ଭୁବନେଶ୍ବର: ଆଉ ଦିନ କେଇଟା ପରେ ବିଧାନସଭା ନିର୍ବାଚନ ପାଇଁ ଭୋଟ ଦେବ ପଡୋଶୀ ରାଜ୍ୟ ଝାଡଖଣ୍ଡ । ଏଥିପାଇଁ ପ୍ରଚାର ଜୋରଦାର କରି ଦେଲେଣି ସମସ୍ତ ରାଜନୈତିକ ଦଳ । ଝାଡଖଣ୍ଡରେ ରହିଛି ଓଡିଆ ଭୋଟରଙ୍କ ରାଜନୈତିକ ପ୍ରଭାବ । ତେଣୁ ଏବେଠୁ ଓଡ଼ିଆ ଭୋଟରଙ୍କୁ ନିଜ ସପକ୍ଷରେ ନେବାକୁ ଲାଗିପଡିଲେଣି ଉଭୟ ବିଜେପି ଏବଂ କଂଗ୍ରେସ । କିଛି ନେତା ପ୍ରଚାର ଆରମ୍ଭ କରିଦେଲେଣି ଓ ଅନ୍ୟ କିଛି ଖୁବଶୀଘ୍ର ପହଞ୍ଚିବା ନେଇ ସୂଚନା ମିଳିଛି ।
ଝାଡଖଣ୍ଡ ଓ ଓଡିଶା ପଡୋଶୀ ରାଜ୍ୟ ହୋଇଥିବାରୁ ଶାସକ ଦଳ ‘ଝାଡଖଣ୍ଡ ମୁକ୍ତି ମୋର୍ଚ୍ଚା’ (ଜେଏମଏମ) ମଧ୍ୟ ଓଡିଆ ଭୋଟରଙ୍କ ସମର୍ଥନ ହାସଲ କରିବା ପାଇଁ ଲାଗିପଡିଛି । ଓଡ଼ିଶାରେ ଏବେ ‘ବିଜେପି’ ସରକାର କ୍ଷମତାରେ ଥିବାରୁ ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼ ଜିଲ୍ଲାର ବିଜେପି ନେତାମାନେ ପଡୋଶୀ ରାଜ୍ୟର ସୀମାବର୍ତ୍ତୀ ଅଞ୍ଚଳରେ ନିର୍ବାଚନ ପ୍ରଚାର କରିବେ । ଏଥିପାଇଁ ବିଜେପି ଏକ ଚିଠା ପ୍ରସ୍ତୁତ କରିଛି । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସହ ଛାମୁଆ ନେତାମାନଙ୍କୁ ଦାୟିତ୍ୱ ଦେଇଛି ଦଳ ।
- ଓଡ଼ିଆ ଭୋଟବ୍ୟାଙ୍କ ଉପରେ ସବୁ ଦଳର ନଜର
ଓଡ଼ିଆଙ୍କୁ ନିଜ ସପକ୍ଷରେ ନେବାକୁ ଆରମ୍ଭ ହୋଇ ସାରିଛି ଜୋରଦାର ପ୍ରୟାସ । ଝାଡଖଣ୍ଡରେ ବସବାସ କରୁଥିବା ଓଡ଼ିଆ ଏଥର ନିର୍ବାଚନରେ ନିର୍ଣ୍ଣାୟକ ଭୂମିକା ଗ୍ରହଣ କରିବା ନେଇ ଚର୍ଚ୍ଚା ଜୋର ଧରିଛି । କାହାକୁ ଯିବ ଓଡ଼ିଆଙ୍କ ଭୋଟ । ସୁଯୋଗକୁ ହାତଛଡା କରିବାକୁ ତିଳେ ମାତ୍ର ସୁଯୋଗ ଛାଡୁନାହାନ୍ତି ପ୍ରମୁଖ ରାଜନୈତିକ ଦଳ । ଉଭୟ ଜାତୀୟ ଦଳ ବିଜେପି ଏବଂ କଂଗ୍ରେସ ମଧ୍ୟରେ କାଣ୍ଟେ କି ଟକ୍କର, ଯଦିଓ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ବୃହତ ଆଞ୍ଚଳିକ ଦଳ ଭାବେ ଉଭା ହୋଇଛି । ଭାରତୀୟ ଜନତା ପାର୍ଟି-ବିଜେପି ‘ଜେଏମଏମ’ ହାତରୁ ସରକାର ଛଡାଇ ନେବାକୁ ଯୁଦ୍ଧଂ ଦେହୀ ଡାକରା ଦେଇଛି ।
- ଏହି ସବୁ ଜିଲ୍ଲାରେ ଅଛନ୍ତି ଓଡିଆ ଭୋଟର:
ଝାଡ଼ଖଣ୍ଡର ପ୍ରାୟ ୧୮ଟି ବିଧାନସଭା କ୍ଷେତ୍ରରେ ଓଡ଼ିଆ ଭୋଟର ରହିଛନ୍ତି । ସେଥିରୁ ୧୪ ଆସନରେ ଓଡ଼ିଆ ଭୋଟରଙ୍କ ଦବଦବା ରହିଛି । କୋଲହଁନ ଡିଭିଜନର ୪ଟି ଜିଲ୍ଲା ଯଥା ପୂର୍ବ-ସିଂହଭୂମ, ପଶ୍ଚିମ-ସିଂହଭୂମ,ସରାଇକେଲା ଏବଂ ଖରସୁଆଁ ହେଉଛି ଓଡ଼ିଆଙ୍କ ପ୍ରଭାବୀ ଜିଲ୍ଲା । ଏହି ଜିଲ୍ଲାଗୁଡିକରେ ଅଧିକାଂଶ ଜନଜାତି ସମ୍ପ୍ରଦାୟର ଓଡ଼ିଆ ବସବାସ କରନ୍ତି ।
- ବିଜେପି ପାଇଁ ପ୍ରଚାର କରିବେ ପ୍ରଧାନମନ୍ତ୍ରୀ ମୋଦି:-
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବରିଷ୍ଠ ହେଭିଓ୍ବେଟଙ୍କୁ ଷ୍ଟାର-ପ୍ରଚାରକ ଦାୟିତ୍ୱ ଦେଇଛି ବିଜେପି । ଝାଡଖଣ୍ଡ ଏକ ଆଦିବାସୀବହୁଳ ରାଜ୍ୟ ହୋଇଥିବାରୁ ମୋହନ ମାଝୀଙ୍କ ପ୍ରଚାର ସହାୟକ ହୋଇପାରେ । ସେହିପରି ଝାଡଖଣ୍ଡର ୪ରୁ ୫ଟି ଜିଲ୍ଲାରେ ଓଡିଆ ଅଧିବାସୀ ବସବାସ କରନ୍ତି । ତେଣୁ ଓଡ଼ିଆଙ୍କୁ ବିଜେପି ସପକ୍ଷରେ ଆଣିବାକୁ କେନ୍ଦ୍ରୀୟ ବିଜେପି ଓଡ଼ିଶାର ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଷ୍ଟାର-ପ୍ରଚାରକ ତାଲିକାରେ ସ୍ଥାନ ଦେଇଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି ।
- ଏଥର ପ୍ରାର୍ଥୀ ହୋଇଛନ୍ତି ଓଡ଼ିଶା କଂଗ୍ରେସ ପ୍ରଭାରୀ :-
ସେପଟେ କଂଗ୍ରେସ ମଧ୍ୟ ପଛରେ ପଡ଼ିନାହିଁ । ଦଳୀୟ ପ୍ରାର୍ଥୀଙ୍କ ସପକ୍ଷରେ ବାହାରିଛି ଓଡିଶା ପ୍ରଦେଶ କଂଗ୍ରେସ । ଓଡିଶା ପ୍ରଭାରୀ ତଥା ଝାଡଖଣ୍ଡ ଜାମସେଦପୁର-ପୂର୍ବ ବିଧାନସଭା ଆସନରେ କଂଗ୍ରେସ ପ୍ରାର୍ଥୀ ହୋଇଥିବା ଡ଼ ଅଜୟ କୁମାରଙ୍କ ପାଇଁ ପ୍ରଚାର କରିବେ ଓଡ଼ିଆ କଂଗ୍ରେସ ନେତା । ଖାଲି ଅଜୟ କୁମାର ନୁହନ୍ତି, ପ୍ରଚାର ମୈଦାନକୁ ଓହ୍ଲାଇଛନ୍ତି ଓଡ଼ିଶା କଂଗ୍ରେସର ଏକାଧିକ ବରିଷ୍ଠ ନେତା ।
- କଂଗ୍ରେସ ପାଇଁ ପ୍ରଚାର କରିବେ ଜୟଦେବ, ମୋକିମଙ୍କ ସମେତ ତୁଙ୍ଗ ନେତା
ଝାଡ଼ଖଣ୍ଡରେ ପ୍ରଚାର କରିବେ ରାଜ୍ୟ କଂଗ୍ରେସ ତୁଙ୍ଗ ନେତା । ଦଳୀୟ ପ୍ରାର୍ଥୀଙ୍କ ପାଇଁ ଗ୍ରାଉଣ୍ଡରେ ପ୍ରଚାର କରି ଭୋଟ ମାଗିବେ । କଂଗ୍ରେସ ଏବଂ JMM ପ୍ରାର୍ଥୀ କିଭଳି ବାଜିମାତ କରିବେ, ସେନେଇ ରଣନୀତି ପ୍ରସ୍ତୁତ ହେଉଛି । କଂଗ୍ରେସ ନେତୃତ୍ବାଧୀନ ‘ଇଣ୍ଡିଆ’ ମେଣ୍ଟ କିଭଳି ରାଜ୍ୟ ଦଖଲ କରିବ ପ୍ରଦେଶ କଂଗ୍ରେସର ବଡ ରଣନୀତି । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କଡ଼ାମ ଝାଡଖଣ୍ଡ ଗସ୍ତ କରି ସାରିଛନ୍ତି । ମହମ୍ମଦ ମୋକିମ ମଧ୍ୟ ପ୍ରଚାର କରୁଛନ୍ତି । ଆଗକୁ ପୂର୍ବତନ ପିସିସି ସଭାପତି ଜୟଦେବ ଜେନା ଓ ଦଳର ଅନ୍ୟ ତୁଙ୍ଗ ଝାଡ଼ଖଣ୍ଡରେ ପ୍ରଚାରକୁ ବ୍ୟାପାକ କରିବେ । ସେହିପରି ରାଜ୍ୟ କଂଗ୍ରେସର ବିଧାୟକଙ୍କମାନେ ମଧ୍ୟ ଝାଡଖଣ୍ଡ ନିର୍ବାଚନର ପ୍ରଚାର କରିବେ । ବିଶେଷ କରି ଝାଡଖଣ୍ଡରେ ଓଡ଼ିଆ ଭାଷାଭାଷୀ ବସବାସ କରୁଥିବା ବିଧାନସଭା କ୍ଷେତ୍ରରେ ପ୍ରଚାର କରି ରାଜ୍ୟ କଂଗ୍ରେସର ନେତା ।
ଏହା ମଧ୍ୟ ପଢନ୍ତୁ :- ଜବର ଦଖଲ ଜମିରେ ଚାଲିବ ବୁଲଡୋଜର: ରାଜସ୍ବ ମନ୍ତ୍ରୀ ଏହା ମଧ୍ୟ ପଢନ୍ତୁ: ପିସି କାରବାର କରୁଥିଲେ ସାବଧାନ; ପ୍ରମାଣ ମିଳିଲେ ଦୃଢ଼ କାର୍ଯ୍ୟାନୁଷ୍ଠାନ: ରାଜସ୍ବ ମନ୍ତ୍ରୀ |
- 2019 ଝାଡ଼ଖଣ୍ଡ ନିର୍ବାଚନ:-
୨୦୧୯ ବିଧାନସଭା ନିର୍ବାଚନରେ ଝାଡଖଣ୍ଡରେ ଝାଡଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ବହୁମତ ହାସଲ କରିବା ସହ ହେମନ୍ତ ସୋରେନ ମୁଖ୍ୟମନ୍ତ୍ରୀ ହୋଇଥିଲେ । ୨୦୧୯ରେ ଜାମସେଦପୁର ପଶ୍ଚିମ ଆସନରୁ ବିଜେପି ନେତା ସରୟୁ ରାୟଙ୍କୁ ଟିକେଟ ଦେଇନଥିଲା ଭାରତୀୟ ଜନତା ପାର୍ଟି । ଫଳରେ ସରୟୁ ରାୟ ରଘୁବର ଦାଶ ବିପକ୍ଷରେ ଜାମସେଦପୁର-ପୂର୍ବ ଆସନରୁ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚିତ ଲଢ଼ିଥିଲେ ଓ ରଘୁବର ଦାଶଙ୍କୁ ପରାସ୍ତ କରିଥିଲେ । ଜାମସେଦପୁର-ପୂର୍ବ ନିର୍ବାଚନ ମଣ୍ଡଳୀଟି ରାଜ୍ୟ ରାଜନୈତିକ ମାନଚିତ୍ରରେ ସବୁଠୁ ଗୁରୁତ୍ୱପୂର୍ଣ୍ଣ ଆସନ ଭାବେ ଉଭା ହୋଇଛି ।
- ଚଳିତ ନିର୍ବାଚନ ସମ୍ପର୍କରେ :-
ଝାଡଖଣ୍ଡ ବିଧାନସଭା ନିର୍ବାଚନ ଦୁଇଟି ପର୍ଯ୍ୟାୟରେ ହେବ । ଚଳିତମାସ (ନଭେମ୍ବର) ୧୩ ତାରିଖ ଓ ୨୦ ତାରିଖରେ ଦୁଇଟି ପର୍ଯ୍ୟାୟରେ ମତଦାନ ହେବ । ୮୧ ବିଶିଷ୍ଟ ବିଧାନସଭା ନିର୍ବାଚନ ମଣ୍ଡଳୀରେ ନିର୍ବାଚନର ଫଳାଫଳ ନଭେମ୍ବର ୨୩ ତାରିଖରେ ଘୋଷଣା ହେବ । ଝାଡ଼ଖଣ୍ଡ ମୁକ୍ତି ମୋର୍ଚ୍ଚା, ଜାତୀୟ କଂଗ୍ରେସ ,ରାଷ୍ଟ୍ରୀୟ ଜନତା ଦଳ ଏବଂ କମ୍ୟୁନିଷ୍ଟ ପାର୍ଟି ଗଠବନ୍ଧନ ସହ ବିଜେପି ନେତୃତ୍ବାଧୀନ ‘ଏନଡିଏ’ ମେଣ୍ଟର ମୁକାବିଲା ହେବାକୁ ଯାଉଛି ।
ଝାଡ଼ଖଣ୍ଡ ବିଧାନସଭା ନିର୍ବାଚନ
- ଦୁଇଟି ପର୍ଯ୍ୟାୟରେ ମତଦାନ
- ନଭେମ୍ବର ୧୩ ତାରିଖରେ ପ୍ରଥମ ପର୍ଯ୍ୟାୟ ଭୋଟ୍
- ନଭେମ୍ବର ୨୦ ତାରିଖରେ ଦ୍ବିତୀୟ ପର୍ଯ୍ୟାୟ ଭୋଟ୍
- ୮୧ ଆସନ ବିଶିଷ୍ଟ ବିଧାନସଭା ନିର୍ବାଚନ ଫଳାଫଳ ନଭେମ୍ବର ୨୩ ତାରିଖରେ ପ୍ରକାଶ ପାଇବ
ଇଟିଭି ଭାରତ, ଭୁବନେଶ୍ବର
