ଭୁବନେଶ୍ବର: ରାଜ୍ୟରେ ବିପର୍ଯ୍ୟସ୍ତ ସ୍ବାସ୍ଥ୍ୟସେବାକୁ ନେଇ ରାଜ୍ୟ ସରକାରଙ୍କୁ ଘେରିଲା ବିଜେପି । ସରକାର ସ୍ବାସ୍ଥ୍ୟସେବା କ୍ଷେତ୍ରରେ ଓଡ଼ିଶା ନଂ 1 କହୁଥିବା ବେଳେ ସେଭଳି କିଛି ଆଖିଦୃଶିଆ କାମ ହୋଇନାହିଁ । ଜିଲ୍ଲାସ୍ତରୀୟ ମେଡିକାଲରେ ଗୁରୁତର ରୋଗୀମାନଙ୍କୁ ଭୁବନେଶ୍ଵର ରେଫର କରାଯାଉଛି । ମେଡିକାଲ କଲେଜରେ ଉପକରଣ ଆସୁଛି । କିନ୍ତୁ ସେଗୁଡିକ ବ୍ୟବହାର ନହୋଇ ପଡ଼ିରହିଛି । ରାଜ୍ୟ ସରକାରଙ୍କ ନିଷ୍କ୍ରିୟତା ପାଇଁ ଓଡ଼ିଶାର ଡାକ୍ତରମାନେ ଅନ୍ୟ ରାଜ୍ୟ ତଥା ଦେଶକୁ ଯାଇ ସ୍ୱାସ୍ଥ୍ୟସେବା ଯୋଗାଉଛନ୍ତି । ଦାଦନ ଶ୍ରମିକ ସମସ୍ୟା ଭଳି ରାଜ୍ୟରେ ହାଇଟେକ ଦାଦନ ଡାକ୍ତରଙ୍କ ସଂଖ୍ୟା ଓ ସମସ୍ୟା ବଢି ଚାଲିଛି ବୋଲି ଅଭିଯୋଗ କରିଛନ୍ତି ବିଜେପି ନେତା ଡାକ୍ତର ପ୍ରତାପ ପାଣି ।
ଶନିବାର ଏକ ସାମ୍ବାଦିକ ସମ୍ମିଳନୀରେ ବିଜେପି କହିଛି ଯେ, ଓଡ଼ିଶାର ସରକାରୀ ହସ୍ପିଟାଲଗୁଡିକର ସଠିକ୍ ପରିଚାଳନା କରାଯାଉନାହିଁ । ସ୍ୱାସ୍ଥ୍ୟସେବା କ୍ଷେତ୍ରରେ କିଛି ଆଖିଦୃଶିଆ କାମ ହୋଇନାହିଁ । ସରକାରୀ ଡାକ୍ତରଖାନାରେ ଡାକ୍ତର, ପାରାମେଡିକାଲ ଷ୍ଟାପ୍, ଟେକନିସିଆନ ଅଭାବ ରହିଛି ଏବଂ ଏହି ଅଭାବକୁ ଦୂର କରିବା ପାଇଁ ରାଜ୍ୟ ସରକାରଙ୍କ କୌଣସି ଆନ୍ତରିକତା ନାହିଁ । ଯେଉଁ ଡାକ୍ତରଖାନାରେ ମେଡିକାଲ ଯନ୍ତ୍ରାଂଶ ରହିଛି, ସେ ସ୍ଥାନରେ ଟେକ୍ନିସିଆନ କିମ୍ବା ଡାକ୍ତର ନାହାନ୍ତି । ରାଜ୍ୟରେ ୪୭ ହଜାର ଡାକ୍ତର ଆବଶ୍ୟକ ଥିବାବେଳେ ମାତ୍ର ୨୭ ହଜାର ଡାକ୍ତର ଅଛନ୍ତି ।
ରାଜ୍ୟର ସର୍ବବୃହତ ମେଡିକାଲ କଲେଜ କଟକ ସ୍ଥିତ ଏସ୍ସିବି ମେଡିକାଲ କଲେଜରେ ରୋଗୀମାନେ ପାନୀୟ ଜଳ ପାଇଁ ହାହାକାର ହେଉଛନ୍ତି । ରାଜ୍ୟର ବିପର୍ଯ୍ୟସ୍ତ ସ୍ୱାସ୍ଥ୍ୟସେବା ପାଇଁ ରୋଗୀଙ୍କ ସଂଖ୍ୟା ବଢୁଛି । ସରକାରଙ୍କ ଅପାରଗତା କାରଣରୁ ସ୍ୱାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡିଛି । ବିଏସକେୱାଇ କାର୍ଡରେ ଚେକ୍ ଆଣ୍ଡ ବାଲାନ୍ସ ନାହିଁ କି କିଛି ଅଡିଟ ନାହିଁ । ଓଡ଼ିଶା ବାହାରେ ରହୁଥିବା ପ୍ରବାସୀ ଓଡିଆଙ୍କ ପାଇଁ ବିଏସକେୱାଇ କାର୍ଡ କାମ କରୁନି । ସେହିପରି ଅନ୍ୟ ରାଜ୍ୟ ତୁଳନାରେ ଓଡିଶାରେ ମାତ୍ର ୧୩ଟି ମେଡିକାଲ କଲେଜ ରହିଛି ।
ଏହାପରେ ବି ମୁଖ୍ୟମନ୍ତ୍ରୀ କହୁଛନ୍ତି ସ୍ୱାସ୍ଥ୍ୟସେବା କ୍ଷେତ୍ରରେ ଓଡ଼ିଶା ବିଶ୍ୱର ନମ୍ବର ୱାନ । ତାହାଲେ ଉନ୍ନତମାନର ଚିକିତ୍ସା ଯୋଗାଇ ଦେବା ପାଇଁ ଜିଲ୍ଲାସ୍ତରୀୟ ମେଡିକାଲରୁ ଗୁରୁତର ରୋଗୀମାନଙ୍କୁ ଭୁବନେଶ୍ୱରକୁ କାହିଁକି ଏୟାରଲିପ୍ଟ କରାଯାଉଛି ବୋଲି ପ୍ରଶ୍ନ କରିଛି ବିଜେପି ।
ଇଟିଭି ଭାରତ, ଭୁବନେଶ୍ବର
