ଭୁବନେଶ୍ବର: ବାଂଲାଦେଶୀ ସନ୍ଦେହରେ ଦେଶର ନାଗରିକଙ୍କୁ ରାଜ୍ୟର ବିଭିନ୍ନ ସ୍ଥାନରେ ଆକ୍ରମଣ ହେଉଥିବା ଦେଖିବାକୁ ମିଳୁଛି । ଯାହାର ପ୍ରଭାବ ରାଜ୍ୟ ବାହାରେ ରହୁଥିବା ଓଡ଼ିଆଙ୍କ ଉପରେ ପଡୁଛି । ଏହି ଘଟଣାକୁ ନେଇ ଉଦବେଗ ପ୍ରକାଶ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ନବୀନଙ୍କ ଉଦବେଗ:
ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ୍ସରେ ପୋଷ୍ଟ କରି ଲେଖିଛନ୍ତି, "ଶାନ୍ତିପ୍ରିୟ ରାଜ୍ୟ ଭାବେ ଓଡ଼ିଶାର ଖ୍ୟାତି ରହିଛି । ଓଡିଶାରେ ଲୋକଙ୍କ ମଧ୍ୟରେ ସାମ୍ପ୍ରଦାୟିକ ସୌହାର୍ଦ୍ଦ୍ୟ, ଶାନ୍ତି ଓ ସହଭାଗିତା ଯୁଗ ଯୁଗ ଧରି ରହି ଆସିଛି । ଏବେ ରାଜ୍ୟର ବିଭିନ୍ନ ପ୍ରାନ୍ତରେ ସାମାଜିକ ବିଶୃଙ୍ଖଳା ଘଟୁଥିବାର ଖବର ଆସୁଛି । ଏହା ଚିନ୍ତାର ବିଷୟ । ଏନେଇ ଅନେକ ଗୋଷ୍ଠୀ ଓ ପୀଡ଼ିତ ନାଗରିକ ମୋତେ ଭେଟୁଛନ୍ତି । ସେମାନଙ୍କ ଦୁଃଖ ଜଣାଉଛନ୍ତି । ଆକ୍ରମଣ ଓ ବିଦ୍ବେଷର ଶିକାର ହେଉଥିବା ଦୁଃଖର କଥା । ଓଡ଼ିଶାର ଭାବମୂର୍ତ୍ତି ତଥା ଗାରିମା ରକ୍ଷା କରନ୍ତୁ । ମୁଁ ସମସ୍ତ ସମ୍ପ୍ରଦାୟକୁ ନିବେଦନ କରୁଛି । ଏକ ଶାନ୍ତିପୂର୍ଣ୍ଣ ରାଜ୍ୟ ଭାବେ ଧନ, ଜୀବନର ସୁରକ୍ଷା ସହ ଆଇନଶୃଙ୍ଖଳା ବଜାୟ ରଖିବା ଦିଗରେ କାମ କରନ୍ତୁ ।"
ଏକ ଶାନ୍ତିପ୍ରିୟ ରାଜ୍ୟ ଭାବେ ଓଡ଼ିଶାର ଖ୍ୟାତି ରହିଛି। ଏହା ଏପରି ଏକ ରାଜ୍ୟ ଯେଉଁଠି ଲୋକଙ୍କ ମଧ୍ୟରେ ସାମ୍ପ୍ରଦାୟିକ ସୌହାର୍ଦ୍ଦ୍ୟ, ଶାନ୍ତି ଓ ସହଭାଗିତା ଯୁଗ ଯୁଗ ଧରି ରହି ଆସିଛି। କିନ୍ତୁ ଚିନ୍ତାର ବିଷୟ ଯେ ଏବେ ରାଜ୍ୟର ବିଭିନ୍ନ ପ୍ରାନ୍ତରେ ସାମାଜିକ ବିଶୃଙ୍ଖଳା ଘଟୁଥିବାର ଖବର ଆସୁଛି। ଅନେକ ଗୋଷ୍ଠୀ ଓ ପୀଡ଼ିତ ନାଗରିକ ମୋତେ…
— Naveen Patnaik (@Naveen_Odisha) August 13, 2024
'ଯେଉଁଠି ଶାନ୍ତି ଥାଏ, ସେଠାରେ ପ୍ରଗତି ହୁଏ'
ନବୀନ ଆହୁରି ଲେଖିଛନ୍ତି, "ଏକ ସଦଭାବପୂର୍ଣ୍ଣ ରାଜ୍ୟ ଭାବରେ ଓଡ଼ିଶାର ପ୍ରତିଛବି ରହିଛି । ଯାହା ରାଜ୍ୟକୁ ନିବେଶକଙ୍କୁ ଆକୃଷ୍ଟ କରିଛି । ରାଜ୍ୟର ଆର୍ଥିକ ଭିତ୍ତିଭୂମି ସୁଦୃଢ଼ ହୋଇଛି । ଓଡି଼ଶା ୬୦ ପ୍ରତିଶତରୁ ଅଧିକ ଲୋକଙ୍କୁ ଦାରିଦ୍ର୍ୟରୁ ମୁକ୍ତ ହୋଇଛି । ଏହା ଆମ ଲାଗି ଖୁସିର କଥା । ରାଜ୍ୟର ସବୁ ବର୍ଗର ଲୋକଙ୍କ ସୁରକ୍ଷା ପାଇଁ ଯଥା ସମ୍ଭବ ସମସ୍ତ ପ୍ରକାରର ପଦକ୍ଷେପ ନିଅନ୍ତୁ । ଏଥିପାଇଁ ମୁଁ ରାଜ୍ୟ ସରକାର ଏବଂ ସମସ୍ତ ସରକାରୀ ଅଧିକାରୀଙ୍କୁ ଅନୁରୋଧ କରୁଛି । ଶାନ୍ତି ଏବଂ ସୌହାର୍ଦ୍ଦ୍ୟ ଏକ ପ୍ରଗତିଶୀଳ ସମାଜର ମୂଳଭିତ୍ତି । ଯେଉଁଠି ଶାନ୍ତି ଥାଏ, ସେଇଠି ହିଁ ପ୍ରଗତି ସମ୍ଭବ ହୁଏ।"
ତଦନ୍ତ ଦାବି କଲେ ବିଜେଡି ବିଧାୟକ:
ବିଜେଡି ବିଧାୟକ ଗଣେଶ୍ୱର ବେହେରା କହିଛନ୍ତି, "ଯେଉଁ ସରକାର ସମୟରେ ଏହି ଘଟଣା ଘଟିବା ଏକ ବ୍ୟଥା ଦାୟକ କଥା। ପ୍ରତ୍ୟେକ ବ୍ୟକ୍ତି ଏନେଇ ଉଦବେଗ ପ୍ରକାଶ କରିବା ସ୍ୱାଭାବିକ କଥା । ବିଜେଡି ସଭାପତି ମଧ୍ୟ ଏନେଇ ଉଦବେଗ ପ୍ରକାଶ କରିଛନ୍ତି । ସରକାର ଏଥିପ୍ରତି ଟିକେ ଅଧିକ ସଚେତନ ହୁଅନ୍ତୁ । ଆବଶ୍ୟକୀୟ କାର୍ଯ୍ୟାନୁଷ୍ଠାନ ଅବିଳମ୍ବେ ନିଅନ୍ତୁ । ସାମାଜିକ ଗଣମାଧ୍ୟମରେ ଯାହା ସବୁ ଆସୁଛି, ସବୁ କଥା ସତ୍ୟ ଉପରେ ଆଧାରିତ ନୁହେଁ । କିନ୍ତୁ ଏହାକୁ ଅସତ୍ୟ କହି ଏଡାଇ ଯିବା ମଧ୍ୟ ବିଜ୍ଞତାର ପରିଚାୟକ ନୁହେଁ । ସମସ୍ତ ଘଟଣାର ପୃଥକ ପୃଥକ ତଦନ୍ତ ହେଉ । ତଦନ୍ତ ଅନୁସାରେ କାର୍ଯ୍ୟାନୁଷ୍ଠାନ ହେଉ ।"
ଇଟିଭି ଭାରତ, ଭୁବନେଶ୍ବର
