କଟକ: ଇଟିଭି ଭାରତର ମହାପ୍ରଭାବ । ଖବର ପ୍ରସାରଣ ପରେ ବନ ବିଭାଗ ରେଞ୍ଜ ଅଫିସରଙ୍କ ବିରୋଧରେ ଆଉ ଏକ ମାମଲା ରୁଜୁ କଲା ଭିଜିଲାନ୍ସ । ଆଠଗଡ଼ ସ୍ଥିତ ନିଜର ଏକ ଫର୍ମହାଉସରେ ୪ ଟି ମୟୂର ରଖିବା ଖବର କେବଳ ଇଟିଭି ଭାରତରେ ପ୍ରସାରିତ ହୋଇଥିଲା । ତେବେ ଆଜି ରେଞ୍ଜ ଅଧିକାରୀ ବିଭୂଦାନନ୍ଦ ମିଶ୍ରଙ୍କ ବିରୋଧରେ Wild life Protection Act 1972 u/s 9 & 39 ଧାରାରେ ମାମଲା ରୁଜୁ କରିଛି । ଏନେଇ ଭିଜିଲାନ୍ସ ପକ୍ଷରୁ ଏକ ପ୍ରେସ ରିଲିଜ ମାଧ୍ୟମରେ ସୂଚନା ଦିଆଯାଇଛି । କେବଳ ସେତିକି ନୁହେଁ ନିଜର ଫାର୍ମହାଉସରେ ରଖା ଯାଇଥିବା ୪ଟି ମୟୂରକୁ ଜବତ କରିବା ସହ ସ୍ଥାନୀୟ ବନ ବିଭାଗ କର୍ମଚାରୀଙ୍କୁ ହସ୍ତାନ୍ତର କରାଯାଇଛି । ତେବେ ଏହି ଘଟଣାର ତଦନ୍ତ ଜାରି ରହିଥିବା ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି । ଅନେକ ଦିଗ ପ୍ରତି ଏହା ତଦନ୍ତ କରାଯାଉଛି ।
କ୍ଷମତାକୁ ଅପବ୍ୟବହାର କରିଥିଲେ କି ରେଞ୍ଜର ସାହେବ ?
ବିଶେଷକରି ଏହି ମୟୂର ଗୁଡିକ କେବେ ଆଣିଥିଲେ ଫରେଷ୍ଟ ଡିଭିଜିନ ରେଞ୍ଜ ଅଫିସର ବିଭୂଦାନନ୍ଦ ମିଶ୍ର ! କେଉଁଠାରୁ ଆଣିଥିଲେ ! ତାଙ୍କୁ କିଏ ଦେଲା ! ଏହି ଘଟଣାରେ ଆଉ କେଉଁ ମାନେ ସାମିଲ ଅଛନ୍ତି ? ସେ ଜଣେ ଫରେଷ୍ଟ ବିଭାଗର ରେଞ୍ଜର ହୋଇ କେମିତି ଆଇନକୁ ଉଲ୍ଲଙ୍ଘନ କରି ନିଜ ଫର୍ମହାଉସରେ ୪ଟି ମୟୂର ରଖିଥିଲେ ! ନିଜର କ୍ଷମତାକୁ ଅପବ୍ୟବହାର କରିଥିଲେ କି !ଏଭଳି ଅନେକ ଦିଗକୁ ଲକ୍ଷ୍ୟ ରଖି ତଦନ୍ତ କରାଯାଇପାରେ । କାରଣ ମୟୂର ରଖିବା ସମ୍ପୂର୍ଣ୍ଣ ବେଆଇନ୍ ।
ଘରେ ମୟୁର ରଖିଲେ କ'ଣ ଆଇନଗତ କାର୍ଯ୍ୟାନୁଷ୍ଠାନ !
ଆପଣ ଜାଣିଛନ୍ତି କି ମୟୂରକୁ କେହି ନିଜର ଘରେ ରଖି ପାରିବେ ନାହିଁ । ଏହା ଆଇନଗତ ଅପରାଧ । Wild life Protection Act 1972 u/s 9 & 39 ଅନୁଯାୟୀ ଜଣେ ଯଦି ଘରେ ମୟୂର ରଖିବ ତେବେ ତା ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ । ଏହି ନିୟମକୁ ଉଲ୍ଲଘଂନ କଲେ ଅର୍ଥାତ ନିଜ ପାଖରେ କିମ୍ବା ନିଜ ଘରେ ମୟୂର ରଖିଲେ ୬ ବର୍ଷ ଜେଲଦଣ୍ଡର ବ୍ୟବସ୍ଥା ରହିଛି । ଜେଲଦଣ୍ଡ ସହିତ ୫ ହଜାର ଟଙ୍କାର ଜୋରିମାନାର ବ୍ୟବସ୍ଥା ରହିଛି । ସମ୍ପୃକ୍ତ ବ୍ୟକ୍ତି ଯଦି ଏହି ମାମଲାରେ ବନ୍ଧା ହୁଏ ବା ତା ବିରୋଧରେ ମାମଲା ରୁଜୁ ହୁଏ । ତେବେ ସମ୍ପୃକ୍ତ ବ୍ୟକ୍ତିକୁ ଜାମିନ ମିଳିବ ନାହିଁ ।ଅର୍ଥାତ ଏହା ଏକ ଜାମିନ ବିହୀନ ମାମଲା ଅଟେ ।
ଏହା ମଧ୍ୟ ପଢନ୍ତୁ ....ମୟୂର ପ୍ରେମରେ ରେଞ୍ଜର ସାହେବ, ଭିଜିଲାନ୍ସ ରେଡ୍ ପରେ ସାମ୍ନାକୁ ଆସିଲା ସତ - PEACOCK SPOTTED IN FARMHOUSE
କ'ଣ କହିଲେ ଆଇନଜୀବୀ ?
ହାଇକୋର୍ଟର ଆଇନଜୀବୀ ଆଲୋକ ମହାପାତ୍ରଙ୍କ କହିଛନ୍ତି,"ମୟୂରଙ୍କ ସୁରକ୍ଷା ପାଇଁ ଏହି ଆଇନ ରହିଛି । ଯିଏ ଏହି ଆଇନକୁ ଉଲ୍ଲଙ୍ଘନ କରିବ ତା ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ଏହି କ୍ରମରେ ଜଣେ ରେଞ୍ଜ ଅଧିକାରୀ ଆଇନ ଜାଣି ମଧ୍ୟ ଆଇନକୁ ନିଜ ହାତକୁ ନେଇଛନ୍ତି । ଅର୍ଥାତ ଆଇନକୁ ଉଲ୍ଲଙ୍ଘନ କରି ସେ ୪ଟି ମୟୂର ନିଜ ପାଖରେ ରଖିଛନ୍ତି । ଯାହାକି ତାଙ୍କ ପାଇଁ ଅଡ଼ୁଆ ସୃଷ୍ଟି କରିବ । ଭିଜିଲାନ୍ସ ଯଦିଓ ଆଉ ଏକ ମାମଲା ରୁଜୁ କରିଛି । ଏହି ମାମଲାରେ ତାଙ୍କୁ ଜାମିନ ମିଳିବ ନାହିଁ । ହୁଏତ ସେ ମୟୂର ବ୍ୟବସାୟ ପାଇଁ ଏହା ରଖିଥାଇ ପାରନ୍ତି । କାରଣ ସେ ଏହି ବିଭାଗର ଜଣେ ବରିଷ୍ଠ ଅଧିକାରୀ । ଅର୍ଥ ପାଇବା ଲାଳସାରେ ସେ ଏପରି କରିଥାଇ ପାରନ୍ତି । ତେଣୁ ଘଟଣାକୁ ସଠିକ୍ ଭାବରେ ତଦନ୍ତ କରିଲେ ପ୍ରକୃତ ତଥ୍ୟ ପଦାକୁ ଆସିବ ।"
କ'ଣ ଥିଲା ପୁରା ଘଟଣା ?
ମୟୂର ପ୍ରେମରେ ରେଞ୍ଜର ସାହେବ । ଘଟଣା ସ୍ଥଳକୁ ଯାଇ ରେଞ୍ଜର ମୟୂର ରଖିଥିବା ଖବର ପ୍ରଥମେ ଇଟିଭି ଭାରତ ପ୍ରସାରିତ ହୋଇଥିଲା । ବାଡ଼ ଖାଇଲା ଫସଲ । ଭିଜିଲାନ୍ସ ଜାଲରେ ପଡିଥିବା ଢେଙ୍କାନାଳ ରେଞ୍ଜ ଅଫିସର ବିଭୂଦାନନ୍ଦ ମିଶ୍ରଙ୍କର ଏକ ଫର୍ମହାଉସରେ ରେଡ ପରେ ଠାବ ହେଲା ମୟୂର । ଗୋଟିଏ କି ଦୁଇଟି ନୁହେଁ ବରଂ ରେଡ ବେଳେ ଠାବ ହେଲା ଚାରି ଚାରିଟି ମୟୂର । ବଡ଼ କଥା ହେଉଛି ମୟୁର ଗୁଡିକୁ ଯେଉଁ ଭଳି ଅବସ୍ଥାରେ ରଖା ଯାଇଥିଲା ତାହା ସମସ୍ତଙ୍କୁ ଚକିତ କରିଦେବ । କାରଣ ଛୋଟ କୋଠରୀରେ ଏଭଳି ଅବସ୍ଥାରେ ମୟୂର ଗୁଡିକ ଥିବା ଦେଖି ଆଶ୍ଚର୍ଯ୍ୟ ପ୍ରକଟ କରିଥିଲେ ଖୋଦ ପ୍ରାଣୀ ସମ୍ପଦ ବିଭାଗର ଅଧିକରିଣୀ । ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଢେଙ୍କାନାଳ ଫରେଷ୍ଟ ବିଭାଗର ରେଞ୍ଜର ବିଭୂଦାନନ୍ଦ ମିଶ୍ରଙ୍କ ବିଭିନ୍ନ ସ୍ଥାନରେ ରେଡ ଜାରି ରଖିଛି ଭିଜିଲାନ୍ସ ବିଭାଗ ।ଏହି କ୍ରମରେ କଟକ ଆଠଗଡ଼ ରାହାଙ୍ଗୋଳ ସ୍ଥିତ ଫାର୍ମହାଉସରେ ରେଡ କରିଥିଲା ଭିଜିଲାନ୍ସ । ତାଙ୍କୁ ବର୍ତ୍ତମାନ ଭିଜିଲାନ୍ସ ଗିରିଫ କରିଥିବା ଜଣାପଡ଼ିଛି ।
ଇଟିଭି ଭାରତ, କଟକ
