ନିଆଳି: ଖରା ଦିନ ନ ଆସୁଣୁ ଜଳ ସଙ୍କଟ । କଟକ ଜିଲ୍ଲା କଣ୍ଟାପଡ଼ା ବ୍ଲକର ବାଇରୋଇ ଗାଁରେ ବିଶୁଦ୍ଧ ପାନୀୟ ଜଳ ପାଇବାରୁ ବଞ୍ଚିତ ହେଉଛନ୍ତି ଗ୍ରାମବାସୀ । ଏନେଇ ସେମାନେ ଅନ୍ୟ ସ୍ଥାନରୁ ପାଣି ସଂଗ୍ରହ କରି ଶୋଷ ମେଣ୍ଟାଉଛନ୍ତି । ତେବେ ଓଭର ହେଡ ଟାଙ୍କି ଏବଂ ଘର ସମ୍ମୁଖରେ ଟ୍ୟାପ୍ ନିର୍ମାଣ ଦିନ ଠାରୁ ସ୍ଥାନୀୟ ଗ୍ରାମବାସୀମାନେ ବିଶୁଦ୍ଧ ପାନୀୟ ଜଳ ପାଇବାରୁ ବଞ୍ଚିତ ହେଉଥିବା ଅଭିଯୋଗ ଆସିଛି ।
କଣ୍ଟାପଡ଼ା ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ଅଧିନରେ ବାଇରୋଇ ଠାରେ ନିର୍ମାଣ ହୋଇଛି ଓଭର ହେଡ ପାଣି ଟାଙ୍କି । ଖର୍ଚ୍ଚ ହୋଇଛି କୋଟିଏରୁ ଅଧିକ ଟଙ୍କାରୁ । ଲୋକେ ଟ୍ୟାପ୍ ଯୋଗେ ବିଶୁଦ୍ଧ ପାଣି ସଂଗ୍ରହ କରିବେ ବୋଲି କେନ୍ଦ୍ର ଓ ରାଜ୍ୟ ସରକାରଙ୍କ ଲକ୍ଷ୍ୟ ଥିଲା । କିନ୍ତୁ ବାସ୍ତବ ଚିତ୍ର ଅଲଗା । କଣ୍ଟାପଡ଼ା ବ୍ଲକର ବାଇରୋଇ ଗାଁ ଏବଂ ଆଖପାଖ ଅଞ୍ଚଳର ଦୁଇ ହଜାରରୁ ଊର୍ଦ୍ଧ୍ବ ପରିବାର ଦୀର୍ଘ ବର୍ଷ ଧରି ବିଶୁଦ୍ଧ ପାନୀୟ ଜଳ ପାଇବାରୁ ବଞ୍ଚିତ ହେଉଛନ୍ତି । ଏନେଇ ଗ୍ରାମବାସୀମାନେ ବାଧ୍ୟ ହୋଇ ଅନ୍ୟ ସ୍ଥାନରୁ ପାଣି ସଂଗ୍ରହ କରି ଶୋଷ ମେଣ୍ଟାଉଥିବା କହିଛନ୍ତି ।
ବାଇରୋଇ ବାସିନ୍ଦା ଅଭିଯୋଗ କରିଛନ୍ତି ଯେ, ଘର ନିକଟରେ ବସିଥିବା ଟ୍ୟାପଗୁଡିକ ନିମ୍ନମାନର କାର୍ଯ୍ୟ ହୋଇଥିବା ଯୋଗୁଁ ଭାଙ୍ଗିରୁଜି ଗଲାଣି ଏବଂ ଏଥିରେ ପାଣି ଆସୁନାହିଁ । ଯେଉଁ କେତେକ ସମୟ ପାଣି ଆସୁଛି ତା' ପୁଣି ଆଇରନ ଏବଂ ପଙ୍କ ପାଣି । ଫଳରେ ତାହା ବ୍ୟବହାର ଉପଯୋଗୀ ହେଉନି । ଏହି ପାଣି ବ୍ୟବହାର କଲେ ପେଟ ରୋଗ ଠାରୁ ଆରମ୍ଭ କରି ବିଭିନ୍ନ ରୋଗରେ ସ୍ଥାନୀୟ ଲୋକମାନେ ଶିକାର ହେଉଥିବା ଅଭିଯୋଗ ହୋଇଛି ।
ଏନେଇ କଣ୍ଟାପଡ଼ା ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ଅଧିକାରୀଙ୍କୁ ଅଭିଯୋଗ କରାଯାଇଥିଲେ ମଧ୍ୟ ସମାଧାନ ହେଉନାହିଁ । ତେଣୁ ଆଗାମୀ ଦିନରେ ବାଇରୋଇ ଗ୍ରାମବାସୀ ଆନ୍ଦୋଳନପନ୍ଥା ଅବଲମ୍ବନ କରିବେ ବୋଲି କହିଛନ୍ତି । ସେପଟେ କଣ୍ଟାପଡ଼ା ପାନୀୟ ଜଳ ଯୋଗାଣ ବିଭାଗ ଯନ୍ତ୍ରୀ ଅଜୟ ମିଶ୍ରଙ୍କୁ ଟେଲିଫୋନ ମାଧ୍ୟମରେ ପାନୀୟ ଜଳ ଯୋଗାଣ ସମସ୍ୟା ସମ୍ପର୍କରେ ପଚାରିବାରୁ ସେ କହିଛନ୍ତି ଯେ, 3ରୁ 4 ଦିନ ମଧ୍ୟରେ ସମସ୍ୟାର ସମାଧାନ କରାଯିବ ।
ଇଟିଭି ଭାରତ, ନିଆଳି
