ରାଉରକେଲା: ମହାନଗର ନିର୍ବାଚନ ପାଇଁ ତେଜୁଛି ଦାବି । ଗର୍ଜିଲା ରାଉରକେଲା କଂଗ୍ରେସ, ନୂଆ ବିଜେପି ସରକାରକୁ ଟାର୍ଗେଟ କଲା ଦଳ । ଆଜି ଏକ ସମ୍ବାଦିକ ସମ୍ମିଳନୀରେ ରାଉରକେଲା କଂଗ୍ରେସ କର୍ମକର୍ତ୍ତାମାନେ ମହାନଗର ନିଗମ ନିର୍ବାଚନ ପାଇଁ ଦାବି କରିଛନ୍ତି । ଜିଲ୍ଲା କଂଗ୍ରେସ ସଭାପତି ରବି ରାୟ କହିଛନ୍ତି, "ରାଉରକେଲା ମହାନଗର ନିଗମ ନିର୍ବାଚନ ଯଥାଶୀଘ୍ର ସମ୍ଭବ କରାଯାଉ । ପୂର୍ବ ସରକାର ଭଳି ନୂଆ ସରକାର ଯଦି ନିର୍ବାଚନ ଲାଗି ଟାଳଟୁଳ ନୀତି ଅପଣାଏ, ତେବେ ତୀବ୍ର ବିରୋଧ କରାଯିବ ।"
ସେ ଆହୁରି ମଧ୍ୟ କହିଛନ୍ତି, "ପୂର୍ବ ବିଜେଡି ସରକାର ରାଉରକେଲାର ବିକାଶ ଚାହୁଁନଥିଲା । ସହର ଓ ବସ୍ତିର ବିକାଶ ପାଇଁ ରାଉରକେଲା ମହାନଗର ନିଗମ (ଆର୍ଏମ୍ସି) ନିର୍ବାଚନ ହେବାର ଆବଶ୍ୟକତା ରହିଛି । କିନ୍ତୁ ବାରମ୍ବାର କୋର୍ଟର ଆଳ ଦେଖାଇ ବିଜେଡି ସରକାର ବର୍ଷ ବର୍ଷ ଗଡାଇ ଚାଲିଥିଲା । ଫଳରେ ଆରଏମ୍ସି (ରାଉରକେଲା ମହାନଗର ନିଗମ)ର କୌଣସି ଜନ ପ୍ରତିନିଧି ନଥିବାରୁ ଅଫିସରମାନେ ମନଇଚ୍ଛା କାମ କରୁଥିଲେ । ତେଣୁ ବସ୍ତି ବାସିନ୍ଦା ମୌଳିକ ସୁବିଧା ସୁଯୋଗ ପାଇପାରୁ ନାହାନ୍ତି । ସରକାରଙ୍କ ଅନେକ ବିକାଶମୂଳକ ଯୋଜନା ସଠିକ୍ ଭାବେ କାର୍ଯ୍ୟକାରୀ ହୋଇପାରୁନଥିଲା । ଏଥିପାଇଁ ବିଜେଡି ସରକାର ମୁଖ୍ୟତଃ ଦାୟୀ । ରାଜ୍ୟରେ ବର୍ତ୍ତମାନ ସରକାର ବଦଳିଛି । ବିଜେପି ସରକାର ଆସିଛି । ନୂଆ ସରକାର ଏସବୁ ଦିଗରେ ପ୍ରାଥମିକତା ଦେବ ଜରୁରୀ ।"
ତେବେ କେବଳ ଆରଏମ୍ସି ନିର୍ବାଚନ ନୁହେଁ, ସହରର ଅଧୁରା ପଡ଼ିଥିବା ଅନେକ ପ୍ରକଳ୍ପ ଓ ଘୋଷଣା ପ୍ରକଳ୍ପଗୁଡ଼ିକୁ କାର୍ଯ୍ୟକାରୀ କରିବାକୁ ଦାବି କରିଛନ୍ତି ଜିଲ୍ଲା କଂଗ୍ରେସ ସଭାପତି । ଯେଉଁସବୁ ନିର୍ବାଚନ ଇସ୍ତାହାରରେ ପ୍ରକାଶ କରିଥିବା ସମସ୍ତ ଯୋଜନାକୁ 30 ଦିନ ମଧ୍ୟରେ ଲାଗୁ କରାଯାଉ ବୋଲି ମଧ୍ୟ ଦାବି କରିଛି କଂଗ୍ରେସ । ବିଜେପି ସରକାର ଦାୟିତ୍ଵ ନେବାପରେ ବିଭାଗୀୟ ଅଧିକାରୀ ଏଦିଗରେ ପୂର୍ବ ବିଜେଡି ସରକାର ପରି ଧ୍ୟାନ ନଦେଲେ କଂଗ୍ରେସ ଆନ୍ଦୋଳନକୁ ବ୍ୟାପକ କରିବ ବୋଲି ଚେତାବନୀ ଦେଇଛି । ସହରବାସୀଙ୍କ ସ୍ବାର୍ଥ ପାଇଁ ଯାହା କରିବାକୁ ପଡ଼ିବ, କଂଗ୍ରେସ ତାହା ନିଶ୍ଚୟ କରିବ । ଦରକାର ପଡ଼ିଲେ ଆରଏମ୍ସି ନିର୍ବାଚନ ପାଇଁ କଂଗ୍ରେସ କୋର୍ଟର ଆଶ୍ରୟ ନେବାକୁ ବାଧ୍ୟ ହେବ ବୋଲି କହିଛନ୍ତି ଦଳର ଜିଲ୍ଲା ସଭାପତି । ନିର୍ବାଚନ ହେଲେ ସହରର ବହୁ ଅସୁବିଧା ଦୂର ହେବ । ରାଉରକେଲାବାସୀ ଏହାର ଲାଭ ପାଇବେ ବୋଲି କହିଛି କଂଗ୍ରେସ ।
ଇଟିଭି ଭାରତ, ରାଉରକେଲା
