ଅନୁଗୋଳ: ସାତକୋଶିଆ ଗଣ୍ଡରେ ଅଘଟଣ । ଶୌଚ ପାଇଁ ଯାଇଥିବା ଜଣେ ନାବାଳକକୁ କୁମ୍ଭୀର ଟାଣି ନେଇ ମାରିଦେଲା କୁମ୍ଭୀର । ଏହାକୁ ନେଇ ଟିକରପଡା ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଛି । ଏହି ଘଟଣା ପରେ ଶତାଧିକ ଅଞ୍ଚଳବାସୀ ଟିକରପଡା ରେଞ୍ଜର କାର୍ଯ୍ୟାଳୟ ସମ୍ମୁଖରେ ମୃତଦେହ ରଖି ଦୀର୍ଘ ସମୟ ଆନ୍ଦୋଳନ କରିଥିଲେ । ସେଠାରେ ଏକ ପ୍ରକାର ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା । ସାତକୋଶିଆ ଡିଏଫଓ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ।
ମହାନଦୀ ସାତକୋଶିଆ ଗଣ୍ଡରେ ବହୁ ସଂଖ୍ୟାରେ ଘଡ଼ିଆଳ ଓ ମଗର କୁମ୍ଭୀର ଅଛନ୍ତି । ସେଥିପାଇଁ ସାତକୋଶିଆ ଗଣ୍ଡକୁ କୁମ୍ଭୀର ସଂରକ୍ଷଣ କେନ୍ଦ୍ରଭାବେ ଘୋଷଣା କରାଯାଇଛି । ତେବେ ଆଜି ପର୍ଯ୍ୟନ୍ତ କେବେ ହେଲେ ଏଠାରେ କୁମ୍ଭୀର ଆକ୍ରମଣରେ ମଣିଷ ମୃତ୍ୟୁବରଣ କରିବା ନଜିର ନାହିଁ । କିନ୍ତୁ ଦୁର୍ଭାଗ୍ୟବଶତଃ ଆଜି ଘଟିଗଲା ଏକ ଅଘଟଣ । ଅପରାହ୍ନ ପ୍ରାୟ ସାଢ଼େ ୧୨ଟା ବେଳେ ନଦୀ ଘାଟରେ ଥିବା ଟିକରପଡା ଗାଁରୁ ସମୀର ନାଏକ ନାମକ ଜଣେ ୮ବର୍ଷର ନାବାଳକ ଅନ୍ୟ ଜଣେ ପିଲା ସହ ଘାଟକୁ ଶୌଚ ପାଇଁ ଯାଇଥିଲେ । ହଠାତ୍ ଏକ କୁମ୍ଭୀର ତାକୁ ଟାଣି ନେଇଥିଲା । ତା'ସହ ଥିବା ଅନ୍ୟ ପିଲାଟି ସେଠାରୁ ଦୌଡ଼ି ଆସି ଗାଁ ଲୋକଙ୍କୁ ଜଣାଇଥିଲା ।
ଗାଁର ଯୁବକମାନେ ଡଙ୍ଗା ନେଇ କୁମ୍ଭୀର ମୁହଁରୁ ସମୀରକୁ ଛଡାଇ ଆଣିବାକୁ ବହୁ ଉଦ୍ୟମ କରିଥିଲେ । କିନ୍ତୁ କୁମ୍ଭୀର ସମୀରକୁ ପାଟିରେ ଧରି ଉଦ୍ଧାର କରିବାକୁ ଯାଇଥିବା ଯୁବକମାନଙ୍କୁ ମଧ୍ୟ ଆକ୍ରମଣ କରିବାକୁ ଗୋଡ଼ାଇ ଥିଲା । ବହୁ ସମୟ ଏଭଳି ଚାଲିବା ପରେ ଶେଷରେ ଜାଲ ପକାଇ ସମୀରକୁ ଉଧାର କରାଯାଇଥିଲା । କିନ୍ତୁ ସେତେବେଳକୁ ତାର ମୃତ୍ୟୁ ହୋଇସାରିଥିଲା । କୁମ୍ଭୀରଟି ତା' ଶିକାର ଖୋଜିବାକୁ ନଦୀରେ ପାଗଳ ପରି ଏବେ ମଧ୍ୟ ବୁଲୁଛି । ଏହାର ପ୍ରତିବାଦରେ ସେ ଅଞ୍ଚଳର ହଜାର ହଜାର ଲୋକ ରେଞ୍ଜ କାର୍ଯ୍ୟାଳୟ ସମ୍ମୁଖରେ ମୃତଦେହ ରଖି ଆନ୍ଦୋଳନ କରିଥିଲେ । ସାତକୋଶିଆ ଡିଏଫ ଓ ପହଞ୍ଚିବା ପରେ ପରିସ୍ଥିତି ଜଟିଳ ହୋଇ ଯାଇଥିଲା । ଲୋକେ ପ୍ରବଳ ପାଟିତୁଣ୍ଡ କରିଥିଲେ । ବନ ବିଭାଗର ଅପାରଗତା ଯୋଗୁଁ ଏଭଳି ପରିସ୍ଥିତି ସୃଷ୍ଟି ହୋଇଥିବା ଅଭିଯୋଗ କରିଥିଲେ । କିଛି ସମୟ ପାଇଁ ସେଠାରେ ଉତ୍ତେଜନା ଦେଖାଦେଇଥିଲା । ଶେଷରେ ସରକାରଙ୍କ ନିୟମ ଅନୁସାରେ ୬ଲକ୍ଷ ଟଙ୍କା କ୍ଷତିପୂରଣ ଦେବା ପାଇଁ ଡିଏଫଓ ପ୍ରତିଶ୍ରୁତି ଦେବା ପରେ ପରିସ୍ଥିତି ଶାନ୍ତ ପଡିଥିଲା।
