ବୌଦ୍ଧ: ଜିଲ୍ଲାରେ କପା ଚାଷ ଉପରେ ନିର୍ଭରଶୀଳ ହଜାର ହଜାର ପରିବାର । କପା ଚାଷକୁ ନେଇ ଏଠାରେ ରହିଛି ବିରାଟ ସମ୍ଭାବନା । ଜଙ୍ଗଲ ଅଞ୍ଚଳର ଧଳା ହୀରା ଭାବରେ ପରିଚିତ ଏହି କପା ଚାଷ ଚାଷୀଙ୍କ ଆର୍ଥିକ ମେରୁଦଣ୍ଡ ପାଲଟିଥିବା ବେଳେ ଚାଷୀ ଅଭାବୀ ବିକ୍ରିର ଶିକାର ହେଉଛନ୍ତି । ବୌଦ୍ଧ ଜିଲ୍ଲାର ତିନୋଟି ବ୍ଲକରେ ହଜାର ହଜାର ଏକର ପଡ଼ିଆ ଓ ଜଙ୍ଗଲ ଅଞ୍ଚଳରେ ଏହି କପା ଚାଷ ହେଉଛି । କିନ୍ତୁ କପା ମଣ୍ଡି ନଥିବାରୁ ଚାଷୀ ଅଭାବୀ ବିକ୍ରିର ସମ୍ମୁଖୀନ ହେଉଥିବା ଅଭିଯୋଗ ହୋଇଛି । ଏନେଇ କପା ଚାଷୀ ଦୂରଦୂରାନ୍ତରେ ଥିବା ବେପାରୀ, ଦଲାଲ ଓ କପା ମିଲରେ କମ୍ ଦରରେ କପା ବିକ୍ରି କରିଛନ୍ତି । ଫଳରେ ଚାଷୀଙ୍କ ବ୍ୟାପକ କ୍ଷତି ହୋଇଥିବା ବେଳେ ଏନେଇ ବିସ୍ତୃତ ସୂଚନା ଦେଇଛନ୍ତି ଜିଲ୍ଲା ମୁଖ୍ୟ କୃଷି ଅଧିକାରୀ ।
ଶିଳ୍ପ ବିହୀନ ଜିଲ୍ଲାରେ ଏହି କପା ଚାଷର ଏକ ବିରାଟ ସମ୍ଭାବନା ରହିଥିଲେ ମଧ୍ୟ ସ୍ଥାନୀୟ କପା ଚାଷୀ ଶୋଷଣର ଶିକାର ହେଉଥିବା ତଥା ଅଭାବୀ ବିକ୍ରିର ସମ୍ମୁଖୀନ ହେଉଥିବା ଅଭିଯୋଗ ହୋଇଛି । ଜିଲ୍ଲାର ଜଳବାୟୁରେ କପା ଚାଷ ଏକ ସଫଳ ବ୍ୟବସାୟ ହୋଇଥିବା ବେଳେ ଗତ କିଛି ବର୍ଷ ପୂର୍ବେ ପଡ଼ିଆ ପଡୁଥିବା ଜମିରେ ବର୍ତ୍ତମାନ ବେଶ ଭଲ କପା ଚାଷ ହେଉଛି । ଜିଲ୍ଲାର ହରଭଙ୍ଗା, ବୌଦ୍ଧ ଓ କଣ୍ଟାମାଳ ବ୍ଲକର ବିଭିନ୍ନ ଅଞ୍ଚଳରେ ଏହି କପାଚାଷ ପର୍ଯ୍ୟାପ୍ତ ପରିମାଣରେ ହେଉଛି । ହେଲେ ଜଙ୍ଗଲ ନିକଟବର୍ତ୍ତୀ ଅଞ୍ଚଳରେ ଜୀବନ ଜୀବିକାର ମାଧ୍ୟମ ପାଲଟିଥିବା ଏହି କପା ଚାଷରେ ସ୍ଥାନୀୟ ଚାଷୀ ଶୋଷଣର ଶିକାର ହେଉଛନ୍ତି । ଜିଲ୍ଲାରେ ପର୍ଯ୍ୟାପ୍ତ କପା ଚାଷ ସତ୍ତ୍ବେ ଏଠାରେ ଗୋଟିଏ ମଧ୍ୟ କପା ମଣ୍ଡି ସ୍ଥାପନ ହୋଇନାହିଁ । ଫଳରେ ବୌଦ୍ଧ ଜିଲ୍ଲାର କପା ଚାଷୀ ଚଳିତ ବର୍ଷ ଅଭାବୀ ବିକ୍ରିର ସମ୍ମୁଖୀନ ହୋଇଥିବା ଅଭିଯୋଗ ହୋଇଛି ।
