ଭବାନୀପାଟଣା: ପାଖେଇ ଆସୁଛି ଲୋକସଭା ଓ ବିଧାନସଭା ନିର୍ବାଚନ ତାରିଖ । ସରଗରମ ପ୍ରଚାର ମଇଦାନ । ଭୋଟ ହାତେଇବାକୁ ଭୋଟରଙ୍କ ପାଖରେ ପହଞ୍ଚୁଛନ୍ତି ପ୍ରାର୍ଥୀ । ଏହି କ୍ରମରେ କଳାହାଣ୍ଡି ଜିଲ୍ଲାରେ ବିଜେଡି, ବିଜେପି ଓ କଂଗ୍ରେସ ପ୍ରାର୍ଥୀ ପ୍ରଚାରକୁ ଜୋରଦାର କରିଛନ୍ତି । ନିଜ ନିଜ ଦଳୀୟ କର୍ମୀଙ୍କୁ ନେଇ ରାଜନୀତି ମଇଦାନରେ ଦମ ଦେଖାଉଛନ୍ତି ନେତା । ଏହି ଲୋକସଭା କ୍ଷେତ୍ରରେ ସମୁଦାୟ ୧୭ ଲକ୍ଷ ୩୦ହଜାର ୧୯୩ ଜଣ ଭୋଟର ରହିଥିବା ବେଳେ ଭୋଟରଙ୍କୁ ଆକୃଷ୍ଟ କରିବା ପାଇଁ ଲାଗି ପଡିଛନ୍ତି ନେତା ।
ପ୍ରଚାରରେ ସବୁଠି ଆଗରେ ରହିଛି ବିଜେଡି । ବିଜେଡି ଲୋକସଭା ପ୍ରାର୍ଥୀ ଲମ୍ବୋଦର ନିଆଲ ନିଜ ସମର୍ଥକମାନଙ୍କୁ ନେଇ ନିର୍ବାଚନ ମାନଙ୍କୁ ଯାଇ ନବୀନ ପଟ୍ଟନାୟକଙ୍କ ସ୍ୱଚ୍ଛ ଭାବ ମୂର୍ତ୍ତି ଓ ବିଭିନ୍ନ ବିକାଶ ମୂଳକ ଯୋଜନାର ବାର୍ତ୍ତା ଦେଇ ଭୋଟରଙ୍କୁ ଆକୃଷ୍ଟ କରୁଛନ୍ତି । ବାଇକ୍ ଶୋଭାଯାତ୍ରାରେ କର୍ମୀଙ୍କୁ ନେଇ ନିଜର ଶକ୍ତି ପ୍ରଦର୍ଶନ କରିବାରେ ଲାଗି ପଡିଛନ୍ତି । ସେପଟେ ଏହି ଲୋକସଭା ଆସନରେ ଆଦିବାସୀ କାର୍ଡ ଖେଳିଛି ଜାତୀୟ କଂଗ୍ରେସ । ଆଦିବାସୀ ନେତ୍ରୀ ଦ୍ରୋପଦୀ ମାଝୀଙ୍କୁ ନେଇ କଂଗ୍ରେସ ନେତା ଭକ୍ତ ଦାସ ବିଶାଳ ଶୋଭାଯାତ୍ରା ମାଧ୍ୟମରେ ଶକ୍ତି ପ୍ରଦର୍ଶନ କରିଥିବା ବେଳେ କଂଗ୍ରେସର ନିର୍ବାଚନ ଇସ୍ତିହାର ଓ ମହିଳା ନିର୍ଯାତନା, କୃଷି ସମସ୍ୟା ଭଳି ଅନେକ ମୁଦ୍ଦାକୁ ନେଇ ପ୍ରାର୍ଥୀ ଲୋକଙ୍କ ନିକଟକୁ ଯାଉଥିବା ଦେଖିବାକୁ ମିଳିଛି ।
ବିଜେପି ମଧ୍ୟ ପ୍ରଚାରରେ ନିଜର ଦମ୍ ଦେଖାଇଛି । ହଜାର ହଜାର କର୍ମୀଙ୍କୁ ନେଇ ବିଜେପି ଲୋକସଭା ପ୍ରାର୍ଥୀ ମାଲବିକା କେଶରୀ ଦେଓ ଏବଂ ଭବାନୀପାଟଣା ବିଧାୟକ ପ୍ରାର୍ଥୀ ପ୍ରଦୀପ୍ତ ନାଏକ ଭବାନୀପାଟଣା ସହର ସମେତ କେସିଙ୍ଗାରେ ବିଶାଳ ଶୋଭାଯାତ୍ରା କରିଥିଲେ । କର୍ମୀଙ୍କୁ ନେଇ ଏବେ ଗଳି କନ୍ଧିରେ ନେତାଙ୍କ ବୈଠକ ଚାଲୁଛି । ହେଲେ ରାଜନୀତି ସମୀକରଣକୁ ଅନୁମାନ କଲେ କଂଗ୍ରେସ ଆଦିବାସୀ ମହିଳାଙ୍କୁ ସାଂସଦ ପ୍ରାର୍ଥୀ କରିଥିବା ବେଳେ କଳାହାଣ୍ଡି ଲୋକସଭା କ୍ଷେତ୍ରରେ ୪ ଲକ୍ଷରୁ ଊର୍ଦ୍ଧ୍ବ ଆଦିବାସୀ ଭୋଟର ରହିଛନ୍ତି । ଯାହା କଂଗ୍ରେସ ପାଇଁ ଆଶା ସଞ୍ଚାର ହୋଇଛି ।
ଇଟିଭି ଭାରତ, କଳାହାଣ୍ଡି
