ଭୁବନେଶ୍ୱର: ରାଜ୍ୟରେ ବିଭିନ୍ନ ସ୍ଥାନରେ ପ୍ରବଳ ବର୍ଷା ଯୋଗୁ ବନ୍ୟା ସ୍ଥିତି ଉପୁଜିଲାଣି । ମହାନଦୀ ଓ ଏହାର ଶାଖା ନଦୀଗୁଡିକରେ ଜଳସ୍ତର ଫୁଲିବାରେ ଲାଗିଛି । ଯାହାକୁ ନେଇ ଲୋକମାନଙ୍କ ମଧ୍ୟରେ ବନ୍ୟା ଆତଙ୍କ ଦେଖିବାକୁ ମିଳିଲାଣି । ତେବେ ରାଜ୍ୟରେ ବନ୍ୟା ସ୍ଥିତିର ମୁକାବିଲା ପାଇଁ ସ୍ୱାସ୍ଥ୍ୟ ବିଭାଗ ପ୍ରସ୍ତୁତ ରହିଛି ବୋଲି କହିଛନ୍ତି ଜନ ସ୍ୱାସ୍ଥ୍ୟ ନିର୍ଦ୍ଦେଶକ ନୀଳକଣ୍ଠ ମିଶ୍ର ।
ପ୍ରସ୍ତୁତ ରହିଛି ସ୍ୱାସ୍ଥ୍ୟ ବିଭାଗ:
ଜନସ୍ୱାସ୍ଥ୍ୟ ନିର୍ଦ୍ଦେଶକ ନୀଳକଣ୍ଠ ମିଶ୍ରଙ୍କ କହିଛନ୍ତି, "ବନ୍ୟା ସମୟର ସଂକ୍ରମଣ ରୋକିବା ଓ ଆଶ୍ରୟ ସ୍ଥଳରେ ସ୍ୱାସ୍ଥ୍ୟସେବା ଯୋଗାଇଦେବା ପାଇଁ ସ୍ୱାସ୍ଥ୍ୟ ବିଭାଗ ପ୍ରସ୍ତୁତ ରହିଛି । ବନ୍ୟା ସମୟରେ ଜଳବାହିତ ସଂକ୍ରମଣ ଯେପରିକି ହଇଜା ଓ ଝାଡ଼ାବାନ୍ତି ଏହାସହ ସାପ କାମୁଡା ଭଳି ସମସ୍ୟାର ସମାଧାନ ପାଇଁ ସରକାର ପ୍ରସ୍ତୁତ ଅଛନ୍ତି । ଏନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ମାର୍ଗଦର୍ଶିକା ଜାରି କରାଯାଇଛି । ରାଜ୍ୟର ସବୁ ଡାକ୍ତରଖାନାରେ ପର୍ଯ୍ୟାପ୍ତ ଔଷଧ ମହଜୁଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି । ବନ୍ୟା ସମୟରେ ବନ୍ୟା ପ୍ରପୀଡ଼ିତଙ୍କ ପାଇଁ ଯେଉଁ ଆଶ୍ରୟସ୍ଥଳୀ ହୋଇଛି ସେଠାରେ ସ୍ୱାସ୍ଥ୍ୟ ସେବା କିଭଳି ସୁବିଧାରେ ଯୋଗାଇ ଦିଆଯିବ ସେନେଇ ଆଶା ଓ ଅଙ୍ଗନଓ୍ବାଡି କର୍ମୀଙ୍କୁ ନିର୍ଦ୍ଦେଶ ଦିଆଯାଇଛି । ଶୁଦ୍ଧ ପାଣି ବ୍ୟବହାର ପାଇଁ ସ୍ୱାସ୍ଥ୍ୟ ବିଭାଗ ଅନୁରୋଧ କରିଛି । ସବୁ ହସ୍ପିଟାଲରେ ଭିନ୍ନ ଭିନ୍ନ ରୋଗ ପାଇଁ ମେଡ଼ିସିନ ରଖାଯାଇଥିବା ବେଳେ ଗର୍ଭବତୀ ରହିବା ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ବିଶେଷକରି ହାଲୋଜିନ ବଟିକା ସହ ସାପକାମୁଡା ମେଡ଼ିସିନ ପର୍ୟାପ୍ତ ମହଜୁଦ ଅଛି ।"
ରାୟଗଡା ଝାଡାବାନ୍ତି ଖବର ବିଷୟରେ ଏଭଳି କହିଲେ ଜନସ୍ୱାସ୍ଥ୍ୟ ନିର୍ଦ୍ଦେଶକ:
ଅନ୍ୟପଟେ ରାୟଗଡାରେ ଝାଡ଼ାବାନ୍ତି ବ୍ୟାପୁଥିବା ପ୍ରସଙ୍ଗରେ ଜନସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି, "ସେଠାରେ ଏଯାବତ କିଛି ଖରାପ ଖବର ଆସିନାହିଁ, ସ୍ଥିତି ଏବେବି ନିୟନ୍ତ୍ରଣରେ ରହିଛି । ସ୍ଥିିତି ନିୟନ୍ତ୍ରଣ ପାଇଁ ସ୍ୱତନ୍ତ୍ର ଡାକ୍ତରୀ ଦଳ ନିୟୋଜିତ ଥିବା ସହ ଭୁବନେଶ୍ୱରରୁ ମଧ୍ୟ ଡାକ୍ତରୀ ଦଳ ଯାଇ ସମୀକ୍ଷା କରୁଛନ୍ତି । ବର୍ଷା ଦିନରେ ବିଶେଷକରି ଅପରିଷ୍କାର ପାଣି ଯୋଗୁ ଝାଡ଼ାବାନ୍ତି ବ୍ୟାପୁଥିବା ବେଳେ ସ୍ଵଚ୍ଛ ଓ ଶୁଦ୍ଧ ପାଣି ପିଇବାକୁ ଅନୁରୋଧ କରୁଛି ।"
ଇଟିଭି ଭାରତ, ଭୁବନେଶ୍ୱର
