ପୁରୀ/ଭୁବନଶ୍ୱର: ଆସନ୍ତା ୯ ତାରିଖରେ ଆମେରିକାର ହ୍ୟୁଷ୍ଟନ ସହରରେ ରଥଯାତ୍ରା ଆୟୋଜନ କରିବ ଆମେରିକାର ଇସ୍କନ ଅନୁଷ୍ଠାନ । ଅଦିନିଆ ରଥଯାତ୍ରାକୁ ଏବେ ସବୁ ମହଲରେ ବିରୋଧ ପରେ ଏହା ବେଶ ଚର୍ଚ୍ଚାର ବିଷୟ ହେଇଛି । ଅଦିନିଆ ରଥଯାତ୍ରାକୁ ବନ୍ଦ ପାଇଁ ଭକ୍ତ, ସେବାୟତ ଅନୁରୋଧ କରିଥିବାବେଳେ ଇସ୍କନ କର୍ତ୍ତୃପକ୍ଷଙ୍କୁ ଚିଠି ଲେଖିଛନ୍ତି ଗଜପତି । ସେପଟେ ଇସ୍କନର ଅଦିନିଆ ରଥଯାତ୍ରା ଓ ସ୍ନାନଯାତ୍ରା ଘଟଣାକୁ ନିନ୍ଦା କରିଛନ୍ତି ଜଗତଗୁରୁ ଶଙ୍କରାଚାର୍ଯ୍ୟ ।
ଅଦିନରେ ରଥଯାତ୍ରାକୁ ଶଙ୍କରାଚାର୍ଯ୍ୟଙ୍କ ନିନ୍ଦା:
ମହାପ୍ରଭୁ ଜଗନ୍ନାଥଙ୍କ ରଥଯାତ୍ରା ଆଷାଢ ଶୁକ୍ଲପକ୍ଷ ଦ୍ବିତୀୟ ତିଥିରେ ଅନୁଷ୍ଠିତ ହୋଇଥାଏ । ଆମେରିକାରେ ଇସ୍କନ ନଭେମ୍ବର ୩ରେ ସ୍ନାନଯାତ୍ରା ଓ ୯ରେ ରଥଯାତ୍ରା ଆୟୋଜନ କରିବାକୁ ଯାଉଛି । ଇସ୍କନର ଏହି ଅଦିନିଆ ରଥଯାତ୍ରା ଓ ସ୍ନାନଯାତ୍ରା ଘଟଣାକୁ ନିନ୍ଦା କରିଛନ୍ତି ଜଗତଗୁରୁ ଶଙ୍କରାଚାର୍ଯ୍ୟ ସ୍ଵାମୀ ନିଶ୍ଚଳାନନ୍ଦ ସରସ୍ଵତୀ । ସ୍ଵାମୀ ନିଶ୍ଚଳାନନ୍ଦ ସରସ୍ଵତୀ କହିଛନ୍ତି, "ବିଧି ଅନୁଯାୟୀ ସବୁ କାର୍ଯ୍ୟ କରାଗଲେ ସବୁ କାର୍ଯ୍ୟ ସଫଳ ହୋଇଥାଏ । ତାହା ଶାସ୍ତ୍ରରେ ଉଲ୍ଲେଖ ରହିଛି । ଏହାକୁ ଉଲଘଂନ କରାଗଲେ ସବୁ କାର୍ଯ୍ୟ ବିଫଳ ହେଇଥାଏ । କେବଳ ନିଜର ଖ୍ୟାତି, ପ୍ରଚାର ପ୍ରସାର ପାଇଁ ଇସ୍କନ ଯେଉଁ ଭଳି ବିଧି ବ୍ୟବସ୍ଥା ନମାନି ମହାପ୍ରଭୁଙ୍କ ରଥଯାତ୍ରା ଆୟୋଜନ କରୁଛି ତାହା ଠିକ୍ ନୁହେଁ । ଯେଉଁମାନେ ମହାପ୍ରଭୁଙ୍କୁ ଭକ୍ତି କରନ୍ତି ସେମାନେ ମହାପ୍ରଭୁଙ୍କ ସବୁ ବିଧି ବ୍ୟବସ୍ଥା ମାନିବା ଉଚିତ ।"
ସେପଟେ ଶ୍ରୀମନ୍ଦିର ବରିଷ୍ଠ ସେବାୟତ ମାଧବ ପୂଜାପଣ୍ଡା କହିଛନ୍ତି, "ପୂର୍ବରୁ ମଧ୍ୟ ଇସ୍କନର ଅଦିନିଆ ରଥଯାତ୍ରାକୁ ନେଇ ବହୁ ଆପତ୍ତି ଉଠିଛି । ଶ୍ରୀମନ୍ଦିର ପରିଚାଳନା କମିଟି ଓ ଛତିଶା ନିଯୋଗ ବୈଠକରେ ଏନେଇ ପୂର୍ବରୁ ଅଲୋଚୋନା ସହ ଉଦ୍ବେଗ ପ୍ରକାଶ ପାଇଛି । ଏହାକୁ ରୋକିବାକୁ ହେଲେ କେବଳ କାଗଜ କଲମରେ ସୀମିତ ରହିଲେ ହେବନାହିଁ । ଏନେଇ ଶ୍ରୀମନ୍ଦିର ପ୍ରଶାସନ ଓ ରାଜ୍ୟ ସରକାରଙ୍କ ପକ୍ଷରୁ ପଦକ୍ଷେପ ନିଆଯିବ ଉଚିତ । ରାଜ୍ୟ ସରକାର ଇସ୍କନ ଅନୁଷ୍ଠାନକୁ ଏନେଇ ଅବଗତ କରିବା ଉଚିତ । ଗତ ୨୦୨୦ରେ କରୋନାରେ ଯେତେବେଳେ ମହାପ୍ରଭୁଙ୍କ ରଥଯାତ୍ରା ହୋଇଥଲା ସେତେବେଳେ ବଡଦାଣ୍ଡରେ ଘର ଥିବା ଲୋକମାନେ ମଧ୍ୟ ମହାପ୍ରଭୁଙ୍କୁ ଦର୍ଶନ କରିନଥିଲେ । ସରକାରଙ୍କ ଗାଇଡଲାଇନକୁ କଡ଼ାକଡ଼ି ପାଳନ କରିଥିଲେ । ଏହା ତ୍ୟାଗ ଓ ଭକ୍ତି ଥିଲା । ଯଦି ଆମେ ମହାପ୍ରଭୁଙ୍କୁ ଭକ୍ତି କରୁଛେ, ତେବେ ଅଦିନିଆ ରଥଯାତ୍ରା ଅୟୋଜନ ଠିକ ନୁହେଁ । ଏହାଦ୍ବାରା ଜଣାପଡୁଛି ମହାପ୍ରଭୁଙ୍କ ପ୍ରତି ଇସ୍କନର ଭକ୍ତି ନାହିଁ । ଶ୍ରୀମନ୍ଦିର ପ୍ରଶାସନ ଓ ରାଜ୍ୟ ସରକାରଙ୍କ ପକ୍ଷରୁ ଇସ୍କନକୁ ଏହା ଅବଗତ କରାଇବା ଉଚିତ୍ । ସେହିପରି କେଉଁ ତିଥିରେ ମହାପ୍ରଭୁଙ୍କ କିଭଳି ପର୍ବ ପର୍ବାଣୀ ପାଳନ କରିହେବ ପ୍ରଶାସନ ପକ୍ଷରୁ ଏକ ସୂଚନା ଇସ୍କନକୁ ଦିଆଯିବ ଉଚିତ ।"
| ଏହା ମଧ୍ୟ ପଢ଼ନ୍ତୁ...ଶ୍ରୀମନ୍ଦିର ସମ୍ମୁଖରେ ସୂଚନା କେନ୍ଦ୍ର ନିର୍ମାଣକୁ ଜୋରଦାର ବିରୋଧ, ମୁଖ୍ୟ ପ୍ରଶାସକଙ୍କୁ ଦାବିପତ୍ର ପ୍ରଦାନ, ସିଂହଦ୍ଵାରର ହେବ ସୋନ୍ଦର୍ଯ୍ୟ ହାନି - information center controversy |
'ମହାପ୍ରଭୁଙ୍କ କୌଣସି ରୀତିନୀତି ଅଲଗା ଭାବରେ ହେବନାହିଁ'
ଅନ୍ୟପଟେ ଇସ୍କନ ମନ୍ଦିରର ଅଦିନିଆ ରଥଯାତ୍ରା ପାଳନ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ସେ କହିଛନ୍ତି, "ପୂର୍ବରୁ ମଧ୍ୟ ଏଭଳି ସ୍ଥିତି ଉପୁଜିଥିଲା । ମନ୍ଦିର ଏବଂ ସରକାରଙ୍କ ପକ୍ଷରୁ ଏଭଳି ଆୟୋଜନ କରିବା ପାଇଁ ବାରଣ କରାଯାଇଛି । ମହାପ୍ରଭୁଙ୍କ ରୀତିନୀତି ଯାନିଯାତ୍ରା ପର୍ବ ଆଦି ସବୁ ଗୁଡ଼ିକ ଏକ ନିର୍ଦ୍ଧାରିତ ସମୟରେ ନୀତି ଅନୁଯାୟୀ ହୁଏ । ଅତୀତରେ ସେମାନଙ୍କୁ ମନ୍ଦିର ପ୍ରଶାସନ ପକ୍ଷରୁ ଜଣାଇ ଦିଆଯାଇଥିଲା । ୨୦୨୨ ମସିହାରେ ମାୟାପୁରୀ ସ୍ଥିତ ଇସ୍କନ ମୁଖ୍ୟାଳୟ ପକ୍ଷରୁ ଏଯାବତ ସେମାନେ ସମସ୍ତ ଇସ୍କନ ମନ୍ଦିରକୁ ଏକ ମାର୍ଗଦର୍ଶକା ମଧ୍ୟ ଜାରି କରିଛନ୍ତି । ସେଥିରେ କୁହାଯାଇଛି, ବିଶ୍ଵର ସବୁ ଇସ୍କନ ମନ୍ଦିରରେ ଯେଉଁଠି ଜଗନ୍ନାଥ ପୂଜା ପାଉଛନ୍ତି ସେଠାରେ ମହାପ୍ରଭୁଙ୍କ କୌଣସି ରୀତିନୀତି ଅଲଗା ଭାବରେ ହେବନାହିଁ । ପୁରୀ ମନ୍ଦିର ରୀତିନୀତି ତାରିଖ ଏବଂ ବିଦ୍ଧି ଅନୁଯାୟୀ ହେବ ବୋଲି କହିଛନ୍ତି । ଅଦିନରେ କୌଣସି ରୀତିନୀତି ହୋଇପାରିବ ନାହିଁ ବୋଲି ଆଡଭାଇଜରୀ ଜାରି କରିଥିଲେ ।"
ଆଇନ ମନ୍ତ୍ରୀ ଆହୁରି ମଧ୍ୟ କହିଛନ୍ତି, "ଏବେ ଯେଉଁ ରଥଯାତ୍ରା ଆୟୋଜନ ହେଇଛି ସେ ବାବଦରେ ସେ ତର୍ଜମା କରାଯିବ । ଗଜପତି ମହାରାଜା ମଧ୍ୟ ଏ ବାବଦରେ ବିସ୍ତୃତ ଭାବେ ତାଙ୍କ ଚିଠିରେ ଉଲ୍ଲେଖ କରିଛନ୍ତି । ଆମେ ଆଶା କରୁଛୁ ଇସ୍କନ ତରଫରୁ ଏ ପ୍ରସଙ୍ଗକୁ ଗୁରୁତ୍ବ ସହ ନେଇ ଯେଉଁ ସ୍ନାନଯାତ୍ରା ଓ ରଥଯାତ୍ରା ହେବାକୁ ଯାଉଛି, ଏକଥାକୁ ବନ୍ଦ କରିବା ପାଇଁ ଯଥାରୀତି ନିର୍ଦ୍ଦେଶ ଦେବେ । ମହାପ୍ରଭୁଙ୍କ କୌଣସି ରୀତିନୀତି ସଂକେତ ଭାବେ ବିଚ୍ୟୁତି ନହେଉ ସେ କଥାକୁ ସରକାର ଗୁରୁତ୍ବ ଦେଉଛନ୍ତି ।"
ଇଟିଭି ଭାରତ, ପୁରୀ/ଭୁବନେଶ୍ବର
