ମାଲକାନଗିରି: ମୌଳିକ ସୁବିଧା ନାହିଁ ତ ଭୋଟ ନାହିଁ । ଦୀର୍ଘ ବର୍ଷ ଧରି ରାସ୍ତା, ପାନୀୟ ସମସ୍ୟା ଭଳି ଗୁରୁତର ସମସ୍ୟା ମଧ୍ୟରେ ଯୁଝି ହେଉଛନ୍ତି ମାଲକାନଗିରି ଜିଲ୍ଲା ସଦର ବ୍ଲକ ଚାଲାନଗୁଡା ପଞ୍ଚାୟତର ଡଡିଗୁଡା ଗ୍ରାମବାସୀ । ବାରମ୍ବାର ଦାବି ସତ୍ତ୍ୱେ ସେମାନଙ୍କ ସମସ୍ୟା ସରକାର କର୍ଣ୍ଣପାତ କରୁନଥିବା ଅଭିଯୋଗରେ ଚରମ ପଦକ୍ଷେପ ନେଇଛନ୍ତି ଗ୍ରାମବାସୀ । ଏଥର ସୁବିଧା ନାହିଁ ତ ନିର୍ବାଚନରେ ଭୋଟ ନାହିଁ ବୋଲି ଗ୍ରାମବାସୀମାନେ ଚେତାବନୀ ଦେଇଛନ୍ତି ।
ମାଲକାନଗିରି ଜିଲ୍ଲା ସଦର ବ୍ଲକ ଚାଲାନଗୁଡା ପଞ୍ଚାୟତର ଡଡିଗୁଡା ଗାଁ । ଏହି ଗାଁରେ ବସବାସ କରୁଛନ୍ତି ପାଖାପାଖି ୧୦୦ ପରିବାର ଓ ତିନିଶହରୁ ଊର୍ଦ୍ଧ୍ୱ ମତଦାତା । ହେଲେ ଚଳିତ ନିର୍ବାଚନରେ ଭୋଟ ବର୍ଜନ କରିବାର ନିଷ୍ପତ୍ତି ନେଇ ଗ୍ରାମବାସୀ । ସେମାନଙ୍କ ଅଭିଯୋଗ ହେଲା ଦୀର୍ଘ ଦିନ ଧରି ନେତାଙ୍କୁ ଭୋଟ ଦେଲେ ମଧ୍ୟ ସରକାରଙ୍କ ମୌଳିକ ସୁବିଧା ବର୍ତ୍ତମାନ ସୁବିଧା ଗାଁରେ ପହଞ୍ଚିପାରୁନି । ଗାଁ ମୁଖିଆଙ୍କ କହିବା କଥା, ଗାଁକୁ ଭଲ ରାସ୍ତାଟିଏ ନାହିଁ । ସେହିଭଳି ଗାଁରେ ନଳକୂପରୁ କେତେବେଳେ ଗୋଳିଆ ପାଣି ତ କେତେବେଳେ ବିଲକୁଲ ପାଣି ବାହାରୁନାହିଁ । ଯେଉଁଥିପାଇଁ ଗ୍ରାମର ଗାଁର କିଛି ଦୂରତାରେ ଥିବା ଏକ ପୋଖରୀ ନିକଟରେ ଚୁଆ ଖୋଳି ସେହି ପାଣିକୁ ବ୍ୟବହାର କରୁଛନ୍ତି ଗ୍ରାମଲୋକେ ।
ଏହି ଗାଁକୁ ମେଗା ୱାଟର୍ ସପ୍ଲାଇ ଯୋଜନାରେ ଅନ୍ତର୍ଭୁକ୍ତ କରି ପିଇବା ପାଣି ଯୋଗାଇ ଦିଆଯିବା କହି ଆଜିକୁ ପାଞ୍ଚ ବର୍ଷ ହେବ ପ୍ରଶାସନ ଓ ନେତାମାନେ ପ୍ରତିଶ୍ରୁତି ଦେଇ ଠକି ଆସିଥିବା ଅଭିଯୋଗ କରିଛନ୍ତି ଗ୍ରାମବାସୀ । ଆଉ ମଧ୍ୟ ଏହି ଅଞ୍ଚଳରେ କୌଣସି ରୋଜଗାରର ପନ୍ଥା ନଥିବାରୁ ଗ୍ରାମର ଅଧିକାଶଂ ଯୁବକ ବାଧ୍ୟ ହୋଇ ଦାଦନ ଖଟିବାକୁ ବାହାର ରାଜ୍ୟକୁ ଯାଇଥାନ୍ତି । ଗ୍ରାମରେ ଗୋଟିଏ ମାତ୍ର ବିଦ୍ୟାଳୟ ରହିଛି କିନ୍ତୁ ବିଦ୍ୟାଳୟର ପାଚେରି ନଥିବାରୁ ପିଲାମାନେ ଅନେକ ସମୟରେ ରାସ୍ତାକୁ ଚାଲି ଆସୁଛନ୍ତି । ଏହି ବିଦ୍ୟାଳୟରେ ପାଚେରୀ ନିର୍ମାଣ କରିବା ପାଇଁ ବାରମ୍ବାର ପ୍ରଶାସନକୁ ଜଣାଇବା ସତ୍ତ୍ୱେ ପ୍ରଶାସନ ପକ୍ଷରୁ ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇନଥିବା ଅଭିଯୋଗ ହୋଇଛି । ତେଣୁ ବ୍ୟାପକ ସମସ୍ୟା ଘେରରେ ଥିବା ଗ୍ରାମବାସୀ ଚଳିତ ସାଧାରଣ ନିର୍ବାଚନରେ ଭୋଟ ବର୍ଜନ କରିବା ପାଇଁ ନିଷ୍ପତି ନେଇଛନ୍ତି ।
ଅନ୍ୟପଟେ ବିଜେଡି ବିଧାୟକ ପ୍ରାର୍ଥୀ ମାନସ ମାଡକାମି କହିଛନ୍ତି, 'ଡଡିଗୁଡା ଗାଁକୁ ପ୍ରଧାନମନ୍ତ୍ରୀ ସଡକ ଯୋଜନାରେ ଅନ୍ତର୍ଭୁକ୍ତ କରାଯାଇଛି । ଖୁବଶୀଘ୍ର ଏହି ରାସ୍ତାକାମ କରାଯିବ ।' ଏହା ସହ ପିଇବା ପାଣିର ସମସ୍ୟା ନେଇ ସେ କହିଛନ୍ତି ଯେ, ଏହି ଅଞ୍ଚଳଟି ସମ୍ପୂର୍ଣ୍ଣ ଭାବେ ଶୁଷ୍କ ଅଞ୍ଚଳ ହୋଇଥିବାରୁ ମାଟିତଳେ ପାଣିର ସ୍ତର ପ୍ରାୟତଃ ନାହିଁ । ବୋରୱେଲ୍ ଖୋଳିଲେ ବାଲି ଧସି ବୋରୱେଲ୍ ପୋତି ହେଉଛି । ମାଲକାନଗିରି ବ୍ଲକର ୧୯ଟି ପଞ୍ଚାୟତକୁ ମେଗାୱାଟ ସପ୍ଲାଇ ଯୋଜନାରେ ଅନ୍ତର୍ଭୁକ୍ତ କରାଯାଇଛି ଏହି ଗ୍ରାମ ମଧ୍ୟ ରହିଛି । ଗ୍ରାମବାସୀ ଖୁବଶୀଘ୍ର ପାଣି ପାଇବେ କହିଛନ୍ତି ମାନସ ମାଡକାମୀ ।
ଇଟିଭି ଭାରତ, ମାଲକାନଗିରି
