ଅନୁଗୋଳ: ଫାଇଲେରିଆ ମୁକ୍ତ ହେବ ଓଡିଶା । ଫାଇଲେରିଆ ମୁକ୍ତ ଓଡିଶା ପାଇଁ ରାଜ୍ୟ ସରକାର ଵିଭିନ୍ନ ପଦକ୍ଷେପ ଗ୍ରହଣ କରିଥିବା ବେଳେ ଆଜି ଅନୁଗୋଳ ଜିଲ୍ଲାରୁ ଆରମ୍ଭ ହୋଇଛି ରାଜ୍ୟ ସ୍ତରୀୟ ସାମୁହିକ ଔଷଧ ସେବନ କାର୍ଯ୍ୟକ୍ରମ । ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ଓ ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମାହଲିଙ୍ଗ ଏହି କାର୍ଯ୍ୟ କାର୍ଯ୍ୟକ୍ରମର ଶୁଭାରମ୍ଭ କରିବା ସହ ନିଜେ ଏହି ଔଷଧ ଖାଇବା ସହ ଅନ୍ୟମାନେ ମଧ୍ୟ ଏହାକୁ ଖାଇବାକୁ ପରାମର୍ଶ ହେଇଛନ୍ତି ।
ଫାଇଲେରିଆ ନିରାକରଣ ଅଭିଯାନ:
ସମଗ୍ର ରାଜ୍ୟର ୧୧ଟି ଜିଲ୍ଲାରେ ଆଜି ଠାରୁ ଆରମ୍ଭ ହୋଇଛି "Mass Drug Administration" ବା ସାମୁହିକ ଔଷଧ ସେବନ କାର୍ଯ୍ୟକ୍ରମ । ଫାଇଲେରିଆ ନିରାକରଣ ଅଭିଯାନ ସାମିଲ ଓ ଜାତୀୟ କୃମି ନାଶକ ଦିବସ ଭାବେ ଏହାକୁ ପାଳନ କରାଯାଉଥିବା ବେଳେ ଆଜି ଠାରୁ ଏହି ସାମୂହିକ ଔଷଧ ସେବନ ଅଭିଯାନ ଆରମ୍ଭ ହୋଇଛି । ଅନୁଗୋଳ ସ୍ୱୟଂ ଶାସିତ ମହାବିଦ୍ୟାଳୟରେ ଆୟୋଜିତ ଏହି ରାଜ୍ୟସ୍ତରୀୟ କାର୍ଯ୍ୟକ୍ରମରେ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ଓ ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ ଯୋଗ ଦେଇ କାର୍ଯ୍ୟ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ । ଏହାସହ ନିଜେ ଏହି ଔଷଧ ଖାଇବା ସହ ଅନ୍ୟମାନକୁ ଔଷଧ ଖାଇବାକୁ ପରାମର୍ଶ ଦେଇଥିଲେ ।
ରାଜ୍ୟର ୧୧ ଜିଲ୍ଲାରେ ଅଭିଯାନ ଆରମ୍ଭ:
ଫାଇଲେରିଆ ରୋଗର ସମୂଳେ ନଷ୍ଟ କରିବା ପାଇଁ ଭାରତ ସରକାରଙ୍କ ପକ୍ଷରୁ ଏହି କାର୍ଯ୍ୟକ୍ରମ ହାତକୁ ନିଆଯାଇଛି । ରାଜ୍ୟର ଅନୁଗୋଳ, ବରଗଡ଼, ଢେଙ୍କାନାଳ, ଗଞ୍ଜାମ, ଝାରସୁଗୁଡା, ଯାଜପୁର, ମୟୂରଭଞ୍ଜ, କେନ୍ଦୁଝର, ସମ୍ବଲପୁର, ସୋନପୁର ଏବଂ ସୁନ୍ଦରଗଡ଼ ଭଳି ୧୧ ଜିଲ୍ଲାରେ ଏହି ଅଭିଯାନ ଆରମ୍ଭ ହୋଇଛି । ଏଥିପାଇଁ 7 ହଜାରରୁ ଅଧିକ ସ୍ୱାସ୍ଥ୍ୟ କର୍ମୀ ନିୟୋଜିତ ହୋଇଥିବା ମନ୍ତ୍ରୀ ସୂଚନା ଦେଇଛନ୍ତି । ଏହି କାର୍ଯ୍ୟକ୍ରମରେ ତାଳଚେର ବିଧାୟକ ବ୍ରଜ କିଶୋର ପ୍ରଧାନ, ଅନୁଗୋଳ ବିଧାୟକ ପ୍ରତାପ ପ୍ରଧାନ ଜିଲ୍ଲାପାଳ ଅବଦୁଲ ଏମ ଅଖତର ଓ ସ୍ୱାସ୍ଥ୍ୟ ବିଭାଗର ଅନ୍ୟ ପଦାଧିକାରୀ ଯୋଗ ଦେଇଥିଲେ । ଏହାସହ ମନ୍ତ୍ରୀ ଜିଲ୍ଲା ମୁଖ୍ୟ ଚିକିତ୍ସାଳୟ ପରିଦର୍ଶନ କରିବା ସହ ସୁବିଧା ଅସୁବିଧା ସମ୍ପର୍କରେ ଅଧିକାରୀ ଓ ଜିଲାପାଳଙ୍କ ସହ ଆଲୋଚନା କରିଥିଲେ ।
କେଉଁମାନଙ୍କୁ ଦିଆଯିବ ନାହିଁ ଔଷଧ:
ଗର୍ଭବତୀ, ୨ ବର୍ଷରୁ କମ୍ ବୟସର ଶିଶୁ, ଗୁରୁତର ଅସୁସ୍ଥ ରୋଗୀ ଓ ଶିଶୁ ଜନ୍ମର ୧ ସପ୍ତାହ ମଧ୍ୟରେ ମା’ଙ୍କୁ ଏହି ଔଷଧ ଦିଆଯିବନି । ମଧୁମେହ ରୋଗୀ ଏବଂ ଅନ୍ୟ ରୋଗୀ ମଧ୍ୟ ଏହାକୁ ଖାଇପାରିବେ । ଚଳିତ ଡିଇସି, ଆଲବେଣ୍ଡାଜଲ ଏବଂ ଆଇଭରମେକ୍ଟିନ ବଟିକା ପ୍ରଦାନ କରାଯିବ । ୨ରୁ ୫ ବର୍ଷ ଶିଶୁଙ୍କୁ କେବଳ ଡିଇସି, ଆଲବେଣ୍ଡାଜଲ ଓ ୬ ବର୍ଷରୁ ଅଧିକ ବର୍ଷର ବ୍ୟକ୍ତିଙ୍କୁ ଅନ୍ୟ ସବୁ ବଟିକା ଦିଆଯିବ ।
କିଭଳି ବ୍ୟାପେ ଫାଇଲେରିଆ :
ଫାଇଲେରିଆ ଏକ ପରଜୀବୀ ରୋଗ ଯାହା ଫାଇଲେରଏଡିଆ ଶ୍ରେଣୀର ସଂକ୍ରମଣ ଯୋଗୁ ହୁଏ । ଏହା ମଶା ଓ ବ୍ଲାକ ଫ୍ଲାଇ ସଂକ୍ରମିତ ରକ୍ତ ଶୋଷି ସୁସ୍ଥ ଲୋକକୁ କାମୁଡ଼ିବା ଫଳରେ ଏହି ରୋଗ ବ୍ୟାପିଥାଏ । ସାଧାରଣତଃ ୨ ପ୍ରକାର ମାଇକ୍ରୋଫାଇଲେରିଆ କୀଟାଣୁ ଫାଇଲେରିଆ ରୋଗ ସଂକ୍ରମଣ କରିଥାନ୍ତି ଯଥା; ଉଚେରିଆ ବାଙ୍କ୍ରଫଟି ଓ ବୃଜୀୟା ମାଲାୟୀ ।
ଫାଇଲେରିଆ ଲକ୍ଷଣ:
ପ୍ରାଥମିକ ଅବସ୍ଥାରେ କମ୍ପ ହୋଇ ଜ୍ଵର ଆସେ । ଗୋଡ ହାତ ଘୋଳା ବିନ୍ଧା ହୁଏ । ଚର୍ମ ଉପରେ ସ୍ଥାନେ ସ୍ଥାନେ ଲାଲ ଦାଗ ପଡିଯାଏ । ଦରଜ ହୁଏ । ଦେହ କମ୍ପିବା ଏବଂ ଥରିବା, ଦେହ ଶିତେଇବା, ମୁଣ୍ଡ ବିନ୍ଧିବା, ବାନ୍ତିହେବା, ତୀବ୍ର ଜ୍ୱର, ମାଂସପେଶୀ ପୀଡ଼ା ହେବା ଭଳି ଲକ୍ଷଣ ଦେଖାଦିଏ । ରୋଗ ପୁରୁଣା ହୋଇଗଲେ ଗୋଡ, ପାଦ, ହାତ, ଆଦି ଫୁଲିଯାଇ ଗୋଦର ହୁଏ ।
ଇଟିଭି ଭାରତ, ଅନୁଗୋଳ
