ପୁରୀ/ଭୁବନେଶ୍ବର: ବିପଦରେ ଶ୍ରୀମନ୍ଦିରର ମେଘନାଦ ପ୍ରାଚୀର । ରକ୍ଷଣାବେକ୍ଷଣ ଅଭାବରୁ ଏହା ଭୁଶୁଡି ପଡିବା ଆଶଙ୍କା ଦେଖାଦେଇଛି । ଶ୍ରୀମନ୍ଦିର ସିଂହଦ୍ଵାର ପାଖରେ ଥିବା ରାମଦୟା ପରିଷଦ ନିକଟ ମେଘନାଦ ପାଚେରୀରେ ସୃଷ୍ଟି ହୋଇଛି ଫାଟ । ଆନନ୍ଦ ବଜାରର ହାତ ଧୁଆ ପାଣି ଡ୍ରେନରେ ନିଷ୍କାସିତ ହେବା ପରିବର୍ତ୍ତେ ମେଘନାଦ ପାଚେରୀରେ ଥିବା ଫାଟ ଦେଇ ଜଳ ନିଷ୍କାସନ ହେଉଛି । ମେଘନାଦ ପାଚେରୀରେ ପାଣି ଲିକେଜ କରି ଶିଉଳି ଲାଗି ଲାଗିଯାଇଛି ।
ମେଘନାଦ ପାଚେରୀରେ ଫାଟ !
ପ୍ରତିଦିନ ଶ୍ରମନ୍ଦିର ଅଧିକାରୀ ଓ ଏଏସଆଇ ଅଧିକାରୀ ଶ୍ରୀମନ୍ଦିରକୁ ଆସୁଥିବାବେଳେ ଆଶ୍ଚର୍ଯ୍ୟର ବିଷୟ ଶ୍ରୀମନ୍ଦିର ମେଘନାଦ ପାଚେରୀର ସୁରକ୍ଷା ନେଇ କୌଣସି ପଦକ୍ଷେପ ନେଉନାହାନ୍ତି । ଯାହା ଫଳରେ ପାଣି ଲିକେଜ ଯୋଗୁଁ ମେଘନାଦ ପାଚେରୀ ଦୁର୍ବଳ ହୋଇ ଭୁଶୁଡ଼ିଯିବାର ଆଶଙ୍କା ରହିଛି । ମେଘନାଦ ପାଚେରୀର ସୁରକ୍ଷା ନେଇ ଶ୍ରୀମନ୍ଦିର ପ୍ରଶାସନ ଅଧିକାରୀ ଓ ଏଏସଆଇ ଅଧିକାରୀ ଚୁପ୍ ବସିବା ଘଟଣାକୁ କଡ଼ା ସମାଲୋଚନା କରିଛନ୍ତି ଜଗନ୍ନାଥ ପ୍ରେମୀ, ବୁଦ୍ଧିଜୀବୀ ଓ ସେବାୟତ।
'ଏଏସଆଇ ଚୁପ୍ ବସିଛି କାହିଁକି ?'
ବରିଷ୍ଠ ଆଇନଜୀବୀ ଶରତ ରାୟଗୁରୁ କହିଛନ୍ତି,"ଶ୍ରୀମନ୍ଦିର ହେଉଛି ଏକ ଐତିହ କୀର୍ତ୍ତିରାଜି । ଏହା ଆମସାର୍ ଆକ୍ଟରେ ପରିଚାଳିତ । ଏହି ଆକ୍ଟର ନିୟମ ଅନୁଯାୟୀ ପ୍ରତ୍ୟେକ ଐତିହ୍ୟ କୀର୍ତ୍ତିରାଜିର ସୁରକ୍ଷା ଦାୟିତ୍ବ ଏଏସଆଇ ଦ୍ବାରା ହେବ । ହେଲେ ମେଘନାଦ ପାଚେରୀରେ ଫାଟ ହୋଇ ପାଣି ଲିକ୍ କରି କାନ୍ଥରେ ଶିଉଳି ଲାଗି ଥିବାବେଳେ ଆଜି ପର୍ଯ୍ୟନ୍ତ କାହିଁକି ଏଏସଆଇ ଚୁପ୍ ବସିଛି । ଏହାର ତୁରନ୍ତ ମରାମତି କରିବା ଉଚିତ୍ । ମେଘନାଦ ପାଚେରୀରେ ପାଣି ଲିକ୍ କରି ପାଚେରୀ ପ୍ରତୀ ବିପଦ ସୃଷ୍ଟି ହୋଇଥିବାବେଳେ କାହିଁକି ଏଏସଆଇ ଚୁପ୍ ବସିଛି । "
ଜଗନ୍ନାଥ ପ୍ରେମୀଙ୍କ ମନରେ କ୍ଷୋଭ:
ଜଗନ୍ନାଥ ପ୍ରେମୀ ରମେଶ ପ୍ରସାଦ ସିହ୍ନା କହିଛନ୍ତି,"ମେଘନାଦ ପାଚେରୀରୁ କେବଳ ପାଣି ନୁହେଁ କାଦୁଅ ମଧ୍ୟ ଝରୁଛି । ଏହା ଉପରେ ତୁରନ୍ତ ରାଜ୍ୟ ସରକାର ଦୃଷ୍ଟି ଦେବା ଆବଶ୍ୟକ ରହିଛି । ଯେଉଁଠି ସାଧାରଣ ଲୋକ ଆସି ମେଘନାଦ ପାଚେରୀର ଦୂରବସ୍ଥା ଦେଖିଲେଣି ସେତେବେଳେ ଏଏସଆଇ ଅଧିକାରୀ ଏପର୍ଯ୍ୟନ୍ତ ନଦେଖିବା ଅତି ଦୁଃଖଦାୟକ ଘଟଣା । ତୁରନ୍ତ ରାଜ୍ୟ ସରକାର ମେଘନାଦ ପ୍ରାଚୀରର ସୁରକ୍ଷା ପାଇଁ ପଦକ୍ଷେପ ନିଅନ୍ତୁ । ସେମାନେ କାହିଁକି ଚୁପ୍ ବସିଛନ୍ତି । ଅବହେଳା କରିଥିବା ଉଭୟ ଏଏସଆଇ ଓ ଶ୍ରୀମନ୍ଦିର ପ୍ରଶାସନ କର୍ମଚାରୀଙ୍କ ବିରୋଧରେ କଡ଼ା କାର୍ଯ୍ୟନୁଷ୍ଠାନ ନିଆଯାଉ ।"
ଦୁଃଖ ଦାୟକ ଘଟଣା କହିଲେ ସେବାୟତ :
ସେହିପରି ଶ୍ରୀମନ୍ଦିର ସେବାୟତ କୀର୍ତ୍ତି ପ୍ରକାଶ ଦାସ ମହାପାତ୍ର କହିଛନ୍ତି," ମେଘନାଦ ପାଚେରୀରେ ପାଣି ଗଳିବା ଅତି ଦୁଃଖ ଦାୟକ ଘଟଣା । ଏଏସଆଇ ବର୍ଷତମାମ ଶ୍ରୀମନ୍ଦିରରେ କାର୍ଯ୍ୟ କରୁଥିଲେ ମଧ୍ୟ ଏଭଳି ଦୁଃଖ ଦାୟକ ଘଟଣା ସାମ୍ନାକୁ ଆସୁଛି । ବିଭିନ୍ନ ନିଯୋଗର ଗୃହରେ ପାଣି ଗଳୁଥିବାବେଳେ ଏଏସଆଇ ଏନେଇ କୌଣସି ପଦକ୍ଷେପ ନେଉନାହିଁ ।"
ଏମିତି କହିଲେ ଏଏସଆଇ ଅଧିକାରୀ:
ପୁରୀ ସର୍କଲରେ ଏଏସଆଇ ଅଧିକାରୀ ଜ୍ୟୋତି ରଞ୍ଜନ ପ୍ରଧାନ କହିଛନ୍ତି," ଆନନ୍ଦ ବଜାରରେ ଭକ୍ତଙ୍କ ପାଇଁ ହୋଇଥିବା ହାତ ଧୁଆ ବେସିନ ପାଣି ମେଘନାଦ ପାଚେରୀରେ ଲିକ୍ କରୁଛି । ଶ୍ରୀମନ୍ଦିର ଆନନ୍ଦ ବଜାରରେ ଡ୍ରେନେଜ କାର୍ଯ୍ୟ ମରାମତି ଶ୍ରୀମନ୍ଦିର ପ୍ରଶାସନ କରିଥାଏ । ଏହି ସମସ୍ୟାର ସମାଧାନ ପାଇଁ ମନ୍ଦିର ପ୍ରଶାସନକୁ ପ୍ରାୟ ଦେଢ଼ ବର୍ଷ ହେବ ଚିଠି କରିଛୁ । ମୂଷା ଗାତ କରି ଦେଇଥିବା ଅନୁମାନ କରାଯାଉଛି । ଫଳରେ ପାଣି ଡ୍ରେନ ବାଟେ ନଯାଇ ମେଘନାଦ ପାଚେରୀରେ ଲିକ୍ କରୁଛି ।"
ଏହା ମଧ୍ୟ ପଢନ୍ତୁ ...ରତ୍ନଭଣ୍ଡାରରେ ନାହିଁ ଗୁପ୍ତ ସୁଡ଼ଙ୍ଗ, ନୂଆବର୍ଷରୁ ଗଣତି ମଣତି ଏହା ମଧ୍ୟ ପଢନ୍ତୁ ...ଏଣିକି ସ୍ୱର୍ଗଦ୍ୱାରରେ ଗୋବର ଘଷିରେ ହେବ ମୃତଦେହ ଦାହ |
ପ୍ରତିକ୍ରିୟା ରଖିଲେ ଆଇନ ମନ୍ତ୍ରୀ:
ମେଘନାଦ ପାଚେରୀରେ ଫାଟ ନେଇ ପ୍ରତିକ୍ରିୟା ରଖିଲେ ଆଇନ ମନ୍ତ୍ରୀ । ସେ କହିଛନ୍ତି," ଫାଟକୁ ତୁରନ୍ତ ମରାମତି କରାଯିବ । ଆଗକୁ ଯେମିତି କୌଣସି ସମସ୍ୟା ହେବ ନାହିଁ , ତାହା ଉପରେ ଗୁରୁତ୍ୱ ଦେଉଛୁ । ମେଘନାଦ ପାଚେରୀ ଫାଟ ସୃଷ୍ଟି ହୋଇଛି । ସେଥିପାଇଁ ଏଏସଆଇର ବୈଷୟିକ ଟିମ ନଜର ରଖିଛନ୍ତି । କୌଣସି ପ୍ରକାର ରାଜନୈତିକ ଟିପ୍ପଣୀ କରିବାକୁ ମୁଁ ଚାହେଁନି । ଅତୀତରେ କିଛି ଭୁଲ କାରଣରୁ ଭବିଷ୍ୟତରେ କିଛି ଭୁଲ ହୁଏ । ଆଗାମୀ ଦିନରେ ତାର ମରାମତି ହେବ । "
ଖବର ପ୍ରକାଶ ପରେ ଚେତିଲା ମନ୍ଦିର ପ୍ରଶାସନ:
ସେପଟେ ଗଣମାଧ୍ୟମରେ ଖବର ପ୍ରକାଶ ପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ମେଘନାଦ ପାଚେରୀରେ ଲାଗିଥିବା ଶିଉଳିକୁ ସଫା କରାଯାଇଛି । ଶ୍ରୀମନ୍ଦିର ପ୍ରଶାସନର ଉନ୍ନୟନ ଅଧିକାରୀ ଦେବଦ୍ରତ ସାହୁ କହିଛନ୍ତି,"ଆନନ୍ଦ ବଜାରରେ ଭକ୍ତଙ୍କ ହାତ ଧୁଆ ପାଣି ଡ୍ରେନରେ ସଠିକ୍ ଭାବରେ ଯାଇନପାରି ମେଘନାଦ ପାଚେରୀକୁ ଲିକ୍ କରୁଛି । ଖୁବଶୀଘ୍ର ଡ୍ରେନେଜ୍ କାର୍ଯ୍ୟ ହେବ । "
ଇଟିଭି ଭାରତ, ପୁରୀ /ଭୁବନେଶ୍ବର
