ମାଲକାନଗିରି: ପୂର୍ବତନ 5ଟି ଅଧ୍ୟକ୍ଷ ଭି.କେ ପାଣ୍ଡିଆନଙ୍କ ଶଳା ବୋଲି ପରିଚୟ ଦେଇ ଚାକିରି ଦେବା ଆଳରେ ଲକ୍ଷ ଲକ୍ଷ ଟଙ୍କା ଠକେଇ । ଏଥିରେ ଜଣେ ବିଜେଡି ନେତ୍ରୀ ମଧ୍ୟ ସମ୍ପୃକ୍ତି ଥିଲେ । ବିଭିନ୍ନ ଲୋକଙ୍କଠାରୁ ଚାକିରି ଓ ଅନ୍ୟ କିଛି କାମ କରାଇଦେବା ପାଇଁ ସଂଗ୍ରହ ହୋଇଥିଲା ଲକ୍ଷ ଲକ୍ଷ ଟଙ୍କା । ପରେ ଏସମ୍ପର୍କରେ ପଚାରିବାରୁ ମୁଳୁଥିଲା ଧମକ । ମାଲକାନଗିରିରୁ କେନ୍ଦ୍ରାପଡା ପର୍ଯ୍ୟନ୍ତ ଲମ୍ବିଥିଲା ଚେର । ହେଲେ ଏବେ କ୍ଷମତା ପରିବର୍ତ୍ତନ ହେବା ପରେ ଅଭିଯୋଗକାରୀ ଥାନାର ଦ୍ବାରସ୍ଥ ହେଲେ, ଜଣେ ଅଭିଯୁକ୍ତ ରମେଶ ରାଉତକୁ ପୋଲିସ ଗିରଫ କରିଛି । ଘଟଣାର କାର୍ପଟଦାର କୁହାଯାଉଥିବା ବିଜେଡି ନେତ୍ରୀ ଓ ଅନ୍ୟ ଜଣେ ଅଭିଯୁକ୍ତ ପୋଲିସ କାର୍ଯ୍ୟାନୁଷ୍ଠାନ ଭୟରେ ଫେରାର ମାରିଛନ୍ତି । ମାଲକାନଗୁରୁ ମାଥିଲି ଥାନା ଏରିଆରେ ଏହି ଘଟଣା ଏବେ ସାଧାରଣରେ ଚର୍ଚ୍ଚା ସୃଷ୍ଟି କରିଛି ।
- ପାଣ୍ଡିଆନଙ୍କ ଶାଳକ ବୋଲି ପରିଚୟ ଦେଇଥିଲା ଅଭିଯୁକ୍ତ ରମେଶ
ଅଭିଯୋଗ ଅନୁସାରେ, ମାଲକାନଗିରି ଜିଲ୍ଲା ମାଥିଲି ଜୋନ-୩ର ଜିଲ୍ଲା ପରିଷଦ ସଦସ୍ୟା ସସ୍ମିତା ମାଝୀ ନିଜର ଅନ୍ୟ ଦୁଇ ଜଣ ସହଯୋଗୀ ରମେଶ ଚନ୍ଦ୍ର ରାଉତ ଓ ଜୀବନ ସାହୁଙ୍କ ସାହାଯ୍ୟରେ ଏହି ଠକେଇ କରୁଥିଲେ । ରମେଶ ରାଉତଙ୍କୁ ସିଧାସଳଖ ଭି.କେ ପାଣ୍ଡିଆନଙ୍କ ଶଳା ବୋଲି ପରିଚୟ କରାଯାଉଥିଲା । ତାଙ୍କ ଆକାଉଣ୍ଟକୁ ଟଙ୍କା ପଠାଯାଉଥିଲା । ସେ ହିଁ ସବୁ କାମ ବୁଝନ୍ତି ବୋଲି କୁହାଯାଉଥିଲା । ଏହି ଟିମ୍ ଜଣେ କି ଦୁଇ ଜଣ ନୁହନ୍ତି, ଅନେକ ଲୋକଙ୍କଠାରୁ ଅର୍ଥ ହଡପ କରିଥିବା ଜଣାପଡିଛି ।
- ବିଭିନ୍ନ ଲୋକଙ୍କଠାରୁ ଲକ୍ଷ ଲକ୍ଷ ଠକେଇ:-
ସ୍ଥାନୀୟ ବ୍ୟବସାୟୀ କାର୍ତ୍ତିକ ରାୟଙ୍କୁ ଇ-ସ୍କୁଟିର ଟେଣ୍ଡର କରାଇଦେବା ପ୍ରଲୋଭନ ଦେଖାଇ ୨୬ ଲକ୍ଷ ୨୦ ହଜାର ଟଙ୍କା ଠକି ନେଇଥିବା ବେଳେ ନନ୍ଦ କିଶୋର ପୁହାଣଙ୍କଠାରୁ ୭ ଲକ୍ଷ ୩୦ ହଜାର ଟଙ୍କା ଏବଂ ମାଧବ ହରେଶ କୁମାରଙ୍କଠାରୁ ପିଇଓ ଚାକିରି କରାଇ ଦେବା ପ୍ରଲୋଭନରେ ୧୦ଲକ୍ଷ ୧୦ହଜାର ଟଙ୍କା ଠକି ନେଇଥିଲା ଏହି ଗୋଷ୍ଠୀ । ଏହି ରାକେଟ କେବଳ ମାଲକାନଗିରିରେ ନୁହେଁ ବରଂ କୋରାପୁଟ ଓ କେନ୍ଦ୍ରାପଡାରେ ମଧ୍ୟ ଏଭଳି କାର୍ଯ୍ୟକଳାପରେ ସମ୍ପୃକ୍ତି ରହିଥିବା ଜଣାପଡିଛି । ତେବେ ଲକ୍ଷ ଲକ୍ଷ ଟଙ୍କା ଦେଇ ଠକାମୀର ଶିକାର ହେବା ପରେ ମଧ୍ୟ ବିଜେଡି ନେତ୍ରୀ ସସ୍ମିତାଙ୍କ ବିରୋଧରେ କେହି ମୁହଁ ଖୋଲୁନଥିଲେ । ପ୍ରଶ୍ନ କଲେ ସେମାନଙ୍କୁ ହତ୍ୟା ଧମକ ମଧ୍ୟ ଦିଆଯାଉଥିଲା ବୋଲି ଅଭିଯୋଗ ହୋଇଛି । ଏବେ ମାଲକାନଗିରି ପୋଲିସ ରମେଶକୁ ଗିରଫ କରିବା ପରେ ଅନ୍ୟ ଦୁଇ ଫେରାର ଅଭିଯୁକ୍ତକୁ ଠାବ କରିବା ପାଇଁ ପ୍ରୟାସ ଜାରି ରଖିଛି । ସେମାନେ ପୋଲିସ କବଜାକୁ ଆସିବା ପରେ କେବେଠାରୁ ଏହି ଠକାମୀ ଚାଲିଥିଲା ଓ ଏଥିରେ କେତେଜଣ ଶିକାର ହୋଇଛନ୍ତି, ସେନେଇ ତଥ୍ୟ ସ୍ପଷ୍ଟ ହେବ ।
ଇଟିଭି ଭାରତ, ମାଲକାନଗିରି
