ନୂଆପଡା: ସାଧାରଣ ନିର୍ବାଚନ ପୂର୍ବରୁ ନୂଆପଡା ବିଜେଡିରେ ଗୋଷ୍ଠୀ କନ୍ଦଳ । ନୂଆପଡା ବିଧାୟକ ରାଜେନ୍ଦ୍ର କୁମାର ଢୋଲକିଆଙ୍କ ମନ୍ତ୍ରୀ ପଦରୁ ଇସ୍ତଫା ଦାବିରେ ଜିଲ୍ଲା ବିଜେଡି ପକ୍ଷରୁ ଆଜି ନୂଆପଡା ସଦର ମହୁକମାରେ ୧୨ ଘଣ୍ଟିଆ ବନ୍ଦ ପାଳନ କରାଯାଉଛି । ଏହି ବନ୍ଦ ପ୍ରଭାବରେ ରାୟପୁର ଭାୟା ନୂଆପଡା ଗୋପାଳପୁର 353 ଜାତୀୟ ରାଜପଥରେ ଗମନାଗମନ ଠପ୍ ହୋଇପଡିଛି । ଗାଡ଼ିମୋଟର ଚଳାଚଳ ବନ୍ଦ ରହିଥିବା ବେଳେ ସମସ୍ତ ସରକାରୀ ବେସରକାରୀ କାର୍ଯ୍ୟାଳୟ, ସ୍କୁଲ କଲେଜ ସମ୍ପୂର୍ଣ୍ଣ ବନ୍ଦ ରହିଛି । ଫଳରେ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖାଯାଇଛି ।
ସୂଚନା ମୁତାବକ, ନୂଆପଡା ବିଧାୟକ ତଥା ଯୋଜନା ଓ ସଂଯୋଜନା ମନ୍ତ୍ରୀ ରାଜେନ୍ଦ୍ର କୁମାର ଢୋଲକିଆଙ୍କ ବିରୋଧରେ ପିସି କାରବାର ଅଭିଯୋଗ ଆଣି ଗତ କିଛି ଦିନ ପୂର୍ବରୁ ବିଜୁ ଜନତା ଦଳର ଜିଲ୍ଲା ସଭାପତି ମନୋଜ କୁମାର ମିଶ୍ର ଏକ ସାମ୍ୱାଦିକ ସମ୍ମିଳନୀ ଜରିଆରେ ବିଷୋଦଗାର କରିଥିଲେ । ମନ୍ତ୍ରୀ ବିଜେଡିକୁ ବଞ୍ଚାଇବା ପରିବର୍ତ୍ତେ ବିନାଶ କରିବା କାମ କରିଚାଲିଛନ୍ତି । ବିଜେଡି ଦଳର ବିଭିନ୍ନ ପଦପଦବୀରେ ଥିବା ନେତୃମଣ୍ଡଳୀକୁ ଅଣଦେଖା କରି ଗୁରୁତ୍ବ ଦେଉନାହାଁନ୍ତି । ନିଜ ଚାଟୁକାରମାନଙ୍କୁ ଧରି ପାର୍ଟି ଚଳାଇଛନ୍ତି । ସେହିଭଳି ଗତ ପଞ୍ଚାୟତ ନିର୍ବାଚନ ସମୟରେ ଜିଲ୍ଲା ପରିଷଦ ଦଳୀୟ ଟିକେଟ ବଣ୍ଟନ ପ୍ରକ୍ରିୟାରେ ବ୍ୟତିକ୍ରମ କରିଛନ୍ତି । 7 ନମ୍ବର ଏବଂ 9 ନମ୍ବର ଜିଲ୍ଲା ପରିଷଦ ଜୋନ ଦଳୀୟ ଟିକେଟ ବଣ୍ଟନରେ ଟଙ୍କା ନେଇ ଟିକେଟ ବିକ୍ରି କରିଥିବା ଭଳି ସାଂଘାତିକ ଅଭିଯୋଗ କରିଥିଲେ ଜିଲ୍ଲା ସଭାପତି । ତେଣୁ ମନ୍ତ୍ରୀ ଢୋଲକିଆ ନିଜ ପଦରୁ ଇସ୍ତଫା ଦିଅନ୍ତୁ ଦାବି କରି ନୂଆପଡା ସଦରକୁ ସମ୍ପୂର୍ଣ୍ଣ ବନ୍ଦ କରାଯାଇଛି ।
