ଝାରସୁଗୁଡ଼ା: କଙ୍ଗାରୁ କୋର୍ଟରେ ଲଣ୍ଡା ହେଲେ ମହିଳା । ସ୍ବାମୀଙ୍କ ଅତ୍ୟାଚାରକୁ ବିରୋଧ କରିବାରୁ ତାଙ୍କୁ ଏଭଳି ଦଶା ଭୋଗିବାକୁ ପଡ଼ିଛି । ସେପଟେ ଏହି ଘଟଣାରେ ୪ ଜଣଙ୍କୁ ଗିରଫ କରିଛି ପୋଲିସ ।
କାହିଁକି ମହିଳାଙ୍କୁ ଲଣ୍ଡା କରାଗଲା?
ସୂଚନା ଅନୁସାରେ, ଝାରସୁଗୁଡ଼ା ଜିଲ୍ଲା ଲଇକେରା ଥାନା ଅନ୍ତର୍ଗତ ରାଉତବାହାଲ ଗ୍ରାମରେ ଘଟିଛି ଏଭଳି ଅଦ୍ଭୁତ ଘଟଣା । ସ୍ବାମୀ ମାରପିଟ୍ କରିବା ସମୟରେ ସ୍ତ୍ରୀ ତାର ପ୍ରତିବାଦ କରିଥିଲେ । ଦମ୍ପତିଙ୍କ ମଧ୍ୟରେ କୌଣସି କାରଣରୁ ବଚସା ହୋଇଥିଲା । ଫଳରେ ସ୍ତ୍ରୀ ଉତକ୍ଷିପ୍ତ ହୋଇ ସ୍ବାମୀଙ୍କ ଉପରକୁ ହାତ ଉଠାଇଥିଲେ । ଏନେଇ ସମ୍ପୃକ୍ତ ସ୍ବାମୀ ଜଣକ ଜାତି ସମାଜଙ୍କ ପାଖକୁ ଗଲେ । ପରେ ବୈଠକ ହେଲା ଏବଂ ଦଣ୍ଡ ମଧ୍ୟ ସ୍ଥିର କରାଗଲା । ଜାତି ସମାଜ ମୁଖିଆ ଓ ତାଙ୍କ ସ୍ବାମୀ ସମ୍ମୁଖରେ ସ୍ତ୍ରୀଙ୍କୁ ଲଣ୍ଡା କରାଯାଇଥିଲା ଏବଂ ଜାତିରେ ପୁନଃ ପ୍ରବେଶ କରିବା ପାଇଁ ଖାସି ମାଂସ ଭୋଜି ଦେବାକୁ ହେବ ବୋଲି ସମାଜ ପକ୍ଷରୁ ବାଧ୍ୟ କରାଯାଇଥିଲା ।
ସମାଜରୁ ବାସନ୍ଦ ଭୟ ଦେଖାଇ ମାଂସଭୋଜି :
ସମାଜରୁ ବାସନ୍ଦ ଭୟ ଦେଖାଇ ଖାସି ମାଂସ ଭୋଜି ମାଗିଲେ ଲୋକେ । ସମାଜର ପୁରୁଖା ଲୋକଙ୍କ ସମ୍ମୁଖରେ ଦଣ୍ଡ ନିଷ୍ପତ୍ତିକୁ ମୁଣ୍ଡପାତି ମାନିଥିଲେ ମହିଳା ଜଣକ । ଜାତି ସମାଜର ଚାପରେ ସମ୍ମୁଖରେ ମହିଳାଙ୍କୁ ଲଣ୍ଡା କରିଥିଲେ । ସେତିକିରେ କଥା ସରି ନଥିଲା । ଜାତିରୁ ବାସନ୍ଦ ନ ହେବା ପାଇଁ ମହିଳା ଜଣକ ମୁହଁ ଖୋଲି ନପାରି ଖାସି ମାଂସ ଭୋଜି ବ୍ୟବସ୍ଥା କରିଥିଲେ । ମା’ଙ୍କୁ ନିର୍ଯାତନା ଦିଆଯାଇଥିବା ସମ୍ପର୍କରେ ସାନ ଭଉଣୀଙ୍କଠାରୁ ଜାଣିବାକୁ ପାଇ ତାମିଲନାଡୁରେ ରହୁଥିବା ପୁଅ ଗାଁକୁ ଫେରିଥିଲେ ।
ମା'ଙ୍କ ପାଇଁ ନ୍ୟାୟ ମାଗିଲେ ପୁଅ:
ଅସହ୍ୟ ଶାରୀରିକ ଉତ୍ପୀଡ଼ନର ଶିକାର ହୋଇଥିବା ମା’ଙ୍କ ପ୍ରତି ହୋଇଥିବା ଅନ୍ୟାୟ ବିରୋଧରେ ସେ ସ୍ଵର ଉଠାଇଛନ୍ତି । ଅଭିଯୁକ୍ତଙ୍କୁ କଠୋର ଦଣ୍ଡବିଧାନ କରିବା ଦାବିରେ ପ୍ରଥମେ ସାହାସପୁର ଫାଣ୍ଡିରେ ଅଭିଯୋଗ କରିଥିଲେ । ଏହାପରେ ଶନିବାର ସନ୍ଧ୍ୟାରେ ଲଇକେରା ଥାନାରେ ପହଞ୍ଚି ଏତଲା ଦେଇଥିଲେ । "ଏନେଇ ଏକ ମାମଲା ରୁଜୁ କରି ୪ ଜଣକୁ ଗିରଫ କରିଥିବାବେଳେ ସେମାନଙ୍କୁ କୋର୍ଟ ଚାଲାଣ କରାଯିବ" ବୋଲି କହିଛନ୍ତି ଝାରସୁଗୁଡ଼ା ଏସଡିପିଓ । ଅପରପକ୍ଷେ, ସାମାନ୍ୟ ବଚସାକୁ କେନ୍ଦ୍ର କରି ମହିଳାଙ୍କୁ ଏଭଳି ଅପମାନିତ କରାଯିବା ଘଟଣାକୁ ସବୁ ମହଲରେ ନିନ୍ଦା କରାଯାଇଛି ।
ଇଟିଭି ଭାରତ, ଝାରସୁଗୁଡ଼ା
