ଭୁବନେଶ୍ବର: ରାୟଗଡ଼ରେ ଘାତକ ସାଜିଛି ଡିପଥେରିଆ । ଜଣଙ୍କ ପରେ ଜଣେ ଶିଶୁ ଏହି ରୋଗରେ ଆକ୍ରାନ୍ତ ହୋଇ ମୃତ୍ୟୁ ମୁଖରେ ପଡ଼ୁଛନ୍ତି । ଏନେଇ ଆଜି ପ୍ରତିକ୍ରିୟା ରଖିଛନ୍ତି ରାଜ୍ୟ ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ । ରାୟଗଡ଼ାର ସ୍ଥିତି ସମ୍ପର୍କରେ ସ୍ବାସ୍ଥ୍ୟମନ୍ତ୍ରୀ ପ୍ରତିକ୍ରିୟାରେ କହିଛନ୍ତି, "ରାଜ୍ୟରେ ସ୍ୱାସ୍ଥ୍ୟ କ୍ଷେତ୍ରକୁ ଗୁରୁତ୍ଵ ଦିଆଯାଉଛି । ରାଜ୍ୟରେ ସ୍ୱାସ୍ଥ୍ୟ କ୍ଷେତ୍ରରେ ଯେଉଁ ସମସ୍ତ ସମସ୍ୟା ବା ଅସୁବିଧା ରହିଛି ତାହା ଉପରେ ତର୍ଜମା କରାଯାଉଛି । ପ୍ରତ୍ୟେକଟି ସ୍ୱାସ୍ଥ୍ୟ କ୍ଷେତ୍ରରେ ଯେପରି ସ୍ବାସ୍ଥ୍ୟକେନ୍ଦ୍ର ହେଉ ବା ରୋଗୀ ସେବା ହେଉ, ସମସ୍ତ ସମସ୍ୟା ଉପରେ ଅନୁଧ୍ୟାନ କରାଯାଉଛି । ଆଗାମୀ ଦିନରେ ଉତ୍ତମ ସ୍ବାସ୍ଥ୍ୟସେବା ଯେମିତି ଅନ୍ତିମ ଧାଡ଼ିରେ ରହିଥିବା ଲୋକମାନଙ୍କ ପାଖରେ ପହଞ୍ଚିପାରିବ ସେନେଇ ପ୍ରଚେଷ୍ଟା କରାଯାଉଛି ।"
ଏପଟେ ରାୟଗଡ଼ାରେ ଡିପଥେରିଆ ଏବଂ ଜାପାନୀ ଏନସେଫାଲାଇଟ୍ସକୁ ନେଇ ଦୁଇଟି ଜିଲ୍ଲାରେ ଆଇସୋଲେସନକୁ ଗୁରୁତ୍ଵ ଦିଆଯାଉଥିବା ମନ୍ତ୍ରୀ କହିଛନ୍ତି । ସେ ଆହୁରି ମଧ୍ୟ କହିଛନ୍ତି, "ରାୟଗଡା ଜିଲ୍ଲା ଡିପଥେରିଆ ଓ ଅନୁଗୋଳ ଜିଲ୍ଲା ଜାପାନୀ ଏନସେଫାଲାଇଟ୍ସ ନିୟନ୍ତ୍ରଣ ପାଇଁ ରାଜ୍ୟ ସରକାର ବିଭିନ୍ନ କାର୍ଯ୍ୟକ୍ରମ କରୁଛନ୍ତି । ଦୁଇଟି ଜାଗାରେ ସଂଘରୋଧକୁ ଗୁରୁତ୍ଵ ଦିଆଯାଇଛି । ଏହାସହ RMRC ବିଶେଷଜ୍ଞମାନଙ୍କ ଦ୍ଵାରା ଅନୁଧ୍ୟାନ କରାଯାଉଛି । ବର୍ତ୍ତମାନ ଏହାର ସ୍ଥିତି ନିୟନ୍ତ୍ରଣରେ ରହିଛି । ଡିପଥେରିଆ ଯୋଗୁଁ ରାୟଗଡା ଜିଲ୍ଲା କାଶୀପୁର ବ୍ଲକକୁ ଆଇସୋଲେଟ କରାଯାଇଛି । ସେହିପରି ସମ୍ବଲପୁରରେ ଜଣ୍ଡିସ ନିୟନ୍ତ୍ରଣ ପାଇଁ ସ୍ୱାସ୍ଥ୍ୟ ସଚିବ ଓ ସ୍ୱାସ୍ଥ୍ୟ ନିର୍ଦ୍ଦେଶକ ବିଭାଗକୁ ନିର୍ଦ୍ଦେଶ ଦେଇଛନ୍ତି । ଏହାସହ ସମସ୍ତ ସ୍ଥିତି ଉପରେ ତର୍ଜମା ଚାଲିଛି ।"
ସେହିପରି ଅନୁଗୋଳ ଜିଲ୍ଲା ଜାପାନୀ ଏନସେଫାଲାଇଟ୍ସ ନେଇ RMRC ଚୂଡାନ୍ତ ରିପୋର୍ଟ ଦେଇଛି ବୋଲି ମନ୍ତ୍ରୀ କହିଛନ୍ତି । ଖୁବଶୀଘ୍ର ତା'ଉପରେ ପଦକ୍ଷେପ ନିଆଯିବ ବୋଲି କହିଛନ୍ତି ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ । ସୂଚନା ଅନୁଯାୟୀ, ରାଜ୍ୟରେ ଅନେକ ସ୍ଥାନରେ ବର୍ଷା ମଧ୍ୟ ଆରମ୍ଭ ହୋଇଗଲାଣି । ବର୍ଷାଦିନ ସମୟରେ ବିଭିନ୍ନ ରୋଗ ଦେଖିବାକୁ ମିଳିଥାଏ । ଯେପରିକି ଥଣ୍ଡା, ଜ୍ବର, କାଶ ସହିତ ଡେଙ୍ଗୁ ମ୍ୟାଲେରିଆ ଭଳି ଜଳବାହିତ ରୋଗ ମଧ୍ୟ ନଜରକୁ ଆସିଥାଏ । ଏହାକୁ କିଭଳି ଭାବରେ ନିୟନ୍ତ୍ରଣ କରାଯିବ ସେନେଇ ବିଭାଗରେ ବାରମ୍ବାର ବୈଠକ ଅନୁଷ୍ଠିତ ହୋଇଛି ।
ଅନ୍ୟପଟେ ଚଳିତ ବର୍ଷ ଏପର୍ଯ୍ୟନ୍ତ ରାଜ୍ୟରେ ଚିହ୍ନଟ ହେଲେଣି ୨୩୫ ଜଣ ଡେଙ୍ଗୁ ରୋଗୀ । ରାଜ୍ୟରେ ଅନେକ ଜିଲ୍ଲାରେ ଡେଙ୍ଗୁ ରୋଗୀ ଚିହ୍ନଟ ହୋଇଥିବାବେଳେ ଭୁବନେଶ୍ବରରେ ମଧ୍ୟ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ତେବେ ଡେଙ୍ଗୁ ନେଇ ସତର୍କ ରହିବାକୁ ସଚେତନ କରାଇବା ସହ ଚିକିତ୍ସା ପାଇଁ ପଦକ୍ଷେପ ନେବାକୁ ସମସ୍ତ CDMOଙ୍କୁ କୁହାଯାଇଛି । ସମସ୍ତ ଜିଲ୍ଲା ମୁଖ୍ୟ ଚିକିତ୍ସାଳୟରେ ସ୍ଵତନ୍ତ୍ର ଡେଙ୍ଗୁ ୱାର୍ଡ କରିବାକୁ ନିର୍ଦ୍ଦେଶ ଦିଆଯାଇଛି । ଏନେଇ ସବୁ ଜିଲ୍ଲାକୁ ଆଲର୍ଟ କରାଯାଇଛି । ପ୍ଲେଟଲେଟ ଉପଲବ୍ଧ କରିବାକୁ କୁହାଯାଇଛି । ଏନେଇ ହସ୍ପିଟାଲଗୁଡିକୁ ପ୍ରଶିକ୍ଷଣ ମଧ୍ୟ ଦିଆଯାଇଛି ।
ଇଟିଭି ଭାରତ, ଭୁବନେଶ୍ବର
