ଭୁବନେଶ୍ୱର: ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ଲିଙ୍ଗରାଜ ମନ୍ଦିର ଭିତର ଭିଡିଓ ପ୍ରସଙ୍ଗ । ତାଙ୍କ ସହ ଉପସ୍ଥିତ ଥିବା ସେବାୟତଙ୍କ ଅଡୁଆ ବଢିଛି । ସମ୍ପୃକ୍ତ ସେବାୟତଙ୍କୁ ମନ୍ଦିର ପ୍ରଶାସନର କାରଣ ଦର୍ଶାଅ ନୋଟିସ ଜାରି ହୋଇଛି ।
କାହିଁକି ତେଜିଲା ବିବାଦ?
ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀ ଲିଙ୍ଗରାଜ ମନ୍ଦିର ଭିତରେ ଥିବା ନିଷିଦ୍ଧାଞ୍ଚଳରେ ଫଟୋ ଓ ଭିଡିଓ ଉଠାଇବା ପ୍ରସଙ୍ଗକୁ ନେଇ ତେଜିଛି ବିବାଦ । ଅଭିନେତ୍ରୀଙ୍କ ସହ ଫଟୋ ଉଠାଇଥିବା ମନ୍ଦିର ସୁପରଭାଇଜର ରାଜକିଶୋର ମହାପାତ୍ରଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି । ନୋଟିସ ଜାରି କରିଛନ୍ତି ଅତିରିକ୍ତ ଜିଲ୍ଲାପାଳ । ଆଉ ସେବାୟତଙ୍କୁ ଏହାର ଉତ୍ତର ୭ ଦିନ ଭିତରେ ରଖିବାକୁ ନୋଟିସରେ ଉଲ୍ଲେଖ ରହିଛି । କେଉଁ ପରିସ୍ଥିତିରେ ଓ କାହା ଅନୁମତିରେ ସେ ଏହି ଫୋଟୋ ଉଠାଇଛନ୍ତି ତାର ଉତ୍ତର ରଖିବାକୁ ୭ ଦିନର ମହଲତ ଦିଆଯାଇଛି । ଏହାସହ "କାରଣ କ'ଣ ରହିଥିଲା କାହିଁକି ମନ୍ଦିରରେ ଅଭିନେତ୍ରୀ ଫଟୋ ଉଠାଇଲେ ତା ଉପରେ ତାର ମଧ୍ୟ ତଦନ୍ତ ହେବ" ବୋଲି କହିଛନ୍ତି ଅତିରିକ୍ତ ଜିଲ୍ଲାପାଳ । ଏପରିକି ଆଗକୁ କିଭଳି ଏପରି ଘଟଣା ନଘଟିବ ସେନେଇ ମନ୍ଦିର ପାଇଁ ଥିବା ନିୟମକୁ କଡାକଡି କରାଯିବ ।
ଏହା ବି ପଢନ୍ତୁ...ଲିଙ୍ଗରାଜ ମନ୍ଦିରରେ ଫଟୋ ଉଠାଇଲେ ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀ, ସୋସିଆଲ ମିଡିଆରେ ଭାଇରାଲ
ସେବାୟତଙ୍କୁ ଦାୟୀ କଲେ ସେବାୟତ:
ଅନ୍ୟପଟେ ସେବାୟତଙ୍କ ନାଁରେ ଲିଙ୍ଗରାଜ ପୋଲିସ ଷ୍ଟେସନରେ ଏକ ଷ୍ଟେସନ ଡାଇରୀ ପ୍ରଶାସନ ପକ୍ଷରୁ କରାଯାଇଛି । ଘଟଣାଟିକୁ ଅନ୍ୟ ସେବାୟତମାନେ ନିନ୍ଦା କରିବା ସହ ସମସ୍ତଙ୍କ ପାଇଁ ସମାନ ନିୟମ ବା କଟକଣା ହେବା ଦରକାର ବୋଲି କହିଛନ୍ତି । ଏନେଇ ପୂଜା ପଣ୍ଡା ନିଯୋଗର ସେବାୟତ ବିରଞ୍ଚି ପତି କହିଛନ୍ତି, "ଏଥିପାଇଁ ସେବାୟତ ହିଁ ଦାୟୀ । କାରଣ ଯେଉଁମାନେ ବି ଆସନ୍ତୁ ସେମାନଙ୍କୁ ମନ୍ଦିରର ନିୟମ ବିଷୟରେ ଜଣାଇବା ଆମର ଦାୟିତ୍ୱ । କିନ୍ତୁ ତାହା ଆମେ କରିନାହୁଁ। ଏହାସହ ପ୍ରଶାସନ ବି ଏଥିପାଇଁ ଉତ୍ତରଦାୟୀ । ମନ୍ଦିର ବେଢାରେ ଫଟୋ ଉଠାଇ ଭାଇରାଲ କରୁଛନ୍ତି ଯାହା ଉଚିତ ନୁହେଁ । ତେଣୁ ଏ ଦିଗରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ।"
ଇଟିଭି ଭାରତ, ଭୁବନେଶ୍ୱର
