ବୌଦ୍ଧ: ଆଖିରେ ଆଖିଏ ସ୍ବପ୍ନ । ପାଠ ପଢିବେ ଆଗକୁ ବଢିବେ । ଗରିବୀର ଶିକୁଳିକୁ ଛିଡାଇ ଆଗକୁ ପାଦ କାଢିଛନ୍ତି ଶିଖା । ମାଓ ଅଧ୍ୟୁଷିତ ଅଞ୍ଚଳରୁ ବାହାରି ରାଜଧାନୀରେ ପାଠ ପଢିବେ । ହେଲେ ଶିଖାଙ୍କ ସାମ୍ନାରେ ପ୍ରାଚୀର ହୋଇ ଛିଡା ହୋଇଛି ଅର୍ଥଭାବ । ଉତ୍କଳ ବିଶ୍ବବିଦ୍ୟାଳୟରେ ପିଜିରେ ନାମ ଲେଖାଇଥିବା ବେଳେ ପାଠ ପଢିବାକୁ ପାଖରେ ଅର୍ଥ ନାହିଁ । ଏଥିପାଇଁ ସମସ୍ତଙ୍କ ସହାୟତା କାମନା କରିଛନ୍ତି ସେ ।
ଶିଖାଙ୍କ ଶିକ୍ଷା ପାଇଁ ଅର୍ଥ ବାଧକ:
ବୌଦ୍ଧ ଜିଲ୍ଲା ଉପାନ୍ତ ବରଗାଁ ପଞ୍ଚାୟତର ଲୁଇସିଙ୍ଗ ଗ୍ରାମର ଛାତ୍ରୀ ଶିଖା ମଲ୍ଲିକ । ପିଲାଟି ଦିନରୁ ନିଜ ବାପାଙ୍କୁ ହରାଇଛନ୍ତି । ମାଆଙ୍କ ସହ ଝାଡିମାଟି କୁଡିଆରେ ଜୀବନ ବିତାଉଛନ୍ତି । ଗାଁ ବିଦ୍ୟାଳୟ ଠାରୁ ନେଇ କଣ୍ଟାମାଳ ମହାବିଦ୍ୟାଳୟରେ ସଫଳତାର ସହିତ ଉତ୍ତୀର୍ଣ୍ଣ ହୋଇଥିଲେ । ପରିବାର କହିଲେ ସେ ଆଉ ତାଙ୍କ ମାଆ । ଘର ଚଳାଇବା ପାଇଁ ମାଆ ଓ ଝିଅ ନିକଟସ୍ଥ ଜଙ୍ଗଲରୁ ଖଲିପତ୍ର ଆଣି ତାକୁ ସିଲେଇ କରି ବିକ୍ରି କରନ୍ତି । ଏଥିସହ ଝାଡୁ ମଧ୍ୟ ତିଆରି କରି ବିକ୍ରି କରି ଗୁଜୁରାଣ ମେଣ୍ଟାନ୍ତି । ଏଥିରୁ ଯାହା ଟଙ୍କା ଆସେ ସେଥିରେ କଷ୍ଟମଷ୍ଟେ ଘର ଚଳିଯାଏ । ହେଲେ ପାଠ ପଢିବା ପାଇଁ ତାଙ୍କ ପାଖରେ ଆବଶ୍ୟକୀୟ ଅର୍ଥ ନାହିଁ । ଆଦିବାସୀ ଛାତ୍ରୀଙ୍କ ଉଚ୍ଚ ଶିକ୍ଷାରେ ବାଧକ ସାଜିଛି ଅର୍ଥ ।
| ଏହା ମଧ୍ୟ ପଢନ୍ତୁ: ସ୍ବାମୀ-ସ୍ତ୍ରୀ ଦୁହେଁ ଭିନ୍ନକ୍ଷମ, ଭଙ୍ଗା ଚାଳଘରେ ବିତୁଛି ଜୀବନ - |
ଧାର ଉଧାର କରି ନାଁ ଲେଖାଇଲେ:
ଶିଖା ଉତ୍କଳ ବିଶ୍ବବିଦ୍ୟାଳୟରେ ପିଜି ପଢିବାକୁ ଧାରକରଜ କରି ନାମ ଲେଖାଇଥିବା ବେଳେ ଆଗକୁ ହଷ୍ଟେଲ ଓ ପାଠ ପଢ଼ିବାକୁ ଆବଶ୍ୟକ ଅର୍ଥ କିଭଳି ଯୋଗାଡ କରିବେ ସେନେଇ ଚିନ୍ତାରେ ପଡିଯାଇଛନ୍ତି । ଏନେଇ ଶିଖା କହିଛନ୍ତି, ‘ଧାର ଉଧାର କରି ଉତ୍କଳ ବିଶ୍ଵବିଦ୍ୟାଳୟରେ ନା ଲେଖାଇ ଦେଇଛି କିନ୍ତୁ ଆଗକୁ ଅର୍ଥର ଆବଶ୍ୟକତା ଥିବାରୁ ସରକାର ମୋତେ ସାହାଯ୍ୟ କରନ୍ତୁ ।’
ମୁଖ୍ୟମନ୍ତ୍ରୀଙ୍କୁ ସମାଜସେବୀଙ୍କ ଅପିଲ୍:
ସେହିପରି କଣ୍ଟାମାଳ ଅଞ୍ଚଳର ବିଶିଷ୍ଟ କନ୍ଧ ସମ୍ପ୍ରଦାୟର ନେତା ତଥା ସମାଜସେବୀ ଡମ୍ବରୁଧର କହିଛନ୍ତି, ‘ଶିଖାଙ୍କ ଭଳି ପ୍ରତିଭା ଏଭଳି ଉପାନ୍ତ ଅଞ୍ଚଳରୁ ଯାଇ ଉତ୍କଳ ବିଶ୍ଵବିଦ୍ୟାଳୟରେ ପାଠ ପଢିବା ନିଶ୍ଚିତଭାବେ ତାଙ୍କ ସଂପ୍ରଦାୟ ପାଇଁ ଗୌରବର ବିଷୟ । ସ୍ଥାନୀୟ କନ୍ଧ ସମାଜ ପକ୍ଷରୁ ସାଧ୍ୟ ମୁତାବକ ଆର୍ଥିକ ସାହାଯ୍ୟ ଦେବାକୁ ବିଚାର କରୁଥିବା ବେଳେ ବର୍ତ୍ତମାନ ମୋହନ ମାଝୀ ସରକାରଙ୍କୁ ସେ ଉକ୍ତ ଛାତ୍ରୀଙ୍କୁ ସହାୟତା ଯୋଗାଇଦେବାକୁ ଅନୁରୋଧ କରୁଛୁ ।’
ଶିଖାଙ୍କୁ ସହାୟତା କରିବ ପ୍ରଶାସନ:
ଏନେଇ ଆମେ ଜିଲ୍ଲା ସହକାରୀ ସମାଜ ମଙ୍ଗଳ ଅଧିକାରୀ ସୈନ୍ୟ ରଞ୍ଜନ ରାୟଙ୍କୁ ଭେଟିଥିଲୁ । ସେ କହିଛନ୍ତି, ‘ଶିଖାଙ୍କୁ ବୌଦ୍ଧ ଜିଲ୍ଲା ପ୍ରଶାସନ ପକ୍ଷରୁ ତିନି ହଜାର ଟଙ୍କା ସହାୟତା ପ୍ରଦାନ କରାଯାଇଯିବା ସହିତ ଆଗାମୀ ଦିନରେ ହଷ୍ଟେଲ ଓ ଅନ୍ୟାନ୍ୟ ସୁବିଧା କିଭଳି ଛାତ୍ରୀ ଜଣକ ଆବେଦନ ପରେ ପାଇପାରିବେ ସେଥିପାଇଁ ଚେଷ୍ଠା କରାଯିବ ।’
ଏହା ମଧ୍ୟ ପଢନ୍ତୁ: ମୁଣ୍ଡ ଗୁଞ୍ଜିବାକୁ ନାହିଁ ଛାତ, ଜରିପାଲ ତଳେ ବିତୁଛି ଚାରି ଜୀବନ
ଆଦିବାସୀ ଅଞ୍ଚଳର ଏହି ମେଧାବୀ ଛାତ୍ରୀ ଶିଖାଙ୍କୁ ସରକାରଙ୍କ ତରଫରୁ ସାହାଯ୍ୟ ସହଯୋଗ ଯୋଗାଇ ଦେଲେ ନିହାତି ସେ ଆଗକୁ ବଢିବେ । ଉଚ୍ଚ ଶିକ୍ଷା ଲାଭ କରିବେ ।
ଇଟିଭି ଭାରତ, ବୌଦ୍ଧ
