ଭୁବନେଶ୍ବର: ଜଙ୍ଗଲ ନିଆଁ ଲିଭାଇବ ଏ.ଟି.ଭି । ଦୁର୍ଗମ ଅଞ୍ଚଳରେ ପହଞ୍ଚିବା ସହ ଲିଭାଇବ ନିଆଁ । ଏକା ସଙ୍ଗରେ ୧୮ଟି ଜିଲ୍ଲାକୁ ଦିଆଗଲା ୧୩୯ ଟି ଅତ୍ୟାଧୁନିକ ଗାଡ଼ି । ବନ୍ୟଜନ୍ତୁ ଉଦ୍ଧାର ସହ ନିଆଁ ଲିଭାଇବା ପର୍ଯ୍ୟନ୍ତ ସବୁ କାମରେ ଲାଗିବ ଏହି ଗାଡ଼ି । ଗତକାଲି (ଶୁକ୍ରବାର) ରାଜ୍ୟ ଉଦ୍ଭିଦ ଉଦ୍ୟାନରେ ପ୍ରଥମ କରି ସରକାରଙ୍କ ନିଷ୍ପତି ଓ ଏସ.ଆର.ସି. ଙ୍କ ତତ୍ତ୍ଵାବଧାନରେ ଉନ୍ନତ ଗତିଶୀଳତା ନିଶ୍ଚିତ କରିବା, ପ୍ରତିକ୍ରିୟା ସମୟ କମ୍ କରିବା, ପ୍ରାକୃତିକ ବିପଦକୁ କମ୍ କରିବା ଏବଂ ଗୁପ୍ତ କାର୍ଯ୍ୟକଳାପକୁ ରୋକିବା ପାଇଁ ସ୍ବତନ୍ତ୍ର ଭାବେ ଏହି ଭେଇକିଲ ଦିଆଯାଇଛି ।
କାହା ପାଇଁ କେଉଁ ଭେଇକିଲ:
୧୩୯ ଟି ଅତ୍ୟାଧୁନିକ ଗାଡ଼ି ମଧ୍ୟରୁ ଆଇସି କଷ୍ଟୋମାଇଜଡ୍ ହୋଇଥିବା ୫୧ ଟି ଅଲ-ଟେରେନ୍ ମୋଟର ଯାନ (ଏଟିଭି) ରହିଛି । ଏହି ଗାଡି ଜଙ୍ଗଲର ପ୍ରତିଟି ସ୍ଥାନକୁ ଯିବାକୁ କ୍ଷମତା ରିଖିଛି । କୌଣସିବି ସ୍ଥାନକୁ ଯାଇ ଏହା ପାଟ୍ରୋଲିଂ କରିବାର କ୍ଷମତା ରଖିଛି । କଷ୍ଟମାଇଜଡ୍ ସ୍ପ୍ରିଙ୍କଲର ସିଷ୍ଟମ୍ ସହିତ ୪୧ଟି ଅଗ୍ନି ନିର୍ବାପକ ୟୁନିଟ୍ ଏବଂ ୪୭ ଟି ଅଗ୍ନି ନିରାକରଣ ସହାୟତା ୟୁନିଟ୍ ଆଦି ୧୮ଟି ଜିଲ୍ଲାକୁ ଯୋଗାଇ ଦିଆଯାଇଛି । ଏହି ଗାଡି ଜଙ୍ଗଲରେ ଅଗ୍ନିକାଣ୍ଡକୁ ରୋକିବ । ଯାହାକି ଡିଏଫଓଙ୍କ ତଦାରଖରେ ରହିବ । ଜଙ୍ଗଲରେ ଅଧିକ ମାତ୍ରାରେ ପଇଁନ୍ତରା, ପର୍ଯ୍ୟଲୋଚନା ଏବଂ ନୀରିକ୍ଷଣ ସୁନିଶ୍ଚିତ କରିବା ପାଇଁ ଏଟିଭି ଗୁଡିକ ନିର୍ଦ୍ଦିଷ୍ଟ ଭାବରେ ଦୁର୍ଗମ ଅଞ୍ଚଳ ପାଇଁ ତିଆରି କରାଯାଇଛି ।
ଏମିତି କହିଲେ ପିସିସିଏଫ:
ଏହି ଅବସରରେ ପିସିସିଏଫ ସୁଶାନ୍ତ ନନ୍ଦ କହିଛନ୍ତି,"ଜଙ୍ଗଲରେ ନିଆଁକୁ ପ୍ରତିହତ କରିବା ପାଇଁ ଏହି ଗାଡ଼ି ଗୁଡିକର ସହାୟତା ନିଆଯାଇଛି । ଗାଡ଼ି ଗୁଡ଼ିକରେ ଅତ୍ୟାଧୁନିକ ବ୍ୟବସ୍ଥା ରହିଛି । ଏହା ଜଙ୍ଗଲର କୋଣାନୁକୋଣକୁ ଯାଇପରିବ ।"
ଓଡିଶାର ଭୌଗୋଳିକ ସ୍ଥିତି:
ରାଜ୍ୟରେ ଥିବା ମୋଟ ଭୌଗୋଳିକ କ୍ଷେତ୍ରର ୮ ହଜାର ୮୬୯ ବର୍ଗ କି.ମି. ସଂରକ୍ଷିତ ଜଙ୍ଗଲ ରହିଛି । ଯାହାକି ୫.୬୯ ପ୍ରତିଶତ ଅଟେ । ଏଥି ମଧ୍ୟରେ ୧୯ ଗୋଟି ଅଭୟାରଣ୍ୟ, ୧ ଗୋଟି ଜାତୀୟ ଉଦ୍ୟାନ, ୨ ଗୋଟି ବ୍ୟାଘ୍ର ସଂରକ୍ଷଣ ଅଞ୍ଚଳ ଏବଂ ୨ ଗୋଟି ସଂରକ୍ଷିତ ଅଞ୍ଚଳ ରହିଛି । ଆମ ରାଜ୍ୟରେ ଏହା ବ୍ୟତୀତ ୨ ଗୋଟି ପ୍ରସ୍ତାବିତ ବ୍ୟାଘ୍ର ସଂରକ୍ଷଣ ଅଞ୍ଚଳ, ୧ ଗୋଟି ପ୍ରସ୍ତାବିତ ଜାତୀୟ ଉଦ୍ୟାନ ଏବଂ ୩ଟି ହାତୀ ସଂରକ୍ଷଣ ଅଞ୍ଚଳ ରହିଛ । ଏହି ସଂରକ୍ଷିତ ଅଞ୍ଚଳ ତଥା ଜଙ୍ଗଲ କ୍ଷେତ୍ର ବାହାରେ ବହୁ ଗୁରୁତ୍ବପୂର୍ଣ୍ଣ ବିରଳ ବନ୍ୟଜନ୍ତୁ ପ୍ରଜାତିଙ୍କ ଆଶ୍ରୟ ସ୍ଥଳର ସୁରକ୍ଷା, ସଂରକ୍ଷଣ ଏବଂ ବିସ୍ତାର ସର୍ବଦା ବନ୍ୟଜନ୍ତୁ ସଂସ୍ଥା ଏବଂ ଜଙ୍ଗଲ ବିଭାଗର ପ୍ରାଥମିକ କାର୍ଯ୍ୟକଳାପ । ଏହି ଅଞ୍ଚଳ ଗୁଡ଼ିକରେ ଶିକାର, ଜଙ୍ଗଲ ଅଗ୍ନି ବିପଦ ଇତ୍ୟାଦିକୁ ପ୍ରତିହତ କରିବା ପାଇଁ ସବୁବେଳେ ଏକ ପ୍ରକାର ଚ୍ୟାଲେଞ୍ଜ ରହିଥାଏ ।
ଏହି ଗାଡ଼ିରେ କ'ଣ ରହିଛି ଅତ୍ୟାଧୁନିକ ସୁବିଧା:
ଏହି ଗାଡ଼ିରେ ଅଧିକ ତୀବ୍ର ପଇଁତରା, ପର୍ଯ୍ୟଲୋଚନା ଏବଂ ନୀରିକ୍ଷଣ ସୁନିଶ୍ଚିତ କରିବା ପାଇଁ ଏଟିଭି ଗୁଡିକ ନିର୍ଦ୍ଦିଷ୍ଟ ଭାବରେ ଦୁର୍ଗମ ଅଞ୍ଚଳ ଗୁଡ଼ିକୁ ଦୃଷ୍ଟିରେ ରଖ୍ କଷ୍ଟମାଇଜଡ୍ କରାଯାଇଛି । ସ୍ପ୍ରିଙ୍କଲର ସିଷ୍ଟମ ସହିତ ଅଗ୍ନି ନିର୍ବାପକ ଯାନ ଗୁଡ଼ିକ ବିଶେଷ ଭାବରେ ସଡକ ପାର୍ଶ୍ବରେ ଘଟୁଥିବା ଅଗ୍ନିକାଣ୍ଡ ଏବଂ ପ୍ରତିକ୍ରିୟା ସମୟକୁ ହ୍ରାସ କରି ଜଙ୍ଗଲରେ ଅଗ୍ନିକାଣ୍ଡ ହେତୁ କ୍ଷୟକ୍ଷତିକୁ କମ୍ କରିବା ପାଇଁ ବିଶେଷ ଭାବରେ ଡିଜାଇନ୍ କରାଯାଇଛି । ଏଥିସହ ଅଗ୍ନି ନିରାପତ୍ତା ୟୁନିଟ୍ ଗୁଡ଼ିକ ଅଗ୍ନି ନିର୍ବାପକ ପାଇଁ ତ୍ବରିତ ପଦକ୍ଷେପରେ ଉନ୍ନତି ପାଇଁ ସହାୟକ ହେବ ।
ଇଟିଭି ଭାରତ, ଭୁବନେଶ୍ବର
