କଟକ: ନାବାଳକକୁ ହତ୍ୟା ମାମଲାରେ ଜେଲରେ 17 ବର୍ଷ ଧରି ସଜା କାଟିବା ପରେ ଅଭିଯୁକ୍ତକୁ ନିର୍ଦ୍ଦୋଷରେ ଖଲାସ କଲେ ହାଇକୋର୍ଟ । ଗତ 2007, ଫେବୃଆରୀ 17ରୁ ଜେଲରେ ସଜା କାଟୁଥିବା ବେଳେ ଗତକାଲି ହାଇକୋର୍ଟ ରାୟ ଶୁଣାଇ କେନ୍ଦୁଝର ଥାନା ଅଞ୍ଚଳର ସମରା ମହାକୁଡ଼କୁ ନିର୍ଦ୍ଦୋଷରେ ଖଲାସ କରିଛନ୍ତି । ସମରାଙ୍କୁ ଆଜୀବନ ସଶ୍ରମ ଜେଲ ଦଣ୍ଡ ପ୍ରଦାନ କରି କେନ୍ଦୁଝର ଦୌରା ଜଜ୍ 2008, ଫେବୃଆରୀ 20ରେ ପ୍ରଦାନ କରିଥିବା ରାୟକୁ ହାଇକୋର୍ଟ ରଦ୍ଦ କରିଛନ୍ତି । ନିମ୍ନ ଅଦାଲତଙ୍କ ଦଣ୍ଡାଦେଶ ଆଇନ ଅନୁସାରେ ଗ୍ରହଣୀୟ ନୁହେଁ ବୋଲି ହାଇକୋର୍ଟ କହିବା ସହିତ ସମରାଙ୍କୁ ଅପହରଣ ଓ ହତ୍ୟା ଅଭିଯୋଗରୁ ମୁକ୍ତ କରିଛନ୍ତି । ଜଷ୍ଟିସ ସଙ୍ଗମ କୁମାର ସାହୁ ଓ ଜଷ୍ଟିସ ଚିତ୍ତରଞ୍ଜନ ଦାଶଙ୍କୁ ନେଇ ଗଠିତ ଖଣ୍ଡପୀଠ ସମରାଙ୍କ ଆବେଦନର ଶୁଣାଣି କରି ଏପରି ନିର୍ଦ୍ଦେଶ ପ୍ରଦାନ କରିଛନ୍ତି । ହାଇକୋର୍ଟଙ୍କ ନିର୍ଦ୍ଦେଶ ପରେ ପ୍ରାୟ ସାଢେ 16 ବର୍ଷ ପରେ ସମରା ଜେଲରୁ ମୁକ୍ତ ହେବାର ବାଟ ଫିଟିଛି ।
କାହିଁକି ୧୬ ବର୍ଷ ଜେଲରେ ଥିଲେ ସମରା ?
ଗତ ୨୦୦୭, ଫେବୃଆରୀ ୧୩ ତାରିଖ ସନ୍ଧ୍ୟା ୪ଟା ସମୟରେ ଜଣେ ୭ ବର୍ଷ ବାଳକକୁ କେନ୍ଦୁ ତୋଳିବାକୁ ଡାକି ନେଇ ସମରା ହତ୍ୟା କରିଥିବା ଅଭିଯୋଗ ହୋଇଥିଲା । ମୃତକଙ୍କ ପରିବାର ଲୋକେ ସମରା ମହାକୁଡ଼କୁ ପଚାରିବାକୁ ସେଏକା ଯାଇଥିବା କହିଥିଲା । ପରେ ଗ୍ରାମବାସୀ ଖୋଜାଖୋଜି କରି ଦୁଇ କିଲୋମିଟର ଦୂର ସିଆନାଳ ଜଙ୍ଗଲରେ ବାଳକର ମୃତଦେହ ପଡ଼ିଥିବା ଦେଖିବାକୁ ପାଇଥିଲେ । ଏହାପରେ ମୃତ ବାଳକର ପରିବାର ସୁଆକାଟି ଫାଣ୍ଡିରେ ଅଭିଯୋଗ କରିଥିଲେ ।
ଅଭିଯୁକ୍ତକୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ କେନ୍ଦୁଝର ଦୌରାଜଜ୍:
ଏହାପରେ ପୋଲିସ କେନ୍ଦୁଝର ସଦର ଥାନାରେ ହତ୍ୟା ମାମଲା ରୁଜୁ କରିବା ସହିତ ୨୦୦୭, ଫେବୃଆରୀ ୧୭ ତାରିଖରେ ସମରାକୁ ଗିରଫ କରି କୋର୍ଟ ଚାଲାଣ କରିଥିଲା । ହତ୍ୟାକାଣ୍ଡରେ ବ୍ୟବହୃତ ଟାଙ୍ଗିଆ ପୋଲିସ ତଦନ୍ତ ବେଳେ ଜବତ କରିଥିଲା । କେନ୍ଦୁଝର ଦୌରାଜଜ୍ ମାମଲାର ଶୁଣାଣୀ କରି ୨୦୦୮, ଫେବୃଆରୀ ୨୦ ତାରିଖରେ ରାୟ ପ୍ରକାଶ କରିଥିଲେ । ଅଦାଲତ ଆଇପିସିର ଦଫା ୩୦୨, ୩୬୪ ଓ ୨୦୧ରେ ସମରାଙ୍କୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡ ପ୍ରଦାନ କରିଥିଲେ ।
ଏହା ମଧ୍ୟ ପଢନ୍ତୁ...ହାଇକୋର୍ଟରେ କଟକ ସହର ସମସ୍ୟା, ମଶାଙ୍କ ପ୍ରାଦୁର୍ଭାବକୁ ନେଇ ଏଭଳି କହିଲେ କୋର୍ଟ ଏହା ମଧ୍ୟ ପଢନ୍ତୁ...ଦୁଷ୍କର୍ମ ପରେ ନାବାଳିକାକୁ ପୋଡି ମାରିଦେଇଥିଲେ, 3 ଜଣଙ୍କୁ ଆଜୀବନ କାରାଦଣ୍ଡ |
ହାଇକୋର୍ଟରୁ ମିଳିଲା ଆଶ୍ବସ୍ତି :
ଏହି ରାୟକୁ ଚାଲେଞ୍ଜ କରି ୨୦୦୮ରେ ସମରା ହାଇକୋର୍ଟରେ ଆବେଦନ କରିଥିଲେ । ହତ୍ୟାରେ ବ୍ୟବହୃତ ଅସ୍ତ୍ର ନିମ୍ନ ଅଦାଲତରେ ମାମଲାର ଶୁଣାଣୀ ବେଳେ ଉପସ୍ଥାପନ କରାଯାଇ ନଥିଲା । ଏଥି ସହିତ ଜବତ ଟାଙ୍ଗିଆ ଦ୍ବାରା ଅପରାଧ କରାଯାଇଥିବା ନେଇ ଉପଯୁକ୍ତ ପ୍ରମାଣ ଉପସ୍ଥାପନ କରାଯାଇନଥିଲା । ଘଟଣାର ପ୍ରତ୍ୟକ୍ଷଦର୍ଶୀ ସାକ୍ଷୀ ନଥିବାବେଳେ ପାରିପାର୍ଶ୍ବିକ ପ୍ରମାଣରୁ ସମରା ଏହି ଘଟଣାରେ ସମ୍ପୃକ୍ତ ଥିବା ସ୍ପଷ୍ଟ ହେଉ ନାହିଁ ବୋଲି ଆବେଦନରେ ଉଲ୍ଲେଖ କରାଯାଇଥିଲା । ତେବେ ହାଇକୋର୍ଟ ଏହି ମାମଲାର ଶୁଣାଣୀ କରି ସମରାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି ।
ଇଟିଭି ଭାରତ, କଟକ
