ଲୋକେ ଆଣିଛନ୍ତି ବଳି ଅଭିଯୋଗ । ମୃତକ ହେଲେ ଜଲପାଙ୍କେଲ ଗାଁର ତପନ ବିଭାରଙ୍କ ୧୩ ବର୍ଷର ପୁଅ ସୋମନାଥ ବିଭାର । ବଲାଙ୍ଗୀର ପୋଲିସ ମୃତଦେହ ଉଦ୍ଧାର କରି ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ କରିଛି । ଏହାକୁ ନେଇ ଗାଁରେ ଉତ୍ତେଜନା ଦେଖାଦେଇଛି ।
ଗୁରୁବାରରୁ ନିଖୋଜ ଥିଲେ ସୋମନାଥ:
ମୃତ ନାବାଳକଙ୍କ ସମ୍ପର୍କୀୟଙ୍କ ଅଭିଯୋଗ ଅନୁସାରେ, ଗତ ଗୁରୁବାର ଅପରାହ୍ନ ୪ ଟାରୁ ନିଖୋଜ ହୋଇଥିଲେ 13 ବର୍ଷିଆ ନାବାଳକ ସୋମନାଥ । ଘର ଲୋକ ଓ ଗ୍ରାମବାସୀ ବହୁ ଖୋଜା ଖୋଜି କରିବା ପରେ ତାର ପତ୍ତା ନ ପାଇବାରୁ ସ୍ଥାନୀୟ ପୋଲିସ ପାଖରେ ଅଭିଯୋଗ କରିଥିଲେ ।
ଗତକାଲି ଜଙ୍ଗଲରୁ ମିଳିଲା ମୃତଦେହ:
ଗତକାଲି(ଶୁକ୍ରବାର) ସକାଳେ ପାଖ ଝଳିଆଲିଟି ଗ୍ରାମର ଜଙ୍ଗଲ ପାଖରେ ନିଖୋଜ ସୋମନାଥର ମୃତଦେହ ଉଦ୍ଧାର ହୋଇଛି । ନାବାଳକର ମୃତଦେହ ପାଖରେ ଏକ ଗାତ ଖୋଳି ପୋତି ଦେବା ଉଦ୍ୟମ କରି ଥିଲେ ସୁଦ୍ଧା ଗାତ ଖୋଳି ପାରିନଥିବାରୁ ମୃତଦେହ ଛାଡି ହତ୍ୟାକାରୀ ଫେରାର ମାରି ଥିବାର ଆଶଙ୍କା କରିଛନ୍ତି ପରିବାର ଲୋକେ।
ଅଭିଯୁକ୍ତକୁ ଗିରଫ ଦାବିରେ ରାସ୍ତା ଅବରୋଧ:
ଅଭିଯୁକ୍ତକୁ ଗିରଫ ଦାବି କରି ପରିବାର ଓ ଗ୍ରାମବାସି ମିଳିତ ଭାବରେ ଅଭିଯୁକ୍ତକୁ ଗିରଫ ଦାବିରେ ବଲାଙ୍ଗୀର ନୂଆପଡା ରାସ୍ତା ଦୀର୍ଘ ସମୟ ଧରି ଅବରୋଧ କରାଯାଇଥିଲା । ଲାଠୋର ପୋଲିସ ଘଟଣାସ୍ଥଳରେ ସାଇଣ୍ଟିଫିକ ଟିମ ଓ ଡଗ ସ୍କ୍ବାର୍ଡକୁ ନେଇ ତଦନ୍ତ କରିଛି । ଏଥିସହ ଗ୍ରାମର ଜଣକୁ ପୋଲିସ ଅଟକ ରଖି ପଚରା ଉଚରା ଜାରି ରଖିଛି । ସେପଟେ ପୋଲିସ ଏହାକୁ ପୂର୍ବ ଶତ୍ରୁତା ଯୋଗୁଁ ହତ୍ୟାକାଣ୍ଡ ବୋଲି ପ୍ରାଥମିକ ତଦନ୍ତରୁ ଜଣାପଡିଥିବାର କହିଛି ।
କଣ କହିଲେ ସମ୍ପର୍କୀୟ:
ମୃତ ନାବାଳକର ସମ୍ପର୍କୀୟ ନାରାୟଣ ହଂସ କହିଛନ୍ତି, ‘ଗତକାଲି(ଗୁରୁବାର) 4 ଠାରୁ ତାଙ୍କ 13 ବର୍ଷର ପୁଅ ନିଖୋଜ ଥିଲା । ଯାହାକୁ ସେମାନେ ସମସ୍ତେ ରାତି ତମାମ ଖୋଜା ଖୋଜି କରିଥିଲେ । କୌଣସି ଖୋଜ ଖବର ନ ପାଇବାରୁ ଥାନାରେ ଲିଖିତ ଅଭିଯୋଗ କରିଥିଲେ । ସେପଟେ ପୋଲିସ୍ ରାତିରୁ ବାଳକର ସନ୍ଧାନ ଆରମ୍ଭ କରିଥିଲେ ସୁଦ୍ଧା ତାର ପତ୍ତା ମିଳି ନଥିଲା । ଗତକାଲି ତାର ମୃତଦେହ ଜଙ୍ଗଲରୁ ମିଳିଛି । ତେବେ ପୂର୍ଣ୍ଣିମା ଥିବାରୁ ପୁଅକୁ ବଳି ଦିଆଯାଇ ହତ୍ୟା କରା ଯାଇଛି । ଏଥିସହ ପୋତିବାର ଉଦ୍ୟମ କରି ଗାତ ଖୋଲି ନ ପାରିବାରୁ ମୃତଦେହକୁ ଫୋପାଡି ହତ୍ୟାକାରୀ ଫେରାର ମାରିଛି’ ।
ପୂର୍ବ ଶତ୍ରୁତାରୁ ହତ୍ୟା ସନ୍ଦେହ:
ପାଟଣାଗଡ଼ ଏସଡିପିଓ ସଦାନନ୍ଦ ପୂଝାରୀ କହିଛନ୍ତି, ‘ପୋଲିସ ପାଖରେ ନାବାଳକର ନିଖୋଜ ଅଭିଯୋଗ ଗତ ଗୁରୁବାର ହୋଇଥିଲା । ଯାହାକୁ ଭିତ୍ତି କରି ପୋଲିସ ଛାନବିନ ଆରମ୍ଭ କରିଥିବା ବେଳେ ଗତକାଲି ତାର ମୃତଦେହ ପାଖ ଏକ ଗାଁ ଜଙ୍ଗଲରୁ ଉଦ୍ଧାର ହୋଇଛି । ତେବେ ପୂର୍ବ ଶତ୍ରୁତାରୁ ତାକୁ ହତ୍ୟା କରାଯାଇଥିବାର ପ୍ରାଥମିକ ତଦନ୍ତରୁ ଜଣାପଡ଼ିଛି। ସେହିପରି ପରିବାର ଲୋକଙ୍କ ଅଭିଯୋଗ ଆଧାରରେ ପୋଲିସ୍ ସବୁ ଦିଗକୁ ନେଇ ତଦନ୍ତ ଜାରି ରଖିଛି । ଏଥିରେ ଜଣକୁ ଅଟକ ରଖି ପୋଲିସ ତଦନ୍ତ କରୁଛି ।’
ଇଟିଭି ଭାରତ, ବଲାଙ୍ଗୀର
