ଭୁବନେଶ୍ବର: ଓଡିଶାରେ ଦୀର୍ଘ 24 ବର୍ଷର ସ୍ଥିର ଏବଂ ଦୃଢ ସରକାରର ଅନ୍ତ ଘଟିଛି । ରାଜ୍ୟ ରାଜନୀତିରେ ଭାଙ୍ଗିଛି ବିଜେଡିର ଅଭେଦ୍ୟ ଦୁର୍ଗ । ଲୋକପ୍ରିୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଥମ ପରାଜୟର ସ୍ବାଦ ଚାଖିବା ସହିତ ‘ଅପରାଜେୟ’ ଟ୍ୟାଗ ହଟିଛି । ଦଳ ଗଠନର 27 ବର୍ଷ ପରେ ପ୍ରଥମ ଥର ପରାଜିତ ହୋଇଛି ବିଜେଡି, ପରାଜିତ ହୋଇଛନ୍ତି ମୁଖ୍ୟମନ୍ତ୍ରୀ ନବୀନ । ଆଉ 16 ବର୍ଷ ପୂର୍ବେ ମେଣ୍ଟ ସରକାରରେ ଓଡିଶା ଶାସନ ଭାର ସମ୍ଭାଳିଥିବା ଦଳ ବିଜେପି ପୁଣିଥରେ ଏକାକୀ ରାଜ୍ୟରେ ସରକାର କରିବାକୁ ଯାଉଛି ।
24 ମହାସଂଗ୍ରାମରେ ଏକାକୀ 78 ଆସନ ହାସଲ କରି ସରକାର ଗଠନ ପାଇଁ ମ୍ୟାଜିକ୍ ନମ୍ବର ପାର କରିଛି ବିଜେପି । ବିଧାନସଭା ପରି ମଧ୍ୟ ଲୋକସଭାରେ ଓଡିଶାର ସୁନାମୀ ଆସିଛି । 21 ଆସନରୁ 20 ଆସନ ପୋଛି ନେଇଛି ବିଜେପି । ତେବେ କିଭଳି ଅପ୍ରତ୍ୟାଶିତ ସଫଳତା ହାସଲ କଲା ବିଜେପି ?
କାମ ଦେଲା ଓଡ଼ିଆ ଅସ୍ମିତା ଫ୍ୟାକ୍ଟର: ନିର୍ବାଚନ ପ୍ରଚାର ସମୟରେ ମାସାଧିକ କାଳ ବିଜେପି ବିଜେଡି ବିରୋଧରେ ଜୋରଦାର କ୍ୟାମ୍ପେନିଂ କରିଥିଲା । ଏପରିକି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ପ୍ରଚାରରେ ବାରମ୍ବାର ଆସି ଓଡିଆ ଅସ୍ମିତା ପ୍ରସଙ୍ଗରେ ବିଜେଡିକୁ ଧୋଇଥିଲେ । ସେହିପରି ଗୃହମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ତୁଫାନୀ ଏବଂ ମାରାଥନ ପ୍ରଚାର କରିଥିଲେ । ଓଡିଆ ଅସ୍ମିତା, ଶ୍ରୀମନ୍ଦିର ପ୍ରସଙ୍ଗ, ଖଣି, ଚିଟଫଣ୍ଡ, ଦାଦନ ଭଳି ବିଭିନ୍ନ ପ୍ରସଙ୍ଗରେ ବିଜେଡିକୁ ଘେରିଥିଲେ । ତେବେ ମୋଦି ମେ' 6 ତାରିଖରେ ତାଙ୍କର ପ୍ରଥମ ନିର୍ବାଚନୀ ପ୍ରଚାରରେ ବ୍ରହ୍ମପୁରରେ କହିଥିଲେ, ଆସନ୍ତା ଜୁନ 10 ତାରିଖରେ ରାଜ୍ୟରେ ଜଣେ ଓଡିଆ ପୁଅ ମୁଖ୍ୟମନ୍ତ୍ରୀ ଭାବେ ଶପଥ ନେବେ ।
ଏଥର ବିଜେପି ଷ୍ଟ୍ରାଟେଜିରେ କ'ଣ ପରିବର୍ତ୍ତନ କରିଥିଲା:-
ଏଥର ବିଜେପି କ୍ୟାମ୍ପେନିଂରେ 2019ର ଭୁଲକୁ ଦୋହରାଇ ନଥିଲା । କାରଣ 2019ରେ ବିଜେପି ନବୀନଙ୍କୁ ସିଧାସଳଖ ଆକ୍ରମଣ କରି କୌଣସି ସଫଳତା ପାଇନଥିଲା । ମାତ୍ର 23ଟି ଆସନ ଜିତିବାରେ ସଫଳ ହୋଇଥିଲା । କିନ୍ତୁ ଏଥର ବିଜେପି ନବୀନଙ୍କ ବଦଳରେ ଟାର୍ଗେଟ କରିଥିଲା ପାଣ୍ଡିଆନଙ୍କୁ । ବିଜେପି ତାର ପୁରା କ୍ୟାମ୍ପେନିଂରେ ପାଣ୍ଡିଆନ ଏବଂ ତାମିଲ କାର୍ଡ ଖେଳିଥିଲା । ଲୋକଙ୍କ ମଧ୍ୟରେ ପାଣ୍ଡିଆନଙ୍କ ପ୍ରତି ଥିବା ବିରୋଧାଭାଷକୁ ବୁଝିବାରେ ସଫଳ ହୋଇଥିଲା ବିଜେପି । ପାଣ୍ଡିଆନଙ୍କୁ ଟାର୍ଗେଟ କରିବା ସହିତ ରତ୍ନଭଣ୍ଡାର ଚାବି ହଜିବା ପ୍ରସଙ୍ଗରେ ଜଣେ ବାହାର ଲୋକ ହାତ ଥିବା ସ୍ବର ଉଠାଇଥିଲା ବିଜେପି ।
ବିଜେଡିକୁ କେମିତି ଚେକମେଟ୍ ଦେଲା ବିଜେପି:-
ରାଜ୍ୟରେ ବିଜେଡିର ବର୍ଷ ବର୍ଷ ଧରି ନିରଙ୍କୁଶ କ୍ଷମତା ହାସଲ ପଛରେ କେବଳ ଗୋଟିଏ ଚେହେରା ନବୀନ ପଟ୍ଟନାୟକ । ନବୀନଙ୍କ ସ୍ବଚ୍ଛ ନିର୍ମଳ ଭାବମୂର୍ତ୍ତୀ ପାଇଁ ସୁଶାସନ ଟ୍ୟାଗ ହାତେଇଛି ବିଜେଡି ସରକାର । ତେବେ କୋଭିଡ ସମୟରେ ଏବଂ ପରବର୍ତ୍ତୀ ସମୟରେ ନବୀନ ନିବାସରେ ରାଜ୍ୟର କ୍ଷମତା କେନ୍ଦ୍ରୀଭୂତ ହୋଇଥିଲା । 6ଥର ପାଇଁ ମୁଖ୍ୟମନ୍ତ୍ରୀ ସ୍ବପ୍ନ ଦେଖିଥିବା ନବୀନ ପଟ୍ଟନାୟକ କେବଳ ଆଉ କେବଳ ନବୀନ ନିବାସରେ ଅଧିକ ସମୟ କାଟିଥିଲା ଏବଂ ଏହା ମଧ୍ୟକୁ ନେତା ମନ୍ତ୍ରୀ ତଥା ଜନସାଧାରଣଙ୍କ ପ୍ରବେଶ ଧିରେ ଧିରେ ବନ୍ଦ ହୋଇଥିଲା । ଯାହା ବିଜେଡି ବିରୋଧରେ ଜନ ଅସନ୍ତୋଷକୁ ପୁଞ୍ଜିଭୂତ କରିଥିଲା । ଏହାର ଫାଇଦା ଉଠାଇଥିଲା ବିଜେପି । ଏହାକୁ ପ୍ରସଙ୍ଗ କରିବା ସହିତ ନବୀନଙ୍କ ସ୍ବାସ୍ଥ୍ୟାବସ୍ଥା ପ୍ରସଙ୍ଗ ମଧ୍ୟ ଉଠାଇଥିଲା ।
