ଭଦ୍ରକ: ପୁଣି ସାମ୍ନାକୁ ଆସିଲା ନାବାଳିକା ଦୁଷ୍କର୍ମ ମାମଲା । କାମନାବାସନା ଚରିତାର୍ଥ କରିବାକୁ ସୀମା ଟପିଲା ବୃଦ୍ଧ ବ୍ୟକ୍ତି । 13 ବର୍ଷର ନାବାଳିକାଙ୍କୁ ଦୁଷ୍କର୍ମ କରିଥିବା ଅଭିଯୋଗରେ ଜଣେ 63 ବର୍ଷୀୟ ବୃଦ୍ଧ ଗିରଫ । ଏଭଳି ଏକ ଲଜ୍ଜାଜନକ ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ତିହିଡି ଥାନା ଅଞ୍ଚଳରେ । ଯାହା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁଯାୟୀ, ଭଦ୍ରକ ତିହିଡି ଥାନା ଅଞ୍ଚଳର କାଳନ୍ଦି ପଶୁପାଳକ ନାମକ ଜନୈକ 63 ବର୍ଷୀୟ ବୃଦ୍ଧ ଜଣେ 13 ବର୍ଷର ନାବାଳିକାଙ୍କୁ ଦୁଇ ମାସ ହେଲା ବିଭିନ୍ନ ପ୍ରକାରର ଲୋଭ ଦେଖାଇ ଅସଦାଚରଣ ଉଦ୍ୟମ କରି ଆସୁଥିଲା । ଘଟଣା ଦିନ କାମାତୁର ବୃଦ୍ଧ ଜଣଙ୍କ ନାବାଳିକାକୁ ଚକୋଲେଟ୍ ଦେବାକୁ ପ୍ରଲୋଭନ ଦେଖାଇ ଗାଁରେ ଥିବା ପମ୍ପ ହାଉସ ନିକଟକୁ ନେଇ ତାଙ୍କ ସହ ଅସଦାଚରଣ ଉଦ୍ୟମ କରିଥିଲା । ଯାହକୁ ନେଇ ନାବାଳିକା ଜଣକ ପରିବାର ଲୋକଙ୍କୁ ଘଟଣା ବିଷୟରେ ଜଣାଇଥିଲେ । ପରେ ଏନେଇ ନାବାଳିକାଙ୍କ ପରିବାର ଲୋକ ତିହିଡ଼ି ଥାନାରେ ଏକ ଲିଖିତ ଅଭିଯୋଗ କରିଥିଲେ ।
ସେପଟେ ନାବାଳିକାର ବାପାଙ୍କ ଅଭିଯୋଗକୁ ଭର୍ତ୍ତି କରି ତିହିଡ଼ି ପୋଲିସ ପକ୍ଷରୁ ଥାନାରେ 80/24 ନମ୍ବରରେ ଦଫା 376 (3), 386 (2) (N), 506 ଏବଂ 6 ପୋସ୍କୋ ଆକ୍ଟରେ ଏକ ମାମଲା ରୁଜୁ ହୋଇଥିଲା । ଅଭିଯୋଗ ହେବା ପରେ ପୋଲିସ ପକ୍ଷରୁ ଖୋଳତାଡ ଆରମ୍ଭ ହୋଇଥିଲା । ବିଭିନ୍ନ ଦିଗ ଉପରେ ତୀକ୍ଷ୍ଣ ଭାବେ ଛାନଭିନ କରିବା ପରେ ଶେଷରେ ନାବାଳିକାଙ୍କୁ ଦୁଷ୍କର୍ମ କରିଥିବା ଅଭିଯୋଗ ନେଇ ତଥ୍ୟ ଏବଂ ପ୍ରମାଣ ଆଧାରାରେ ଅଭିଯୁକ୍ତ ବୃଦ୍ଧକୁ ଗିରଫ କରିଥିଲା ପୋଲିସ ।
ଅଭିଯୁକ୍ତ ବୃଦ୍ଧଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ତେବେ କୋର୍ଟରେ ଜାମିନ ଆବେଦନ ନାମଞ୍ଜୁର ହେବାରୁ ବୃଦ୍ଧ କାଳନ୍ଦିକୁ ଗତକାଲି (ଶୁକ୍ରବାର) ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ଅନ୍ୟ ପକ୍ଷରେ ଏନେଇ ପୋଲିସ ପକ୍ଷରୁ ଗଣମାଧ୍ୟମକୁ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ । ଏହି ଘଟଣାଟି ସ୍ଥାନୀୟ ଅଞ୍ଚଳରେ ସଂପ୍ରତି ଏକ ଚର୍ଚ୍ଚାର ବିଷୟ ପାଲଟିଛି ।
ଇଟିଭି ଭାରତ, ଭଦ୍ରକ
