ଭୁବନେଶ୍ବର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭେଟିଲେ ଜେଏସପିଏଲ ମୁଖ୍ୟ ନବୀନ ଜିନ୍ଦଲ । ଭାରତୀୟ ଇସ୍ପାତ ସଂଘ ପକ୍ଷରୁ ସୌଜନ୍ୟମୂଳକ ଭାବେ ସେ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି । ଅନୁଗୋଳ ଜିନ୍ଦଲ ପ୍ଲାଣ୍ଟ ବିଶ୍ବର ସର୍ବବୃହତ ଷ୍ଟିଲ ପ୍ଲାଣ୍ଟ ହେବ ଏବଂ ଓଡ଼ିଶାରେ ବର୍ଷକ ମଧ୍ୟରେ ଇସ୍ପାତ ଉତ୍ପାଦନ କ୍ଷମତା ଦୁଇ ଗୁଣା ବୃଦ୍ଧି ପାଇବ ବୋଲି ଏହି ଅବସରରେ ନବୀନ ଜିନ୍ଦଲ କହିଛନ୍ତି ।
ଜେଏସପିଏଲ ମୁଖ୍ୟ ଆହୁରି କହିଛନ୍ତି ଯେ, ଓଡ଼ିଶାର ନୂଆ ମୁଖ୍ୟମନ୍ତ୍ରୀଙ୍କୁ ଭେଟିଛୁ । ଭାରତରେ ଓଡ଼ିଶା ଷ୍ଟିଲ ଉତ୍ପାଦନ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ । ଷ୍ଟିଲ କ୍ଷେତ୍ରରେ ବହୁ ବିନିଯୋଗ ଓଡ଼ିଶାରେ ହୋଇଛି । ଭାରତୀୟ ଷ୍ଟିଲ ସଂଘ ସଭାପତି ଭାବେ ଆଜି ମୁଁ ମୁଖ୍ୟମନ୍ତ୍ରୀଙ୍କୁ ଭେଟିଛି । ନୂଆ ମୁଖ୍ୟମନ୍ତ୍ରୀଙ୍କୁ ଶୁଭେଚ୍ଛା ଜଣାଇଛି । ବିଜେପିର ସରକାର ଆସିଥିବାରୁ ସ୍ୱାଗତ କରୁଛି । ନୂଆ ମୁଖ୍ୟମନ୍ତ୍ରୀଙ୍କ କାର୍ଯ୍ୟକାଳରେ ଓଡ଼ିଶାରେ ଆହୁରି ଅଧିକ ଶିଳ୍ପ ପ୍ରତିଷ୍ଠା ହେଉ ବୋଲି ଆମେ ଆଶାବାଦୀ ଅଛୁ । ଆମର ସହଯୋଗ ରହିବ । ଆହୁରି ଅଧିକ ଯୋଗଦାନ କରିବୁ । ଯୁବବର୍ଗଙ୍କୁ ନିଯୁକ୍ତି ସହ ରୋଜଗାର ବୃଦ୍ଧି ହେବ ।
ଅନୁଗୋଳରେ ଜିନ୍ଦଲ ଷ୍ଟିଲ ଆଣ୍ଡ ପାୱାର ଓଡ଼ିଶାରେ ସବୁଠାରୁ ବଡ଼ ଷ୍ଟିଲ ପ୍ଲାଣ୍ଟ ୬ ନିୟୁତ ଟନ ପ୍ରତିଷ୍ଠା କରିଛି । ଆସନ୍ତା ବର୍ଷକ ମଧ୍ୟରେ ଏହାର ଉତ୍ପାଦନ କ୍ଷମତା ଦ୍ଵିଗୁଣିତ ହେବ । ଆସନ୍ତା ବର୍ଷକ ମଧ୍ୟରେ ବାର୍ଷିକ ୧୨ ନିୟୁତ ଟନ ଇସ୍ପାତ ଉତ୍ପାଦନ କରାଯିବ । ଆସନ୍ତା ୬ରୁ ୭ ମଧ୍ୟରେ ଏହାକୁ ବିଶ୍ୱର ସବୁଠାରୁ ବଡ଼ ଷ୍ଟିଲ ପ୍ଲାଣ୍ଟ ଭାବେ ସମ୍ପ୍ରସାରଣ କରିବାକୁ ଯୋଜନା କରୁଛୁ । ଯାହା କ୍ଷମତା ୨୫ ନିୟୁତ ଟନକୁ ବୃଦ୍ଧି ହେବ । ଏ ଦିଗରେ କାର୍ଯ୍ୟ ଚାଲିଛି ।
ନବୀନ ଜିନ୍ଦଲ ସିଭି ରମଣ ବିଶ୍ୱବିଦ୍ୟାଳୟ, ସେଣ୍ଟୁରିଆନ ବିଶ୍ୱବିଦ୍ୟାଳୟକୁ ଯାଇଥିଲେ । ସେଠାରେ ହାଇଡ୍ରୋଲକ୍ସ, ରୋବଟିକ୍ସ, ଏଆଇ, ଅଟୋମେକାନିକ୍ସ ପରି ଅନେକ କ୍ଷେତ୍ରରେ ଛାତ୍ରଛାତ୍ରୀଙ୍କୁ ତାଲିମ ମିଳୁଛି । ଓଡ଼ିଶା ରୁଚିର ସହ ଏ ଦିଗରେ କାର୍ଯ୍ୟ କରୁଛି । ସାରା ଦେଶ ଓଡ଼ିଶାରୁ ବହୁତ କିଛି ଶିଖି ପାରିବ । ଏହି ବୈଷୟିକ ଜ୍ଞାନକୁ ମୁଁ ହରିୟାଣାକୁ ନେବାକୁ ଚାହୁଁଛି ବୋଲି ସେ କହିଛନ୍ତି ।
ଇଟିଭି ଭାରତ, ଭୁବନେଶ୍ବର
